“Sa Ziz lo later antye” i toultan fer sa ki byen

 1. Ki mannyer Abraam ti demontre ki i annan konfyans dan lazistis Zeova? (Vwar portre o konmansman sa lartik.)

“ESKI sa Ziz lo later antye pa pou fer sa ki drwat?” (Zenez 18:25, NWT) Abraam ki ti en serviter fidel, pa ti demann sa kestyon akoz i ti dan dout. O kontrer, son kestyon i montre ki i ti annan konfyans ki Zeova pou ziz Sodonm ek Gomor avek lazistis. I ti konvenki ki Zeova pa pou “detrir bann zonm ki drwat ansanm avek sa ki mesan.” Abraam ‘pa ti krwar’ ki Zeova ti pou fer sa. Pli tar Zeova ti dir konsernan li menm: “I en Ros protekter. Son bann aksyon i parfe e tou son bann semen i zis. I en Bondye fidel, zanmen enzis. I zis e drwat.”​—Deterononm 31:19; 32:4.

 2. Akoz i enposib pour Zeova vin enzis?

² Akoz Abraam ti annan konfyans ki Zeova pou toultan fer sa ki byen? Parski Zeova i sa pli bon legzanp lazistis ek ladrwatir. Anfet sa mo “lazistis” ek “ladrwatir” i souvan ganny servi ansanm dan Lekritir Ebre parski zot annan preski menm sinifikasyon. Alor vi ki standar Zeova i toultan zis, i pou toultan ziz byen. Labib i dir: “[Zeova] i kontan lazistis ek ladrwatir.”​—Psonm 33:5.

 3. Donn en legzanp parmi bann lenzistis ozordi.

³ I rekonfortan pour konnen ki Zeova i toultan fer sa ki zis. Par kont, ozordi lemonn i ranpli avek lenzistis. Par egzanp, i annan dimoun ki’n ganny kondannen e ganny mete dan prizon pour krim ki zot pa’n fer. Gras a bann tes DNA, serten in ganny trouve inosan, me sa in arive apre ki zot in pas plizyer lannen dan prizon. Bann tel lenzistis in fer dimoun fristre e ankoler. Par kont, i annan en lot kalite lenzistis ki petet i pli difisil pour siporte. Eski ou konnen kwa?

 4. Ki mannyer lafwa en Kretyen i kapab ganny teste?

⁴ Bann Kretyen i ekspekte sibir lenzistis an deor kongregasyon. Par kont, nou lafwa i kapab ganny teste si nou remarke oubyen eksperyans en keksoz ki paret enzis dan kongregasyon. Si sa i arive, ki mannyer ou pou reazir? Eski ou pou les sa fer ou tonbe?

 5. Akoz i pa devret sirprann nou si nou vwar oubyen sibir lenzistis dan kongregasyon?

⁵ Nou tou nou enparfe e fer bann fot, alor i posib ki en dimoun i kapab enzis anver nou oubyen ki nou osi nou kapab enzis anver en lot dimoun dan kongregasyon. (1 Zan 1:8) Menm si sa pa ariv souvan, bann Kretyen fidel pa sirprann oubyen soke ler i annan en lenzistis. Zeova in donn nou bann bon konsey dan Labib pour ed nou reste fidel si nou sibir lenzistis avek enn nou frer oubyen ser.​—Psonm 55:12-14.

6, 7. Ki lenzistis en frer ti sibir dan kongregasyon e ki bann kalite ki ti ed li?

⁶ Annou vwar leksperyans Willi Diehl. O konmansman 1931, Frer Diehl ti servi fidelman dan Betel, Bern, Laswis. An 1946, i ti asiste wityenm laklas Lekol Gilead New York, Leta-z-ini. Ler i ti fini lekol, i ti ganny anvoye konman sirveyan rezyonal Laswis. Dan son biografi, Frer Diehl ti dir ki an Me 1949, i ti enform biro brans Laswis ki i ti pe fer plan pour li marye. Bann frer responsab ti dir li zot pou retir tou son bann privilez e i pou zis kapab fer pionye. Frer Diehl ti dir: “Mon pa ti ganny drwa fer diskour. Laplipar bann frer ek ser pa ti menm dir nou bonzour e zot ti tret nou konman bann ekskli.”

⁷ Ki mannyer Frer Diehl ti reazir? I ti dir: “Nou ti konnen ki maryaz pa ti kont prensip Labib, alor nou ti priye e met nou konfyans dan Zeova.” Menm si serten bann frer pa ti konpran pwennvi Zeova lo maryaz avek letan zot ti konpran e Frer Diehl ti reganny son bann privilez. Zeova ti rekonpans son fidelite.a (Vwar not.) Annou demann nou lekor: ‘Si mon sibir en tel lenzistis, eski mwan osi mon ti pou demontre pasyans e esper Zeova aranz sa sityasyon? Oubyen eski mon ti pou’n depan lo mwan menm e esey lager kont sa lenzistis?’​—Proverb 11:2; lir Mika 7:7.

