Zeova i nou Led

“Mon led i sorti kot Zeova, sa Enn ki’n fer lesyel ek later.”—PSONM 121:2.

 1, 2. (a) Akoz nou kapab dir ki parfwa nou tou nou bezwen led? (b) Ki kalite led Zeova i ete?

LEKEL parmi nou ki pa zanmen bezwen led? Pour dir laverite, parfwa nou tou nou bezwen led—ki swa led pour fer fas avek en gro problenm, douler lanmor, oubyen pour siport en leprev ki difisil. Ler dimoun i bezwen led, souvan zot al ver en zanmi ki toultan la pour zot. Partaz ou problenm avek en dimoun koumsa, i kapab fer li pli fasil pour ou siporte. Me imen i annan serten limit, alor zot pa kapab fer tou pour ed ou. Deplis, pa toultan ki lezot i dan en bon pozisyon pour ed ou kan ou bezwen led.

² Me i annan enn ki kapab ed ou, parski i annan tou pouvwar ek resours. Anplis ki sa, i asir nou ki i pa pou zanmen abandonn nou. Nou kapab konnen lekel Li par sa parol ki en psalmis ti dir avek konfyans total: “Mon led i sorti kot Zeova.” (Psonm 121:2) Akoz sa psalmis ti asire ki Zeova ti pou ed li? Annou egzamin Psonm 121 pour reponn sa kestyon. Anmezir ki nou pe fer sa, nou pou vwar akoz ki nou osi avek konfyans nou kapab tourn ver Zeova pour ganny led.

En Led ki nou kapab toultan kont lo la

 3. Ver ki montanny sa psalmis ti’n kapab gete, e akoz?

³ Pour konmanse, sa psalmis i rapel nou ki Zeova i Kreater, alor nou annan en keksoz pour baz nou konfyans lo la: “Mon pou lev mon lizye ver bann montanny. Kote mon led pou sorti? Mon led i sorti kot Zeova, sa Enn ki’n fer lesyel ek later.” (Psonm 121:1, 2) Sa psalmis pa ti get ver nenport ki montanny. Kan sa bann parol ti ganny ekrir, tanp Zeova ti Zerizalenm. Sa lavil anler lo montanny Zida, ti pe reprezant landrwa kot Zeova i ete. (Psonm 135:21) I kapab ki sa psalmis ti’n get ver bann montanny Zerizalenm, sa landrwa kot tanp Zeova ti’n ganny konstri, avek konfyans ki Zeova ti pou ed li. Akoz sa psalmis ti asire ki Zeova ti pou kapab ed li? Parski I sa enn “ki’n fer lesyel ek later.” An realite, sa psalmis ti pe dir, ‘Sirman napa nanryen ki kapab anpes sa Bondye tou pwisan ed mwan!’—Izai 40:26.

 4. Ki mannyer sa psalmis ti montre ki Zeova i toultan pe veye si son pep i bezwen led, e akoz sa panse i ankourazan?

⁴ Apre, sa psalmis ti eksplike ki Zeova i toultan la pe veye pour ed son bann serviter: “I pa pou permet ki ou lipye i fer en fo pa. Sa enn ki pe vey ou pa pou ganny sonmey. Gete! Sa enn ki pe vey Izrael pa pou sonmey, i pa pou ni menm al dormi.” (Psonm 121:3, 4) Bondye pa pou permet bann ki annan konfyans dan li “fer en fo pa” oubyen tonbe dan en fason ki zot pa pou kapab lev ankor. (Proverb 24:16) Akoz i pa pou permet sa? Parski Zeova i parey en Berze ki toultan lo son gard pe vey son mouton. Pa sa i en panse ankourazan? Ni menm pour en minit i pa pou ferm son laport anver son pep ki bezwen led. I vey lo zot lizour konman aswar.

