Zenn, ki ou pou fer avek ou lavi?

“Mon pa fer parey en bokser ki donn kou-d-pwen dan ler.”—1 KOR. 9:26.

1, 2. Pour ki ou reisi anmezir ou grandi pour vin en adilt, ki ou devret annan?

SI OU ti pe al lo en zil ki ou pa abitye avek, sirman ou ti pou anmenn en map ek en konpa avek ou. Sa map ti pou ed ou konnen kote ou ete e gid ou dan sa bon semen. Sa konpa ti pou ed ou reste dan sa bon direksyon. Par kont, sa map ek sa konpa pa ti pou itil si ou pa ti konnen kote ou pe ale. Pour ki ou pa perdi letan pour ale vini, ou pou bezwen konnen egzakteman kote ou pe ale.

² Kan ou pe grandi pour vin en adilt, ou pas dan preski menm sityasyon. Dan ou dispozisyon ou annan en map ek en konpa ki ou kapab depan lo la. Labib i en map ki kapab ed ou konn sa bon semen ki ou pou swazir. (Prov. 3:5, 6) Si ou konsyans in ganny byen antrennen, i pou ed ou en kantite pour reste dan sa bon direksyon. (Rom. 2:15) I kapab ganny servi konman en konpa. Par kont, pour ou reisi dan lavi, ou osi bezwen konnen kote ou pe ale. Ou bezwen konn byen ou bann lobzektif.

3. Ki byenfe Pol i koz lo la dan 1 Korentyen 9:26 konsernan lenportans pour annan bann lobzektif?

³ Zapot Pol ti senpleman montre byenfe sa lenportans pour etablir bann lobzektif e fer zefor pour atenn zot kan i ti ekrir: “Mon pa tay an bonnavini, mon pa fer parey en bokser ki donn kou-d-pwen dan ler.” (1 Kor. 9:26) Si ou annan bann lobzektif, ou kapab tay avek lasirans. Byento, ou pou bezwen fer bann desizyon serye konsernan ladorasyon, lanplwa, maryaz, lafanmir ek lezot ankor. Parler, ou kapab santi ou konfize telman i annan swa pour ou fer. Me si ou kalkil ou swa davans, e baz ou desizyon lo laverite ek bann prensip ki dan Parol Bondye, ou pa pou ganny tante pour al dan sa move direksyon.—2 Tim. 4:4, 5.

4, 5. (a) Ki i kapab arive si ou pa etablir bann lobzektif personnel? (b) Akoz swa ki ou fer i devret pour fer plezir Bondye?

⁴ Si ou pa etablir bann lobzektif personnel, ou bann kanmarad ek ansenyan pou sirman enfliyans ou pour fer sa ki zot zot krwar i bon pour ou. Byensir, menm si ou annan bann lobzektif spesifik, serten pou menm donn ou zot lopinyon. Kan ou pe ekout zot sizesyon, demann ou lekor: ‘Eski lobzektif ki zot oule mon etablir pou ed mwan mazin mon Kreater pandan ki mon ankor zenn ouswa i pou anpes mwan fer li?’—Lir Eklezyast 12:1.a

⁵ Akoz ou devret les ou dezir pour fer plezir Bondye gid ou dan ou bann desizyon ki ou annan pour fer dan lavi? En rezon i akoz Zeova in donn nou tou sa bann bon keksoz ki nou annan. (Zak 1:17) Sirman nou tou nou devret rekonesan anver Zeova. (Rev. 4:11) Eski pa i pou sa pli meyer fason pour demontre ou lapresyasyon pour Zeova si ou gard li antet kan ou pe etablir bann lobzektif? Annou vwar ki kalite lobzektif ki vo lapenn atenn e ki ou devret fer pour atenn zot.

Ki ou lobzektif?

6. Ki lobzektif prensipal ou kapab etablir e akoz?

⁶ Parey i ti ganny mansyonnen dan lartik avan, en lobzektif enportan ki ou kapab annan, se analize si sa ki Labib i dir i vre. (Rom. 12:2; 2 Kor. 13:5) Lezot ou bann kanmarad i kapab krwar dan evolisyon ouswa dan diferan fo krwayans relizye akoz lezot in dir zot dan kwa zot devret krwar. Par kont, ou pa devret krwar dan en keksoz zis akoz lezot i anvi ou krwar ladan. Rapel byen ki Zeova i anvi ou servi li avek tou ou lespri. (Lir Matye 22:36, 37.) Nou Papa ki dan lesyel i anvi ou batir ou lafwa baze lo levidans.—Ebr. 11:1.