 8. Akoz i kapab ki nou ti’n tronpe ler nou ti krwar ki nou oubyen lezot in sibir lenzistis?

⁸ Si ou santi ki i ti annan serten lenzistis dan kongregasyon, mazinen i kapab ki ou’n tronpe. Akoz? Nou enparfe e petet nou pa’n byen konpran sa sityasyon. I kapab osi ki nou pa konn tou detay. Ki swa nou byen konpran ouswa non, nou devret priy Zeova lo sa sityasyon, depan lo li e reste fidel. Sa pou anpes nou vin “ankoler kont [Zeova].”​—Lir Proverb 19:3.

 9. Ki bann legzanp nou pou vwar dan sa lartik ek sa lot ki swiv?

⁹ Annou aprann avek trwa lenzistis ki pep Zeova ti sibir dan letan Labib. Dan sa lartik, nou pou koz lo Zozef, ayer pti zanfan Abraam e sa ki i ti pas ladan avek son bann frer. Dan sa lot lartik, nou pou diskit lo fason ki Zeova ti tret Lerwa Aab e leksperyans zapot Pyer dan lavil Antyos, Siri. Anmezir nou diskit lo sa bann legzanp, rod bann fason ki pou ed ou reste konsantre lo Zeova e gard ou relasyon avek li, espesyalman ler ou krwar ki ou’n sibir en lenzistis.

10, 11. (a) Ki bann lenzistis Zozef ti sibir? (b) Ki loportinite Zozef ti annan ler i ti dan prizon?

¹⁰ Zozef ti en serviter fidel Zeova ki ti sibir lenzistis avek bann etranze. Me sa ki ti pli fermal pour li ti ler i ti sibir lenzistis avek son bann prop frer. Ler Zozef ti annan 17 an, son bann frer ti pran li pardfors e vann li konman en lesklav. Apre sa i ti ganny anmennen Lezip. (Zenez 37:23-28; 42:21) Pli tar, dan sa pei etranze, Zozef ti ganny akize konmkwa i ti pe esey vyol en madanm e i ti ganny met dan prizon san zize. (Zenez 39:17-20) Pour 13 an, Zozef ti soufer konman en prizonnyen e konman en lesklav. Ki leson nou kapab aprann avek leksperyans Zozef ki pou ed nou si nou sibir lenzistis avek nou frer ek ser?

¹¹ Pandan ki Zozef ti dan prizon, sa responsab labwason lerwa ti osi ganny mete dan prizon. En zour swar, sa responsab labwason lerwa ti ganny en rev ki Zeova ti ed Zozef enterprete. Zozef ti eksplik sa responsab labwason lerwa ki i ti pou ganny large dan prizon e ki i ti pou servi Faraon ankor. Apre Zozef ti pran sa loportinite pour eksplik son sityasyon avek sa zonm. Nou kapab aprann bokou avek sa ki Zozef ti dir, me osi aprann avek sa ki i pa ti dir.​—Zenez 40:5-13.

12, 13. (a) Ki mannyer nou konnen ki Zozef pa ti zis aksepte lenzistis? (b) Ki Zozef pa ti dir sa responsab labwason lerwa?

¹² Lir Zenez 40:14, 15. Remarke ki Zozef ti dir ki i ti “ganny anmennen pardfors.” Sa lekspresyon ki ganny servi dan Labib i osi vedir vole. Sa i montre klerman ki i ti en viktim lenzistis. Zozef ti osi dir klerman ki i pa ti’n fer nanryen mal. Sanmenm sa i ti demann sa responsab labwason lerwa pour koz lo li avek Faraon. Ki ti son lobzektif? I ti dir: “Pour ki mon kapab sorti dan sa landrwa.”

¹³ Eski Zozef ti zis aksepte son sityasyon san fer nanryen pour rezourd son problenm? Non! Zozef ti konnen ki i ti en viktim bokou lenzistis. Sanmenm i ti eksplik son sityasyon avek sa responsab labwason lerwa an krwayan ki i ti pou kapab ed li. Rapel ki Labib pa dir ki Zozef ti rakont avek personn, ni menm Faraon, ki son bann frer ki ti’n kidnap li. Anfet, ler son bann frer ti vin Lezip e fer lape avek Zozef, Faraon ti akey zot e envit zot pour reste Lezip e pour apresye “meyer landrwa dan Lezip.”​—Zenez 45:16-20.

