Swazir pour servi Zeova pandan ki ou ankor zenn

‘Reste ferm dan sa ki ou’n aprann, e dan sa ki ou’n ganny persyade pour krwar.’—2 TIM. 3:14.

1. Ki mannyer Zeova i vwar sa servis ki bann zenn Temwen i ofer li?

SERVIS sakre ki bann zenn i ofer Zeova i sitan enportan pour Li ki i ti enspir en profesi konsernan zot. En psalmis ti sante: “Ou pep pou ofer zot lekor volonterman zour ou lafors militer. Parey laroze dan granmaten, ou annan ou latroup zenn zan ki zoli akoz zot sen.” (Ps. 110:3) Wi, pour Zeova bann zenn ki anvi servi li volonterman i vreman presye.

2. Ki lenfliyans bann zenn ozordi i gannyen an rapor avek zot swa pour lavenir?

² Zot zenn dan kongregasyon, eski zot in dedye zot lavi avek Zeova? Bokou zenn i kapab vwar li difisil pour deside si zot pour servi sa vre Bondye oubyen non. Bann biznesmenn, ansennyan e parfwa manm fanmir ek zanmi i kapab ankouraz en zenn pour pourswiv bann lobzektif materyel. Lemonn i souvan kritik bann zenn ki pourswiv bann lobzektif spirityel. Me larealite se ki servi sa vre Bondye i sa pli meyer swa ki en zenn i kapab fer dan son lavi. (Ps. 27:4) An rapor avek sa, egzamin sa trwa kestyon: Akoz ou devret servi Bondye? Ki mannyer ou kapab reisi konman en dimoun ki’n dedye son lavi avek Bondye malgre sa ki lezot i kapab dir ouswa fer? Ki loportinite merveye ou kapab gannyen dan servis sakre?

Servi Zeova i sa pli bon keksoz pour fer

3. Ki lefe kreasyon Zeova i devret annan lo nou?

³ Akoz ou devret servi sa Bondye ki vivan e vre? Revelasyon 4:11 i donn sa rezon prensipal: “Nou Senyer, nou Bondye, ou merite resevwar laglwar, loner ek pisans, parski ou’n kree tou keksoz, e se par ou lavolonte ki zot egziste e ki zot in ganny kree.” Zeova i sa Kreater merveye ki’n kree tou keksoz ki egziste. Pa later i vreman zoli! Zeova ki’n kree tou pye dibwa, fler, zannimo, losean, montanny ek kaskad delo. Psonm 104:24 i dir: “Later i ranpli avek tou sa ki [Bondye in] fer.” Pa nou vreman rekonesan ki avek lanmour Zeova in donn nou en lekor ek en lespri ki permet nou rezwir lavi lo later ek tou bann bon keksoz ki lo la! Eski pa sa lapresyasyon ki nou annan ofon nou leker pour son kreasyon merveye i devret motiv nou pour servi li?

4, 5. Ki Zeova ti fer ki ti atir Zozye ver Li?

⁴ Zozye ki ti en dirizan Izrael i dir nou en lot rezon akoz nou devret servi Zeova. Ver lafen son lavi, Zozye ti dir pep Bondye: “Zot konn byen avek tou zot leker e avek tou zot nanm ki napa okenn parol parmi tou bann bon parol ki Zeova zot Bondye in dir zot ki pa’n reisi. Tousala in vin vre pour zot.” Akoz Zozye ti kapab dir sa?—Zoz. 23:14.

⁵ Pandan ki i ti pe grandi Lezip, sirman Zozye in kapab aprann konsernan promes ki Zeova ti fer avek bann Izraelit ki i ti pou donn zot zot prop pei. (Zen. 12:7; 50:24, 25; Egz. 3:8) Deplis, Zozye ti vwar kan Zeova ti konmans akonplir sa promes par anvoy sa Dis Fleo lo Lezip e fors Faraon ki ti byen antete pour les bann garson Izrael ale. Zozye ti osi parmi bann ki ti ganny delivre atraver Lanmer Rouz e apre sa i ti vwar kan lanmer ti detrir Faraon ek son larme. Pandan zot gran vwayaz dan dezer Sinai ki ti en “gran dezer efreyan,” Zozye ti vwar ki mannyer Zeova ti donn bann Izraelit tou sa ki zot ti bezwen. Napa ni menm enn parmi zot ki ti mor avek lafen ouswa avek laswaf. (Det. 8:3-5, 14-16; Zoz. 24:5-7) Kan ti’n ariv ler pour bann Izraelit konkerir bann Kananeen ki ti en nasyon vreman pwisan e pour arive pran Later Promiz, Zozye ti vwar ki mannyer sa Bondye ki li e lezot Izraelit ti adore ti siport zot dan sa travay.—Zoz. 10:14, 42.

