Ki liv Revelasyon i dir pou arive avek bann lennmi Bondye?

 1. Ki liv Revelasyon i dir konsernan pep Bondye?

LIV Revelasyon i montre ki Rwayonm Bondye pe dirize dan lesyel e ki Satan in ganny pouse dan lesyel. (Rev. 12:1-9) Sa i fer ki i annan lape dan lesyel me problenm pour nou ki lo later. Akoz sa? Parski Satan i ankoler e i pe atak bann serviter fidel Zeova ki lo later.​—Rev. 12:12, 15, 17.

 2. Kwa ki pou ed nou reste fidel avek Zeova?

² Ki mannyer nou kapab reste fidel avek Zeova menm si Satan i atak nou? (Rev. 13:10) En keksoz ki pou ed nou, i ler nou konnen ki pou arive dan lavenir. Par egzanp, dan liv Revelasyon zapot Zan i dekri serten bann benediksyon ki nou pou gannyen byento. Enn parmi sa bann benediksyon i ki bann lennmi Bondye pou ganny detrir. Aprezan, annou vwar ki liv Revelasyon i dir lo sa bann lennmi e ki pou arive avek zot.

 3. Ki serten siny liv Revelasyon i koz lo la?

³ Premye verse liv Revelasyon i dir ki sa lenformasyon ki nou pe al lir dan sa liv i ganny donnen atraver “bann siny,” setadir dan en fason senbolik. (Rev. 1:1) Sa liv i koz lo diferan bebet sovaz ki reprezant bann lennmi Bondye. Par egzanp, i dir ki i annan “en bebet sovaz [ki] monte sorti dan lanmer” e ki sa bebet i annan “dis korn ek set latet.” (Rev. 13:1) Apre i annan “en lot bebet sovaz [ki] monte sorti dan later.” Sa bebet i koz parey en dragon e i “fer dife sorti dan lesyel desann.” (Rev. 13:11-13) Apre sa, i annan “en bebet sovaz rouz” e lo sa bebet i annan en prostitye. Sa trwa bebet sovaz i reprezant bann lennmi Bondye ki’n lager kont Bondye ek son Rwayonm pour en kantite letan. Alor i enportan pour nou konnen lekel sa bann bebet sovaz.​—Rev. 17:1, 3.

4-5. Ki mannyer Danyel 7:15-17 i ed nou konpran ki sa bann siny i vedir?

⁴ Avan ki nou vwar lekel sa bann lennmi, nou bezwen konpran ki sa bann bebet sovaz ek sa prostitye i reprezante. Pour fer sa, nou bezwen les Labib eksplik nou. En kantite sa bann siny dan liv Revelasyon in fini ganny eksplike dan lezot liv Labib. Par egzanp, profet Danyel ti ganny en rev kot i ti vwar “kat gro bebet [ki] ti sorti dan lanmer.” (Dan. 7:1-3) Danyel i osi dir nou ki sa bann bebet i reprezante. Sa bann bebet i reprezant kat “lerwa” oubyen gouvernman. (Lir Danyel 7:15-17.) Alor, i bezwen ki sa bann bebet ki ganny dekrir dan liv Revelasyon, i reprezant bann gouvernman.

⁵ Aprezan, annou vwar serten sa bann siny ki ganny dekrir dan liv Revelasyon. Anmezir nou fer sa, nou pou vwar ki mannyer Labib i ed nou konpran ki sa bann siny i vedir. Nou pou konmans par diskit lo sa bann bebet sovaz. Nou pou vwar ki zot reprezante e ki pou arive avek zot. Apre, nou pou vwar ki tousala i vedir pour nou.