 5. Akoz sa psalmis ti dir ki Zeova i lo “kote drwat”?

⁵ Pour montre ki i ti annan konfyans ki Zeova i fidelman protez son pep, sa psalmis ti ekrir: “Zeova pe vey lo ou. Zeova i ou lonbraz lo ou kote drwat. Lizour soley pa pou bril ou, ni menm lalin aswar.” (Psonm 121:5, 6) Pour en dimoun ki pe mars apye dan en pei parey Izrael, en landrwa ki annan lonbraz pou kapab protez li kont sa gro ker soley. Zeova i parey en lonbraz pour son pep, i protez zot kont bann problenm ki kapab afekte zot zis parey ler lasaler in apiy kote. Remarke ki sa psalmis i dir ki Zeova i lo “kote drwat.” Dan bann lager dan letan lontan, lanmen drwat en solda pa ti ganny proteze par sa boukliye, parski boukliye ti dan lanmen gos. En zanmi fidel ti kapab protez sa solda par debout e lager dan son kote drwat. Parey sa zanmi, Zeova i fidelman debout obor son bann adorater, i toultan pare pour ed zot.

 6, 7. (a) Ki mannyer sa psalmis i asir nou ki Zeova pa pou zanmen aret ed son pep? (b) Akoz nou kapab annan menm konfyans parey sa psalmis?

⁶ Eski en zour Zeova pou aret ed son pep? Zanmen sa pou arive. Pour konklir, sa psalmis ti dir: “Zeova li menm pou vey ou kont okenn maler. I pou vey lo ou. Zeova li menm pou vey lo ou kan ou sorti e kan ou antre, depi konmela menm e pour en letan endefini.” (Psonm 121:7, 8) Remarke ki sa ekriven i met lanfaz pa zis lo letan prezan me osi lo lavenir. Pli boner dan verse 5, sa psalmis ti dir: “Zeova pe vey lo ou.” Me dan verse 7 ek 8, sa psalmis ti ekrir: “Zeova li menm pou vey lo ou.” Bann vre Kretyen i asire ki Zeova pou ed zot, pa zis konmela me osi dan lavenir. Nenport ki landrwa zot ete, nenport ki problenm zot fer fas avek, Zeova pou toultan ed zot.—Proverb 12:21.

⁷ Definitivman sa ekriven ki ti ekrir Psonm 121 ti konvenki ki Bondye tou pwisan i vey byen son bann serviter parey en bon berze e parey en gard ki toultan vizilan. Nou annan tou rezon pour annan menm konfyans parey sa psalmis, parski Zeova pa zanmen sanze. (Malaki 3:6) Eski sa i vedir ki nou pou toultan ganny proteze fizikman? Non, osi lontan ki nou tourn ver Zeova pour led, i pou protez nou kont okenn keksoz ki kapab afekte nou spirityelman. Alor, i toutafe normal ki nou demande, ‘Konman Zeova i ed nou?’ Annou egzamin kat fason ki Zeova i ed nou. Dan sa lartik nou pou diskite konman Zeova ti ed son bann serviter dan letan Labib. Dan nou lot lartik nou pou egzamin konman Zeova i ed son pep ozordi.

Led sorti kot bann Lanz

 8. Akoz i pa drol ki bann lanz i annan en gran lentere dan byennet bann serviter Bondye lo later?

⁸ Zeova i diriz plizyer milyon, milyon lanz. (Danyel 7:9, 10) Sa bann lanz i fidelman akonpli son lavolonte. (Psonm 103:20) Zot konn tre byen ki Zeova i kontan son bann serviter lo later en kantite e ki i anvi ed zot. Alor, i pa drol ki bann lanz i annan en gran lentere dan byennet bann serviter Bondye lo later. (Lik 15:10) Sirman zot bezwen kontan ki Zeova i servi zot pour ed bann imen. Dan ki fason Zeova ti servi bann lanz pour ed son bann serviter lo later dan letan lontan?

 9. Donn en legzanp kot bann lanz ti protez bann serviter fidel lo later.

⁹ Bondye ti donn bann lanz pouvwar pour protez e delivre bann serviter fidel lo later. Kan Sodonm ek Gomor ti pe al ganny detrir, de lanz ti ed Lot ek son de fiy sorti dan sa landrwa. (Zenez 19:1, 15-17) Zis en sel lanz ti touy 185,000 solda Asiryen ki ti pe menas Zerizalenm. (2 Lerwa 19:35) Kan Danyel ti ganny zete dan trou lyon, Zeova ti “anvoy son lanz pour ferm lagel sa bann lyon.” (Danyel 6:21, 22) En lanz ti delivre zapot Pyer dan prizon. (Akt 12:6-11) Dan Labib, i annan plizyer legzanp ankor kot bann lanz ti protez bann serviter Bondye. Tou sa i konfirm sa ki Psonm 34:7 i dir: “Lanz Zeova pe kanpe toultour bann ki annan lakrent pour li, e i sov zot.”

