“Nou tou nou’n dakor”

1, 2. (a) Ki kestyon enportan konsey direkter pour bann kongregasyon Kretyen dan premye syek ti bezwen reponn? (b) Kwa ki ti ed bann frer pour zot kapab fer en bon desizyon?

TOU dimoun pe espere pour konnen ki desizyon ki pou ganny pran. Bann zapot ek bann ansyen ki dan sa lasanm Zerizalenm, i get kanmarad, zot realize ki i’n ariv ler pour zot fer en desizyon enportan. Sa problenm konsernan sirkonsizyon in fer bann dimoun demann bann kestyon enportan parey, eski bann Kretyen i devret swiv Lalwa Moiz? Eski i devret annan en diferans ant bann Kretyen Zwif ek bann Kretyen lezot nasyon?

² Bann zapot ek bann ansyen ti’n egzamin en kantite levidans. Zot ti’n reflesir lo bann profesi dan Parol Bondye e zot ti’n ekout bann dimoun ki’n rakonte ki mannyer Zeova in beni zot. Zot ti dir tou sa ki zot ti konnen e ki mannyer zot ti santi lo sa problenm. I ti annan en kantite levidans ki montre ki lespri sen Zeova ti pe gid zot pour rezourd sa problenm. Eski sa bann zonm ti pou swiv sa gidans?

 3. Ki byenfe nou kapab gannyen ler nou egzamin sa resi dan Akt sapit 15?

³ Zot pou bezwen annan en kantite lafwa ek kouraz pour zot kapab aksepte gidans lespri sen dan sa sityasyon. Bann sef larelizyon Zwif i kapab ay zot plis ankor e i annan bann zonm dan kongregasyon ki anvi fer tou sa ki zot kapab pour fer pep Bondye rekonmans swiv Lalwa Moiz. Ki konsey direkter pou fer? Annou vwar. Anmezir nou etidye sa resi, nou pou vwar ki mannyer sa bann zonm in kit en legzanp ki Konsey Direkter Temwen Zeova pe swiv ozordi. Nou osi nou bezwen swiv zot legzanp ler nou fer bann desizyon e ler nou ganny bann problenm akoz nou en Kretyen.

4, 5. Ki profesi dan Parol Bondye Zak ti koz lo la?

⁴ Disip Zak, demi frer Zezi, ti koze.a I paret ki Zak ki ti pe diriz sa renyon sa zour. I ti koz lo bann keksoz ki zot tou zot ti’n dakor lo la. Zak ti dir sa bann zonm: “Simeonn in rakont an detay ki mannyer, pour premye fwa, Bondye in aksepte pour swazir dimoun parmi lezot nasyon pour ki zot vin en pep ki port son non. Sa i annakor avek parol bann Profet.”​—Akt 15:14, 15.

⁵ Petet sa ki Simeonn, setadir Simon Pyer ti dir ek bann levidans ki Barnabas ek Pol ti donnen, ti fer Zak rapel bann bout dan Lekritir ki ti pou ed zot konpran pli byen sa problenm ki zot ti pe diskit lo la. (Zan 14:26) Apre ki Zak ti’n dir ki sa “i annakor avek parol bann Profet,” i ti dir sa ki dan Amos 9:11, 12. Liv Amos ti form parti sa bout dan Lekritir Ebre ki ganny apele “bann Profet.” (Mat. 22:40; Akt 15:16-18) Ou pou remarke ki sa bout dan liv Amos ki Zak ti koz lo la, i en pe diferan avek sa ki ou kapab lir dan liv Amos ozordi. I paret ki Zak ti pe refer avek Septant, ki en tradiksyon Lekritir Ebre dan langaz Grek.

 6. Ki mannyer Lekritir ti ed sa bann frer?

⁶ Zeova ti predir atraver profet Amos ki i pou ariv en letan kot i pou rekonstri “lakaz David,” setadir desandans bann lerwa ziska ki Rwayonm Kris i dirize. (Ezek. 21:26, 27) Eski Zeova ti pou konsider zis bann Zwif konman son pep? Non. Sa profesi i dir ki “dimoun lezot nasyon” ti pou rasanble ansanm konman “bann ki port . . . non [Bondye.]” Pa oubliye ki Pyer ti’n fek dir ki Bondye “pa ti fer okenn diferans ant nou [bann Kretyen Zwif] ek zot [bann disip lezot nasyon], me i ti pirifye zot leker akoz zot lafwa.” (Akt 15:9) Andotmo, i lavolonte Bondye ki bann Zwif ek bann dimoun lezot nasyon i vin bann zeritye Rwayonm. (Rom. 8:17; Efe. 2:17-19) Napa okenn profesi ki dir ki bann disip lezot nasyon i bezwen ganny sirkonsi oubyen konverti dan larelizyon Zwif.

