Napa En Parol Zeova Ki Pa’n Reisi

“Napa okenn parol parmi tou bann bon parol ki Zeova zot Bondye in dir zot ki pa’n reisi. Tousala in vin vre pour zot.”—ZOZYE 23:14.

 1. Lekel li Zozye e ki i ti fer ver lafen son lavi?

ITI en komandan militer dinamik e kouraze, en zonm ki ti annan lafwa e ki ti fidel. I ti mars avek Moiz e i ti ganny swazir par Zeova pour fer pep Izrael sorti an deor sa dezer ki ti fer per, pour anmenn zot dan en landrwa kot i koul dile ek dimyel. Ver lafen son lavi, Zozye sa zonm ki ti ganny bokou respekte ti donn en diskour adye vreman tousan pour bann ansyen dan nasyon Izrael. San okenn dout sa diskour ti fortifye lafwa sa bann ki ti ekout li. Ou lafwa osi i kapab ganny fortifye par sa diskour.

2, 3. Kan Zozye ti adres li avek bann ansyen dan nasyon Izrael, ki ti sitiasyon Izrael, e ki Zozye ti dir?

² Esey vwar sa senn dan ou lespri, parey in ganny dekrir dan Labib: “Apre plizyer zour ki Zeova ti’n donn Izrael repo avek tou zot lennmi partou, kan Zozye ti’n vye e avanse dan laz, Zozye ti kriy tou nasyon Izrael, son bann ansyen, son bann sef, son bann ziz, ek son bann zofisye. I ti dir zot: “Mwan, mon’n vye e avanse dan laz.’”—Zozye 23:1, 2.

³ Zozye ki ti’n viv pandan enn bann moman pli eksitan dan listwar pep Bondye ti pe apros son 110 dizyenm lannen. I ti’n vwar bann keksoz ekstraordiner ki Bondye ti’n fer e i ti’n osi vwar en kantite promes Zeova ganny akonplir. Alors, vi ki li menm i ti’n eksperyans tousala, i ti kapab dir avek en konviksyon total: “Zot konn byen avek tou zot leker e avek tou zot nanm ki napa okenn parol parmi tou bann bon parol ki Zeova zot Bondye in dir zot ki pa’n reisi. Tousala in vin vre pour zot. Napa en parol ki pa’n reisi.”—Zozye 23:14.

 4. Ki promes Zeova ti fer avek bann Izraelit?

⁴ Ki parol Zeova ki ti vin vre dan lepok Zozye? Nou pou egzamin trwa promes ki Zeova ti fer avek bann Izraelit. Premyerman, Bondye ti pou tir zot dan lesklavaz. Dezyenmman, i ti pou protez zot. Trwazyenmman, i ti pou pran swen avek zot. Zeova in fer menm promes avek son pep dan nou letan e nou osi parey Zozye nou pe vwar tou sa bann keksoz pe ganny realize dan nou letan. Avan ki nou diskit lo sa ki Zeova in fer dan nou letan, annou egzamin sa ki i ti fer dan letan Zozye.

Zeova i delivre son pep

5, 6. Ki mannyer Zeova ti delivre bann Izraelit Lezip, e ki sa ti demontre?

⁵ Ler bann Izraelit ti kriy ver Bondye akoz zot ti dan lesklavaz Lezip, Zeova ti pran kont zot sitiasyon. (Egzod 2:23-25) Kot en brousay ki ti pe brile Zeova ti dir avek Moiz: “Mon pe desann pour al sov zot dan lanmen bann Ezipsyen e mon pou tir zot laba e anmenn zot dan en bon pei ki gran. En pei kot i koul dile ek dimyel.” (Egzod 3:8) Pa i ti bezwen eksitan pour vwar Zeova akonplir sa promes! Kan Faraon ti refize pour les bann Izraelit kit Lezip, Moiz ti enform li ki Bondye ti pou fer delo Larivyer Nil vin disan. Parol Zeova ti vin vre. Delo Larivyer Nil ti vin disan. Bann pwason ti mor e personn pa ti kapab bwar sa delo. (Egzod 7:14-21) Faraon ti kontinyen rebel e Zeova ti anvoy nef lezot fleo. I ti dekrir sak sa bann fleo davans. (Egzod, SAPIT 8-12) Apre sa dizyenm fleo kot tou bann premye ne Lezip ti ganny touye, Faraon ti donn lord bann Izraelit pour ale e se sanmenm sa ki zot ti fer!—Egzod 12:29-32.