10. Ki mannyer Zeova ti servi en lanz pour ankouraz profet Danyel?

¹⁰ Parfwa, Zeova ti servi bann lanz pour ankouraz e fortifye son bann serviter fidel. Nou kapab vwar en legzanp tousan dan Danyel sapit 10. Dan sa letan, petet Danyel ti pres dan son 100 an. Sa profet ti vreman dekouraze, akoz Zerizalenm ti’n ganny detrir e ti annan en retar dan letan ki tanp ti’n devret ganny rekonstrir. I ti osi trouble akoz i ti vwar en vizyon ki ti fer per. (Danyel 10:2, 3, 8) Avek lanmour, Bondye ti anvoy en lanz pour ankouraz li. Enn de fwa, sa lanz ti rapel Danyel ki i ti vreman presye dan lizye Bondye. Ki lefe sa ti fer lo li? Sa profet ki ti avanse dan laz ti dir sa lanz: “Ou’n fortifye mwan.”—Danyel 10:11, 19.

11. Nonm en legzanp kot bann lanz ti ganny servi pour diriz sa travay predikasyon.

¹¹ Zeova ti osi servi bann lanz pour diriz sa travay predikasyon. En lanz ti diriz Filip pour li kapab pres lo Kris avek en Etyopyen, ki apre ti batize. (Akt 8:26, 27, 36, 38) Pa bokou letan apre, Bondye ti deside ki sa bon nouvel ti pou ganny prese avek bann ki pa Zwif. Korney, ki pa ti en Zwif me ki ti annan respe pour Bondye, ti ganny en vizyon kot en lanz ti aparet avek li. Sa lanz ti fer li anvoy bann zonm pour al rod zapot Pyer. Kan zot ti vwar Pyer, zot ti dir: “Nou’n vin isi anvoye par Korney . . . En lanz Bondye in ordonn li pour anvoy sers ou pour li ekoute sa ki ou annan pour dir.” Pyer ti dakor e Korney ti vin premye dimoun ki pa ti en Zwif e ki pa ti sirkonsi pour vin en manm dan kongregasyon Kretyen. (Akt 10:22, 44-48) Zis mazinen ki mannyer ou ti pou santi si en lanz ti ed ou zwenn en dimoun ki annan sa bon kondisyon leker!

Led Lespri Sen

12, 13. (a) Akoz bann zapot ti annan tou rezon pour krwar ki lespri sen ti pou kapab ed zot? (b) Dan ki fason lespri sen ti donn bann premye Kretyen pouvwar?

¹² Ler i ti pres pour mor, Zezi ti asir son bann zapot ki zot pa ti pou tousel. Son Papa ti pou anvoy en led pour zot, sa se ‘lespri sen.’ (Zan 14:26) Bann zapot ti annan tou rezon pour krwar ki lespri sen ti pou kapab ed zot. Apre tou, Lekritir i ranpli avek bann legzanp lo konman Zeova in servi son lespri sen, sa lafors pli pwisan, pour ed son pep.

¹³ Plizyer fwa, Bondye ti servi son lespri sen pour donn imen sa pouvwar pour akonpli son lavolonte. Lespri sen ti donn bann Ziz sa pouvwar pour delivre bann Izraelit. (Ziz 3:9, 10; 6:34) Sa menm lespri sen ti donn bann premye Kretyen sa pouvwar pour kontinyen pres avek devouman malgre bann persekisyon. (Akt 1:8; 4:31) Lefe ki zot ti trouv sikse dan zot travay predikasyon, sa ti en laprev solid ki zot ti annan lespri sen. Sirman sa i sel rezon akoz ki bann dimoun “senp” e “san gran ledikasyon” ti kapab pres sa mesaz Rwayonm dan lemonn antye!—Akt 4:13; Kolosyen 1:23.

