Depan lo Zeova parey Sanmson

1-2. Akoz i byen pour nou etidye sa resi lo Sanmson?

KWA ki vin dan ou lespri ler ou tann sa non Sanmson? I tre probab ki ou mazin en zonm ki vreman for. I vre ki Sanmson ti for me i ti fer en move desizyon ki ti fer li soufer en kantite. Kantmenm sa, Zeova ti konsantre lo tou sa ki Sanmson ti’n fer pour servi li e Zeova in fer ki legzanp Sanmson in ganny ekrir dan Labib pour nou byenfe.

² Zeova ti servi Sanmson pour fer bann gran keksoz pour ed bann Izraelit, ki ti Son pep. Plizyer santenn lannen apre ki Sanmson ti’n mor, Zeova ti fer zapot Pol ekri non Sanmson dan lalis bann zonm fidel. (Ebr. 11:​32-34) Legzanp Sanmson i kapab ankouraz nou. I ti depan lo Zeova menm pandan bann moman difisil. Dan sa lartik, nou pou vwar ki nou kapab aprann avek legzanp Sanmson e ki mannyer son legzanp i kapab ankouraz nou.

 3. Ki travay Zeova ti donn Sanmson pour fer?

³ Ler Sanmson ti ne, bann Filisten ki ti pe diriz Izrael e bann Filisten ti domin lo zot. (Ziz 13:1) Bann Izraelit ti soufer en kantite parski bann Filisten ti vreman kriyel. Zeova ti swazir Sanmson pour “sov Izrael dan lanmen bann Filisten.” (Ziz 13:5) Me sa ti en travay difisil pour fer. Pour Sanmson kapab sov bann Izraelit, i ti pou bezwen depan lo Zeova.

 4. Ki mannyer Zeova ti ed Sanmson pour sove dan lanmen bann Filisten? (Ziz 15:​14-16)

⁴ Annou vwar en legzanp ki montre lafason ki Sanmson ti annan konfyans dan Zeova e lafason ki Zeova ti ed li. En fwa, en larme Filisten ti vin Lei pour atrap Sanmson. I tre probab ki Lei ti dan lavil Zida. Bann zonm Zida ti per. Alor zot ti deside pour tyonbo Sanmson e donn li avek bann Filisten. Sa bann zonm ki ti sorti dan menm nasyon avek Sanmson, ti anmar Sanmson avek de lakord nef e anmenn li kot bann Filisten. (Ziz 15:​9-13) Me Sanmson “ti ganny lafors atraver lespri sen Zeova” e i ti kapab sorti dan sa bann lakord. Apre i “ti trouv lanmaswar en mal bourik ki ti’n fek ganny touye” e i ti servi sa lanmaswar pour touy 1,000 zonm Filisten.—Lir Ziz 15:​14-16.

 5. Ki mannyer lafason ki Sanmson ti servi lanmaswar en bourik ti montre ki i ti pe depan lo Zeova?

⁵ Akoz Sanmson ti servi lanmaswar en bourik? Sa pa ti en keksoz ki ti normalman ganny servi konman en zarm! San dout, Sanmson ti konnen ki Zeova ki ti pou ed li ranport laviktwar lo bann Filisten. Sa zonm fidel ti servi sa ki ti annan o bor li pour fer lavolonte Zeova. I kler ki Sanmson ti ranport laviktwar lo sa bann zonm parski i ti depan lo Zeova.

 6. Ki leson nou kapab aprann avek sa resi lo Sanmson?

⁶ Nou osi Zeova i kapab donn nou sa lafors ki nou bezwen pour fer en keksoz ki i demann nou pour fer menm si sa keksoz i paret enposib pour fer. Bondye i kapab ed nou dan en fason ki nou pa ti pe ekspekte. Zis parey Zeova ti donn Sanmson lafors ki i ti bezwen, annan konfyans ki Zeova pou ed ou pour fer son lavolonte tan ki ou depan lo Li.—Prov. 16:3.

