LESON 26

Akoz lemal ek soufrans i egziste?

Edisyon ki enprimen

I normal pour en dimoun demande “Akoz?” ler en maler i arive. Nou byen kontan ki Labib i kapab donn bann larepons kler pour sa kestyon!

1. Ki mannyer Satan ti entrodwi lemal dan lemonn?

Satan ti rebel kont Bondye. I ti anvi domin lo lezot, alor i ti enfliyans sa premye koup imen, Adan ek Ev, pour rebel kont Bondye zot osi. Satan ti fer sa par koz manti avek Ev. (Zenez 3:1-5) I ti fer li krwar ki Bondye pe priv li en bon keksoz, sa ti mal. Dapre li bann imen ti pou pli byen si zot pa ti obeir Bondye. Satan ti koz manti pour premye fwa ler i ti dir Ev ki i pa pou mor. Se pour sa ki Labib i dir ki Satan “i en manter e i papa mansonz.”—Zan 8:44.

2. Ki Adan ek Ev ti swazir pour fer?

Zeova ti vreman zenere anver Adan ek Ev. I ti’n dir zot ki zot kapab manz fri sorti dan tou pye sa zarden eksepte zis enn. (Zenez 2:15-17) Me kantmenm sa, zot ti deside pour manz sa fri. Ev “ti kas fri dan sa pye e i ti manze.” Pli tar, Adan “ti manze” li osi. (Zenez 3:6) Zot tou le de zot ti dezobeir Bondye. Vi ki Adan ek Ev ti parfe, i ti fasil pour zot fer sa ki byen. Me zot ti volonterman dezobeir Zeova. Ler zot ti fer sa, zot ti fer pese e dan en sans zot ti pe dir ki Zeova napa drwa dir zot ki pour fer. Zot desizyon ti anmenn bokou soufrans lo zot.—Zenez 3:16-19.

3. Ki mannyer desizyon Adan ek Ev in afekte nou?

Ler Adan ek Ev ti fer pese, zot ti vin enparfe e zot ti pas sa lenperfeksyon avek tou zot desandans. Labib i koz lo Adan ler i dir: “Atraver en sel zonm pese in antre dan lemonn e pese in anmenn lanmor, alor tou dimoun i mor.”—Romen 5:12.

Nou soufer pour diferan rezon. Parfwa nou soufer akoz bann move desizyon ki nou fer. Parfwa nou soufer akoz move desizyon ki lezot dimoun i fer. Nou kapab osi soufer akoz senpleman nou’n dan en landrwa kot en maler in arive.—Lir Eklezyas 9:11.

AL PLI O PROFON

Vwar akoz Bondye pa responsab pour lemal ek soufrans ki egziste dan sa lemonn ozordi e ki mannyer i santi ler i vwar nou soufer.

4. Sa enn ki responsab pour nou soufrans

Bokou dimoun i krwar ki Bondye pe kontrol sa lemonn. Eski sa i leka? Zwe sa VIDEO.

VIDEO: Lekel ki pe kontrol sa lemonn? (1:24)

Lir Zak 1:13 ek 1 Zan 5:19 e apre reponn sa kestyon:

Eski Bondye i responsab pour soufrans ek lemal?

5. Ki dominasyon Satan in anmennen?

Zwe sa VIDEO.

VIDEO: Akoz Bondye i permet soufrans?—Ekstre (3:07)

Lir Zenez 3:1-6 e apre reponn sa bann kestyon:

Ki mannyer Satan ti koz manti?—Vwar verse 4 ek 5.
Ki mannyer Satan ti sizere ki Zeova ti pe priv bann imen en bon keksoz?
Dapre Satan, eski bann imen ti bezwen Zeova pour diriz zot pour zot ere?

Lir Eklezyas 8:9 e apre reponn sa kestyon:

Ki’n arive pandan sa letan ki Zeova pa pe diriz sa lemonn?

Diferan portre: Bann senn ki montre kondisyon later depi son kreasyon ziska dan Paradi a lavenir. A. Paradi lo later. B. Gouvernman imen ki’n dirize pour plizyer syek e ki’n ranpli lemonn avek fo larelizyon, divizyon, lager ek polisyon. Bann portre serten sa bann gouvernman pwisan parey Lezip, Lasin, Lagres, Rom, Langleter ek Leta-z-ini. C. Bann dimoun pe viv lo later ki’n revin en Paradi.

Adan ek Ev ti parfe e zot ti viv dan Paradi. Me zot ti ekout Satan e rebel kont Zeova
Apre ki zot ti rebel, lemonn ti ranpli avek pese, soufrans ek lanmor
Zeova pou met en lafen avek pese, soufrans ek lanmor. Bann imen pou revin parfe ankor e zot pou viv dan Paradi

6. Ki mannyer Zeova i santi ler i vwar nou soufer?

Eski Zeova pa fatig li ler i vwar nou soufer? Get sa ki Lerwa David ek zapot Pyer ti ekri. Lir Psonm 31:7 ek 1 Pyer 5:7 e apre reponn sa kestyon:

Ki mannyer ou santi ler ou konnen ki Zeova i vwar ou soufrans e i santi ou douler?

7. Byento Bondye pou elimin tou soufrans

Lir Izai 65:17 ek Revelasyon 21:3, 4 e apre reponn sa kestyon:

Akoz i rekonfortan pour konnen ki Zeova pou retir tou sa ki fer nou soufer?

Eski ou ti konnen?

Ler Satan ti koz manti lo Zeova, i ti sali son repitasyon konman en bon Dirizan ki zis. Byento, ler Zeova pou met en lafen avek tou soufrans, i pou retir sa repros lo son non. Andotmo, i pou prouve ki i sa pli bon Dirizan. Defann non Zeova ek son repitasyon i sa size pli enportan dan liniver.—Matye 6:9, 10.

SERTEN DIMOUN I DIR: “Soufrans i form parti plan Bondye pour imen.”

Ki ou pou dir?

REZIMEN

Satan ek sa premye koup imen ki prensipalman responsab pour lemal dan lemonn. Zeova i santi nou douler ler nou soufer e tre byento i pou fer nou aret soufer.