7, 8. (a) Ki sizesyon Zak ti donnen? (b) Ki mannyer nou devret konpran sa ki Zak ti dir?

⁷ Ler Zak ti tann bann levidans dan Lekritir ek bann bon temwannyaz ki bann frer ti’n donnen, i ti dir sa: “Alor, mon desizyon se pour pa fatig bann dimoun lezot nasyon ki pe tourn ver Bondye, me pour ekri zot ki zot devret rezet keksoz ki’n ganny sali avek zidol, ki zot pa devret pratik imoralite seksyel, pa manz zannimo ki’n mor toufe e pa servi disan. Parski depi lontan, dimoun in ansenny Lalwa Moiz dan en lavil apre lot e sak saba zot ti lir sa bann liv Moiz aotvwa dan sinagog.”​—Akt 15:19-21.

⁸ Ler Zak ti dir “alor, mon desizyon se,” vi ki i ti pe diriz sa renyon, eski i ti pe servi son lotorite lo lezot frer pour deside kwa ki devret ganny fer? Pa ditou! Sa lekspresyon Grek ki’n ganny tradwir “mon desizyon se” i kapab osi vedir “mon zize” oubyen “mon panse.” Zak pa ti pe fer en desizyon pour tou dimoun lo sa konsey direkter, me i ti pe donn en sizesyon lo sa ki zot kapab fer apre ki zot ti’n ekout bann levidans e sa ki Lekritir i dir lo sa size.

 9. Ki byenfe sizesyon Zak ti anmennen?

⁹ Eski sizesyon Zak ti bon? Wi i ti bon parski bann zapot ek bann ansyen ti fer sa ki i ti dir. Ki byenfe sa ti anmennen? Lo en kote, sizesyon Zak pa ti pou “fatig” bann Kretyen lezot nasyon oubyen “fer li difisil pour” zot, parski zot pa ti pou oblize swiv Lalwa Moiz. (Akt 15:19; New International Version) De lot kote, sa desizyon ti pou respekte konsyans bann Kretyen Zwif, ki pour plizyer lannen, ti’n tann ‘bann liv Moiz ganny lir aotvwa sak saba dan sinagog.’b (Akt 15:21) Sirman sa sizesyon ti pou fer bann Kretyen Zwif ek bann Kretyen lezot nasyon vin pli pros avek kanmarad. Me sa ki pli enportan, i ki sa ti pou fer plezir Zeova vi ki sa desizyon ti dapre plan Zeova. Sa ti en bon fason pour rezourd sa problenm ki ti’n kapab anpes annan linite dan kongregasyon e afekte byennet pep Bondye! Sa i en bon legzanp pour kongregasyon Kretyen ozordi!

10. Ki mannyer Konsey Direkter ozordi i swiv legzanp konsey direkter dan premye syek?

¹⁰ Parey nou ti vwar dan sa sapit avan, ozordi Konsey Direkter Temwen Zeova i fer parey konsey direkter dan premye syek. Zot depan lo Zeova, Souvren Liniver ek Zezi Kri, Sef kongregasyon pour ganny gidans dan tou keksoz.c (1 Kor. 11:3) Ki mannyer zot fer sa? Albert D. Schroeder, ki ti lo Konsey Direkter depi 1974 ziska Mars 2006 ti dir: “Bann frer lo Konsey Direkter i zwenn dan Merkredi e zot konmans sa renyon avek en lapriyer pour demann gidans lespri sen Zeova. Zot fer en kantite zefor pour fer sir ki tou sa ki ganny diskite ek tou desizyon i an armoni avek Parol Bondye, Labib.” Pareyman, Milton G. Henschel ki ti lo Konsey Direkter pour en kantite lannen e ki ti mor Mars 2003, ti demann en kestyon enportan avek bann frer ek ser ki ti dan sa san-en-tyenm Lekol Gilead. I ti demann zot, “Eski i annan en lot lorganizasyon lo later ki son bann dirizan i egzamin Parol Bondye, Labib, avan zot fer bann desizyon enportan?” Larepons i non.

