Zenn, kontinyen fer progre apre ou batenm

 1. Ki bon keksoz en kantite zenn in fer?

TOU le lannen, plizyer milye zenn i batize. Eski ou’n batize? Si wi, ou bann frer ek ser dan kongregasyon i kontan pour ou e Zeova osi i kontan! (Prov. 27:11) Mazin lo tou bann bon keksoz ki ou’n fer ziska aprezan. Petet ou’n etidye Labib o profon pour plizyer lannen. Ou letid Labib in konvenk ou ki Labib i Parol Bondye. Ou’n aprann konn e kontan Loter Labib. Ou lanmour pour Zeova in vin sitan for ki ou’n dedye ou lavi avek li e batize. I en bon desizyon ki ou’n fer.

 2. Ki nou pou vwar dan sa lartik?

² Avan ou ti batize, ou ti fer fas avek en kantite problenm ki ti fer li difisil pour ou reste fidel avek Zeova. Me anmezir letan i pase, ou pou fer fas avek bann nouvo problenm. Satan pou esey fer ou aret kontan Zeova e pour aret servi Li. (Efe. 4:14) Ou pa devret les sa arive. Kwa ki kapab ed ou pour reste fidel avek Zeova e pour gard ou promes pour servi li? Ou bezwen kontinyen “fer zefor” pour vin en Kretyen matir. (Ebr. 6:1) Me ki mannyer ou kapab fer sa?

 3. Ki tou Kretyen i devret fer apre ki zot in batize?

³ Apre ki nou’n batize, nou tou nou bezwen swiv sa konsey ki zapot Pol ti donn bann Kretyen Efez. Pol ti ankouraz zot pour vin “adilt.” (Efe. 4:13) Sa i vedir ki zot bezwen kontinyen fer progre. Pol ti konpar lafason ki en Kretyen i fer progre spirityel avek lafason ki en zanfan i grandi. Bann paran i kontan zot zanfan e zot fyer pour annan sa zanfan. Me sa zanfan pa pou reste zanfan tou son lavi. Avek letan, i pou bezwen aret fer “sa ki en zanfan i fer.” (1 Kor. 13:11) I menm parey pour bann Kretyen. Apre ki nou’n batize, nou bezwen kontinyen fer progre spirityel. Annou vwar serten keksoz ki pou ed nou fer sa.

 4. Ki en keksoz ki kapab ed ou fer progre spirityel? Eksplike. (Filipyen 1:9)

⁴ Kontinyen devlop plis lanmour pour Zeova. Ou deza kontan Zeova en kantite. Me ou kapab devlop plis lanmour pour li. Ki mannyer? Zapot Pol ti mansyonn en fason ki nou kapab fer sa dan Filipyen 1:9. (Lir.) Pol ti priye ki lanmour bann Filipyen “i vin deplizanpli gran.” Sa i montre ki nou kapab devlop plis lanmour pour Zeova. Ki mannyer nou kapab fer sa? Nou kapab fer sa par rod ‘konnesans egzakt e annan bon zizman.’ Pli nou konn Zeova, pli nou kontan li e apresye son bann kalite e fason ki i fer keksoz. Sa pou fer nou pli anvi fer li plezir e nou pa pou anvi fer keksoz ki pou dezapwent li. Nou fer nou mye pour konpran ki Zeova i anvi nou fer e ki mannyer nou kapab fer li.

5-6. Ki mannyer nou kapab devlop plis lanmour pour Zeova? Eksplike.

⁵ Zezi i reflekte bann kalite Zeova dan en fason parfe. Alor ler nou konn Zezi byen, nou kapab devlop plis lanmour pour Zeova. (Ebr. 1:3) Sa pli bon fason pour aprann konn Zezi i par etidye sa kat Levanzil. Si ou napa sa labitid pour lir Labib toulezour, petet ou kapab konmans avek bann resi lo Zezi. Anmezir ki ou lir sa bann resi, konsantre lo son bann kalite. Par egzanp, Zezi ti fer li fasil pour dimoun koz avek li e zot ti kontan pas letan avek li. Sanmenm sa i ti kapab pran bann zanfan dan son lebra. (Mark 10:13-16) Zezi i bon e zantiy e sa ti fer ki son bann disip pa ti per pour dir li ki mannyer zot santi. (Mat. 16:22) Vi ki Zezi i parey son Papa, son legzanp i montre nou ki nou kapab apros Zeova dan lapriyer. Ler nou fer lapriyer, nou kapab devid nou leker avek Zeova. Nou asire ki Zeova pa pou ziz nou. I kontan nou e i pou pran swen avek nou.​—1 Pyer 5:7.

