“Lo Later parey dan Lesyel”

“Dapre krwayans Katolik, i annan Kat Destinasyon: Lanmor, Zizman, Lanfer, Lesyel.”—Catholicism, editer George Brantl.

ESKI ou’n remarke ki parmi sa kat posibilite pour limanite, later pa’n ganny enkli. Sa i pa drol, akoz Legliz Katolik ek serten lezot larelizyon zot dir ki en zour later pou ganny detri. Dictionnaire de Théologie Catholique i dir klerman anba sa tit “Lafen Lemonn”: “Legliz Katolik i krwar e ansennyen ki sa lemonn ozordi, parey Bondye in kree e parey i egziste ozordi, pa pou reste pour touzour.” Menm nide ti ganny pase dan en katesis Katolik tou resaman: “Nou lemonn . . . in ganny destinen pour disparet en zour.” Me si nou plannet later pou disparet, ki pou arive avek sa bann promes dan Labib ki koz lo paradi isi lo later?

Labib i dir klerman ki alavenir later pou vin en paradi. Par egzanp, gete konman profet Izai ti dekrir later ek son bann zabitan: “Zot pou konstri lakaz e zot pou reste ladan; wi, zot pou plant pye rezen e zot pou manz son fri. Zot pa pou konstri pour en lot reste, e zot pa pou plante pour en lot manze. Parski lakantite letan ki mon pep pou viv pou parey lakantite letan ki en pye dibwa i viv; e sa bann ki mon’n swazir pou profit plennman travay zot lanmen.” (Izai 65:21, 22) Bondye ti fer sa promes avek bann Zwif, alors zot ti asire ki zot pei, anfet later antye, en zour ti pou vin en paradi kot limanite ti pou ganny beni pour leternite.

Psonm 37 i asir nou: “Bann dimoun ki annan limilite pou reste lo later.” (Psonm 37:11) Sa verse pa pe zis koz lo bann Izraelit ki ti reste dan Later Promiz tanporerman. Sa menm psonm i spesifye: “Bann dimoun drwat pou posed later, e zot pou reste lo la pour touzour.” (Psonm 37:29)a Remarke ki sa psonm i fer resorti ki lavi eternel lo later i en rekonpans pour bann ki annan “limilite.” Dapre en remark lo sa verse dan en Labib an Franse, sa mo “limilite” “i annan en sinifikasyon pli zeneral ki lafason in ganny tradwir. I enkli bann ki pov, sa ki pe soufer oubyen ki pe ganny persekite akoz Yahweh [oubyen Zeova]. I osi enplik bann ki abes zot akoz zot pare pour soumet avek Bondye.”

Lo Later oubyen dan Lesyel?

Zezi ti fer en promes dan son Sermon lo montanny, ki fer nou rapel sa bann verse ki nou’n verifye dan paragraf avan: ‘Byennere bann ki dous, akoz zot pou posed later.’ (Matye 5:5) Ankor enn fwa nou vwar ki later i sa landrwa kot bann dimoun fidel pou reste lo la pour touzour. Me Zezi ti fer kler avek son bann zapot ki i ti pe al prepar en plas pour zot “dan lakaz [son] Papa” e ki zot ti pou avek li dan lesyel. (Zan 14:1, 2; Lik 12:32; 1 Pyer 1:3, 4) Alors, ki mannyer nou devret konpran sa bann benediksyon ki Labib i dir pou ariv lo later? Eski zot ankor valab ozordi, e pour ki sennla zot aplike?

Plizyer spesyalis Labib i dir ki sa “later” ki ganny mansyonnen dan Sermon Zezi ek dan Psonm 37, i senbolik. Dapre F. Vigouroux dan son komanter dan Bible de Glaire, sa bann verse “i reprezant lesyel ek Legliz.” Dapre M. Lagrange, en Franse ki fer resers lo Labib, sa promes “i pa en promes kot bann dimoun ki annan limilite pou posed later pour touzour, ki swa dan sa sistenm oubyen alavenir dan en lemonn parfe. Me plito i rwayonm lesyel, sa landrwa kot i pa konnen kote i ete.” Dapre en lot serser, sa promes i zis en lekspresyon “senbolik kot in servi bann valer imen pour refer avek lesyel.” Me pour lezot serser, “sa later promiz, Kanaan, i ganny servi dan en sans spirityel e i reprezant lesyel, rwayonm Bondye, sa landrwa ki’n ganny rezerve pour bann ki annan limilite. Psonm 37 ek lezot verse i annan menm sinifikasyon.” Eski deswit nou devret konklir ki later pa enkli dan bann promes ki Bondye in fer?

En Plan eternel pour Later

Depi okonmansman nou vwar ki later ti relye etrwatman avek plan ki Bondye ti annan pour limanite. En psalmis ti ekrir: “An sa ki konsern lesyel, i pour Zeova, me later i’n donn imen.” (Psonm 115:16) Alors, plan orizinal Bondye ti annan pour fer avek later, pa avek lesyel. Zeova ti donn sa premye koup imen sa travay pour agrandi zarden Edenn ziska later antye i vin en paradi. (Zenez 1:28) Sa pa ti en plan tanporer. Dan son Parol, Labib, Zeova in konfirmen ki later pou reste pour touzour: “En zenerasyon pe ale, e en zenerasyon pe vini, me later pe debout menm pour en letan endefini.”—Eklezyast 1:4; 1 Kronik 16:30; Izai 45:18.