⁶ Delivrans bann Izraelit ti donn Zeova sa loportinite pour adopte zot konman sa nasyon ki i ti’n swazir e i ti donn zot son Lalwa. Sa ti glorifye Zeova konman sa enn ki akonplir son bann promes e sa enn ki son parol i toultan vin vre. Sa ti osi demontre siperyorite Zeova lo bann bondye lezot nasyon. Ler nou lir konsernan sa delivrans nou lafwa i vin pli for. Pa sa ti bezwen en zoli leksperyans! San okenn dout Zozye ti vwar ki Zeova ti sa enn ki “Tre O lo later antye.”—Psonm 83:18.

Zeova i protez son pep

 7. Ki mannyer Zeova ti protez bann Izraelit kont larme Faraon?

⁷ Ki nou pou dir konsernan sa dezyenm promes setadir ki Zeova ti pou protez son pep? Sa lasirans ki Zeova ti donn bann Izraelit ti evidan dan promes ki i ti fer pou delivre zot Lezip e fer zot antre dan Later Promiz. Pa bliye Faraon ki ti byen ankoler ti swiv bann Izraelit avek son larme pwisan ek plizyer santenn saret. San dout Faraon ti annan bokou larogans ek konfyans dan son lekor, sirtou ler i ti paret ki bann Izraelit ti’n pri ant bann montanny ek lanmer! Sa menm moman Bondye ti entervenir pour protez son pep par met en nyaz ant bann Izraelit ek bann Ezipsyen. I ti vin fernwanr lo kote bann Ezipsyen me laklerte lo kote bann Izraelit. Pandan ki sa nyaz ti anpes bann Ezipsyen pour al annavan, Moiz ti lev son baton e delo Lanmer Rouz ti ouver. Bann Izraelit ti ganny en semen sove tandis ki bann Ezipsyen zot zot ti tonm dan en latrap. Zeova ti detrir konpletman Faraon ek son larme e protez son pep pour li pa ganny defet.—Egzod 14:19-28.

 8. Ki proteksyon bann Izraelit ti eksperyanse (a) dan dezer e (b) kan zot ti antre dan Later Promiz?

⁸ Apre ki bann Izraelit ti’n travers Lanmer Rouz, zot ti ale vini dan en landrwa ki ti ganny dekrir konman “en gran dezer efreyan, enfeste avek serpan anpwazonnen ek skorpyon, en landrwa sek kot ti napa delo.” (Deterononm 8:15, The New English Bible) La osi Zeova ti protez son pep. E ki ti arive ler zot ti antre dan Later Promiz? Bann larme pwisan dan pei Kanaan ti opoz zot. Kantmenm sa Zeova ti dir avek Zozye: “Leve e travers Zourden ansanm avek sa pep dan sa pei ki mon pe donn zot, sa pei ki mon pe donn bann garson Izrael. Tou dilon ou lavi personn pa pou reziste devan ou. Zis parey mon ti avek Moiz, mon pou osi avek ou. Mon pa pou zanmen abandonn ou oubyen kit ou konpletman.” (Zozye 1:2, 5) Sa bann parol Zeova ti vin vre. Apepre sis an plitar Zozye ti defet 31 lerwa e kontrol en bon bout teritwar Later Promiz. (Zozye 12:7-24) I ti pou enposib pour pran kontrol sa bann lavil san proteksyon ek sipor sorti kot Zeova.

Zeova i pran swen avek son pep

9, 10. Ki mannyer Zeova ti protez son pep dan dezer?

⁹ Aprezan annou egzamin sa trwazyenm promes ki Zeova ti fer, ki i ti pou pran swen avek son pep. Pa bokou letan apre ki zot ti’n ganny delivre Lezip, Bondye ti promet bann Izraelit: “La la mon pe fer dipen tonm ater sorti dan lesyel pour zot e lepep i devret sorti e ki sakenn i anmas lakantite ki i bezwen zour apre zour.” Bondye ti fer egzakteman sa ki i ti dir i pou fer, i ti fourni zot avek sa ‘dipen sorti dan lesyel.’ “Kan bann garson Izrael ti vwar sa, zot ti demann avek kanmarad: ‘Ki si sa sa?’” Sa ti lamann, sa dipen ki Zeova ti’n promet zot.—Egzod 16:4, 13-15.

¹⁰ Zeova ti pran swen avek bann Izraelit pandan 40 an dan dezer par donn zot manze ek delo. I ti menm fer sir ki zot manto pa ti ize e ki zot lipye pa ti anfle. (Deterononm 8:3, 4) Zozye ti vwar tousala. Zis parey i ti’n promet zot Zeova ti delivre, protez, e pran swen avek son pep.