 7. Ki legzanp ki montre ki i enportan pour rod gidans Zeova?

⁷ Bann frer ek ser ki’n ede pour konstri nou bann landrwa ladorasyon, in montre ki zot annan konfyans dan Zeova. Dan lepase, normalman bann frer ki ti plàn e konstri laplipar nouvo Lasal Rwayonm ek lezot batiman ki lorganizasyon Zeova i servi. Me avek letan lorganizasyon ti bezwen fer bann sanzman parski plis dimoun ti pe batize. Bann frer ki pe diriz lorganizasyon Zeova ti rod gidans Zeova e zot ti esey bann nouvo fason fer. Par egzanp, zot ti aste bann batiman e fer renovasyon lo la. En frer ki apel Robert, ki pandan bann lannen ki’n pase in travay lo plizyer proze konstriksyon partou dan lemonn, i dir: “O konmansman, i pa ti fasil pour personn swiv en nouvo fason fer keksoz.” I ti osi dir: “I ti vreman diferan avek sa ki nou ti abitye fer pandan plizyer lannen. Bann frer ek ser ti pare pour adapte e i kler ki Zeova pe beni sa bann azisteman.” Sa i zis en legzanp lo ki mannyer Zeova pe gid son pep pour fer son lavolonte. Alor i ti pou byen ki tanzantan nou tou nou demann nou lekor: ‘Eski mon pe rod gidans Zeova e mon pare pour fer bann sanzman pour servi li dan sa pli bon fason posib?’

 8. Ki Sanmson ti fer en fwa ler i ti vreman swaf?

⁸ Petet ou’n lir konsernan lezot moman kot Sanmson in fer lezot keksoz ekstraordiner. Sanmson ti touy en lyon e pli tar, i ti al Askelonn e touy 30 Filisten. I ti fer tousala li tousel. (Ziz 14:​5, 6, 19) Sanmson ti konnen ki i pa ti pou kapab fer tou sa bann keksoz san led Zeova. Sa ti evidan enn fwa ler i ti vreman swaf apre ki i ti’n touy 1,000 Filisten. Ki i ti fer? Olye depan lo son prop lekor pour ganny delo pour li bwar, i ti demann Zeova pour ed li.—Ziz 15:18.

 9. Ki Zeova ti fer ler Sanmson ti demann li led? (Ziz 15:19)

⁹ Zeova ti ekout lapriyer Sanmson e i ti ed li. I ti donn Sanmson delo atraver en mirak. Ler Sanmson ti bwar sa delo, “i ti reganny lafors ek kouraz.” (Lir Ziz 15:19.) I paret ki sa nouvo sours delo ti ankor egziste plizyer lannen pli tar ler profet Samyel ti ganny enspire pour ekrir liv Ziz. I kapab ki bann Izraelit ki ti vwar sa sours delo ti rapel ki si zot depan lo Zeova, Zeova pou ed son bann serviter fidel ler zot bezwen led.

10. Ki nou bezwen fer pour nou ganny led Zeova? (Vwar portre.)

¹⁰ Nou osi nou bezwen depan lo Zeova pour ed nou malgre nenport abilite ki nou annan oubyen malgre nenport keksoz ki nou’n fer dan son servis. Nou devret annan limilite e admet ki nou kapab fer sa ki Zeova i demann nou zis ler nou depan lo li. Sanmson ti ganny sa lenerzi ki i ti bezwen ler i ti bwar sa delo ki Zeova ti donn li. Parey Sanmson, nou bezwen aksepte led ki Zeova i donn nou pour nou kapab reste fidel avek li.—Mat. 11:28.

