Eski ou apresye tou sa ki Zeova in fer pour delivre ou?

“Mon rann glwar mon Senyer, Bondye pep Izrael, akoz in vin vizit e delivre son pep.”—LIK 1:68.

1, 2. Ki legzanp ki kapab ganny servi pour dekrir gravite sa kondisyon ki nou ladan ozordi e ki kestyon nou pou diskite?

FER krwar ou pe alonze lo en lili dan lopital. Ou dan en ward kot tou dimoun i soufer avek menm maladi, en maladi mortel ki napa en gerizon. Kan ou aprann ki i annan en dokter ki pe fer bokou zefor pour trouv en gerizon, ou ganny lespwar. Avek enpasyans ou esper lenformasyon lo okenn nouvo devlopman. En zour ou aprann ki en gerizon in ganny dekouver! Sa dokter ki par deryer sa dekouvert i’n fer en kantite sakrifis pour arive kapab trouv en gerizon pour sa maladi. Ki mannyer ou ti pou santi? Sirman ou pou annan en gran respe ek lapresyasyon pour sa zonm ki’n fer li posib pour ou, ensi ki plizyer lezot dimoun ankor, arive ganny delivre avek lanmor.

² Sa senn i kapab paret en egzazerasyon, me i relye avek sa realite ki nou tou nou fer fas avek. Sakenn parmi nou i dan en kondisyon ki pli pir ki sa enn ki’n ganny dekrir. Nou vreman bezwen en sover. (Lir Romen 7:24.) Zeova in sakrifye en kantite pour delivre nou. Son Garson osi in fer en gro sakrifis. Aprezan, annou egzamin kat kestyon elemanter. Akoz nou bezwen ganny delivre? Ki nou delivrans ti kout Zezi? Ki i ti kout Zeova? Ki mannyer nou montre ki nou apresye valer sa delivrans ki sorti kot Bondye?

Akoz nou bezwen ganny delivre?

3. Akoz pese i kapab ganny konpare avek en lepidemi?

³ Dapre en estimasyon ki’n ganny fer tou dernyenman, enn parmi bann lepidemi pli terib dan listwar imen ti sa lagrip Espanyol ki ti arive an 1918 e ki ti touy plizyer dizenn milyon dimoun. Lezot maladi i pli danzere dan en lot sans. Menm si zot enfekte pli ptigin dimoun, zot touy en pli gran poursantaz dimoun ki zot enfekte.a Me, si nou ti pou konpar pese avek sa kalite lepidemi? Mazin sa parol dan Romen 5:12: “Pese in antre dan lemonn par en sel zonm, e pese in anmenn lanmor, e lanmor in pas avek tou dimoun, parski tou dimoun in konmet pese.” Tou dimoun in ganny enfekte avek pese akoz nou tou nou enparfe. (Lir Romen 3:23.) Ki kantite dimoun ki mor akoz pese? Pol ti ekrir ki pese i anmenn lanmor lo ‘tou dimoun.’

4. Ki plan Zeova ti annan konsernan kantite lannen ki nou viv e ki mannyer son pwennvi i diferan avek pour bokou dimoun ozordi?

⁴ Bokou imen ozordi pa vwar pese ek lanmor dan sa fason. Zot konsernen avek bann dimoun ki dapre zot i mor avan ler e zot dir ki i “normal” pour en dimoun mor akoz lavyeyes. I vreman fasil pour bann imen oubliy plan nou Kreater. Lakantite letan ki nou viv i san okenn dout bokou pli kourt ki sa ki i ti’n plàn. Tou fason, napa okenn imen ki’n viv menm “en zour” dapre pwennvi Zeova. (2 Pyer 3:8) Parol Bondye i menm dir ki nou lavi i kourt parey zerb ki pous par sezon ouswa sa ler ki nou large ler nou respire. (Ps. 39:5; 1 Pyer 1:24) Nou devret touzour gard sa pwennvi antet. Akoz? Si nou konpran gravite sa “maladi” ki nou gannyen, nou pou pli kapab apresye valer sa “gerizon,” andotmo valer nou delivrans.