Delivrans dan nou letan

11. Ki ti arive Brooklyn, New York an 1914 e kwa ki ti’n ler pour arive?

¹¹ Me ki nou pou dir konsernan nou lepok? Vandredi bomaten le 2 Oktob 1914, Charles Russell ki ti responsab sa group etidyan Labib sa letan ti antre dan lasal a manze dan Betel Brooklyn, New York. Avek lazwa i ti dir “Bonzour tou dimoun.” Apre, avan ki i ti asize i ti anonse ki: “Letan bann nasyon etranze in fini; zour zot bann lerwa in terminen.” Ankor enn fwa ti’n ariv ler pour Zeova sa Souvren liniver azir an faver son pep. E se sanmenm ki i ti fer!

12. Ki delivrans ti arive an 1919 e ki rezilta sa ti anmennen?

¹² Zis senk an plitar, Zeova ti delivre son pep avek “Gran Babilonn,” savedir tou bann fo larelizyon. (Revelasyon 18:2) Laplipar nou pa ti ankor ne pour vwar sa delivrans eksitan. Me nou kapab senpleman vwar son rezilta. Zeova ti reetablir ladorasyon pir e i ti ini bann ki ti vreman anvi ador li. Sa ti ganny predir atraver profet Izai: “I devret arive dan bann dernyen zour ki montanny kot lakaz Zeova i ete pou ganny byen etabli parlao latet bann montanny, e i pou sirman ganny mete parlao bann pti montanny; e tou bann nasyon pou al ver li.”—Izai 2:2.

13. Ki ogmantasyon ou’n vwar parmi pep Zeova?

¹³ Parol Izai ti vin vre. An 1919 bann Kretyen swazir ti konmans en kanpanny predikasyon dan lemonn antye ki ti met ladorasyon sa vre Bondye anler. An 1930 i ti evidan ki “lezot mouton” ti pe ganny rasanble pour sa vre ladorasyon. (Zan 10:16, NW) Premye kou ti annan plizyer mil dimoun apre sa plizyer santenn milye e ozordi plizyer milyon pe soutenir sa vre ladorasyon! Dan en vizyon ki ti ganny donnen avek zapot Zan, zot ganny dekrir konman en “gran lafoul, ki personn pa ti kapab konte, sorti dan tou nasyon, tribi, pep ek lalang.” (Revelasyon 7:9) Ki ou’n vwar diran ou lavi? Konbyen Temwen Zeova ti annan lo later ler ou ti fek konn laverite? Ozordi i annan plis ki 6,700,000 ki pe servi Zeova. Par delivre son pep dan Gran Babilonn, Zeova in permet ki sa in ouver semen pour sa gran ogmantasyon ki nou vwar aprezan dan lemonn antye.

14. Ki sa delivrans ki pe vini?

¹⁴ I ankor annan en lot delivrans ki pe vini, enn ki pou enkli tou imen lo later. Par servi son pouvwar dan en fason ekstraordiner Zeova pou retir tou bann ki opoz li e i pou anmenn son pep dan sa nouvo lemonn kot pou annan lazistis. Pa i pou vreman gou pour vwar lafen mesanste e vwar larive en lot moman pli zwaye dan listwar imen!—Revelasyon 21:1-4.

Proteksyon Zeova dan nou letan

15. Akoz pep Bondye i bezwen ganny proteksyon Zeova dan nou letan?

¹⁵ Parey nou’n vwar, bann Izraelit dan letan Zozye ti bezwen proteksyon Zeova. Eski i diferan pour pep Zeova dan nou letan? Sa i pa ditou leka! Zezi ti averti son bann disip: “Zot pou ganny persekite e met a mor. Tou dimoun pou ay zot akoz mwan.” (Matye 24:9) Diran bann lannen ki’n pase Temwen Zeova dan bokou landrwa in andir bokou lopozisyon e persekisyon kriyel. Kantmenm sa i kler ki Zeova in soutenir son pep. (Romen 8:31) Son parol i asir nou ki nanryen, ‘okenn zarm ki ganny formen kont nou’ pa pou aret nou travay predikasyon ni nou travay lansennyman.—Izai 54:17.

