I ti saz, kouraze e pare pour fer sakrifis

1-3. (a) Ki mannyer Ester ti santi li ler i ti apros tronn son msye? (b) Ki mannyer lerwa ti reazir ler i ti vwar li?

ESTER pe apros tronn lerwa dousman dousman, son leker pe bat for. Imazin sa silans ki’n ranpli sa gran lasal rwayal dan pale Pers dan lavil Siz. I sitan trankil ki Ester i kapab tann son prop lepa ek tapaz son lenz rwayal ler i pe marse. I enportan ki i pa les li ganny distrer par labote ekstraordiner sa lakour rwayal, sa bann gran kolonn, sa zoli plafon dekore ki’n ganny fer avek dibwa sorti Liban. Tou son latansyon i lo sa zonm ki pe asize lo tronn, sa zonm ki pou deside si i pou viv oubyen mor.

² Regar lerwa in fikse lo Ester anmezir i aprose e i lev son baton lerwa annor dan son direksyon. Sa aksyon i senp, me i vedir lavi pour Ester. Par sa, lerwa i montre ki i’n pardonn Ester pour sa lofans ki i’n komet, akoz i’n vin devan lerwa san en lenvitasyon. Ler i ariv kot tronn, Ester i tous baton lerwa avek rekonesans.​—Ester 5:1, 2.

³ Tou keksoz lo Lerwa Asweris i montre son gran larises ek pouvwar. Bann lenz ki bann lerwa Pers ti annan sa letan ti kapab kout plizyer santenn milyon dolar. Pourtan, Ester i kapab vwar lafeksyon dan lizye son msye e i konnen ki son msye i kontan li. I dir: “Ki ou gannyen, O Ester larenn, e ki ou anvi demande? Ziska lanmwatye mon rwayonm, mon pou donn ou!”​—Ester 5:3.

 4. Ki defi Ester ti bezwen fer fas avek?

⁴ Ester in demontre en lafwa ek kouraz remarkab. I’n al devan lerwa pour protez son pep kont en konplo pour detri zot tou. Pour le moman, tou sa ki i’n fer in reisi, me i annan ankor bann pli gran defi ki pe esper li. I pou bezwen konvenk sa lerwa fyer ki son pli bon konseye i en move zonm ki’n anbet li pour touy tou bann Zwif. Ki mannyer i pou konvenk sa lerwa e ki nou kapab aprann atraver son lafwa?

5, 6. (a) Ki mannyer Ester ti aplik sa prensip dan Eklezyast 3:1, 7? (b) Ki mannyer Ester ti demontre lasazes ler i ti apros son msye?

⁵ Eski Ester ti bezwen revel sa problenm avek lerwa devan tou dimoun dan lakour rwayal? Si i ti’n fer sa, i ti pou imilye lerwa e donn letan son konseye Amann pour reponn sa lakizasyon. Alor, ki Ester ti fer? Plizyer santenn lannen avan, Lerwa Salomon ti ganny enspire pour ekrir: “Pour tou keksoz i annan en letan fikse, en letan pour reste trankil ek en letan pour koze.” (Ekle. 3:1, 7) Nou kapab imazin papa adoptif Ester, Mordekay, sa zonm fidel, pe ansenny sa zenn fiy sa bann prensip pandan ki i ti pe grandi avek li. Ester ti’n sirman konpran lenportans pour swazir en moman apropriye pour li koze.

⁶ Ester ti dir: “Si i paret bon pour lerwa, ki lerwa ek Amann i vin sa festen ki mon’n prepare pour li ozordi.” (Ester 5:4) Lerwa ti aksepte e fer apel Amann. Eski ou vwar ki mannyer Ester ti koz dan en fason saz? I ti prezerv dinyite son msye e rod en letan ek landrwa pli favorab pour li revel avek son msye son bann konsern.​—Lir Proverb 10:19.

7, 8. Ki mannyer sa premye festen ki Ester ti’n prepare ti pase? Akoz Ester ti bezwen espere pour koz avek lerwa?