7, 8. (a) Ki lobzektif ki pou ed ou fortifye ou lafwa? (b) Ki pou arive anmezir ou atenn serten ou bann lobzektif?

⁷ Pour ede ranforsi ou lafwa, akoz ou pa etablir bann lobzektif ki pa pran bokou letan pour atenn? Priye tou le zour i enn. Pour ki ou lapriyer i spesifik e pa en repetisyon, ou kapab mazin ouswa ekrir serten keksoz ki’n arive dan lazournen ki ou ti pou kontan dir dan ou lapriyer. Fer sir ki ou pa mansyonn zis bann difikilte ki ou’n rankontre, me osi bann keksoz ki ou ti kontan. (Fili. 4:6) Lir Labib tou le zour i en lot lobzektif. Eski ou ti konnen ki si ou lir apepre kat paz Labib sak zour, ou pou lir Labib an antye dan zis enn an?b Psonm 1:1, 2 i dir: “Byennere sa zonm ki . . . pran plezir dan lalwa Zeova, e i lir son lalwa avwabas lizour e aswar.”

⁸ Prepar en larepons pour sak renyon kongregasyon i en trwazyenm lobzektif ou kapab etablir. Premye kou, petet ou ti pou kontan lir larepons ouswa lir en verse Labib. Pli tar, ou kapab annan sa lobzektif pour reponn dan ou prop mo. Sak fwa ki ou reponn, i konmsi ou pou ofer Zeova en kado. (Ebr. 13:15) Enn fwa ki ou’n atenn serten sa bann lobzektif, ou pou annan plis konfyans dan ou lekor, ou lapresyasyon pour Zeova pou ogmante e ou pou pli pare pour annan bann lobzektif ki pran plis letan pour atenn.

9. Si ou pa ankor vin en proklanmater, ki lobzektif ou kapab etablir?

⁹ Ki bann lobzektif ki ou menm ou kapab atenn a lavenir? Si ou pa ankor konmans anons sa bon nouvel, ou kapab etablir sa lobzektif pour vin en proklanmater. Enn fwa ki ou atenn sa lobzektif ki en gran privilez, ou pou anvi regilye e efikas, ou pa pou anvi les en mwan pase san ki ou al prese. Ou pou osi anvi aprann servi byen Labib dan predikasyon. Anmezir ou fer li, tre probab ou pou dekouver ki ou pou kontan predikasyon plis ankor. Apre sa, ou kapab ogmant lakantite letan ou pase dan predikasyon portanport ouswa menm fer bokou zefor pour kondwir en letid Labib. Konman en proklanmater ki pa ankor batize, eski pa ou kapab etablir sa lobzektif pour kalifye pour batenm, dedye ou lavi avek Bondye e vin en Temwen Zeova batize?

10, 11. Ki lobzektif bann zenn ki’n batize i kapab etablir pour zot menm?

¹⁰ Si ou deza en serviter Zeova ki’n batize, la detrwa lobzektif ou kapab fer zefor pour atenn. De tanzantan ou kapab ed kongregasyon pres dan bann teritwar ki rarman ganny prese. Ou osi kapab servi ou lafors ek bon lasante pour fer pionye asistan ouswa ordiner. Plizyer santenn pionye zwaye pou dir ou ki servis a plen tan i en bon fason pour mazin ou Kreater pandan ou zenntan. Sa i bann lobzektif ki ou kapab atenn ler ou pe reste kot ou fanmir. Ou kongregasyon osi pou benefisye si ou atenn sa bann lobzektif.