⁶ Zezi ti pran pitye pour bann dimoun. Zapot Matye i dir: “Ler i ti vwar lafoul, i ti pran pitye pour zot, parski zot ti pe ganny maltrete e rezete parey mouton ki napa berze.” (Mat. 9:36) Ki mannyer Zeova i santi? Zezi i dir: “Mon Papa dan lesyel pa anvi ki ni enn sa bann dimoun ki parey en zanfan i perdi.” (Mat. 18:14) Sa bann parol i fer nou kontan parski i montre nou ki Zeova i kontan nou en kantite! Anmezir ki nou aprann konn Zezi pli byen, nou devlop plis lanmour pour Zeova.

 7. Ler ou pas letan avek bann Kretyen martir, ki mannyer sa i kapab ed ou?

⁷ Ou kapab osi aprann pour demontre plis lanmour e vin en Kretyen pli matir, ler ou pas letan e aprann konn bann frer ek ser matir dan ou kongregasyon. Ou pou remarke ki zot zwaye. Zot pa regrete ki zot in deside pour servi Zeova. Demann zot konsernan bann leksperyans ki zot in gannyen dan servis Zeova. Ler ou annan en desizyon enportan pour fer, demann zot konsey. Rapel ki “kot i annan plizyer konseye, keksoz pou reisi.”​—Prov. 11:14.

 8. Ki ou kapab fer si ou annan dout konsernan sa ki Labib i dir?

⁸ Sirmont ou bann dout. Parey i ganny mansyonnen dan paragraf 2, Satan pou esey anpes ou fer progre spirityel. En fason ki i kapab fer sa, i par fer ou annan dout konsernan bann lansennyman ki dan Labib. Par egzanp, serten dimoun i kapab esey fer ou krwar ki Bondye pa’n kree nou e ki lavi in vin par evolisyon. Petet ou pa’n zanmen reflesir lo sa size ler ou ti ankor zanfan. Me la ki ou en adolesan, i kapab ki sa size pe ganny diskite dan lekol. Petet sa ki ou bann ansenyan pe dir i fer sans. Me i kapab ki sa bann ansenyan pa’n zanmen esey rode si i annan en Kreater. Rapel sa prensip ki dan Proverb 18:17 ki dir: “Sa enn ki koz premye dan en dispit i paret annan rezon ziska ki sa lot parti i vin demann li pour donn laprev sa ki i’n dir.” Olye krwar tou sa ki lekol i ansennyen, ou devret etidye o profon bann laverite ki dan Parol Bondye. Fer resers dan nou bann piblikasyon. Koz avek bann frer ek ser ki ti krwar dan evolisyon avan. Demann zot kwa ki ti konvenk zot ki i annan en Kreater ki kontan nou. Bann konversasyon koumsa i kapab ed ou vwar levidans ki i annan en Kreater.

 9. Ki ou aprann avek leksperyans Melissa?

⁹ En ser ki apel Melissa ti fer resers konsernan kreasyon dan nou bann piblikasyon e sa ti ed li sirmont son bann dout.b Melissa i dir: “Bann ansenyan kot lekol i eksplik teori evolisyon dan en fason ki fer dimoun krwar ki i vre. O konmansman mon pa ti anvi fer resers parski mon ti per ki mon ti pou dekouver ki sa teori lo evolisyon i vre. Me mon ti realize ki Zeova i anvi nou asire dan sa ki nou krwar. Alor mon ti konmans fer resers. Mon ti lir liv Is There a Creator Who Cares About You?, brosir Was Life Created? ek brosir The Origin of Life​—Five Questions Worth Asking. I sanmenm ki mon ti bezwen. Mon ti’n devret fer sa pli boner.”