⁷ San okenn dout, Ester ti byen prepar sa festen e i ti fer sir ki i ti annan tou sa ki son msye ti kontan. Dan sa festen, i ti’n bezwen annan bon diven pour ki son msye i dan lazwa. (Ps. 104:15) Asweris ti’n vreman pas en bon moman e sa ti pous li pour demann Ester ankor en fwa kwa ki i ti anvi koz lo la. Eski la i ti sa bon moman pour li koze?

⁸ Ester pa ti vwar sa moman favorab. Plito, i ti envit lerwa ek Amann pour en dezyenm festen son lannmen. (Ester 5:7, 8) Akoz i ti tarde pour koze? Pa bliye ki tou bann Zwif ti pe al ganny met a mor akoz lord lerwa. Pour sa rezon, Ester ti bezwen fer sir ki i ti koz dan sa pli bon moman. Alor, i ti espere e i ti fer en lot festen pour li ganny en lot loportinite pour montre son msye sa gran respe ki i ti annan pour li.

 9. Ki valer pasyans i annan e ki mannyer nou kapab imit legzanp Ester dan sa domenn?

⁹ Pasyans i en kalite ki rar e presye. Menm si i ti dezespere e anvi dir lerwa sa ki ti pe arive, Ester ti esper avek pasyans sa moman apropriye pour fer li. Nou kapab aprann en kantite atraver son legzanp, akoz nou tou nou’n deza vwar en keksoz mal ki ti merit ganny korize. Si nou anvi konvenk en dimoun ki annan lotorite pour rezourd en problenm, petet i ti a byen si nou imit legzanp pasyans ki Ester ti demontre. Proverb 25:15 i dir: “Avek pasyans, nou kapab persyad en komandan e en lalang dous i kapab kas en lezo.” Si nou esper sa bon moman e koz avek ladouser, parey Ester ti fer, menm lopozisyon ki kapab dir parey en lezo i kapab ganny kase. Eski Zeova ti beni pasyans ek lasazes ki Ester ti demontre?

10, 11. Akoz Amann ti pran lakoler ler i ti sorti sa premye festen e ki son madanm ek zanmi ti ankouraz li pour fer?

¹⁰ Pasyans Ester ti fer ki finalman tou keksoz ti sanz en sel kou. Amann ti kit sa premye festen “dan lazwa ek lakontantman” akoz lerwa ek larenn ti kontan li plis ki lezot. Me kan Amann ti pas kot baro sato, i ti vwar Mordekay, sa Zwif ki ti ankor pe refize salye li. Parey nou ti’n vwar dan sapit avan, rezon ki Mordekay pa ti oule salye li ti napa nanryen pour fer avek en mank respe. Me o kontrer, sa ti annan pour fer avek son konsyans ek son relasyon avek Zeova son Bondye. Toudmenm, “en sel kou [Amann] ti pran en gran lakoler.”​—Ester 5:9.

¹¹ Ler Amann ti rakont son madanm ek son bann zanmi sa ki ti pe arive avek Mordekay, zot ti ankouraz li pour fer en gran poto apepre 22 met oter e apre pour demann lerwa permisyon pour pann Mordekay lo la. Amann ti kontan sa lide e deswit i ti donn lord pour fer sa poto.​—Ester 5:12-14.

12. Akoz sa lerwa ti demande ki sa zofisye i lir sa liv ki rakont bann keksoz ki’n pase dan lakour lerwa e ki lerwa ti dekouver?

¹² Sa menm zour swar, en keksoz drol ti ariv avek lerwa. Labib i dir nou, “lerwa pa ti ganny sonmey,” alor i ti demann enn son zofisye pour lir dan sa liv ki rakont bann keksoz ki’n pase dan lakour lerwa. Sa ti enkli sa rapor lo sa konplo pour touy Lerwa Asweris. I ti mazin sa ki ti arive, sa bann kriminel ti’n ganny arete e egzekite. Me ki ti’n arive avek Mordekay, sa zonm ki ti’n raport sa konplo? Lerwa ti demande ki mannyer Mordekay ti’n ganny rekonpanse. Nanryen pa ti’n ganny fer pour rekonpans sa zonm.​—Lir Ester 6:1-3.