 6. Ki sa bebet sovaz ki annan set latet ki ganny mansyonnen dan Revelasyon 13:1-4 i reprezante?

⁶ Lekel sa bebet sovaz ki annan set latet? (Lir Revelasyon 13:1-4.) Sa bebet i parey en leopar me i annan lapat lours, lagel lyon ek dis korn. Sa kat bebet ki ganny mansyonnen dan Danyel sapit 7, i osi annan sa bann karakteristik. Me la dan Revelasyon sa bann karakteristik i ganny trouve dan zis en bebet, non pa dan kat diferan bebet. Sa bebet ki annan set latet pa reprezant zis en gouvernman oubyen en pouvwar mondyal. Zan i osi dir ki i pe diriz “lo tou tribi, pep, langaz ek nasyon.” Sa i montre ki i pli pwisan ki okenn lezot gouvernman. (Rev. 13:7) Alor, i bezwen ki sa bebet sovaz i reprezant tou bann gouvernman ki’n diriz bann imen ziska ozordi.b​—Ekle. 8:9.

 7. Ki sa set latet sa bebet sovaz i reprezante?

⁷ Ki sa set latet i reprezante? Revelasyon sapit 17 i ed nou pour konn larepons sa kestyon parski i koz lo stati sa bebet sovaz ki ganny mansyonnen dan Revelasyon sapit 13. Revelasyon 17:10 i dir: “I annan set lerwa: Senk zot in tonbe, enn i la me sa lot pa ankor vini, me ler i vini i devret reste pour en ptigin letan.” Parmi tou bann gouvernman ki Satan in servi, set parmi ti bann “latet” parski zot ti annan en kantite pouvwar. En kantite parmi pep Bondye ti reste dan bann landrwa kot sa bann gouvernman ti dirize ouswa sa bann gouvernman ti persekit pep Bondye. Ler zapot Zan ti ankor vivan, senk parmi sa bann gouvernman ti’n fini dirize. Sa ti Lezip, Asiri, Babilonn, Med ek Pers ek Lagres. Sa sizyenm gouvernman ti Ronm e i ti ankor pe dirize ler Zan ti ganny sa vizyon. Alor, lekel ki ti pou sa setyenm e dernyen gouvernman ouswa latet?

 8. Ki setyenm latet sa bebet sovaz i reprezante?

⁸ Aprezan, nou pou vwar bann profesi dan liv Danyel ki ed nou konpran lekel sa setyenm e dernyen latet sa bebet sovaz. Lekel sa gouvernman ki pe dirize pandan bann dernyen zour ouswa “pandan zour Senyer”? (Rev. 1:10) Sa gouvernman i de nasyon pwisan ki pe travay ansanm e sa i Langleter ek Leta-z-ini, ki ansanm zot form Pouvwar Mondyal Angle e Ameriken. Alor nou kapab dir ki sa setyenm latet sa bebet sovaz ki ganny mansyonnen dan Revelasyon 13:1-4, i Pouvwar Mondyal Angle e Ameriken.

 9. Ki sa bebet sovaz ki annan “de korn ki ti parey korn en pti mouton” i reprezante?

⁹ Dan Revelasyon sapit 13, nou vwar ki sa setyenm latet, setadir Pouvwar Mondyal Angle e Ameriken i osi azir parey en lot bebet sovaz ki annan “de korn ki ti parey korn en pti mouton me i ti konmans koz parey en dragon.” Sa bebet ti “fer bann mirak, i ti menm fer dife sorti dan lesyel desann lo later devan tou dimoun.” (Rev. 13:11-15) Revelasyon sapit 16 ek sapit 19 i dekri sa bebet sovaz konman “sa fo profet.” (Rev. 16:13; 19:20) Danyel i dir en keksoz en pe parey, setadir ki Pouvwar Mondyal Angle e Ameriken ti pou “anmenn destriksyon.” (Dan. 8:19, 23, 24) Sanmenm ki ti arive pandan Dezyenm Lager Mondyal. Bann syantis Angle ek Ameriken ti travay ansanm pour fer de bonm atomik ki ti zwe en rol enportan pour aret sa lager. I ti konmsi Pouvwar Mondyal Angle e Ameriken ti fer “dife sorti dan lesyel desann lo later.”

