Zeova i nou Berze

“Zeova i mon Berze. Mon pa pou mank nanryen.”​—PSONM 23:1.

 1-3. Akoz i pa sirprann nou ki David ti konpar Zeova avek en Berze?

SI OU ti ganny demande pour dekrir fason ki Zeova i pran swen avek son pep, ki ou ti pou dir? Avek ki ou ti pou konpar sa swen ranpli avek tandres ki Zeova i donn son bann serviter fidel? Plis ki 3,000 an pase, Lerwa David ti fer en zoli deskripsyon lo Zeova dan en Psonm. I ti servi en konparezon baze lo sa louvraz ki i ti fer konman en zennonm.

² Kan i ti ankor byen zenn, David ti fer louvraz en berze. Alors i ti konnen konman pour pran swen avek mouton. I ti konn byen ki si en berze pa vey byen son mouton, zot kapab fasilman perdi e vin viktim bann voler oubyen bebet feros. (1 Samyel 17:34-36) San en berze pour okip zot byen, zot pa pou kapab trouv bann bon landrwa manze. Plitar dan son lavi, David ti’n bezwen gard bann bon souvenir sa bann moman ki i ti pase pour diriz, protez, e anmenn son bann mouton manze.

³ I pa sirprann nou ki David ti mazin louvraz en berze ler i ti ganny enspire pour dekrir konman Zeova i pran swen avek son pep. Psonm 23, ekrir par David, i konmans koumsa: “Zeova i mon Berze. Mon pa pou mank nanryen.” Annou vwar akoz sa i dekrir byen Zeova. Apre, nou pou vwar ki mannyer Zeova i pran swen avek son bann serviter zis parey en berze i pran swen avek son mouton.—1 Pyer 2:25.

En bon Konparezon

 4, 5. Ki mannyer Labib i dekrir bann tre ki en mouton i annan?

⁴ Dan Labib Zeova i annan plizyer tit, me “Berze” i enn parmi bann tit ki donn plis sa lide tandres. (Psonm 80:1) Pour konpran pli byen akoz Berze i al byen avek Zeova, i bon pour nou konn de keksoz. Premyerman, bann tre ki en mouton i annan, e dezyenmman, latas ek bann kalite ki en bon berze i annan.

⁵ Labib i souvan mansyonn bann tre ki bann mouton i annan. Ler zot berze i donn zot lafeksyon, zot osi zot fer parey (2 Samyel 12:3), zot pa agresif (Izai 53:7), e zot pa kapab defann zot lekor. (Mika 5:8) En ekriven ki ti sonny mouton pour bokou lannen ti fer sa remark: “Mouton pa ‘kapab okip zot zot menm,’ parey serten i kapab krwar. Zot bezwen bokou bokou plis latansyon ek swen partikilye ki okenn lezot kalite zannimo.” Pour zot kapab viv, sa bann zannimo san defans i bezwen en berze pour pran swen avek zot.—Ezekyel 34:5.

 6. Ki mannyer en diksyonner Labib i dekrir fason ki en berze dan letan lontan ti pas son lazournen?

⁶ Ki mannyer lazournen ti ete pour en berze dan letan lontan? En diksyonner Labib i eksplike: “Dan bomaten, i ti fer troupo sorti dan berkay e mars devan zot pour anmenn zot dan en landrwa manze. Laba i ti vey zot lazournen antye, fer sir okenn antre zot pa egare, e si i arive ki enn i kit troupo san ki i apersevwar, i ti pou pran son letan pour rod li ziska i trouv li e retourn avek li. . . . Aswar i ti retourn avek troupo dan berkay, i ti kont zot avek son baton anmezir zot antre par laport, pour fer sir napa ki manke. . . . Souvannfwa i ti bezwen vey berkay pandan lannwit pangar bann zannimo sovaz i atak zot oubyen pangar i annan voler ki pe tranp tranpe par la pour sey vol zot.”a

 7. Akoz en berze ti bezwen parfwa demontre plis pasyans ek tandres?

⁷ Ti annan letan kot bann mouton ti demann plis pasyans ek tandres, sirtou bann ki ti plenn ek bann ki ti ankor pti. (Zenez 33:13) En liv referans lo Labib i dir: “Mouton i souvan donn nesans byen lwen lo lapant montanny. Sa berze i vey sa manman dan son bann moman ki i pa kapab fer nanryen pour defann son lekor e pran sa piti mouton e anmenn li kot troupo. Pour sa detrwa zour ziska ki i kapab marse, petet i pou anmenn li dan son lebra oubyen dan son lenz.” (Izai 40:10, 11) I kler ki en bon berze i bezwen dous e anmenmtan for.