5. Ki nou’n perdi akoz pese?

⁵ Pour konpran gravite pese ek son lefe, nou devret esey konpran ki pese in fer nou perdi. Sa i kapab difisil o konmansman parski pese in fer nou perdi en keksoz ki nou menm nou pa’n deza eksperyanse. Adan ek Ev ti rezwir en lavi parfe o konmansman. Zot ti parfe mantalman e fizikman, zot ti kapab swazir pour kontrol zot panse, santiman ek aksyon. Sa i fer ki zot ti lib pour kontinyen devlop bann zoli kalite ek abilite pour servi Zeova. O kontrer, zot ti rezet sa kado presye. Par swazir pour fer pese kont Zeova, ni Adan ek Ev, ni zot desandans pa ti ganny sa lavi ki Zeova ti’n plàn pour zot. (Zen. 3:16-19) An menm tan, zot in anmenn sa “maladi” terib ki nou’n diskite, lo zot menm e lo nou tou. Zeova ti annan tou drwa kondann zot. Me i ofer nou en lespwar pour ganny delivre.—Ps. 103:10.

Ki nou delivrans ti kout Zezi?

6, 7. (a) Ki mannyer Zeova ti premyerman montre ki nou delivrans ti pou kout li en kantite? (b) Ki nou kapab aprann atraver sakrifis ki ti ganny fer par Abel ek lezot patrias ki ti viv avan Lalwa ti ganny donnen?

⁶ Zeova ti konnen ki i ti pou kout li en kantite pour delivre desandans Adan ek Ev. Dan sa profesi ki ganny rikorde dan Zenez 3:15, nou aprann konsernan sa pri ki ti pou neseser pour nou ganny delivre. Zeova ti pou fourni en “desandans,” setadir en sover ki en zour ti pou detrir e elimin Satan pour touzour. Parkont sa sover ti pou soufer pour li akonplir son rol. Dan en sans senbolik, i ti pou ganny en blesir lo son talon. En blesir lo talon i fermal e kapab limit aktivite oubyen afeblir en dimoun, me ki sa i vedir dan sa profesi? Ki sa Enn ki Zeova in swazir ti pou bezwen pas atraver?

⁷ Pour delivre limanite avek pese, sa sover ti pou bezwen fourni en mwayen pour kouver pese, setadir, en fason pour zonm rekonsilye avek Bondye, par retir lefe pese. Ki sa ti pou enplike? I ti annan bann lendikasyon depi o konmansman ki en sakrifis ti pou neseser. Kan Abel, sa premye zonm fidel ti ofer Zeova en sakrifis zannimo, i ti ganny laprouvasyon Bondye. Pli tar, bann patrias ki ti annan lakrent pour Bondye parey Noe, Abraam, Zakob ek Zob osi ti ofer bann sakrifis ki ti fer plezir Bondye. (Zen. 4:4; 8:20, 21; 22:13; 31:54; Zob 1:5) Plizyer syek pli tar, Lalwa Moiz ti fer lepep pli konsyan konsernan sa zafer sakrifis.

8. Ki gran pret ti fer Zour Propisyasyon tou le-z-an?

⁸ Parmi bann sakrifis pli enportan ki Lalwa ti demande ti sa bann ki ti ganny ofer Zour Propisyasyon tou le-z-an. Sa zour, gran pret ti fer en seri aksyon senbolik. I ti ofer Zeova sakrifis pour kouver pese, premyerman pour bann pret, apre pour bann tribi ki pa ti pret. Gran pret ti antre dan lasanm Tre Sen dan tabernak oubyen tanp kot zis li ki ti kapab antre e sa ti posib zis sa zour pandan lannen. Laba i ti fann disan sa bann sakrifis devan lars lalyans. Parlao sa lars, parfwa i ti annan en nyaz klate e briyan ki ti aparet e sa ti reprezant prezans Zeova.—Egz. 25:22; Lev. 16:1-30.

9. (a) Zour Propisyasyon, ki gran pret ti pe reprezante e ki sa sakrifis ki i ti ofer ti endike? (b) Larantre gran pret dan Tre Sen ti pe reprezant kwa?

⁹ Zapot Pol ti ganny enspire pour revel sinifikasyon ki ti par deryer sa bann aksyon senbolik. I ti montre ki gran pret ti reprezant Mesi, Zezi Kri, tandis ki bann sakrifis ki ti ganny ofer ti reprezant lanmor Kris konman en sakrifis. (Ebr. 9:11-14) Sa sakrifis parfe ti pou vreman kouver pese de group dimoun, sa 144,000 frer Kris ki’n ganny swazir par lespri sen ki form sa group pret, e osi ‘lezot mouton.’ (Rev. 7:9, 14; Zan 10:16) Kan gran pret ti antre dan Tre Sen, sa ti pe reprezant sa letan kan Zezi ti pou mont dan lesyel e prezant Zeova valer son sakrifis konman en ranson.—Ebr. 9:24, 25.