¹¹ Lezot lobzektif i kapab anmenn ou dan en lot kongregasyon. Par egzanp, ou kapab fer plan pour al servi dan en lot rezyon ouswa en pei kot i annan plis bezwen. Ou kapab anvi ede konstrir bann Lasal Rwayonm ek Biro Brans dan diferan pei. Ou menm kapab antre dan Betel ouswa vin en misyonner. Byensir, avan ou akonplir tousala ou pou bezwen batize. Si ou pa ankor batize, mazinen kwa ki pou ed ou atenn sa lobzektif pli enportan dan ou lavi.

Atenn sa lobzektif pour pran batenm

12. Pour ki rezon serten i batize e akoz sa bann rezon pa valab?

¹² Akoz en dimoun i batize? Serten i krwar ki en dimoun i batize akoz batenm pou ed li pa tonm dan pese. Lezot i kapab santi ki zot devret batize akoz zot bann kanmarad in fini fer li. Lezot ankor i anvi fer plezir zot paran. Par kont, batenm pa en kontra ki anpes ou fer bann keksoz ki ou ti pou kontan fer ansousekre; ou pa devret ni batize akoz lezot pe met presyon lo ou. Ou devret batize kan ou konpran sa ki i enplike pour vin en Temwen Zeova e kan ou asire ki ou pare e anvi desarz sa responsabilite.—Ekle. 5:4, 5.

13. Akoz ou devret batize?

¹³ En rezon akoz en dimoun i batize i akoz Zezi ti donn lord son bann disip pour “fer . . . disip [e] batiz zot.” Li menm i ti batize e kit sa legzanp. (Lir Matye 28:19, 20; Mark 1:9.) Deplis, batenm i en pa enportan pour tou sa bann ki anvi ganny sove. Apre ki i ti’n koz konsernan Noe ek sa lars ki i ti konstrir kot i ti sov son lekor ek son fanmir pandan Deliz, zapot Pyer ti dir: “Sa i reprezant batenm, ki sov zot aprezan, . . . par rezireksyon Zezi-Kri.” (1 Pyer 3:20, 21) Me sa pa vedir ki batenm i parey benefis lasirans ki ou gannyen kan en dezas i arive. O kontrer, ou batize akoz ou kontan Zeova e anvi servi li avek tou ou leker, lam, lespri ek lafors.—Mark 12:29, 30.

14. Akoz serten i kapab ezite pour batize, me ki lasirans ou annan?

¹⁴ Serten i kapab ezite pour batize akoz zot per pangar to ou tar zot ganny ekskli. Eski ou annan sa lafreyer? Si wi, i pa mal pour annan sa lafreyer. I kapab vedir ki ou konpran sa responsabilite serye ki en Temwen Zeova i annan. Eski i annan ankor en lot rezon? Petet ou pa ankor konvenki ki i pli bon pour viv dapre standar Bondye. Dan sa ka, si ou reflesir lo konsekans ki sa bann ki inyor standar Zeova i gannyen sa i kapab ed ou pour fer en swa. De lot kote, i kapab ki ou kontan standar Bondye me ou pa krwar ki ou pou kapab viv annakor avek zot. Anfet, sa i kapab en bon siny, akoz i montre ki ou annan limilite. Apre tou, Labib i dir ki leker tou bann imen enparfe i tret. (Zer. 17:9) Me ou kapab reisi si ou kontinyelman ‘les laparol ed ou reste vizilan.’ (Lir Psonm 119:9.c) Nenport ki kalite rezon i annan ki fer ou ezite pran batenm, ou devret regle sa bann problenm ek konsern.d

15, 16. Ki mannyer ou pou konnen si ou pare pour batize?

¹⁵ Me ki mannyer ou pou konnen si ou pare pour batize? En fason pour konnen i kan ou demann ou lekor bann kestyon parey: ‘Eski mon kapab eksplik lezot bann lansennyman de baz sorti dan Labib? Eski mon al predikasyon menm ler mon paran pa ale? Eski mon fer zefor pour asiste tou renyon? Eski mon rapel bann moman kot mon ti reziste presyon ki mon ti gannyen avek lezot? Eski mon pou kontinyen servi Zeova menm si mon paran ek zanmi i arete? Eski mon’n priye lo mon relasyon avek Bondye? Eski mon’n senserman dedye mon lavi avek Zeova dan lapriyer?’

