Elisa ti vwar bann saret dife​—Eski ou osi?

Lerwa Siri ti pe rod Elisa, profet Bondye, e i ti tay deryer li ziska Dotann, en lavil dan montanny ki ti antoure avek miray. Dan lannwit, lerwa Siri ti anvoy bann seval, saret lager, ek son latroup solda Dotann. Lo granmaten, son larme ti’n anserkle sa lavil.​—2 Rwa. 6:13, 14.

Kan serviter profet Elisa ti leve e al deor, i ti vwar sa bann ki ti pe vin atrap sa profet. I ti kriye: “Ar, mon met! Ki nou pou fer?” Me Elisa ti reponn: “Pa bezwen per, parski i annan plis avek nou ki avek zot.” Apre sa, Elisa ti konmans priye e dir: “O Zeova, ouver son lizye, silvouple, pour ki i kapab vwar.” Sa resi i dir: “Deswit Zeova ti ouver lizye sa serviter pour ki i kapab vwar, e gete! partou lo montanny ti ranpli avek seval ek saret lager ki ti annan dife, toultour Elisa.” (2 Rwa. 6:15-17) Ki nou kapab aprann avek sa resi ek lezot levennman dan lavi Elisa?

Elisa ti reste kalm kan larme Siryen ti’n anserkle lavil akoz i ti annan konfyans dan Zeova e i ti pe vwar lafason ki Zeova ti pe servi son pwisans pour protez li. Ozordi, nou pa ekspekte vwar mirak, me nou konnen ki Zeova pe protez son pep konman en group. Dan en sans nou osi nou pe ganny antoure avek seval ek saret dife. Si nou “vwar” zot avek nou lizye lafwa e touzour depan lo Bondye, nou pou “viv an sekirite” e nou pou ganny benediksyon Zeova. (Ps. 4:8) Annou egzamin byenfe ki nou kapab gannyen dan sa ki ti ariv Elisa.

ELISA I KONMANS SERVI ELIYA

En fwa, kan Elisa ti pe travay dan en plantasyon, profet Eliya ti aprose e anvoy son lenz ofisyel lo Elisa. Elisa ti’n fini konnen ki sa ti vedir. I ti fer en lafet, e dir orevwar son papa ek son manman, e apre i ti kit lakour pour vin serviter Eliya. (1 Rwa. 19:16-21) Vi ki Elisa ti’n pare pour servi Zeova a plen tan, i ti vin konman en lenstriman dan lanmen Zeova e finalman i ti pran plas Eliya konman profet.

Elisa ti servi Eliya pour petet apepre si-z-an. Pandan sa letan, se Elisa ki ti “vid delo dan lanmen Eliya.” (2 Rwa. 3:11) Dan sa letan, bann dimoun ti abitye manz avek zot lanmen, san fourset, kwiyer ouswa lezot keksoz ki ganny servi pour manz avek. Apre repa, en serviter ti vid delo dan lanmen son met pour lav son lanmen. Alor, omwen serten travay Elisa ti senp. Kantmenm sa, i ti konsider li konman en privilez pour vin serviter Eliya.

Ozordi, bokou Kretyen osi i partisip dan diferan form servis a plen tan. Par fer sa, zot lafwa i motiv zot e zot devlop sa dezir pour servi zot lenerzi plennman dan servis Zeova. Pour serten, zot bezwen kit zot lakour e al travay dan Betel, lo proze konstriksyon ek lezot ankor, e sa i kapab paret konman bann travay senp. Okenn Kretyen pa devret konsider zot servis konman en keksoz ki napa lenportans oubyen pa fer sans, akoz pour Zeova tou travay i annan gran valer.​—Ebr. 6:10.

ELISA TI KONSANTRE LO SON MISYON

Avan ki Bondye ti ‘pran Eliya e anmenn li ver lesyel dan en tanpet divan,’ i ti fer li sorti Gilgal pour al Betel. Eliya pa ti oule ki son konpanyon i akonpanny li, me Elisa ti dir li: “Mon pa pou kit ou.” Pandan zot vwayaz, de fwa ankor Eliya ti ankouraz Elisa pour reste deryer, me i pa ti oule. (2 Rwa. 2:1-6) Zis parey Rit ti atase avek Naomi, Elisa osi ti atase avek Eliya. (Rit 1:8, 16, 17) Akoz? Parski Elisa ti apresye sa privilez ki i ti’n gannyen avek Bondye konman serviter Eliya.

Elisa in kit en bon legzanp pour nou. Si nou ganny serten privilez dan lorganizasyon Bondye, i pou annan en gran valer pour nou si nou gard antet ki nou pe servi Zeova. Napa en pli gran loner ki sa.​—Ps. 65:4; 84:10.

“DEMANN MWAN SA KI OU OULE MON FER POUR OU”

Pandan zot vwayaz, Eliya ti dir Elisa: “Demann mwan sa ki ou oule mon fer pour ou avan ki mon kit ou.” Zis parey demann ki Salomon ti fer plizyer lannen pli boner ti an armoni avek lavolonte Bondye, pour Elisa osi ti parey. I ti demande pour ‘ganny de par lespri Eliya.’ (1 Rwa. 3:5, 9; 2 Rwa. 2:9) Normalman an Izrael, premye ne en zonm ki ti pou ganny de par son leritaz. (Det. 21:15-17) Anfet, Elisa ti pe demande pour li ganny rekonnet konman zeritye spirityel Eliya. An plis ki sa, i kler ki Elisa ti anvi sa menm lespri kouraze ki Eliya ti annan, setadir pour “vreman zalou pour Zeova.”​—1 Rwa. 19:13, 14.