10. Dapre bann profesi Labib, ki Mesi ti pou pas atraver?

¹⁰ I kler alor ki pour bann desandans Adan ek Ev arive ganny delivre, sa ti pou kout vreman ser. Mesi ti pou bezwen sakrifye son lavi! Bann profet dan Lekritir Ebre in eksplik sa laverite dan en fason byen kler. Par egzanp, profet Danyel ti dir direkteman ki “Mesi sa Lider” ti pou ganny “touye” oubyen egzekite “pour kouver nou fot.” (Dan. 9:24-26) Izai ti predir ki Mesi ti pou ganny rezete, persekite e egzekite oubyen perse, pour anmenn pese bann imen enparfe.—Iza. 53:4, 5, 7.

11. Dan ki fason Garson Zeova ti montre ki i ti pare pour sakrifye son lekor pour nou arive ganny delivre?

¹¹ Avan vin lo later, Garson byenneme Bondye ti konnen ki nou delivrans ti pou kout li. I ti pou bezwen soufer en kantite e apre ganny touye. Kan son Papa ti ansenny li sa bann laverite, eski i ti rekile oubyen rebele? Non, i ti volonterman soumet avek lenstriksyon son Papa. (Iza. 50:4-6) Pareyman, kan i ti lo later, Zezi ti fer lavolonte son Papa dan en fason obeisan. Akoz? I ti donn larepons par sa parol: “Mon kontan mon Papa.” I ti osi dir: “Pli gran lanmour ki en dimoun i kapab posede: se donn son lavi pour son bann zanmi.” (Zan 14:31; 15:13) Alor, nou’n ganny delivrans akoz lanmour ki Garson Zeova i annan. Menm si sa ti kout li son lavi parfe, i ti kontan pour fer li pour ki nou arive ganny delivre.

Ki nou delivrans ti kout Zeova?

12. I ti lavolonte lekel pour fourni sa ranson e akoz i ti fer sa?

¹² Zezi pa ti sa enn ki ti deside ki en sakrifis ti devret ganny fer ouswa ki mannyer i ti devret ganny fer. Plito, sa mwayen delivrans ti en keksoz vreman enportan an rapor avek lavolonte Zeova. Zapot Pol ti endike ki lotel kot tanp kot bann sakrifis ti ganny ofer ti reprezant lavolonte Zeova. (Ebr. 10:10) Alor, sa delivrans ki nou gannyen par mwayen sakrifis Kris, i en keksoz ki nou premyerman devret rekonesan anver Zeova. (Lik 1:68) I en fason pour eksprim son gran lanmour pour bann imen ek son lavolonte parfe.—Lir Zan 3:16.

13, 14. Ki mannyer legzanp Abraam i kapab ed nou pour apresye sa ki Zeova in fer pour nou?

¹³ Ki i ti kout Zeova pour demontre son lanmour pour nou dan sa fason? I difisil pour nou konpran. Parkont, i annan en resi dan Labib ki kapab ed nou pour konpran sa size pli klerman. Zeova ti demann Abraam, sa zonm fidel pour fer en keksoz ki vreman difisil, i ti demann li pour ofer son garson Izaak konman en sakrifis. Be, Abraam ti en papa ki ti kontan son garson en kantite. Ler i ti pe koz avek Abraam, Zeova ti dir ki Izaak i “ou sel garson ki ou kontan en kantite.” (Zen. 22:2) Kantmenm sa, Abraam ti vwar ki fer lavolonte Zeova ti pli enportan pour li ki son lanmour pour Izaak. Abraam ti obeir. Parkont, Zeova pa ti les Abraam fer sa ki li menm ti pou fer en zour. Bondye ti anvoy en lanz aret Abraam zis avan ki i ti sakrifye son garson. Abraam ti vreman determinen pour obeir son Bondye dan sa tes difisil, i ti asire ki sel lespwar pour li revwar sa zenn onm vivan ankor ti pou atraver en rezireksyon. I ti annan lafwa total ki Bondye ti pou fer sa kalite rezireksyon. Vreman, Pol ti dir ki Abraam ti reganny Izaak atraver en rezireksyon “senbolikman.”—Ebr. 11:19.