11. Ki mannyer nou kapab depan lo Zeova pour ganny led? Donn en legzanp.

¹¹ Annou vwar legzanp en frer Larisi ki apel Aleksey. Aleksey pe fer fas avek en kantite persekisyon. Kwa ki’n ed li pour andire pandan sa bann moman difisil? Aleksey ek son madanm i annan en bon progranm spirityel. I dir: “Mon kontinyen fer zefor pour fer mon letid personnel e pour lir Labib tou le zour. Tou le bomaten, mwan ek mon madanm, nou fer nou teks pour lazournen e nou priy Zeova ansanm.” Ki nou aprann avek legzanp Aleksey? Olye depan lo nou prop lekor, nou devret depan lo Zeova. Ki mannyer nou kapab fer sa? Nou fer sa par kontinyen fer bann keksoz ki batir nou lafwa parey etidye Labib, priye, asiste renyon e partisip dan predikasyon. Sa pou fer ki an retour, Zeova pou donn nou sa led ki nou bezwen pour nou kapab kontinyen servi li. Zeova ti donn Sanmson lafors e nou asire i kapab donn nou osi lafors.

12. Ki fot Sanmson ti fer e ki mannyer son relasyon ki i ti annan avek Dalila ti diferan avek sa relasyon ki i ti annan avan?

¹² Sanmson ti enparfe parey nou. Alor parfwa i ti fer bann move desizyon. Enn bann desizyon ki i ti fer, ti anmenn bann move konsekans. Apre ki Sanmson ti’n servi konman en ziz pour en pe letan, i “ti tonm anmoure avek en madanm ki ti apel Dalila ki ti reste dan Vale Sorek.” (Ziz 16:4) Oparavan, Sanmson ti’n fiyanse avek en madanm Filisten me “Zeova ki ti’n pous li pour pran sa desizyon, parski Bondye ti pe rod en loportinite pour atak bann Filisten.” Pli tar ler Sanmson ti al Gaza, ki ti en lavil Filisten, i ti reste dan lakaz en prostitye. Ler i ti laba, Bondye ti donn li sa lafors pour tir baro lavil e sa ti fer sa lavil vin fay. (Ziz 14:​1-4; 16:​1-3) Me son relasyon avek Dalila ti diferan. I tre probab ki Dalila ti en Izraelit alor sa pa ti en loportinite pour li lager avek bann Filisten.

13. Ki mannyer Dalila ti met Sanmson dan en move sityasyon?

¹³ Dalila ti aksepte en gro sonm larzan ki bann Filisten ti donn li pour li trai Sanmson. I kapab ki Sanmson ti sitan kontan Dalila en kantite, ki i pa ti realize ki Dalila ti anvi fer. Dalila ti kontinyen demann Sanmson kote son lafors ti sorti e finalman Sanmson ti dir li. Malerezman sa ti en move desizyon ki ti fer li perdi son lafors e pour en serten letan, i ti perdi laprouvasyon Zeova.—Ziz 16:​16-20.

14. Ki ti arive avek Sanmson lefet ki i ti annan konfyans dan Dalila?

¹⁴ Sanmson ti’n met son konfyans dan Dalila olye Zeova e akoz sa, i ti eksperyans bann move konsekans. Bann Filisten ti tyonbo li e tir son lizye. Zot ti met li dan prizon Gaza, sa landrwa kot pli boner i ti’n tir baro lavil. Zot ti fer li vin en lesklav e i ti kraz lagrenn dan moulen. Apre sa, zot ti imilye Sanmson ler zot ti anmenn li dan enn zot bann lafet. Zot ti ofer en gran sakrifis pour zot fo bondye Dagonn parski zot ti krwar ki Dagonn, ki ti’n ed zot atrap Sanmson. Zot ti al sers Sanmson dan prizon e anmenn li dan zot lafet pour zot “riy li.”—Ziz 16:​21-25.