10. Ki “stati sa bebet sovaz” i reprezante? (Revelasyon 13:14, 15; 17:3, 8, 11)

¹⁰ I annan en lot bebet sovaz. Sa enn i preski parey sa bebet sovaz ki annan set latet me i rouz. I ganny apele “stati sa bebet sovaz” e i ganny dekrir konman “en wityenm lerwa.”c (Lir Revelasyon 13:14, 15; 17:3, 8, 11.) Zapot Zan ti dir ki sa “lerwa” ti egziste, apre i ti nepli egziste e pli tar i ti revin an egzistans. Sa i dekri byen sa ki’n arive avek Nasyon-z-ini ki siport bann gouvernman dan lemonn. O konmansman i ti egziste konman Lasosyete bann Nasyon. Apre pandan Dezyenm Lager Mondyal, i ti nepli egziste. Pli tar i ti revin an egzistans konman Nasyon-z-ini.

11. Ki sa bann bebet sovaz i fer e akoz nou pa devret per zot?

¹¹ Sa bann bebet sovaz oubyen bann gouvernman i servi bann mansonz pour fer lezot dimoun opoz Zeova ek son pep. Zan i dir ki i konmsi zot rasanble “bann lerwa partou lo later” pour sa lager Armagedon ki “sa gran zour Bondye Tou Pwisan.” (Rev. 16:13, 14, 16) Me nou napa okenn rezon pour per. Nou Bondye Zeova pou azir deswit pour sov tou bann ki siport son drwa pour dirize.​—Ezek. 38:21-23.

12. Ki pou arive avek tou sa bann bebet?

¹² Ki i arive avek tou sa bann bebet? Revelasyon 19:20 i dir: “Sa bebet sovaz ti ganny atrape ansanm avek sa fo profet ki ti fer bann siny devan li pour tronp bann ki’n ganny mark sa bebet sovaz e bann ki ador son stati. Zot tou le de zot ti ganny zete vivan dan lak dife kot souf pe brile.” Alor, pandan ki sa bann gouvernman i ankor pe dirize, Bondye pou detri zot pour touzour.

13. Ki presyon gouvernman i met lo bann Kretyen?

¹³ Ki sa i vedir pour nou? Konman bann Kretyen, nou bezwen fidel avek Bondye ek son Rwayonm. (Zan 18:36) Pour fer sa, nou pa devret pran kote dan bann zafer politik sa lemonn. Me i kapab vreman difisil pour nou fer sa, parski bann gouvernman i anvi ki nou montre ki nou siport zot par sa ki nou dir e fer. Bann dimoun ki les gouvernman met presyon lo zot pou ganny mark sa bebet sovaz. (Rev. 13:16, 17) Sa pou fer ki zot pa pou ganny laprouvasyon Zeova e zot pa pou viv pour touzour. (Rev. 14:9, 10; 20:4) Alor, i vreman enportan ki nou pa pran kote dan bann zafer politik sa lemonn malgre nenport ki kantite presyon gouvernman i met lo nou pour siport zot.

14. Dapre Revelasyon 17:3-5, ki sa lot keksoz ki zapot Zan i vwar?

¹⁴ Zapot Zan ti dir ki i “ti vreman etonnen” par en lot keksoz ki i ti vwar. Ki sa keksoz? I ti vwar en madanm pe asiz lo enn sa bann bebet sovaz. (Rev. 17:1, 2, 6) Sa madanm i parey en “gran prostitye” e i apel “Gran Babilonn.” I fer “imoralite seksyel” avek “bann lerwa lo later.”​—Lir Revelasyon 17:3-5.

15-16. Lekel “Gran Babilonn” e ki mannyer nou konn sa?

¹⁵ Lekel “Gran Babilonn”? Sa madanm pa kapab reprezant en gouvernman parski liv Revelasyon i dir ki i komet imoralite seksyel avek bann dirizan politik sa lemonn. (Rev. 18:9) Lefet ki i pe asiz lo sa bebet sovaz, sa i montre ki i esey kontrol sa bann dirizan. An plis, i pa kapab reprezant sistenm komersyal sa lemonn Satan parski dan lezot verse dan liv Revelasyon, sistenm komersyal i ganny apele “bann marsan lo later.”​—Rev. 18:11, 15, 16.