Ki mannyer Eliya ti reponn demann son serviter? Sa profet ti dir, “Ou’n demann en keksoz difisil. Si ou vwar ler mon ganny pran avek ou, sanmenm sa ki devret ariv ou, me si ou pa vwar, i pa pou arive.” (2 Rwa. 2:10) Aparaman, larepons Eliya ti annan de sinifikasyon. Premyerman, zis Bondye ki ti kapab dir si Elisa ti pou ganny sa ki i ti’n demande. Dezyenmman, pour ki Elisa i ganny sa ki i ti’n demande, i ti pou bezwen pare pour reste avek Eliya, nenport kwa ki arive.

SA KI ELISA TI VWAR

Ki mannyer Bondye ti vwar demann Elisa pour ganny de par lespri Eliya? Sa resi i dir: “I ti arive ki, letan ki zot ti pe marse e an menm tan diskite, gete!, en saret dife ek bann seval dife ti fer en separasyon ant zot de; e Eliya ti mont dan lesyel dan en tanpet divan. Pandan sa letan, Elisa ti pe vwar tou sa la.”a Sa ti larepons Zeova pour sa ki Elisa ti’n demande. Elisa ti arive vwar Eliya ganny pran avek li, i ti ganny de par lespri Eliya, e i ti vin zeritye spirityel sa profet.​—2 Rwa. 2:11-14.

Elisa ti pran lenz ofisyel Eliya ki ti’n tonbe e met lo li. Sa lenz ti idantifye Elisa konman profet Bondye aprezan. Plis laprev son privilez ti evidan kan i ti fer en mirak par separ Larivyer Zourden an de.

Lefet ki i ti’n vwar ler Eliya ti mont dan lesyel dan sa tanpet divan, san dout sa ti annan en gran lefe lo Elisa. Apre tou, pa tou le zour ki en dimoun i vwar en saret dife ek bann seval dife! Tou sa la ti donn laprev ki Zeova ti’n reponn Elisa pour sa ki i ti’n demande. Kan Bondye i reponn nou lapriyer, nou pa ganny en vizyon saret dife ek seval dife. Me nou kapab konpran ki Bondye i servi son gran pwisans pour fer sir ki son lavolonte i ganny fer. Ler nou obzerv lafason ki Zeova i beni son lorganizasyon lo later, annefe i konmsi nou pe “vwar” son saret dan lesyel pe travay.​—Ezek. 10:9-13.

Elisa ti vwar en kantite laprev ki ti konvenk li ki Zeova i annan en kantite pwisans. Anfet, lespri sen Bondye ti permet sa profet pour fer 16 mirak, de fwa plis ki sa ki Eliya ti fer.b Dezyenm fwa ki Elisa ti vwar bann seval ek saret dife ti pandan sa sityasyon ki ti arive Dotann ki ganny dekrir o konmansman sa lartik.

ELISA TI ANNAN KONFYANS DAN ZEOVA

Elisa ti reste kalm menm si i ti pe ganny antoure par son bann lennmi Dotann. Akoz? Parski i ti’n devlop en lafwa for dan Zeova. Nou osi nou bezwen annan sa menm lafwa. Alor, annou priye pour ganny lespri sen Bondye pour ki nou kapab demontre lafwa ek lezot laspe fri lespri.​—Lik 11:13; Gal. 5:22, 23.

Sa lensidan Dotann ti donn Elisa bon rezon pour annan konfyans dan Zeova e dan son larme lanz ki donn proteksyon. Sa profet ti realize ki Zeova ti’n anvoy son bann lanz pour anserkle sa lavil ek bann solda. Par fer sa bann lennmi pa vwar kler, Bondye ti fer en mirak pour sov Elisa ek son serviter. (2 Rwa. 6:17-23) Dan sa letan difisil, parey dan lezot sityasyon, Elisa ti demontre lafwa e met son konfyans total dan Zeova.

Parey Elisa, annou met nou konfyans dan Zeova. (Prov. 3:5, 6) Si nou fer sa, “Bondye li menm pou demontre faver anver nou e beni nou.” (Ps. 67:1) I vre, nou pa antoure avek bann saret ek seval dife. Me, pandan sa “gran ladetres” ki pe vini, Zeova pou protez nou konman en group frer ek ser dan lemonn antye. (Mat. 24:21, NW; Rev. 7:9, 14) Alor, ziska sa letan, annou touzour rapel ki “Bondye i en refiz pour nou.”​—Ps. 62:8.

[Not anba lo paz]

[Portre lo paz 28]

[Bwat lo paz 30]

SERTEN LAVIKTWAR LEGAL

243 Lakantite laviktwar Temwen Zeova in gannyen dan bann gran lakour dan lemonn

Lafrans — 8.2 milyon dolar

Total (an dolar Ameriken) ki’n ganny rann avek Temwen Zeova le 11 Desanm 2012, par gouvernman Lafrans apre en batay legal ki’n al pour 15 an

Lagres — Konsil Leta

Le 2 Novanm 2012, Konsil Leta ti aksepte ki Temwen Zeova i ganny rekonnet konman en larelizyon, e ki zot annan tou drwa pour annan en landrwa pour zot ladorasyon

20 Ka ki’n ganny ranporte dan Lakour Eropeen pour Drwa Imen depi Avril 2000

Sid Kore — Zizman Komite Drwa Imen, Nasyon-z-ini

Le 25 Oktob 2012 - Sid Kore i oblize donn konpansasyon sa 388 Temwen Zeova ki zot drwa ti’n ganny vyole