 8. Ki rezon David i donnen pour annan konfyans dan Zeova?

⁸ “Zeova i mon Berze.” Pa sa i dekrir byen nou Papa dan lesyel? Anmezir ki nou egzamin Psonm 23, nou pou vwar konman Bondye i pran swen avek nou avek kouraz ek tandres en berze. Dan verse 1, David i eksprim son konfyans ki Bondye pou fer tou sa ki neseser pour Son mouton pour ki zot “pa mank nanryen.” Dan bann verse ki swiv, David i sit trwa rezon ki fer li annan sa konfyans: Zeova i diriz, protez, e nouri Son mouton. Annou diskit zot enn par enn.

“I diriz mwan”

 9. Ki senn pezib David i dekrir, e ki mannyer bann mouton ti pou ariv dan en tel landrwa?

⁹ Premyerman, Zeova i diriz son pep. David i ekrir: “I fer mwan alonze dan bann landrwa kouver avek lerb; i anmenn mwan dan bann landrwa repo kot i annan delo. I afresi mwan. I diriz mwan dan bann santye ladrwatir akoz son non.” (Psonm 23:2, 3) En troupo pe alonze anpe dan en ta lerb. La David pe dekrir en senn kontantman, repo, ek sekirite. Sa mo Ebre ki’n ganny tradwir la konman “landrwa kouver avek lerb” i kapab vedir en “landrwa agreab.” Petet bann mouton lo zot menm pa ti pou kapab trouv en landrwa repo kot zot kapab dormi anpe. Zot berze i bezwen diriz zot ver en “landrwa agreab” koumsa.

10. Ki mannyer Zeova i montre ki i annan konfyans dan nou?

¹⁰ Ki mannyer Zeova i diriz nou ozordi? En fason ki i fer sa i par son legzanp. Son Parol i sipliy nou pour “fer tou parey li.” (Efezyen 5:1) Konteks sa verse i koz lo demontre konpasyon ek lanmour, e pardonnen. (Efezyen 4:32; 5:2) Byensir, Zeova i donn nou pli bon legzanp kot i konsern demontre sa bann kalite atiran. I demann nou pour imit li. Eski nou pou dir ki Bondye pa rezonnab? Non. Anfet sa konsey enspire i montre ki Zeova i annan konfyans dan nou. Ki mannyer sa? Nou’n ganny fer dan resanblans Bondye, savedir nou’n ganny bann bon kalite e kapasite pour annan en lavi spirityel. (Zenez 1:26) Alors Zeova i konnen ki malgre nou lenperfeksyon, nou annan sa potansyel pour devlop sa bann kalite ki li i annan. Zis mazinen: Nou Bondye lanmour i annan konfyans ki nou kapab vin parey li. Si nou swiv son legzanp, i pou konmsi i pe diriz nou dan en ‘landrwa repo’ ki agreab. Nou pou “viv an sekirite” dan sa lemonn vyolan e eksperyans sa lape ki vin avek laprouvasyon Bondye.—Psonm 4:8; 29:11.

11. Ler i diriz son mouton, ki Zeova i pran an konsiderasyon, e ki mannyer nou vwar sa dan sa ki i demann nou?

¹¹ Zeova i diriz nou avek tandres ek pasyans. En berze i pran an konsiderasyon limit son mouton. Alors i pou mars ‘dapre vites son mouton.’ (Zenez 33:14) Zeova osi i diriz son mouton ‘dapre zot vites.’ I pran an konsiderasyon nou abilite ek nou sitiasyon. Anfet, i adapte son vites avek nou, i pa zanmen demann plis ki nou kapab donnen. Sa ki i demande se ki nou servi li avek tou nou nanm. (Kolosyen 3:23, NW ) Me si ou avanse dan laz e pa kapab fer sa ki ou ti abitye fer avan? Oubyen si ou annan en maladi grav ki anpes ou fer otan ki ou ti a oule? Se la ki nou vwar labote dan sa ki Zeova pe demann nou, pour servi li avek tou nou nanm. Napa personn ki parey dan tou keksoz. Servi avek tou ou nanm i vedir servi tou ou lafors ek lenerzi dan servis Bondye otan ki posib pour ou. Malgre bann febles ki kapab afekte nou vites, Zeova i apresye bokou nou ladorasyon ki nou donn li avek tou nou leker.—Mark 12:29, 30.

