Reste fidel e san defo!

 1. Ki mannyer sa trwa Temwen Zeova in reste fidel avek Bondye?

IMAZIN sa trwa senaryo ki enplik en Temwen Zeova. (1) En zenn fiy i dan laklas e son ansenyan i demann tou manrmay dan laklas pour partisip dan en lafet oubyen en seremoni ki Temwen Zeova pa selebre. Sa fiy i konnen ki sa lafet pa fer plezir Zeova, alor avek bokou respe i refize pour partisipe. (2) En garson ki en pe timid pe prese portanport. I konnen ki enn son kanmarad lekol i reste dan sa lakaz kot i pe al prese. Sa garson in deza koz an mal lo Temwen Zeova. Me kantmenm sa, sa zenn Temwen i al kot sa lakaz e tap laport. (3) En msye i travay dir pour okip son fanmir. En zour, son sef i demann li pour fer en keksoz dezonnet e ilegal. Menm si i kapab perdi son travay, sa msye i eksplik son sef ki i bezwen onnet e obei lalwa akoz se sa ki Bondye i ekspekte avek son bann serviter.​—Rom. 13:1-4; Ebr. 13:18.

 2. Ki kestyon ki nou pou reponn e akoz?

² Ki sa kalite ki ou’n vwar dan sa trwa dimoun? Petet ou’n remark detrwa, par egzanp kouraz ek lonnekte. Me i annan en lot kalite ki vreman enportan. Sa i lentegrite.b Zot tou le trwa, zot in reste fidel avek Zeova. Zot pa’n oule fer okenn konpromi avek bann standar Zeova. Sa trwa dimoun in fer sa akoz zot lentegrite, andotmo akoz zot fidel e san defo. Sirman Zeova i fyer ler i vwar zot pe demontre sa kalite. Nou osi nou anvi fer nou Papa dan lesyel fyer. Alor, annou vwar: Kisisa lentegrite? Akoz nou bezwen sa kalite? Ki nou bezwen fer pour ki nou pli determinen pour reste fidel e san defo pandan sa bann dernyen zour?

 3. (a) Ki mannyer bann serviter Zeova i demontre lentegrite? (b) Ki legzanp ki kapab ed nou pour konpran ki savedir lentegrite?

³ Ki mannyer bann serviter Zeova i demontre lentegrite? Nou fer sa ler nou kontan Zeova avek tou nou leker e donn li tou nou devosyon. Dan tou desizyon ki nou fer dan nou lavi, lavolonte Bondye i bezwen toultan premye. Annou vwar detrwa legzanp dan Labib ki montre ki mannyer sa mo i ganny servi. Sa mo “lentegrite” i kapab vedir: konplet, san defo oubyen antye. Par egzanp, bann Izraelit ti fer bann sakrifis zannimo avek Zeova e Lalwa ti demande ki bann zannimo i san defo.c (Lev. 22:21, 22) Pep Zeova ti napa drwa ofer en zannimo ki mank en lapat, en zorey, en lizye oubyen enn ki malad. I ti vreman enportan ki sa zannimo i an bonn sante, san defo oubyen antye. (Mal. 1:6-9) Nou kapab konpran akoz sa i sitan enportan pour Zeova. Par egzanp, ler nou aste en fri, en liv oubyen en zouti, nou pa pou pran enn ki’n gate oubyen ki’n kase. Nou pou aste enn ki konplet, san defo oubyen antye. Zeova i santi parey. I anvi ki nou fidel avek li e ki nou kontan li avek tou nou leker, dan en fason konplet e san defo.

 4. (a) Akoz i posib pour en dimoun enparfe reste fidel e san defo? (b) Dapre Psonm 103:12-14, ki Zeova i ekspekte avek nou?

⁴ Dan sa ka, eski sa i vedir ki nou devret parfe pour ki nou fidel e san defo? Apre tou, nou kapab santi ki nou annan en kantite defo, andotmo ki nou pa san defo. Annou vwar de rezon akoz nou pa devret enkyet. Premyerman Zeova pa konsantre lo nou defo. Son Parol i dir nou: “O Ya, O Zeova, si ou ti vey bann fot, lekel ki pa ti pou koupab?” (Ps. 130:3, NWT) Zeova i konnen ki nou bann imen enparfe ki fer pese me i toultan pare pour pardonn nou. (Ps. 86:5) Dezyenmman, Zeova i konn nou limit e i pa ekspekte plis ki sa ki nou kapab fer. (Lir Psonm 103:12-14.) Alor, pour Zeova, dan ki sans ki nou devret konplet, san defo oubyen antye?