14. Ki mannyer Zeova in servi son lespri sen pour revel plis konnesans avek son pep?

¹⁴ Zeova ti osi servi son lespri sen pour revel plis konnesans avek son pep. Lespri sen ti ed Zozef pour eksplik rev profetik Faraon. (Zenez 41:16, 38, 39) Zeova ti servi son lespri sen pour revel son plan avek bann ki annan limilite, me i ti kasyet li avek bann ki orgeye. (Matye 11:25) Remarke ki zapot Pol ti dir konsernan bann keksoz ki Zeova i fourni “pour sa bann ki kontan li.” I ti dir: “Bondye in revel son sekre avek nou par Lespri.” (1 Korentyen 2:7-10) Si en dimoun pa ganny led lespri sen i pa pou kapab vreman konpran plan Bondye.

Led sorti dan Parol Bondye

15, 16. Ki Bondye ti demann Zozye pour fer pour li kapab azir avek lasazes?

¹⁵ Parol Bondye ki’n ganny enspire i “itil pour ansennyen,” i fer bann serviter Bondye “byen prepare e byen ekipe pour fer tou aksyon ki bon.” (2 Timote 3:16, 17) I annan en kantite legzanp dan Labib ki montre konman bann liv Labib ti ed pep Bondye dan letan lontan.

¹⁶ Labib ti ed bann serviter Bondye trouv bon gidans. Kan Zozye ti ganny sa responsabilite pour diriz Izrael, Bondye ti dir li: “Sa liv lalwa [ki’n ganny ekrir par Moiz] pa devret elwanny avek ou labous, ou devret lir li avwabas lizour konman aswar, pour fer sir ki ou fer tou dapre sa ki’n ganny ekrir, ler ou fer sa ou pou trouv sikse e ou pou azir avek lasazes.” Remarke ki Bondye pa ti promet Zozye ki i pou fer mirak pour donn li lasazes. Plito, Zozye ti pou azir avek lasazes, si i ti lir e reflesir lo “sa liv lalwa.”—Zozye 1:8; Psonm 1:1-3.

17. Ki mannyer Lekritir ti ed Danyel ek Lerwa Yosiya?

¹⁷ Bondye ti osi servi son Parol pour revel son lavolonte ek plan. Par egzanp, gras a liv ki Zeremi ti ekrir, Danyel ti kapab konnen ki kantite letan Zerizalenm ti pou ganny abandonnen. (Zeremi 25:11; Danyel 9:2) Annou egzaminen ki ti arive pandan letan ki Lerwa Yosiya ti pe dirize an Zida. Sa letan, sa nasyon ti’n elwannyen avek Zeova e bann lerwa pa ti’n fer en kopi personnel sa liv Lalwa e zot pa ti pe swiv sa liv Lalwa. (Deterononm 17:18-20) Me kan zot ti pe repar tanp, zot ti trouv “sa liv lalwa,” ki petet Moiz ti’n ekrir. I kapab ki sa ti kopi orizinal ki ti’n ganny ekrir depi 800 zan pase. Apre ki Yosiya ti’n ekoute ki ti annan dan sa liv, i ti realize ki kantite lwen sa nasyon ti’n egare avek lavolonte Zeova. Alor, i ti determinen pour fer tou sa ki ti’n ganny ekrir dan sa liv. (2 Lerwa 22:8; 23:1-7) Pa i kler ki Lekritir ti ed pep Bondye dan letan lontan?

Led sorti kot bann Konpanyon Kretyen

18. Akoz nou kapab dir ki ler en serviter Bondye i ed en lot, sa led i sorti kot Zeova?

¹⁸ Souvannfwa, Zeova i fourni led atraver bann konpanyon Kretyen. Wi, kan en vre konpanyon i ed en lot, an realite sa led i sorti kot Zeova. Akoz nou dir sa? I annan de rezon. Premyerman, parski lespri sen Bondye i enplike. Sa lespri i prodwir fri tel parey, lanmour ek labonte dan bann ki les lespri sen enfliyans zot lavi. (Galat 5:22, 23) Alor, kan en serviter Bondye i ganny pouse pour ed en lot, sa i laprev ki lespri sen Zeova i aktif. Dezyenmman, akoz nou’n ganny kree dan resanblans Bondye. (Zenez 1:26) Sa i vedir ki nou kapab reflekte son bann kalite, enkli son labonte ek konpasyon. Alor, kan en serviter Zeova i ed en lot, an realite sa led i sorti kot Zeova.