12. Ki legzanp dan Lalwa Moiz ki montre ki Zeova i diriz son mouton ‘dapre zot vites’?

¹² Pour montre ki Zeova i diriz son mouton dapre zot vites, annou vwar ki i ti dir konsernan serten lofrann kilpabilite dan Lalwa Moiz. Zeova ti anvi bann bon kalite lofrann ki ganny donnen avek en leker ranpli avek lapresyasyon. Anmenmtan, sa bann lofrann ti ganny klasifye dapre sa ki en dimoun i kapab donnen. Lalwa ti dir: “Si son mwayen pa permet li ganny en mouton, alor i bezwen anmenn de tourtrel oubyen de zenn pizon.” Me si i napa pour donn ni menm de pizon? I ti kapab anmenn en pe “lafarin byen fen.” (Levitik 5:7, 11) Sa i montre ki Bondye pa ti demann en dimoun pour ofer sa ki i napa. Vi ki Bondye pa sanze, sa i rekonfort nou akoz nou konnen i pa zanmen demann plis ki nou kapab donnen. Okontrer i pare pour aksepte sa ki nou kapab donnen. (Malaki 3:6) I vreman en plezir pour nou ganny dirize par en Berze ki konpran nou koumsa!

“Mon pa per okenn keksoz mal, parski ou avek mwan”

13. Dan Psonm 23:4, ki mannyer David i koz dan en fason pli entim e akoz sa pa sirprenan?

¹³ David i donn en dezyenm rezon pour son konfyans dan Bondye: Zeova i protez son mouton. Nou lir: “Kantmenm mon mars dan en vale fernwanr epe, mon pa per okenn keksoz mal, parski ou avek mwan. Ou baget ek ou baton i bann keksoz ki rekonfort mwan.” (Psonm 23:4) La David i koz dan en fason pli entim. I adres Zeova par dir “ou.” Sa pa sirprann nou akoz David pe koz lo ki mannyer Bondye ti ed li siport son difikilte. David ti pas dan bokou vale fernwanr—bann letan kot son lavi ti an danze. Me i pa ti les lafreyer domin li, parski i ti santi ki Bondye ti avek li, avek son baton pare pour aksyon si neseser. Vi ki David ti konsyan ki Zeova ti pe protez li, sa ti rekonfort li e san dout fer li vin pli pros avek Zeova.b

14. Ki lasirans Labib i donn nou konsernan proteksyon Zeova, me ki sa pa vedir?

¹⁴ Ki mannyer Zeova i protez son mouton ozordi? Labib i asir nou ki napa personn—ki i demon oubyen imen—ki pou reisi elimin son mouton lo later. Zeova pa pou zanmen les sa arive. (Izai 54:17; 2 Pyer 2:9) Me sa pa vedir nou Berze pou protez nou kont tou kalite maler. Nou rankontre problenm ki normalman tou dimoun i rankontre, e nou fer fas avek lopozisyon ki tou vre Kretyen i gannyen. (2 Timote 3:12; Zak 1:2) I annan defwa kot ou a krwar ou pe “mars dan en vale fernwanr epe.” Par egzanp, persekisyon oubyen en maladi grav i kapab fer nou vwar lanmor pe vini. Oubyen petet en dimoun ki nou kontan i kapab pres pour mor oubyen menm arive mor. Dan sa bann moman pli sonm, nou Berze i avek nou, e i pou vey nou. Konman?

15, 16. (a) Dan ki fason Zeova i ed nou sirmont bann lobstak ki nou rankontre? (b) Rakont en leksperyans ki montre ki mannyer Zeova i ed nou dan bann moman leprev.

¹⁵ Zeova pa promet ki i pou entervenir par fer mirak.c Me selman en keksoz ki nou asire se ki: Zeova pou ed nou sirmont nenport lobstak ki nou rankontre. I kapab donn nou lasazes pour fer fas avek “tou bann leprev.” (Zak 1:2-5) En berze pa servi son baton zis pour fer taye bann zannimo ki vin atak son mouton. Me i osi servi li pour montre son mouton direksyon ki i devret ale. Zeova i kapab montre nou sa bon direksyon, petet par servi en konpanyon Kretyen ki donn nou en konsey baze lo Labib ki kapab fer en gran diferans pour nou. Deplis, Zeova i kapab donn nou lafors pour siporte. (Filipyen 4:13) Par mwayen son lespri sen, i kapab ekip nou avek “sa pisans ki napa son parey.” (2 Korentyen 4:7) Lespri Bondye i kapab ed nou siport nenport leprev ki Satan i kapab anmenn lo nou. (1 Korentyen 10:13) Pa i rekonfort nou pour konnen ki Zeova i toultan pare pour ed nou?

¹⁶ Wi, nenport vale fernwanr ki nou kapab trouv nou ladan, nou pa bezwen travers li lo nou tousel. Nou Berze i avek nou, pour ed nou dan bann fason ki petet nou pa ti’n realize avan. Annou vwar leksperyans en ansyen, ki ti aprann i annan en timer danzere dan son latet. “Mon bezwen admet ki premye kou mon ti vwar mwan pe demann mon lekor si Zeova ti ankoler avek mwan oubyen menm si i ti kontan mwan. Me mon ti determinen pour pa elwannyen avek Zeova. Plito mon ti fer li konn sa ki ti dan mon lespri. Zeova ti ed mwan, souvan i ti rekonfort mwan atraver mon bann frer ek ser. Bokou zot ki ti’n deza fer fas avek en maladi grav ti partaz zot konnesans baze lo zot leksperyans personnel. Zot komanter byen ekilibre ti rapel mwan ki sa ki mon ti pe pas ladan pa ti en keksoz drol. Bann led pratik ki lezot ti ofer mwan ti tous mwan e sa ti rasir mwan ki Zeova pa ti ankoler avek mwan. Byensir mon lalit avek sa maladi i kontinyen, e mon pa konnen ki mannyer i pou fini. Me mon konvenki ki Zeova i avek mwan e i pou kontinyen ed mwan pas atraver sa leprev.”