 5. Pour bann serviter Zeova, akoz lanmour i enportan pour zot kapab reste fidel e san defo?

⁵ Pour bann serviter Zeova reste fidel e san defo, sa ki pli enportan se lanmour. Nou lanmour pour Bondye ek nou devosyon pour li konman nou Papa dan lesyel i devret reste konplet, san defo oubyen antye. Si nou lanmour i reste koumsa menm ler nou ganny teste, sa i vedir ki nou fidel e san defo. (1 Kron. 28:9; Mat. 22:37) Annou revwar legzanp sa trwa Temwen ki nou ti vwar o konmansman sa lartik. Akoz zot in azir dan sa fason? Eski sa fiy pa kontan anmize kot lekol? Eski sa garson ti a kontan ganny kanmi devan laport? Oubyen eski sa sef fanmir i anvi perdi son travay? Byensir ki non! Par kont, zot konnen ki Zeova i annan bann standar ki drwat e zot konsantre lo sa ki fer plezir zot Papa ki dan lesyel. Akoz zot kontan li, zot toultan mazin li avan fer en desizyon. Dan sa fason, zot fidel e san defo.

 6. (a) Akoz nou bezwen reste fidel e san defo? (b) Akoz Adan ek Ev pa ti reste fidel e san defo?

⁶ Akoz nou tou nou bezwen fidel e san defo? Ou bezwen fidel e san defo akoz Satan in fer en lakizasyon kont Zeova e kont ou osi. Ler i ti dan zarden Edenn, sa lanz ti rebel kont Zeova e vin Satan oubyen “Opozan.” I ti sali repitasyon Zeova par dir ki Bondye i en Dirizan ki move, egois e dezonnet. Malerezman, Adan ek Ev ti pran kote Satan e rebel kont Zeova. (Zen. 3:1-6) Ler zot ti dan zarden Edenn, zot ti ganny en kantite loportinite pour zot ranforsi zot lanmour pour Zeova. Me ler Satan ti kestyonn drwa Zeova pour dirize, zot lanmour pour Zeova pa ti konplet, san defo oubyen antye. Sa ti fer ki en lot kestyon ti ganny souleve: Eski i annan dimoun ki pou reste fidel avek Zeova akoz zot vreman kontan li? Andotmo, eski bann imen i kapab reste fidel e san defo? Sa kestyon ti ganny demande dan ka Zob.

 7. Dapre Zob 1:8-11, ki pwennvi Zeova ek Satan lo fidelite Zob?

⁷ Zob ti viv dan letan ler bann Izraelit ti Lezip. Sa letan, napa personn lo later ki ti fidel e san defo parey Zob. Zob ti enparfe parey nou menm. I ti fer fot. Me Zeova ti kontan Zob akoz i ti fidel e san defo. I posib ki Satan ti’n deza provok Zeova konsernan fidelite bann imen. Alor, Zeova ti montre Satan ki Zob ti fidel e san defo. Lafason ki Zob ti viv son lavi ti montre ki Satan i en manter! Satan ti demann Zeova pour teste fidelite Zob. Zeova ti annan konfyans dan son zanmi Zob, alor I ti les Satan teste li.​—Lir Zob 1:8-11.

 8. Ki mannyer Satan ti atak Zob?

⁸ Satan i kriyel e i en mertriye. I ti atak Zob par pran tou son keksoz, son larises ek son bann serviter e i ti osi gat repitasyon Zob. Apre, i ti atak fanmir Zob par touy son dis zanfan ki i ti kontan. Apre, i ti atak Zob li menm par fer li ganny bann klou vreman fermal partou depi latet ziska lipye. Madanm Zob ti nepli kapab avek tou sa bann problenm ek son sagrinasyon, alor i ti demann Zob pour modi Bondye e mor. I vre ki Zob ti anvi mor, me i ti reste fidel e san defo. Satan ti osi servi en lot fason pour atak Zob. I ti servi trwa zonm ki ti konn Zob. Sa bann zonm ti vin vizit Zob pour plizyer zour, me zot pa ti kapab rekonfort li. O kontrer, zot ti zis koze zanmen fini e kritik li. Zot ti dir ki Bondye ki ti pe fer li soufer e i pa ti ni menm enterese avek li. Zot ti menm dir ki Zob i en move dimoun e i ti merit tou sa bann move keksoz ki ti pe arive avek li.​—Zob 1:13-22; 2:7-11; 15:4, 5; 22:3-6; 25:4-6.