16. Kwa ki ou’n vwar ki en levidans konmkwa Zeova i protez son pep?

¹⁶ Malgre laenn sa lemonn kont pep Zeova, zot pe kontinyen ogmante. Temwen Zeova pe ogmante dan 236 pei e sa i en levidans konvenkan ki vreman Zeova i avek nou pour protez nou kont bann ki anvi detrir nou oubyen fer nou reste trankil. Eski ou rapel non bann lider politik oubyen relizye ki ti o pouvwar dan ou letan e ki’n severman oprim pep Bondye? Ki’n arive avek zot? Oli zot ozordi? Laplipar in mor, zis parey Faraon dan letan Moiz ek Zozye. Be ki’n arive avek bann serviter Bondye dan nou letan ki’n reste fidel ziska lanmor? Zot in ganny proteze dan memwar Zeova. Napa en landrwa kot zot kapab pli an sekirite. I kler ki an rapor avek proteksyon, parol Zeova in vin vre.

Zeova i pran swen avek son pep ozordi

17. Ki lasirans Zeova in donnen konsernan nouritir spirityel?

¹⁷ Zeova ti pran swen avek son pep dan dezer e i pe pran swen avek zot ozordi. Nou ganny nouri spirityelman par “lesklav fidel e pridan.” (Matye 24:45, NW) Nou’n ganny konnesans konsernan laverite lo Bondye, konnesans ki ti’n ganny garde sekre pour plizyer syek. Sa lanz ti dir avek Danyel: “Gard sekre sa bann parol e sel sa liv, ziska letan lafen. Bokou pou rod partou partou, e sa vre konnesans pou annabondans.”—Danyel 12:4.

18. Akoz nou kapab dir ki vre konnesans i annabondans ozordi?

¹⁸ Aprezan nou pe viv dan letan lafen, kot vre konnesans lo Bondye i vreman annabondans. Partou dan lemonn lespri sen in gid bann ki kontan laverite pour ganny konnesans egzakt lo Bondye ek son plan. Ozordi dan lemonn antye i annan en kantite Labib e osi bann piblikasyon ki ed dimoun pour konpran bann laverite presye ki trouve dan Labib. Par egzanp annou egzamin konteni sa liv Ki Labib i vreman dir? a Parmi son bann sapit i annan bann tit tel ki “Laverite lo Bondye,” “Kot bann Dimoun mor i ale?,” “Kisisa Rwayonm Bondye?” e “Akoz Bondye i les nou soufer?” Bann imen in reflesir lo sa kestyon pour plizyer milye lannen. Aprezan nou annan larepons sa bann kestyon. Malgre ki dimoun ti dan linyorans konsernan Labib e ki bann larelizyon ki pretann Kretyen i ansenny bann fo lansennyman, Parol Bondye in ganny laviktwar, par soutenir tou bann ki ti anvi servi Zeova.

19. Ki bann promes ki ou’n vwar ganny akonplir e ki konklizyon ou tire?

¹⁹ Sirman par sa ki nou’n vwar avek nou prop lizye, nou kapab dir “Napa okenn parol parmi tou bann bon parol ki Zeova zot Bondye in dir zot ki pa’n reisi. Tousala in vin vre pour zot. Napa en parol ki pa’n reisi.” (Zozye 23:14) Zeova i delivre, protez, e pran swen avek son bann serviter. Eski ou kapab dir i annan enn parmi sa bann promes ki pa’n reisi ganny akonplir dan son letan fikse? Sa i enposib. Nou vreman annan konfyans dan Parol Bondye, lo ki nou kapab depan.

20. Akoz nou kapab annan konfyans dan lavenir?

²⁰ Ki nou pou dir konsernan lavenir? Zeova in dir nou ki laplipar parmi nou pou kapab annan sa lespwar pour viv lo en later ki pou ganny transformen dan en zoli paradi. Zis en ptigin parmi nou ki annan sa lespwar pour rennyen avek Zezi dan lesyel. Nenport ki lespwar nou annan, nou annan tou rezon pour reste fidel parey Zozye. Sa zour pe vini kot nou lespwar pou vin en realite. Alor nou pou mazin tou bann promes ki Zeova in fer dan lepase e nou pou dir: “Tousala in vin vre.”

[Not anba lo paz]

Eski ou kapab eksplike?

• Ki lakonplisman Zozye ti vwar konsernan sa ki Zeova ti promet li?

• Ki promes sorti kot Bondye ou’n vwar ganny akonplir?

• Konsernan Parol Bondye ki lasirans nou kapab annan?

[Portre lo paz 23]

Zeova in entervenir pour delivre son pep

[Portre lo paz 23]

Ki mannyer Zeova ti delivre son pep kot Lanmer Rouz?

[Portre lo paz 24]

Ki mannyer Zeova in pran swen avek son pep dan dezer?

[Portre lo paz 25]

Zeova i pran swen avek son pep ozordi