11. Ki mannyer konsey direkter ti fer bann kongregasyon konnen ki desizyon zot ti’n pran?

¹¹ Konsey direkter Zerizalenm ti dakor lo desizyon konsernan sa problenm lo sirkonsizyon. Zot ti pou bezwen dir bann frer ek ser dan bann kongregasyon sa desizyon ki zot ti’n pran, dan en fason ki ti pou ankouraz zot pour zot reste ini. Ki sa pli bon fason zot ti pou kapab fer sa? Sa resi i dir: “Bann zapot, ansyen ek kongregasyon antye ti swazir de zonm parmi zot pour anvoy Antyos, ansanm avek Pol ek Barnabas. Zot ti anvoy Zida ki osi apel Barsabas ensi ki Silas ki ti bann frer responsab dan kongregasyon.” Zot ti osi ekri en let e donn sa bann frer pour zot lir dan tou bann kongregasyon Antyos, Siri ek Silisi.​—Akt 15:22-26.

12, 13. (a) Akoz i ti bon pour anvoy Zida ek Silas? (b) Ki byenfe sa let ki konsey direkter ti anvoye ti anmennen?

¹² Konman “bann frer responsab dan kongregasyon,” Zida ek Silas ti byen kalifye pour reprezant konsey direkter. Sa kat frer ki ti’n ganny anvoye pour al kot bann kongregasyon, ti pou bezwen fer sa bann frer ek ser konpran ki sa mesaz ki zot ti’n vin anmennen pa ti zis en solisyon pour sa problenm konsernan sirkonsizyon me i ti osi en nouvo lenstriksyon ki konsey direkter ti’n donnen. Vi ki sa bann zonm ki ti’n ganny swazir ti pe al kot sa bann kongregasyon, bann Kretyen Zwif Zerizalenm ek bann Kretyen lezot nasyon dan lezot landrwa ti pou kapab vin pli pros avek kanmarad. Sa ti en bon laranzman! San dout, sa ti fer ki i annan lape ek linite parmi pep Bondye.

¹³ Dan sa let, i ti annan bann lenstriksyon kler pour bann Kretyen lezot nasyon konsernan sa problenm lo sirkonsizyon e osi sa ki zot devret fer pour ganny laprouvasyon Zeova ek son benediksyon. Sa bout ki ti pli enportan dan sa let ti dir: “Lespri sen in ed nou konpran ki nou pa devret enpoz okenn fardo lo zot eksepte sa bann keksoz ki neseser: ki zot devret kontinyen rezet bann keksoz ki’n ganny sakrifye avek zidol, pa servi disan, pa manz zannimo ki’n mor toufe e pa pratik imoralite seksyel. I ava byen pour zot si zot pa fer sa bann keksoz. Port byen!”​—Akt 15:28, 29.

14. Akoz pep Zeova i kapab travay ansanm dan linite dan sa lemonn ki divize?

¹⁴ Ozordi, Temwen Zeova i annan menm krwayans e zot partisip dan menm travay. Dan lemonn antye, i annan plis ki 8,000,000 Temwen Zeova dan plis ki 100,000 kongregasyon. Ki mannyer zot kapab ini menm si i annan en kantite problenm ek divizyon partou dan lemonn ozordi? En rezon i akoz Zezi Kri ki Sef kongregasyon i donn bann lenstriksyon kler atraver “lesklav fidel e pridan,” setadir Konsey Direkter. (Mat. 24:45-47) En lot rezon i akoz bann frer ek ser dan lemonn antye i pare pour swiv bann lenstriksyon ki Konsey Direkter i donnen.

15, 16. Ki ti arive ler sa problenm konsernan sirkonsizyon ti ganny rezourd e akoz zot ti ganny sa rezilta?