¹⁶ Dan Labib, sa mo “prostitye” i kapab refer avek bann dimoun ki dir ki zot servi Bondye me ki ador zidol ouswa ki zanmi avek sa lemonn. (1 Kron. 5:25; Zak 4:4) De lot kote, Labib i dir ki bann ki servi Bondye fidelman i “pir” e zot ganny apele bann “vyerz.” (2 Kor. 11:2; Rev. 14:4) Dan letan Labib, Babilonn ti renonmen pour fo ladorasyon. Alor i bezwen ki Gran Babilonn i reprezant tou fo ladorasyon. Anfet, Gran Babilonn i tou fo larelizyon.​—Rev. 17:5, 18; vwar lartik “What Is Babylon the Great?” lo jw.org an Angle.

17. Ki pou arive avek Gran Babilonn?

¹⁷ Ki pou arive avek Gran Babilonn? Revelasyon 17:16, 17 i dir: “Sa dis korn ki ou ti vwar e sa bebet sovaz pou ay sa prostitye. Zot pou depouy li e met li touni, zot pou manz son laser e zot pou konpletman bril li dan dife. Parski Bondye in met dan zot leker son nide pour ki zot fer son lavolonte.” Zeova pou fer bann nasyon servi sa bebet sovaz rouz, setadir Nasyon-z-ini, pour atak fo larelizyon e detri li konpletman.​—Rev. 18:21-24.

18. Ki mannyer nou kapab fer sir ki nou pa pe siport Gran Babilonn dan okenn fason?

¹⁸ Ki sa i vedir pour nou? Nou bezwen kontinyen ador Bondye dan en fason “ki pir e san defo dapre pwennvi nou Bondye.” (Zak 1:27) Nou pa devret zanmen les nou ganny enfliyanse par bann fo lansennyman, lafet fo larelizyon, standar moral sa lemonn ek bann pratik demonyak Gran Babilonn. Nou pou kontinyen averti dimoun pour “sorti” dan Gran Babilonn pour ki Bondye pa vwar zot osi koupab pour pese Gran Babilonn.​—Rev. 18:4.

19. Lekel sa “gro dragon rouz parey dife”?

¹⁹ Liv Revelasyon i osi koz lo “en gro dragon rouz parey dife.” (Rev. 12:3) Sa dragon i lager avek Zezi ek son bann lanz. (Rev. 12:7-9) I atak pep Bondye e i donn lotorite sa bann bebet sovaz ouswa bann gouvernman imen. (Rev. 12:17; 13:4) Lekel sa dragon? I “sa premye serpan, sa enn ki ganny apele Dyab e Satan.” (Rev. 12:9; 20:2) I sa enn ki pe kontrol tou bann lennmi Bondye.

20. Ki pou arive avek sa dragon?

²⁰ Ki i arive avek sa dragon? Revelasyon 20:1-3 i dir ki en lanz pou zet Satan dan labim e sa pou parey en prizon pour Satan. Pandan sa letan, Satan pou “nepli kapab anbet bann nasyon ankor ziska ki sa 1,000 an in fini.” Finalman, Satan ek son bann demon pou ganny zete dan “lak dife ek souf.” Sa i vedir ki zot pou ganny detrir pour touzour. (Rev. 20:10) Esey imazin en lemonn kot Satan ek son bann demon pa la. Sa pou en letan merveye!

21. Akoz sa ki nou lir dan liv Revelasyon i fer nou ere?

²¹ I vreman ankourazan pour konpran ki sa bann siny dan liv Revelasyon i vedir! Nou’n vwar lekel bann lennmi Zeova e nou’n osi vwar ki pou arive avek zot. Wi, “ere sa enn ki lir aotvwa e bann ki ekout parol sa profesi.” (Rev. 1:3) Me ler bann lennmi Bondye in ganny detrir, ki benediksyon bann ki fidel pou gannyen? Nou pou vwar sa dan dernyen lartik dan sa seri.