“Ou met en Latab devan mwan”

17. Ki mannyer David i dekrir Zeova dan Psonm 23:5, e akoz sa pa an konfli avek legzanp en berze?

¹⁷ Aprezan David i sit en trwazyenm rezon pour son konfyans dan son Berze. Zeova i nouri son mouton, e i donn zot bokou menm. David i ekrir: “Devan bann ki ay mwan, ou met en latab devan mwan. Avek delwil ou lwil mon latet; mon lakoup in byen ranpli.” (Psonm 23:5) Dan sa verse, David i dekrir son Berze konman en dimoun zenere ki donn son bann envite bokou manze ek bwar. Sa pa an konfli avek lide ki Zeova i en berze ki pran swen avek son mouton. Apre tou, en bon berze i bezwen konnen kote pour trouv landrwa kot i annan ase manze ek delo pour ki son troupo ‘pa mank nanryen.’—Psonm 23:1, 2.

18. Kwa ki montre ki Zeova i zenere?

¹⁸ Eski nou Berze i osi zenere avek nou? Definitivman! Zis mazin sa kantite nouritir spirityel ki nou servi! I varye e i bon kalite! Atraver lesklav fidel e pridan, Zeova in fourni nou bann piblikasyon ki itil ek bann progranm renyon ek lasanble ki vreman ris. Tousala pour satisfer nou bezwen spirityel. (Matye 24:45-47) Wi, nouritir spirityel pa manke. ‘Lesklav fidel e pridan’ in prodwir plizyer milyon Labib ek liv ki ed dimoun etidye Labib, e sa bann piblikasyon i disponib dan 413 langaz. Zeova in donn nou en gran varyete nouritir spirityel—depi “dile,” savedir bann lansennyman debaz Labib, ziska “nouritir solid,” bann lenformasyon spirityel ki pli profon. (Ebre 5:11-14) Koumsa ler nou rankontre problenm oubyen nou annan en desizyon pour fer, nou kapab trouv egzakteman sa ki nou ti bezwen. Kot nou ti pou ete san sa bann nouritir spirityel? Vreman napa Berze pli zenere ki nou Berze!—Izai 25:6; 65:13.

“Mon pou reste dan Lakaz Zeova”

19, 20. (a) Ki konfyans David i eksprimen dan Psonm 23:6, e ki mannyer nou kapab annan menm konfyans? (b) Ki nou pou diskite dan lartik swivan?

¹⁹ Apre en bon refleksyon lo sa ki son Berze e Fourniser i fer, David i konklir: “Sirman dibyen ek labonte leker pou swiv mwan toulezour dan mon lavi; e mon pou reste dan lakaz Zeova pour lontan.” (Psonm 23:6) David i koz avek en leker ranpli avek lapresyasyon ek lafwa. Lapresyasyon ler i mazin lepase e lafwa ler i get lavenir. David ki ti en berze avan sa, i santi li an sekirite. I konnen ki osi lontan ki i reste pros avek son Berze dan lesyel, konmsi i pe reste dan Son lakaz. Zeova pou toultan pran swen avek li.

²⁰ Nou vreman apresye sa bann zoli parol ki’n ganny rikorde dan Psonm 23! Napa en pli bon fason pour David dekrir lafason ki Zeova i diriz, protez, e nouri son mouton. Son bann santiman profon in ganny prezerve pour donn nou konfyans ki nou osi nou kapab vwar Zeova konman nou Berze. Wi, osi lontan ki nou reste pros avek Zeova, i pou pran swen avek nou konman en Berze ranpli avek lanmour “pour lontan,” menm pour leternite. Me konman son mouton, nou annan en responsabilite pour mars avek nou gran Berze, Zeova. Lartik swivan pou diskite ki sa i enplike.

[Not anba lo paz]

Eski ou rapel?

• Akoz i apropriye ki David i konpar Zeova avek en berze?

• Ki mannyer Zeova i montre ki i konpran nou ler i diriz nou?

• Ki mannyer Zeova i ed nou siport bann leprev?

• Kwa ki montre ki Zeova i zenere avek nou?

[Portre lo paz 24]

Zeova i diriz Son mouton zis parey en berze Izrael