13, 14. (a) Ki mannyer keksoz ti konmans al mal pour Amann? (b) Ki madanm Amann ek son bann zanmi ti remarke?

¹³ Sa ti fatig lerwa e i ti demande lekel zofisye ki ti disponib pour ed li koriz sa ki ti’n arive. Zis mazinen lekel ki deside vin boner sa zour? Amann! I paret ki i ti’n vin boner pour demann lerwa permisyon pour egzekit Mordekay. Me avan Amann ti fer son demann, lerwa ti demann li ki pli bon fason pour rekonpans en dimoun ki ti’n ganny laprouvasyon lerwa. Amann ti panse ki lerwa ti pe mazin li. Alor, i ti sizer pli bon fason pour onor sa dimoun. I ti dir: Met lo li en lenz rwayal e fer bann o zofisye parad avek li otour lavil Siz lo seval lerwa, anmezir ki zot fer tou dimoun konnen ki i sa enn ki pe ganny onore par lerwa. Zis mazin lekspresyon lo figir Amann ler i ti tande ki sa zonm ki ti pe al ganny onore pa ti lot ki Mordekay! Lekel ou krwar ti pe al onor Mordekay? Amann!​—Ester 6:4-10.

¹⁴ Amann ti napa swa ki obeir, menm si i ti ganny abese pli ba ki later. Apre, i ti tay kot li dezespere. Laba, son madanm ek son bann zanmi ti remarke ki zafer ti’n sal pour li e ki i pa ti pou zanmen ranport laviktwar kont Mordekay sa Zwif.​—Ester 6:12, 13.

15. (a) Ki bon keksoz ki ti arive ler Ester ti demontre pasyans? (b) Akoz i saz pour nou “kontinyen espere”?

¹⁵ Gras a pasyans Ester, i ti esper ankor en zour avan ki i ti fer son demann avek lerwa e sa ti donn letan Amann pour fer son prop maler. Eski ou panse ki Zeova ki ti’n kapab fer lerwa pa ganny sonmey? (Prov. 21:1) Sanmenm alor ki Parol Bondye i ankouraz nou pour “kontinyen espere.” (Lir Mika 7:7.) Ler nou les Bondye azir, nou pou vwar ki son bann solisyon i bokou pli meyer ki nenport kwa ki nou ti’n kapab mazinen pour fer.

16, 17. (a) Kan ki sa moman apropriye pour Ester koze ti arive? (b) Ki mannyer Ester ti diferan avek Vasti?

¹⁶ Ester pa ti anvi teste pasyans sa lerwa ankor plis e dan son dezyenm festen i ti bezwen dir tou. Me ki mannyer? I pa ti bezwen trakase akoz lerwa ti donn li loportinite e demann li ankor ki i ti anvi koz lo la. (Ester 7:2) ‘Letan pour Ester koze’ ti’n arive.

¹⁷ Nou kapab imazin Ester pe priy Bondye an silans avan ki i ti dir sa parol: “Si ou’n pran plezir dan mwan, O lerwa e si pour lerwa i paret vreman bon, ki ou ekout mon demann pour sov mon lavi e osi lavi mon pep.” (Ester 7:3) Remarke ki i ti asir lerwa ki i ti respekte son zizman lo sa ki paret bon. Ester ti vreman diferan avek Vasti, son madanm avan, ki ti imilye son msye par ekspre! (Ester 1:10-12) An plis, Ester pa ti kritik lerwa akoz i pa ti fer sans pour li met son konfyans dan Amann. O kontrer, i ti sipliy lerwa pour protez li.

18. Ki mannyer Ester ti revel sa problenm avek lerwa?

¹⁸ Sa demann ti sirman tous e sirprann sa lerwa. Lekel ki ti oze met lavi son larenn an danze? Ester ti kontinyen: “Mwan ek mon pep, nou’n ganny vann pour ganny eliminen, touye e detri. Si nou ti’n zis ganny vann konman bann lesklav e servant, mon ti pou’n reste trankil. Me sa maler pa zistifye akoz i pou fer ditor lerwa.” (Ester 7:4) Remarke ki Ester ti fran kan i ti fer konnen sa problenm, pourtan i ti azoute ki si i ti’n zis ganny vann konman lesklav, i ti pou reste trankil. Me lefet ki sa ti en zenosid, i ti pou difisil pour lerwa reste trankil.