¹⁵ Sa resi dan liv Akt i dir ki ler sa bann frer ki sorti Zerizalenm ti ariv Antyos, “zot ti rasanble tou bann disip e donn zot sa let.” Ki mannyer sa bann frer Antyos ti reazir ler zot ti ganny sa let sorti kot konsey direkter? “Ler zot ti lir sa let, sa ti ankouraz zot e zot ti byen kontan.” (Akt 15:30, 31) An plis ki sa, Zida ek Silas “ti ankouraz e fortifye bann frer atraver plizyer diskour.” Dan en sans, sa de zonm ti “bann profet,” parey Barnabas, Pol ek lezot ki ti ganny apele profet. Bann dimoun ki ti anons oubyen fer konnen lavolonte Bondye ti ganny apele bann profet.​—Akt 13:1; 15:32; Egz. 7:1, 2.

¹⁶ I ti kler ki Zeova ti pe beni tou sa ki ti pe ganny fer pour rezourd sa problenm konsernan sirkonsizyon. Kwa ki ti ede pour zot ganny en bon rezilta? San dout, sa ti akoz konsey direkter ti’n donn bann lenstriksyon kler dan sa letan apropriye e zot desizyon ti baze lo Parol Bondye ek gidans lespri sen. An plis ki sa, sa bann desizyon ti ganny donnen avek bokou lanmour dan bann kongregasyon.

17. Ki legzanp bann sirveyan rezyonal i swiv ozordi?

¹⁷ Konsey Direkter ozordi i fer menm parey. I donn bann frer ek ser partou dan lemonn bann lenstriksyon dan sa letan apropriye. Bann desizyon ki zot pran i ganny anonse dan en fason kler avek bann kongregasyon. En fason ki sa i ganny fer i ler sirveyan rezyonal i vizit bann kongregasyon. Sa bann frer i met lentere lezot avan sa ki pour zot e zot vizit plizyer kongregasyon e donn bann lenstriksyon kler e ankourazan. Parey Pol ek Barnabas, zot pas en kantite letan dan predikasyon, “pe ansennyen e anons sa bon nouvel konsernan parol Zeova ansanm avek bokou lezot frer.” (Akt 15:35) Parey Zida ek Silas, zot “ankouraz e fortifye bann frer atraver plizyer diskour.”

18. Ki pep Bondye i bezwen fer pour Zeova kontinyen beni zot?

¹⁸ Ki nou kapab dir lo bann kongregasyon? Kwa ki pou ed bann kongregasyon partou dan lemonn pour kontinyen annan lape ek linite dan en lemonn ki divize? Rapel ki pli tar disip Zak ti ekri sa: “Lasazes ki sorti dan lesyel i fer en dimoun premyerman pir, apre i fer li kontan fer lape, rezonnab, pare pour obei . . . Deplis, fri ladrwatir i ganny senmen dan lape pour sa bann ki pe fer lape.” (Zak 3:17, 18) Nou pa konnen si Zak ti pe mazin sa renyon ki zot ti fer Zerizalenm ler i ti ekri sa. Me ler nou egzamin sa bann keksoz ki’n arive dan Akt sapit 15, nou asire ki Zeova pou beni nou si nou ini e korpere ansanm.

19, 20. (a) Kwa ki ti montre ki i ti annan lape ek linite dan kongregasyon Antyos? (b) Ki Pol ek Barnabas ti kapab fer aprezan?

¹⁹ Aprezan, i ti annan lape ek linite dan kongregasyon Antyos. Dan plas dispit avek bann frer ki sorti Zerizalenm, bann frer Antyos ti kontan ki Zida ek Silas ti’n vin kot zot. Sa resi i dir “Apre ki zot ti’n pas en pe letan laba, bann frer [Antyos] ti dir zot orevwar e zot ti retourn Zerizalenm kot bann frer ki ti’n anvoy zot.”d (Akt 15:33) Nou kapab asire ki bann frer Zerizalenm ti kontan ler zot ti tann sa ki sa de frer ti rakont zot konsernan zot vwayaz. Zot ti kapab akonpli zot travay dan lazwa akoz Zeova ti demontre son labonte ekstraordiner.

²⁰ Pol ek Barnabas ti’n reste Antyos e aprezan zot ti kapab fer tou sa ki zot ti kapab pour diriz sa travay predikasyon. Ozordi, bann sirveyan rezyonal i fer parey zot osi ler zot vizit sa bann kongregasyon ki zot sipoze pran swen avek. (Akt 13:2, 3) Sa i en benediksyon pour pep Zeova! Me ki mannyer Zeova ti kontinyen servi e beni sa de predikater ki ti devoue? Nou pou vwar sa dan sa lot sapit.