6. Kwa ki pou ed ou devlop sa dezir pour servi Bondye?

⁶ Zozye ti konnen ki Zeova ti’n gard Son promes. Alors, Zozye ti dir: “Mwan ek mon fanmir, nou pou servi Zeova.” (Zoz. 24:15) Be ou? Kan ou mazin bann promes ki sa vre Bondye in akonplir ek bann ki i pa ankor akonplir, eski ou vreman anvi servi li parey Zozye?

7. Akoz batenm dan delo i en pa vreman enportan?

⁷ Kan ou medit lo Kreasyon Zeova e reflesir lo son bann promes merveye ki in akonplir e ki nou kapab depan lo la, sa i devret motiv ou pour pa zis dedye ou lavi avek Zeova me osi senboliz ou dedikasyon par batenm kot ou ganny plonze dan delo. Batenm i en pa vreman enportan pour bann ki anvi servi Bondye. Zezi in kit son legzanp pour nou swiv. I ti prezant son lekor devan Zan Batis pour li ganny batize zis avan konmans son travay konman Mesi. Akoz Zezi ti fer sa pa? I ti dir pli tar: “Mon’n sorti dan lesyel pour vin fer, non pa mon prop lavolonte, me lavolonte sa enn ki’n anvoy mwan.” (Zan 6:38) Pour montre ki i ti pe ofer son lavi pour fer lavolonte son Papa, Zezi ti batize.—Mat. 3:13-17.

8. Akoz Timote ti swazir pour li ador Bondye, e ki ou merit fer?

⁸ Egzamin osi leka Timote, en zenn Kretyen ki avek letan Zeova ti donn li bokou travay ek plizyer privilez. Akoz Timote ti deside pour ador sa vre Bondye? Labib i dir nou ki ‘i ti aprann en kantite keksoz e i ti ganny persyade pour krwar.’ (2 Tim. 3:14) Ou dan menm sitiasyon avek Timote, si ou’n etidye Parol Bondye e ou’n ganny persyade pour krwar ki son lansennyman i vre. Alors la ou bezwen fer en desizyon. Akoz ou pa koz avek ou paran lo sa ki ou anvizaze fer? Ansanm avek bann ansyen dan kongregasyon, zot kapab ed ou konpran bann keksoz ki neseser pour ou kapab batize dapre bann prensip Labib.—Lir Akt 8:12.

9. Ki lefe ou batenm i kapab annan lo lezot?

⁹ Si ou batize, sa pou en tre bon fason pour ou konmans servi sa vre Bondye. Kan ou fer sa pa, ou vin en partisipan dan sa lakours maraton ki son rekonpans i lavi eternel ek sa lazwa ki ou eksperyanse ozordi menm kan ou fer lavolonte Bondye. (Ebr. 12:2, 3) Manm ou fanmir ek ou zanmi dan kongregasyon ki deza dan sa lakours pou vreman zwaye kan ou fer sa pa. Pli enportan ankor se ki ou pou rezwir leker Zeova. (Lir Proverb 23:15.) I vre, i annan ki pa pou konpran akoz ou’n swazir pour servi Zeova e zot pou menm kapab kestyonn ou desizyon ouswa opoz ou. Me ou kapab reisi sirmont sa bann leprev.

Kan lezot i kestyonn ouswa opoz ou

10, 11. (a) Ki kestyon serten i kapab demann ou lo ou swa pour servi Bondye? (b) Ki ou kapab aprann par lafason Zezi ti reponn bann kestyon lo vre ladorasyon?

¹⁰ Desizyon ki ou fer pour servi Zeova i kapab sirprann ou bann kanmarad lekol, vwazen ek fanmir. Zot kapab demann ou akoz ou’n fer sa swa e kestyonn ou lo ou krwayans. Ki mannyer ou pou reponn? Byensir, ou bezwen egzamin ou panse ek santiman pour ki ou ava kapab eksplik zot akoz ou’n fer sa swa. E kan ou pe donn zot en larepons lo ou krwayans, pa Zezi i sa pli bon legzanp ou kapab imite!