15. Ki mannyer Sanmson ti montre ankor enn fwa ki i ti depan lo Zeova? (Ziz 16:​28-30) (Vwar portre lo kouvertir.)

¹⁵ Sanmson ti fer en gro fot me i ti kontinyen servi Zeova. I ti rod loportinite pour fer sa ki Zeova ti anvi i fer e sa ti pour lager kont bann Filisten. (Lir Ziz 16:​28-30.) Sanmson ti sipliy Zeova: “Les mwan revanze lo bann Filisten.” Sa vre Bondye ti reponn lapriyer Sanmson e i ti donn li sa lafors ekstraordiner ki i ti annan avan. Sa ti fer ki sa zour Sanmson ti touy plis Filisten ki i ti’n deza touye oparavan.

16. Ki nou kapab aprann avek fot ki Sanmson ti fer?

¹⁶ Menm si Sanmson ti eksperyans bann move konsekans pour sa fot ki i ti’n fer, i pa ti aret fer lavolonte Zeova. Menm si nou fer en fot e nou bezwen ganny disiplinen oubyen perdi en privilez, nou pa devret aret servi Zeova. Gard antet ki Zeova i pare pour pardonn nou. (Ps. 103:​8-10) Menm si nou’n fer fot, Zeova i kapab donn nou lafors pour fer son lavolonte zis parey i ti fer avek Sanmson.

17-18. Ki mannyer legzanp Michael i ankouraz ou? (Vwar portre.)

¹⁷ Annou vwar legzanp en zenn frer ki apel Michael. I ti bizi dan servis Zeova. I ti en serviter kongregasyon e en pionye ordiner. Malerezman, i ti fer en fot e sa ti fer ki i ti perdi bann privilez ki i ti annan dan kongregasyon. Michael i dir: “Mon ti vreman bizi dan mon servis pour Zeova. Apre sa, en sel kou mon ti santi ki mon pa ti kapab fer nanryen dan servis Zeova. Mon pa ti zanmen krwar ki Zeova pou abandonn mwan. Me mon ti demann mon lekor si mon lanmitye avek Zeova ti pou revin parey ankor oubyen si mon ti pou kapab servi li dan kongregasyon o maksimonm parey avan.”

¹⁸ Erezman Michael pa ti aret servi Zeova. I dir: “Mon ti travay dir pour aranz mon lanmitye avek Zeova par koz avek li regilyerman dan lapriyer, etidye Labib e medite.” Avek letan, Michael ti reganny son bann privilez dan kongregasyon. Aprezan, i en ansyen e i en pionye ordiner. I dir: “Sa sipor ek lankourazman ki mon ti gannyen sirtou avek bann ansyen ti ed mwan pour realize ki Zeova i ankor kontan mwan. Ankor enn fwa, mon kapab servi dan kongregasyon avek en konsyans kler. Sa leksperyans in montre mwan ki Zeova pou pardonn tou bann ki repantir senserman.” Pareyman, menm si nou fer fot, nou kapab asire ki Zeova pou servi nou e beni nou tan ki nou fer tou sa ki nou kapab pour aret fer sa move keksoz e kontinyen depan lo Zeova.—Ps. 86:5; Prov. 28:13.

19. Ki mannyer legzanp Sanmson in ankouraz ou?

¹⁹ Dan sa lartik, nou’n vwar serten keksoz enteresan ki ti arive dan lavi Sanmson. I ti enparfe me i pa ti aret servi Zeova menm apre sa ki ti’n arive avek Dalila. Zeova pa ti abandonn li. Me Bondye ti servi li ankor dan en fason ekstraordiner. Zeova ti ankor konsider Sanmson konman en zonm ki ti annan en gran lafwa. I pour sa rezon ki i ti fer ekri non Sanmson dan lalis bann serviter fidel ki trouve dan Ebre sapit 11. Nou vreman kontan pour konnen ki nou pe servi en Papa ki kontan nou, ki anvi donn nou lafors sirtou ler nou annan problenm e nou bezwen son led. Alor parey Sanmson, annou sipliy Zeova: “Mazin mwan. O Bondye, silvouple, donn mwan lafors.”—Ziz 16:28.