 9. Malgre bann leprev, ki Zob ti refize pour fer?

⁹ Ki Zob ti fer ler i ti pas atraver tou sa bann leprev? I pa ti parfe. I ti pran lakoler e koz severman avek sa trwa zonm. Pli tar, li menm i ti dir ki i ti’n koz an bonnavini. I ti ensiste ki li i ti drwat olye defann ladrwatir Zeova. (Zob 6:3; 13:4, 5; 32:2; 34:5) Menm ler son sityasyon ti vin pli pir, Zob pa ti zanmen kas son fidelite avek Zeova. I pa ti oule krwar bann mansonz son bann swadizan zanmi. I ti dir: “Mon pa pou zanmen donn zot rezon! Ziska mon lanmor, mon pou reste fidel e san defo!” (Zob 27:5, NWT) Sa parol i montre ki Zob ti determinen pour reste fidel e san defo, malgre nenport kwa ki ti pou arive. Zob ti reste fidel, nou osi nou kapab fer parey!

10. Ki mannyer sa lakizasyon ki Satan ti fer kont Zob i konsern ou?

¹⁰ Be ou, eski sa lakizasyon ki Satan ti fer kont Zob i konsern ou osi? Anfet, Satan i dir ki ou pa vreman kontan Zeova, ki ou pou aret servi li pour sov ou lavi e ki ou fidelite pa vreman senser. (Zob 2:4, 5; Rev. 12:10) Ki mannyer ou santi konsernan sa? I vreman mal, non? Par kont, reflesi lo sa: Zeova i annan konfyans dan ou e i donn ou en bon loportinite. Zeova i les Satan teste ou fidelite. Zeova i asire ki ou kapab reste fidel e san defo e prouve ki Satan i en gran manter. Zeova i promet pour ed ou fer sa. (Ebr. 13:6) Pa i en gran privilez pour konnen ki Souvren liniver i annan konfyans dan ou! Eski ou konpran akoz ou fidelite i sitan enportan? Si ou reste fidel, nou kapab montre ki Satan i en manter, defann repitasyon nou Papa dan lesyel e siport son drwa pour dirize. Ki nou kapab fer pour kontinyen reste fidel e san defo?

11. Ki nou kapab aprann avek Zob?

¹¹ Satan in entansifye son bann latak dan sa “bann dernyen zour.” (2 Tim. 3:1) Dan sa letan vreman difisil, ki mannyer nou kapab ranforsi nou spirityalite pour ki nou kapab reste fidel e san defo? Ankor en fwa, nou kapab aprann bokou avek legzanp Zob. Menm avan i ti ganny teste, Zob ti deza annan labitid pour reste fidel. Annou vwar trwa leson ki nou kapab aprann avek Zob konsernan ranforsi nou spirityalite pour ki nou kapab reste fidel e san defo.

12. (a) Parey Zob 26:7, 8, 14 i montre, kwa ki ti ed Zob pour annan ladmirasyon ek respe pour Zeova? (b) Ki mannyer nou kapab devlop ladmirasyon pour Zeova?

¹² Zob ti ranforsi son lanmour pour Bondye par devlop ladmirasyon ek respe pour Zeova. Zob ti pas en kantite letan pour admir bann mervey dan kreasyon Zeova. (Lir Zob 26:7, 8, 14.) Ler i ti pran letan pour reflesi lo later, lesyel, nyaz ek loraz, tousala ti vreman enpresyonn li, me i ti rekonnet ki i pa ti konn bokou lo tou sa ki Zeova in kree. I ti osi apresye en kantite bann parol Zeova. Zob ti dir sa lo parol Bondye: “Mon’n gard dan mon leker, tou son bann parol.” (Zob 23:12) Ladmirasyon ek respe ki Zob ti annan pour Zeova ti tous son leker en kantite. I ti kontan son Papa e i ti anvi fer li plezir. Alor, sa ti fer li pli determinen pour reste fidel e san defo. Nou bezwen fer parey Zob. Nou konn bokou plis lo kreasyon Zeova ki sa ki dimoun dan letan Zob ti konnen. Osi, nou annan Labib antye ki ed nou konn Zeova parey i vreman ete. Tou sa ki nou konnen, i kapab ranpli nou leker avek ladmirasyon pour li. Ler nou admir e annan respe pour Zeova, sa pou motiv nou pour kontan e obei li. I pou ed nou osi pour pli determinen pour reste fidel e san defo.​—Zob 28:28.