¹⁴ Eski ou kapab mazin sa douler ki Abraam ti resanti anmezir ki i ti fer preparasyon pour ofer son garson? Dan en sans, leksperyans Abraam i montre nou santiman Zeova kan i ti ofer sa enn ki i ti apel “mon Garson byenneme.” (Mat. 3:17) Mazinen toudmenm ki douler Zeova ti pli for. Ansanm avek son Garson, zot ti’n pas plizyer milyon, petet menm plizyer bilyon lannen ansanm. Sa Garson ti travay dan lazwa avek son Papa konman son “zouvriye abil” byenneme e konman “Laparol” son Portparol. (Prov. 8:22, 30, 31; Zan 1:1) Sa ki Zeova ti resanti ler son Garson ti pe ganny tourmante, gognarde e apre egzekite konman en kriminel i en keksoz ki nou menm nou pa konnen. Nou delivrans ti kout Zeova tre ser! Alor, ki mannyer nou montre ki nou apresye sa delivrans?

Konman ou pou montre lapresyasyon pour ou delivrans?

15. Ki mannyer Zezi ti konplet son aksyon sakrifisyel ki kouver pese e ki posibilite sa in donnen?

¹⁵ Zezi ti termin son aksyon sakrifisyel ki kouver pese ler i ti resisite e al dan lesyel. I ti reini avek son Papa lanmour e prezant Li valer son sakrifis. Bann gran benediksyon ti swiv apre. Pardon konplet ti posib, premyerman pour pese bann frer swazir Kris e apre pour “lemonn antye.” Atraver sa sakrifis, ozordi tou dimoun ki senserman repantir e vin bann vre disip Kris i kapab annan en relasyon pros avek Zeova. (1 Zan 2:2) Ki mannyer sa i aplik pour ou?

16. Ki legzanp nou kapab donnen pour montre akoz nou devret rekonesan pour sa delivrans ki Zeova in fer posib pour nou?

¹⁶ Annou retourn lo sa legzanp ki ti ganny donnen o konmansman sa lartik. Fer krwar sa dokter ki ti dekouver sa gerizon i apros bann pasyan dan ward kot ou ete avek sa propozisyon: Okenn pasyan ki aksepte sa tretman e swiv sa ladyet ki’n ganny preskrir pou sirman ganny geri. Me si i arive ki laplipar pasyan i refize swiv konsey dokter e konplent ki i tro difisil pour pran sa latizann ouswa swiv sa ladyet? Eski ou osi ou pou fer parey menm si ou konvenki par levidans ki sa tretman i vreman marse? Byensir non! San dout ou pou remersye li pour sa tretman e apre swiv son lenstriksyon atantivman, petet menm fer lezot konn ou swa. Dan en pli gran lanpler, sakenn ant nou i devret pare pour montre Zeova ki kantite nou apresye sa delivrans ki i’n fer posib pour nou gannyen atraver sakrifis son Garson.—Lir Romen 6:17, 18.

17. Dan ki fason ou kapab demontre lapresyasyon pour sa ki Zeova in fer pour delivre ou?

¹⁷ Si nou apresye sa ki Zeova ek son Garson in fer pour nou kapab ganny delivre avek pese ek lanmor, nou pou montre li. (1 Zan 5:3) Nou pou lit avek nou tandans pour fer pese. Si nou pratik pese volonterman e viv de kalite lavi ek lipokrizi ki vin avek, sa kalite latitid pou montre ki nou pa ditou apresye valer sa sakrifis. Plito, nou pou montre en gran lapresyasyon par travay dir pour reste prop devan Bondye. (2 Pyer 3:14) Nou pou demontre sa par partaz nou zoli lespwar delivrans avek lezot pour ki zot osi zot ava kapab annan laprouvasyon Bondye ek sa lespwar pour en lavenir eternel. (1 Tim. 4:16) Sirman Zeova ek son Garson i merit sak moman letan ki nou annan ek nou lenerzi ki nou kapab dedye pour loue zot! (Mark 12:28-30) Mazin lo la! Nou kapab esper sa moman kot nou pou konpletman ganny geri avek pese. Nou pou kapab viv lavi parey Bondye ti’n plàn, parfe e pour touzour, tou sa la, gras a sa ki Zeova in fer pour delivre nou!—Rom. 8:21.

[Not anba lo paz 29]

Ki ou pou reponn?

• Akoz ou bezwen ganny delivre?

• Lefet ki Zezi ti pare pour sakrifye son lekor, ki lefe sa i devret annan lo ou?

• Ki mannyer ou santi anver sa ranson ki Zeova in donnen konman en kado?

• Ki ou ganny motive pour fer pour sa provizyon ki Zeova in fer pour delivre ou?

[Portre lo paz 30]

Zour Propisyasyon, gran pret Izrael ti reprezant Mesi

[Portre lo paz 31]

Abraam ti pare pour ofer son garson, sa i ansenny nou en kantite lo sakrifis Zeova ki pli gran ki sa