10-11. Kwa ki kapab ed ou reste prop moralman? (1 Tesalonisyen 4:3, 4)

¹⁰ Reziste move dezir. Ler ou en adolesan, i kapab ki sa dezir pour fer sèks i vreman for e petet lezot i met presyon lo ou pour komet imoralite seksyel. Sanmenm sa ki Satan i anvi ou fer. Me kwa ki kapab ed ou pour reste prop moralman? (Lir 1 Tesalonisyen 4:3, 4.) Dan ou lapriyer, dir Zeova ki mannyer ou santi e demann li pour donn ou sa lafors ki ou bezwen. (Mat. 6:13) Gard antet ki Zeova pa anvi pini ou me i anvi ed ou. (Ps. 103:13, 14) Labib osi i kapab ed ou. Melissa, ki’n ganny mansyonnen pli boner, ti vwar li difisil pour aret mazin bann keksoz imoral. I dir: “Mon ti lir Labib toulezour e sa ti ed mwan pour kontinyen lager avek mon bann move dezir. Mon lektir Labib ti fer mwan rapel ki mon pour Zeova e ki mon anvi servi li.”​—Ps. 119:9.

¹¹ Pa esey rezourd ou bann problenm ou tousel. Koz avek ou paran lo ou problenm. Menm si i pa fasil pour koz lo bann keksoz personnel, i enportan ki ou fer li. Melissa i dir: “Mon ti priy Zeova e demann li kouraz e apre mon ti koz avek mon papa lo mon problenm. Mon ti santi mwan pli byen apre sa. Mon ti konnen ki mon ti’n fer Zeova fyer.”

12. Ki mannyer ou kapab fer bann bon desizyon?

¹² Les bann prensip Labib gid ou. Anmezir ki ou grandi, ou paran pou les ou fer serten desizyon ou menm. Me ou napa bokou leksperyans. Ki mannyer ou kapab evite fer en fot ki pou gat ou lanmitye avek Zeova? (Prov. 22:3) En ser ki apel Kari ti eksplike kwa ki ti ed li pour fer bann pli bon desizyon. I ti realize ki en Kretyen matir pa bezwen en lareg pour sak sityasyon. I dir: “Mon ti bezwen konpran bann prensip Labib olye zis swiv bann lareg.” Ler ou pe lir Labib, demann ou lekor: ‘Ki sa resi i dir mwan lo fason panse Zeova? Eski i annan bann prensip ki kapab ed mwan fer sa ki byen? Si wi, ki byenfe mon pou gannyen ler mon aplik sa bann prensip?’ (Ps. 19:7; Iza. 48:17, 18) Ler ou lir Labib e medit lo sa ki ou lir, i pou pli fasil pour ou fer bann desizyon ki fer plezir Zeova. Anmezir ki ou kontinyen fer progre spirityel, ou pou remarke ki ou pa bezwen annan en lareg pour sak sityasyon parski ou pou’n konpran fason panse Zeova.

13. Ki lefe bann bon zanmi i kapab annan lo ou? (Proverb 13:20)

¹³ Swazir bann zanmi ki kontan Zeova. Parey i’n ganny mansyonnen pli boner, bann zanmi ki ou swazir i kapab ed ou pour vin en Kretyen matir. (Lir Proverb 13:20.) En ser ki apel Sara ti pe perdi son lazwa. Me en keksoz ti arive ki ti ed li pour reganny son lazwa. Sara i dir: “Mon ti ganny bann bon zanmi zis a tan. Mon ti zwenn avek en zenn ser tou le semenn pour nou prepar Latour Veyer ansanm. En lot zanmi ti ed mwan pour konmans fer komanter dan renyon. Mon bann zanmi ti annan en bon lenfliyans lo mwan e sa ti ed mwan pour konmans pran lapriyer ek letid personnel pli o serye. Mon ti konmans annan en pli bon lanmitye avek Zeova e sa ti fer mwan reganny mon lazwa.”

14. Ki mannyer Julien ti fer bann bon zanmi?

¹⁴ Ki mannyer ou kapab fer zanmi avek dimoun ki pou annan en bon lenfliyans lo ou? En ansyen ki apel Julien i dir: “Ler mon ti pli zenn, mon ti fer zanmi avek bann ki mon ti travay avek dan predikasyon. Zot ti devoue dan predikasyon e zot ti ed mwan vwar ki predikasyon i gou. Mon ti konmans annan sa lobzektif pour fer servis a plen tan. Mon ti osi realize ki rezon ki mon ti napa en kantite bon zanmi, i akoz mon ti pe fer zanmi avek zis bann ki menm laz avek mwan. Pli tar, mon ti al Betel e mon ti osi fer bann bon zanmi laba. Zot legzanp ti ed mwan pour swazir pli byen mon bann divertisman e sa ti fer mwan vin pli pros avek Zeova.”