13, 14. (a) Dapre Zob 31:1, ki Zob ti fer ki montre ki i ti obeisan? (b) Ki mannyer nou kapab swiv legzanp Zob?

¹³ Lefet ki Zob ti toultan obei, sa ti ed li pour reste fidel e san defo. Zob ti konnen ki pour reste fidel e san defo, i ti bezwen obei Zeova. Anfet, sak fwa nou obei, nou vin pli determinen pour gard nou lentegrite, andotmo pour reste fidel e san defo. Zob ti fer en kantite zefor pour obei Bondye dan son lavi toulezour. Par egzanp, i ti vey byen son konportman anver bann madanm. (Lir Zob 31:1.) Konman en msye marye, i ti konnen ki i mal pour montre en lentere romantik pour okenn lezot madanm. Ozordi, nou pe viv dan en lemonn ki ranpli avek imoralite seksyel. Parey Zob, eski nou refize konmans montre en lentere romantik dan en dimoun ki pa nou msye oubyen nou madanm? Eski nou pou refize get okenn portre obsenn oubyen pornografi? (Mat. 5:28) Si toulezour nou vreman fer zefor pour annan kontrol lo nou lekor, nou pou pli determinen pour reste fidel e san defo.

¹⁴ Zob ti osi obei Zeova dan lafason ki i ti konsider keksoz materyel. Zob ti konpran ki si i met son konfyans dan sa ki i posede, sa ti pou en pese grav ki merit pinisyon. (Zob 31:24, 25, 28) Ozordi, nou pe viv dan en lemonn ki vreman kontan bann keksoz materyel. Si nou devlop en pwennvi balanse lo larzan ek keksoz materyel parey Labib i konsey nou pour fer, nou pou pli determinen pour reste fidel e san defo.​—Prov. 30:8, 9; Mat. 6:19-21.

15. (a) Ki lespwar ki ti ed Zob reste fidel e san defo? (b) Akoz i byen pour gard antet sa lespwar ki Zeova in donn nou?

¹⁵ Zob ti reste fidel e san defo par konsantre lo lespwar ki Bondye ti pou beni li. I ti konnen ki Bondye ti vwar ki i ti reste fidel e san defo. (Zob 31:6) Menm si i ti pas atraver en kantite leprev, i ti asire ki Zeova ti pou rekonpans li finalman. Sa konfyans ki i ti annan dan Zeova ti ed li pour reste fidel e san defo. Zeova ti sitan kontan ki Zob ti’n reste fidel avek li ki I ti beni li en kantite menm si i ti en dimoun enparfe. (Zob 42:12-17; Zak 5:11) Me Zob pou ganny plis benediksyon ankor a lavenir. Eski ou vreman krwar ki Zeova pou beni ou akoz ou reste fidel e san defo? Nou Bondye pa’n sanze. (Mal. 3:6) Si nou gard antet ki nou fidelite i annan valer pour Zeova, nou lespwar pour en zoli lavenir pou reste vivan.​—1 Tesa. 5:8, 9.

16. Ki nou devret determinen pour fer?

¹⁶ Alor, annou determinen pour toultan reste fidel e san defo! Parfwa, ou kapab ganny lenpresyon ki zis ou tousel ki fidel, me ou pa zanmen tousel. Avek ou, i annan plizyer milyon serviter Zeova ki fidel e ki pe gard zot lentegrite partou dan lemonn. Ou pou osi form parti bann msye ek madanm fidel, ki ti annan lafwa, ki ti gard zot lentegrite dan lepase, menm ler zot ti fer fas avek lanmor. (Ebr. 11:36-38; 12:1) Nou tou, annou determinen pour reste fidel e san defo parey Zob, ki ti dir: “Mon pou reste fidel e san defo!” Annou gard nou lentegrite e glorifye Zeova pour touzour!