¹¹ Kan bann sef relizye Zwif ti kestyonn Zezi lo rezireksyon, i ti diriz zot latansyon lo en verse ki zot pa ti’n pran kont. (Egz. 3:6; Mat. 22:23, 31-33) Kan en profeser lalwa ti demann li lekel sa pli gran komannman, Zezi ti sit en verse apropriye. Sa zonm ti vreman rekonesan anver Zezi pour sa larepons. (Lev. 19:18; Det. 6:5; Mark 12:28-34) Lafason i ti servi Lekritir ek lafason i ti koze ti fer ki “lafoul ti divize akoz Zezi” e bann ki ti opoz li pa ti kapab fer li ditor. (Zan 7:32-46) Servi Labib e avek “labonte ek respe” reponn kestyon lo ou lafwa. (1 Pyer 3:16) Si ou pa konn larepons, zis fer zot konnen e dir zot ki ou pou fer resers lo la. Pli tar, rod lenformasyon lo sa size dan Watch Tower Publications Index ouswa dan Watchtower Library lo CD-ROM (Angle/Franse). Avek en bon preparasyon ou pou “kapab donn bann repons valab.”—Kol. 4:6.

12. Akoz ou pa devret les persekisyon dekouraz ou?

¹² Parler ou kapab rankontre plis ki zis kestyon lo ou desizyon ek krwayans. Apre tou, se lennmi Bondye, Satan oubyen Dyab ki pe kontrol sa lemonn. (Lir 1 Zan 5:19.) I pa fer sans pour ou ekspekte ganny felisite ouswa laprouvasyon avek tou dimoun, ou menm kapab fer fas avek lopozisyon. Serten i kapab “kritik” ou e zot menm kapab kontinyen fer li. (1 Pyer 4:4) Me mazinen ki ou pa tousel. Zezi osi ti sibir persekisyon. Zapot Pyer osi parey e i ti ekrir: “Mon bann byenneme pa bezwen etonnen par bann gran soufrans ki zot pe pas ladan pour teste zot, konmsi sa ki pe ariv zot ti bann keksoz ekstraordiner. Okontrer, zot devre rezoui ki zot pe partisip dan soufrans Kris.”—1 Pyer 4:12, 13.

13. Akoz bann Kretyen i kapab rezouir ler zot ganny persekite?

¹³ Pour en Kretyen, andir persekisyon ek lopozisyon i en rezon pour li rezouir. Akoz sa? Akoz si ou ganny laprouvasyon lemonn sa pou endike ki ou pe viv dapre standar Satan e non pa dapre sa ki pour Bondye. Zezi ti donn sa lavertisman: “Maler, ler tou dimoun i dir dibyen lo zot, akoz zot bann zanset ti fer parey avek bann fo profet!” (Lik 6:26) Persekisyon i endike ki Satan ek son lemonn i ankoler avek ou akoz ou servi Zeova. (Lir Matye 5:11, 12.) E nou annan rezon pour rezouir kan nou ganny “maltrete pour non Kris.”—1 Pyer 4:14.

14. Ki bon rezilta en dimoun i kapab gannyen kan i reste fidel avek Zeova malgre persekisyon?

¹⁴ I annan kat bon rezilta ou kapab gannyen si ou reste fidel avek Zeova malgre lopozisyon. Ou pou pe rann temwannyaz lo Zeova ek son Garson. Kan ou andire fidelman sa i kapab ankouraz bann frer ek ser Kretyen. Bann ki obzerv ou e ki pa konn Zeova i kapab ganny pouse pour rod li. (Lir Filipyen 1:12-14.) E ou lanmour pour Zeova pou agrandi anmezir ou eksperyans sa lafors ki I donn ou pour andir bann leprev.

“En gran laport” i ganny ouver pour ou

15. Ki “gran laport” ki ti ganny ouver pour zapot Pol?

¹⁵ An rapor avek son minister Efez, Pol ti ekrir: “En gran laport in ouver pour mwan fer en gran travay.” (1 Kor. 16:8, 9) Sa laport ti en laport ki ti ranpli avek loportinite pour pres sa bon nouvel e fer disip dan sa lavil. Pol ti antre par sa laport e sa ti fer li posib pour li ed bokou dimoun pour aprann lo Zeova e ador Li.

16. Ki mannyer larestan Kretyen swazir ti antre par sa “laport ouver” an 1919?

¹⁶ An 1919, Zezi Kri ki’n ganny glorifye ti plas “en laport ouver” devan larestan Kretyen swazir. (Rev. 3:8) Zot ti antre par sa laport e konmans pres sa bon nouvel e ansenny laverite dan Labib avek plis devouman ki oparavan. Ki rezilta zot ti gannyen dan zot minister? Sa bon nouvel in aprezan ariv dan bann landrwa pli lwen lo later e apepre set milyon dimoun i annan sa lespwar pour ganny lavi eternel dan nouvo lemonn Bondye.