19. Ki nou kapab aprann avek Ester konsernan sa abilite pour persyad lezot?

¹⁹ Legzanp Ester i ansenny nou bokou lo konman pour devlop sa abilite pour persyad en dimoun. Si zanmen ou bezwen koz lo en problenm serye avek en dimoun ki ou kontan ouswa menm avek en dimoun ki annan lotorite, ou pou bezwen demontre pasyans, respe ek lonnekte.​—Prov. 16:21, 23.

20, 21. (a) Ki mannyer Ester ti devwal konplo Amann e ki mannyer lerwa ti reakte? (b) Ki mannyer Amann ti reakte ler i ti ganny devwale konman en tret?

²⁰ Asweris ti demande: “Lekel li sa dimoun e kote i ete sa enn ki’n annan lodas pour fer sa?” Imazin Ester pe montre ledwa e pe dir: “Sa zonm, sa adverser ek lennmi, i sa move Amann.” Ki mannyer i ti pou reakte anver sa lakizasyon serye? En gran lafreyer ti sezi Amann. Figir sa lerwa ti vin rouz avek lakoler ler i ti realize ki son konseye ki i ti annan konfyans ladan ti’n trai li par fer li donn lord pour detri son prop madanm ki i ti kontan! Sa lerwa ti leve e al deor dan zarden pour esey apez son lakoler.​—Ester 7:5-7.

²¹ Amann ti tonm dan lipye larenn akoz i ti’n ganny devwale konman sa tret ki i ti ete. Ler lerwa ti retournen, i ti vwar Amann lo sofa pe sipliy Ester, avek lakoler lerwa ti akiz Amann pour esey vyol larenn dan son prop lakaz. Sa ti parey en santans lanmor pour Amann. Zot ti tyonbo li e kouver son figir. Enn bann zofisye ti dir lerwa konsernan sa gran poto ki Amann ti’n fer pour touy Mordekay. Asweris ti deswit donn lord ki Amann i ganny pann lo la.​—Ester 7:8-10.

22. Ki mannyer legzanp Ester i ansenny nou pour pa zanmen dezespere, perdi lespwar oubyen perdi lafwa?

²² Ozordi dan sa lemonn enzis, i fasil pour nou krwar ki i pa pou zanmen annan lazistis. Eski ou’n deza santi koumsa? Ester pa ti zanmen dezespere, perdi lespwar oubyen perdi son lafwa. Ler letan ti arive, avek kouraz, i pa ti per pour dir laverite e i ti annan konfyans ki Zeova ti pou fer sa ki neseser. Annou fer parey nou osi! Zeova pa’n sanze depi lepok Ester. I ankor kapab fer bann move dimoun ek bann tret tonm dan zot prop latrap, zis parey i ti fer avek Amann.​—Lir Psonm 7:11-16.

23. (a) Ki mannyer lerwa ti rekonpans Mordekay ek Ester? (b) Ki mannyer sa profesi lo Benzamen ki Zakob ti predir avan son lanmor ti ganny akonplir? (Vwar bwat “En profesi i ganny akonplir.”)

²³ Finalman, sa lerwa ti konnen lekel Mordekay, i pa ti zis sa dimoun ki ti’n anpes li ganny touye me i ti osi papa adoptif Ester. Asweris ti donn Mordekay sa pozisyon konman premye minis dan plas Amann. Lakaz ek larises Amann ti ganny donnen avek Ester ki ti met Mordekay ansarz tou sa la.​—Ester 8:1, 2.

24, 25. (a) Akoz Ester ti kontinyen trakase menm si konplo Amann ti’n ganny dekouver? (b) Ki mannyer Ester ti riske son lavi ankor enn fwa?