¹⁶ Batenm i en pa ki pa devret ganny pran alalezer. Eski ou ase matir pour mazin seryezman lo sa pa? En dimoun ki kapab fer bann bon size lo lestrad ouswa donn bann larepons enpresyonan dan renyon pa neseserman en dimoun matir. En dimoun matir i enn ki kapab fer bann bon desizyon baze lo son konprenezon lo bann prensip Labib. (Lir Ebre 5:14.) Si ou santi ki la konmela ou kapab fer li, alor ou annan sa privilez spesyal devan ou pour servi Zeova avek tou ou leker e viv dan en fason ki montre ki ou’n vreman dedye ou lavi avek li.

17. Kwa ki pou ed ou fer fas avek bann leprev ki swiv apre batenm?

¹⁷ Deswit apre batenm, ou kapab annan sa gran determinasyon pour servi Bondye. Me avek letan ou pou fer fas avek bann leprev ki pou teste ou lafwa ek perseverans. (2 Tim. 3:12) Pa krwar ki ou pou bezwen fer fas avek sa bann leprev ou tousel. Rod konsey avek ou paran. Demann led avek bann Kretyen matir dan kongregasyon. Gard en bon lanmitye avek sa bann ki siport ou. Pa zanmen oubliye ki Zeova i enterese avek ou e i pou donn ou sa lafors ki ou bezwen pour fer fas avek nenport ki difikilte ki ou kapab rankontre.—1 Pyer 5:6, 7.

Konman pour atenn ou bann lobzektif?

18, 19. Ki byenfe ou kapab gannyen kan ou egzamin ou priyorite?

¹⁸ I kapab ki ou annan bann bon lentansyon, me malgre tousala, eski ou santi ki ou zis napa ase letan pour fer sa ki ou anvi fer e bezwen fer? Si wi, egzamin ou bann priyorite. Pour donn en legzanp: Pran en pti seo plastik e met detrwa ros ladan. Apre sa, ranpli sa seo avek disab. Ou seo i plen avek ros ek disab. Vid tou sa ki dan sa seo e reservi sanmenm sa bann ros ek disab. Safwasi, ranpli sa seo avek disab premye e apre sa, esey met sa bann ros dan sa seo. Napa plas, pa i vre? Sa i akoz ou’n met disab dan seo premye.

¹⁹ I menm zafer kan ou pe balans ou letan. Si ou met bann keksoz parey detant dan premye plas, ou pou paret napa ase letan pour fer bann keksoz pli enportan, setadir bann keksoz spirityel. Me si ou swiv konsey Labib e “verifye sa ki pli enportan” ou pou vwar ki ou pou annan ase plas pour lentere Rwayonm e osi pour en serten kantite detant.—Fili. 1:10, NW.

20. Si ou santi ou enkyet ouswa annan dout anmezir ou fer zefor pour atenn ou lobzektif, ki ou devret fer?

²⁰ Anmezir ou fer bokou zefor pour atenn ou bann lobzektif, enkli batenm, parler ou kapab enkyet ouswa annan dout. Kan sa i arive, “larg ou fardo lo Zeova li menm, e li i pou soutenir ou.” (Ps. 55:22) La konmela, ou annan sa loportinite pour partisip dan sa travay pli eksitan e enportan dan listwar, sa travay predikasyon ek lansennyman ki pe ganny fer dan lemonn antye. (Akt 1:8) Ou kapab swazir pour swa vin en spektater e get ou kanmarad kot i travay. Ouswa ou kapab swazir pour vin en partisipan dan sa travay. Pa ezite pour servi ou abilite pour servi Bondye e siport son Rwayonm. Ou pa pou zanmen regrete ki ou’n servi “ou Gran Kreater letan ou ankor zenn.”—Ekle. 12:1.

[Not anba lo paz]

Ki ou pou reponn?

• Akoz ou devret etablir bann lobzektif?

• Ki lobzektif ki vo lapenn atenn?

• Pour arive batize, ki ou merit fer?

• Ki mannyer, ler ou egzamin ou priyorite, sa i kapab ed ou atenn ou bann lobzektif?

[Portre lo paz 23]

Eski ou annan sa lobzektif pour lir Labib tou le zour?

[Portre lo paz 24]

Ki leson ou aprann atraver sa legzanp?