15. Ki zapot Pol ti dir Timote konsernan serten dimoun dan kongregasyon dan premye syek? (2 Timote 2:20-22)

¹⁵ Ki ou pou fer si ou realize ki en dimoun dan ou kongregasyon pa en bon frekantasyon pour ou? Zapot Pol ti konnen ki serten dimoun dan kongregasyon dan premye syek pa ti mazin oubyen azir parey en Kretyen. Alor i ti dir Timote pa frekant zot. (Lir 2 Timote 2:20-22.) Nou lanmitye avek Zeova i presye. Nou’n fer en kantite zefor pour vin pros avek Zeova, alor nou pa devret annan bann zanmi ki pou gat nou lanmitye avek Zeova.​—Ps. 26:4.

16. Ki kalite lobzektif ou devret swazir?

¹⁶ Met bann bon lobzektif. Met bann lobzektif ki pou ed ou ranforsi ou lafwa e ed ou vin en Kretyen pli matir. (Efe. 3:16) Par egzanp, ou kapab deside pour fer letid Labib personnel pli souvan e etidye Labib regilyerman. (Ps. 1:2, 3) Petet ou santi ki ou bezwen amelyor ou lapriyer e fer lapriyer pli souvan. Ouswa ou bezwen fer atansyon bann divertisman ki ou swazir e lafason ki ou servi ou letan. (Efe. 5:15, 16) Zeova pou kontan ler i vwar ou pe fer zefor pour vin en Kretyen pli matir.

17. Ki byenfe ou gannyen ler ou ed lezot?

¹⁷ Ler ou ed lezot dimoun, sa pou ed ou vin en Kretyen pli matir. Zezi ti dir: “I annan plis lazwa pour donnen ki pour resevwar.” (Akt 20:35) Ou pou vreman kontan si ou servi ou letan ek lenerzi pour ed lezot. Par egzanp, ou kapab annan sa lobzektif pour ed bann ki pli aze e ki annan dezabilite dan ou kongregasyon. Petet ou kapab ed zot par fer zot konmisyon ouswa par ed zot pour servi zot lekipman elektronik. Si ou en frer, met sa lobzektif pour vin en serviter kongregasyon pour ou kapab ed ou bann frer ek ser. (Fili. 2:4) Ou osi demontre lanmour pour bann ki pa Temwen Zeova par anons sa bon nouvel avek zot. (Mat. 9:36, 37) Si i posib, annan sa lobzektif pour servi Zeova dan en form servis a plen tan.

18. Ki mannyer servis a plen tan i kapab ed ou pour fer progre spirityel?

¹⁸ Servis a plen tan i kapab ed ou fer progre spirityel. Si ou en pionye ordiner, ou kapab ganny sa loportinite pour al Lekol pour bann Predikater Rwayonm. Petet ou kapab al servi dan Betel ouswa travay lo bann proze konstriksyon ki pour lorganizasyon Temwen Zeova. En zenn ser ki apel Kaitlyn e ki en pionye, i dir: “Enn bann keksoz ki’n ed mwan fer progre spirityel apre mon batenm i ler mon’n pas letan avek bann frer ek ser ki annan leksperyans. Zot legzanp ti ankouraz mwan pour etidye Labib plis e pour amelyor mon abilite pour ansennyen.”

19. Ki bann benediksyon ou pou gannyen anmezir ou kontinyen fer progre spirityel?

¹⁹ Anmezir ki ou kontinyen fer progre spirityel, ou pou ganny en kantite benediksyon. Ou pa pou gaspiy ou lenerzi pour fer bann keksoz ki pa enportan. (1 Zan 2:17) Ou pa pou sibir bann move konsekans ki vin avek move desizyon. O kontrer ou pou reisi e ou pou zwaye. (Prov. 16:3) Ou bon legzanp pou ankouraz ou bann frer ek ser, ki swa zot zenn oubyen aze. (1 Tim. 4:12) Pli enportan ankor ou pou annan lape ek lazwa parski ou pe fer plezir Zeova e ou annan en bon lanmitye avek li.​—Prov. 23:15, 16.