²⁴ Aprezan ki Ester ek Mordekay ti an sekirite, eski sa larenn ti pou aret trakase? Non, akoz i pa ti pe zis mazin son prop lekor. I ti konnen ki bann Zwif dan kat kwen lanpir ti pe al ganny touye akoz lord Amann. Aparaman Amann ti’n tir osor, ki ti en form grigri, pour konn sa pli bon moman pour lans sa latak visye. (Ester 9:24-26) I ti reste ankor detrwa mwan pour sa zour arive, me i ti pe vin vitman. Eski sa maler ti pou kapab ganny evite?

²⁵ Ester ti riske son lavi ankor enn fwa ler i ti al devan lerwa san okenn lenvitasyon. Safwasi, i ti plere pour son pep e i ti sipliy son msye pour retir sa lord. Me lalwa ki ti’n fini ganny aprouve par en lerwa Pers pa ti kapab ganny retire. (Dan. 6:12, 15) Alor, lerwa ti donn Ester ek Mordekay drwa pour fer en nouvo lalwa. En dezyenm lord ti donn bann Zwif drwa pour defann zot lekor. Sa bon nouvel ti ganny anmennen vitman kot bann Zwif dan tou parti sa lanpir. Sa ti redonn bann Zwif lespwar. (Ester 8:3-16) Nou kapab imazin bann Zwif partou dan sa gran lanpir pe met pare zot zarm pour defann zot lekor, en keksoz ki zot pa ti pou’n zanmen kapab fer si sa lalwa pa ti’n ganny aprouve. Me pli enportan ankor, eski “Zeova bann larme” ti pou avek son pep?​—1 Sam. 17:45.

26, 27. (a) Ki mannyer Zeova ti donn laviktwar son pep lo zot bann lennmi? (b) Ki profesi ki ti ganny akonpli lo destriksyon bann garson Amann?

²⁶ Ler sa zour ki ti’n ganny swazir pour touy bann Zwif ti arive, pep Bondye ti’n pare. Menm en kantite zofisye Pers ti lo zot kote aprezan, akoz nouvel ti’n fannen partou konsernan nouvo premye minis, Mordekay sa Zwif. Zeova ti donn son pep en gran laviktwar. San dout, i ti fer sir ki zot bann lennmi ti ganny en gran defet pour ki zot pa kapab atak Son pep ankor.a​—Ester 9:1-6.

²⁷ De plis, Mordekay pa ti pou zanmen santi li an sekirite pour ansarz lakaz Amann tan ki son dis garson ti ankor vivan. Zot osi zot ti ganny touye. (Ester 9:7-10) En profesi Labib ti ganny akonplir akoz Bondye ti’n predir pli boner ki bann Amalekit ki ti bann lennmi son pep ti pou ganny detri konpletman. (Det. 25:17-19) I posib ki bann garson Amann ti bann dernyen manm sa nasyon ki ti’n ganny kondannen.

28, 29. (a) Akoz i ti lavolonte Zeova ki Ester ek son pep i lager? (b) Akoz legzanp Ester i en benediksyon pour nou ozordi?

²⁸ Menm si i ti ankor zenn, Ester ti bezwen fer fas avek bann gro defi, parey lord lerwa pour lager e egzekit bann Zwif. I pa ti fasil, me i ti lavolonte Zeova ki son pep pa ganny detri, akoz Mesi ti pou sorti dan nasyon Izrael, ki ti sa sel sours lespwar pour limanite! (Zen. 22:18) Denozour, bann serviter Bondye i kontan ki ler Mesi ti lo later, i ti enterdi son bann disip pour partisip dan okenn lager.​—Mat. 26:52.

²⁹ Toudmenm, bann Kretyen i partisip dan en lager spirityel. Satan li, i pli determinen ki zanmen oparavan pour detri nou lafwa dan Zeova. (Lir 2 Korentyen 10:3, 4.) I en benediksyon pour annan legzanp Ester! Parey li, nou demontre nou lafwa par persyad lezot avek lasazes ek pasyans, par nou kouraz ek leta lespri sakrifis nou pare pour defann pep Bondye.