17. Ki mannyer ou kapab antre dan sa ‘gran laport ki’n ganny ouver pour fer en gran travay’?

¹⁷ ‘Sa gran laport ki’n ganny ouver pour fer en gran travay’ i ankor gran ouver pour tou bann serviter Zeova. Bann ki pas par sa laport i trouv lazwa ek satisfaksyon pandan ki zot partisip plis pour pres sa bon nouvel. Ou ki en zenn serviter Zeova, eski ou apresye sa privilez ki ou annan pour ed lezot pour “krwar dan sa Bonn Nouvel”? (Mark 1:14, 15) Eski ou’n konsider servis pionye asistan ouswa ordiner? I annan lezot loportinite ki bokou zot i kapab sezi parey konstriksyon Lasal Rwayonm, servis Betel ouswa servis misyonner. De zour an zour i vin deplizanpli irzan pour partisip dan sa bann form servis pour Rwayonm akoz pa reste bokou letan pour sa move lemonn Satan ganny detrir. Eski ou pou antre dan sa “gran laport” pandan ki i ankor annan letan?

“Goute e vwar konman Zeova i bon”

18, 19. (a) Kwa ki ti ed David annan en gran dezir pour servi Zeova? (b) Kwa ki montre ki David pa ti zanmen regrete ki i ti’n servi Bondye?

¹⁸ En psalmis ki ti ganny enspire ti envit lezot pour “goute e vwar konman Zeova i bon.” (Ps. 34:8) Kan Lerwa David dan ansyen Izrael ti ankor en zenn berze, Zeova ti sov li kont latak bann bebet feros. Bondye ti siport li dan son batay avek Golyat e i ti delivre li dan en kantite lezot maler. (1 Sam. 17:32-51; Ps. 18, lentrodiksyon) An rapor avek gran labonte leker ki Zeova ti annan, David ti ganny pouse pour ekrir: “Bokou keksoz ou menm ou’n fer, O Zeova mon Bondye, menm ou bann travay merveye e ou bann panse anver nou; okenn pa kapab ganny konpare avek ou.”—Ps. 40:5.

¹⁹ David ti arive kontan Zeova en kantite e i ti anvi loue Li avek tou son leker ek lespri. (Lir Psonm 40:8-10.) Anmezir ki lannen ti pase, David pa ti zanmen regrete ki i’n servi son lavi pour ador sa vre Bondye. Sa latasman ki i ti annan pour Bondye ti parey en trezor presye e pour li sa ti en sours lazwa ki ti napa son parey. Dan son vye zour, David ti dir: “Ou mon lespwar, O Souvren Senyer Zeova, mon konfyans depi mon zenes. Menm ziska lavyeyes ek seve blan, O Bondye, pa kit mwan.” (Ps. 71:5, 18) Konfyans ek lanmitye ki David ti annan avek Zeova ti vin pli for menm si son lafors fizik ti pe diminyen.

20. Akoz ler ou servi Zeova sa i pli bon fason pour viv ou lavi?

²⁰ Lavi Zozye, David ek Timote i en laprev ki servi Zeova i sa pli meyer swa ou kapab fer. Lavantaz materyel ki ou gannyen kan ou pourswiv en karyer dan sa lemonn i dir zis pour en pe letan e i pa kapab ganny konpare avek sa kantite byenfe ki ou kapab gannyen ler ou ‘servi Zeova avek tou ou leker ek nanm.’ (Zoz. 22:5) Si ou pa ankor dedye ou lavi avek Zeova dan lapriyer, demann ou lekor, ‘Kwa ki pe anpes mwan vin en Temwen Zeova?’ Si ou deza en adorater Zeova ki’n batize, eski ou ti a kontan ganny plis lazwa dan ou lavi? Alors, fer plis dan servis Bondye e kontinyen progrese spirityelman. Sa lartik ki swiv pou montre ou ki mannyer ou pou kapab progrese spirityelman par swiv legzanp zapot Pol.

Ki ou pou reponn?

• Nonm de rezon akoz nou devret servi Bondye.

• Kwa ki ti ed Timote deside pour servi Bondye?

• Akoz ou devret reste ferm kan ou fer fas avek persekisyon?

• Ki loportinite ou kapab gannyen dan servis?

[Portre lo paz 22]

Servi Zeova i sa pli bon swa dan lavi

[Portre lo paz 23]

Eski ou kapab reponn bann kestyon lo ou lafwa?