19. Dapre Labib, ki mannyer Zeova ti fourni led atraver bann konpanyon Kretyen?

¹⁹ Ki mannyer Zeova ti fourni led atraver son bann serviter dan letan Labib? Souvannfwa, Zeova ti fer enn son serviter konsey en lot, zis parey ler Zeremi ti donn Barouk bann konsey ki ti sov son lavi. (Zeremi 45:1-5) Parfwa, bann vre serviter Bondye ti ganny pouse pour fourni led materyel pour ed zot bann konpanyon Kretyen. Sa ti evidan kan bann Kretyen an Masedwann ek Akai ti demontre sa dezir pour ed zot bann frer ek ser an Zerizalenm. Zapot Pol ti dir ki sa kalite zenerozite ti pous zot pour remersye Bondye.—2 Korentyen 9:11.

20, 21. Dan ki sitiasyon zapot Pol ti ladan ler son bann frer ek ser an Ronm ti fortifye li?

²⁰ Sa ki pli tousan, se bann resi kot bann serviter Zeova ti fer bokou zefor pour fortifye e ankouraz kanmarad. Annou konsider en legzanp lo zapot Pol. Kan Pol ti pe ganny anmennen an Ronm konman en prizonnyen, i ti pas lo en semen ki ti apel Semen Apiyis. Me sitiasyon pa ti fasil ler zot ti pres pour termin sa vwayaz, parski zot ti bezwen pas dan en rezyon ki ti annan bokou lanmar.a Bann frer ek ser an Ronm ti konnen ki zapot Pol ti pe vini. Ki zot ti pou fer? Eski zot ti pou asize dan zot lakaz pour esper Pol arive pour zot al akey li?

²¹ Lik, enn bann ekriven Labib ki ti akonpanny Pol dan sa vwayaz, i dir nou ki ti arive: “Bann frer dan lavil Ronm ti’n ganny nou nouvel e zot ti vin ziska Laplas piblik Apiyis ek Trwa Oberz.” Eski ou kapab vwar sa senn dan ou lespri? Vi ki zot ti konnen ki Pol ti pe vini, en group frer ek ser ti sorti Ronm pour al zwenn li. En pe dan sa group ti pe esper li kot laplas piblik an Apiyis, ki ti en landrwa kot bann vwayazer ti kapab sanz zot seval e repoze. Sa laplas piblik ti apepre 74 kilomet avek Ronm. Larestan ti pe esper li kot Trwa Oberz, en landrwa repo ki ti apepre 58 kilomet avek Ronm. Ki ti reaksyon Pol? Les Lik dir nou: “Ler Pol ti war zot i ti remersi Bondye e i ti pran kouraz.” (Akt 28:15) Zis mazin sa, omoman ki Pol ti vwar son bann frer ek ser ki ti’n vwayaz tou sa distans, sa ti vreman donn li lafors e rekonfort li! Me lekel ki Pol ti remersi pour sa sipor? I ti remersye Zeova, sa enn ki ti par deryer tousala.

22. Ki nou teks pour lannen 2005 e ki nou pou egzaminen dan lartik swivan?

²² Sirman, bann resi ki’n ganny rikorde dan Labib i prouve ki Zeova i en led. Napa personn ki kapab fourni led parey li. Alor, i apropriye ki konman zot teks pour lannen 2005, Temwen Zeova in swazir Psonm 121:2: “Mon led i sorti kot Zeova.” Me ki mannyer Zeova i ed nou ozordi? Dan nou lot lartik nou pou egzamin sa kestyon.

[Not anba lo paz]

Eski ou rapel?

Dan ki fason Zeova ti fourni led atraver—

• bann lanz?

• son lespri sen?

• son Parol?

• bann konpanyon Kretyen?

[Ekstre lo paz 15]

Teks pour lannen 2005: “Mon led i sorti kot Zeova.”—Psonm 121:2.

[Portre lo paz 12]

Pol ti remersi Bondye pour led ki i ti gannyen avek son bann frer ek ser an Ronm