14. Kwa ki pou anpes nou dir en keksoz blesan si nou sibir lenzistis dan kongregasyon?

¹⁴ Si nou santi ki nou’n sibir lenzistis dan kongregasyon, nou devret fer atansyon pour pa fann rimer konsernan sa sityasyon. I vre ki nou devret demann led avek bann ansyen e dir zot si en frer in komet en pese grav. (Levitik 5:1) Par kont, dan bokou ka kot i pa enplik en pese grav, i kapab posib pour fer lape avek en frer san dir personn, ni menm bann ansyen. (Lir Matye 5:23, 24; 18:15.) Alor, annou reste fidel e aplik bann prensip Labib dan sa bann sityasyon. Par ler, nou kapab realize ki nou’n mal konpran en sityasyon e nou pa ni menm viktim en lenzistis. Pa nou ti pou kontan ler nou konnen nou pa’n fer en sityasyon vin pli grav par dir bann move keksoz lo nou frer oubyen ser! Mazinen ki swa nou annan rezon ouswa non, ler nou dir en keksoz blesan, sa pa pou zanmen amelyor en sityasyon. Fidelite anver Zeova ek nou bann frer ek ser pou anpes nou fer en tel fot. Sa psalmis ti dir ki i annan “enn ki san repros.” En tel dimoun “pa koz dimal lo son prosen, ki pa fer ditor son zanmi.”​—Psonm 15:2, 3; Zak 3:5.

15. Ki mannyer relasyon ki Zozef ti annan avek Zeova ti en benediksyon?

¹⁵ Nou kapab aprann en lot leson enportan avek Zozef. Pandan sa 13 an ki i ti’n sibir lenzistis, Zozef ti montre ki i ti annan menm pwennvi avek Zeova. (Zenez 45:5-8) I pa ti zanmen blanm Zeova pour sa ki ti arive avek li. Byensir, Zozef pa ti bliy sa lenzistis ki i ti pas ladan me i pa ti vin ankoler. Pli enportan ankor i pa ti les lenperfeksyon ek bann move aksyon lezot separ li avek Zeova. Parski Zozef ti fidel, i ti kapab vwar ki mannyer Zeova ti koriz sa lenzistis e beni li ek son fanmir.

16. Akoz nou devret apros pli pre avek Zeova si nou sibir lenzistis dan kongregasyon?

¹⁶ Dan menm fason, nou devret apresye e protez nou relasyon avek Zeova. Nou pa devret zanmen les lenperfeksyon bann frer ek ser separ nou avek sa Bondye lanmour ki nou kontan e adore. (Romen 8:38, 39) O kontrer, si nou sibir lenzistis dan kongregasyon, annou imit Zozef e vin pli pros avek Zeova. Esey annan menm pwennvi avek Li lo bann sityasyon. Apre ki nou’n fer tou sa ki nou kapab pour rezourd sa problenm avek bann prensip Labib, nou bezwen les keksoz dan lanmen Zeova. Nou kapab annan konfyans ki i pou aranz keksoz dan son letan ek fason apropriye.

17. Ki mannyer nou kapab demontre ki nou annan konfyans dan “sa Ziz lo later antye”?

¹⁷ Otan ki nou reste dan sa move lemonn, nou kapab ekspekte sibir lenzistis. I rar ki petet ou, ouswa en dimoun ki ou konnen i sibir oubyen vwar en keksoz ki paret enzis dan kongregasyon. Me pa les sa fer ou tonbe. (Psonm 119:165) O kontrer, reste fidel avek Bondye, demann li led dan lapriyer e depan lo li. Gard antet ki akoz lenperfeksyon, ou kapab mal konpran en sityasyon e i tre probab ki ou pa konn tou detay. Alor, annou imit legzanp Zozef e evite dir bann keksoz negatif ki kapab fer en move sityasyon vin pli pir. Finalman dan plas depan lo ou menm, ou devret determinen pour reste fidel e esper avek pasyans ziska ki Zeova i aranz sa sityasyon. Alor ou pou ganny laprouvasyon Zeova ek son benediksyon parey Zozef ti gannyen. Ou kapab asire ki Zeova, “sa Ziz lo later antye,” pou toultan fer sa ki byen parski “tou son bann semen i zis.”​—Zenez 18:25; Deterononm 32:4.

18. Ki nou pou vwar dan sa lot lartik?

¹⁸ Dan sa lot lartik, nou pou vwar ankor de legzanp lenzistis parmi pep Zeova dan letan Labib. Sa bann legzanp pou ed nou vwar ki mannyer limilite ek pardon pou ed nou annan menm pwennvi avek Zeova lo lazistis.