Zanmen bann promes Bondye i tonm dan delo, akoz i sa enn Tre O e i fer sir ki zot ganny akonpli. Pour montre ki bann promes Bondye i toultan ganny akonpli, Labib i servi sa prosesis natirel ki delo i pas atraver konman en legzanp: “Zis parey lapli toransyel ek lanez i desann sorti dan lesyel e i pa retournen, san ki i aroz later, . . . demenm mon parol [parol Bondye] ki sorti dan mon labous pou parey. I pa pou retourn kot mwan san rezilta, me i pou sirman akonpli sa ki mon’n pran plezir ladan, e i pou sirman annan sikse dan sa ki mon’n anvoy li.” (Izai 55:10, 11) Bondye i fer bann promes avek imen. I kapab ki en pe letan i pase avan sa bann promes i ganny akonpli, me zanmen zot tonm dan delo. Zot “retourn” kot li apre ki zot in ganny akonpli parey i ti dir.

Sirman Zeova ti “pran plezir” pour kree later pour imen. Akoz alafen son sizyenm zour Kreasyon, i ti dir ki tou keksoz ti “tre bon.” (Zenez 1:31) Vwar later vin en paradi pour touzour i form parti plan Bondye ki pa ankor ganny akonpli ziska prezan. Me nou kapab asire ki bann promes Bondye ‘pa pou retourn kot li san rezilta.’ Tou sa bann promes, enkli en lavi parfe lo later kot imen pou reste pour touzour dan lape ek sekirite, pou ganny akonpli.—Psonm 135:6; Izai 46:10.

Plan Bondye pou ganny akonpli

Akoz nou premye paran ti fer pese, sa ti tanporerman enteronp plan Bondye pour fer later vin en paradi. Apre ki zot ti’n dezobei, zot ti ganny tire dan zarden. Zot ti perdi sa privilez pour donn Bondye lanmen akonpli son plan pour fer bann imen parfe viv dan paradi lo later. Me kantmenm sa, Bondye ti fer lezot laranzman pour ki en zour son plan i ganny akonpli. Konman?—Zenez 3:17-19, 23.

Sa ki ti arive dan zarden Edenn i zis parey avek en zonm ki konmans konstri son lakaz lo en zoli kare later. Me zis apre ki i’n fouy fondasyon, en dimoun i vini e detri son fondasyon. Me olye aret dan milye semen, sa zonm i fer tou sa ki i kapab pour fini fer son lakaz. Menm si i bezwen fer plis depans, i napa dout ki sa ki i pe fer pa en bon proze.

Pareyman, Bondye in fer bann laranzman pour fer sir ki son plan i ganny akonpli. Deswit apre ki nou premye paran ti fer pese, i ti donn zot desandans en lespwar, i ti fer resorti ki en “desandans” pou repar sa bann domaz. Pour akonpli sa profesi, sa premye parti sa desandans i Garson Bondye, Zezi, ki ti vin lo later pour donn son lavi konman en sakrifis pour sov limanite. (Galat 3:16; Matye 20:28) Apre ki i ti resisite, Zezi ti vin Lerwa dan sa Rwayonm. Premyerman, i sa enn ki annan limilite ki pou posed later ansanm avek lezot Kretyen fidel ki’n ganny swazir, ki apre zot rezireksyon zot al dan lesyel pour dirize dan sa Rwayonm. (Psonm 2:6-9) Avek letan, sa gouvernman pou pran kontrol lo later afen pour akonpli plan orizinal Bondye e pour fer later vin en paradi. Plizyer milyon dimoun ki annan limilite pou “posed later” dan le sans ki zot pou benefisye avek sa direksyon sorti kot sa Rwayonm ki pou ganny dirize par Zezi ek son bann asosye.—Zenez 3:15; Danyel 2:44; Akt 2:32, 33; Revelasyon 20:5, 6.

“Lo Later parey dan Lesyel”

Zis parey zapot Zan ti vwar dan en vizyon, sa delivrans ki Bondye pou anmennen i annan de laspe, enn i pou dan lesyel e lot lo later. Dan sa vizyon i ti vwar bann lerwa lo tronn dan lesyel, zot sa bann ki’n ganny swazir parmi bann disip fidel Kris. Labib i fer kler ki “zot pou rennyen lo later” ansanm avek Kris. (Revelasyon 5:9, 10) Remarke ki plan Bondye i kontyen de laspe, sa i en later ki’n vin en paradi anba direksyon en Rwayonm dan lesyel. Tou sa bann laranzman ki Bondye in fer, i fer li posib pour en zour later vin en Paradi zis parey i ti anvi depi okonmansman.

Dan son lapriyer model, Zezi ti demann son bann disip pour priye ki lavolonte Bondye i ganny akonpli “lo later parey dan lesyel.” (Matye 6:9, 10) Eski sa model lapriyer ti pou fer sans si later ti pou ganny detri en zour oubyen si i ti senbolikman reprezant lesyel? Eski i ti pou fer sans si tou bon dimoun ti al dan lesyel? Plan Bondye pour later i vreman kler dan Labib, depi Zenez ziska Revelasyon. Later pou vin en paradi zis parey Bondye ti anvi. Sa i lavolonte Bondye ki in promet pour akonpli. Bann Kretyen fidel lo later i priye ki son lavolonte i ganny akonpli.

Nou Kreater ki “pa’n sanze,” depi okonmansman ti anvi ki tou imen i viv pour touzour lo later. (Malaki 3:6; Zan 17:3; Zak 1:17) Pour plis ki 100 tan, sa magazin Latour Veyer, in eksplik sa de laspe dan plan Bondye. Sa in fer li posib pour nou konpran sa promes ki Bondye in fer dan Labib, pour fer later vin en paradi. Nou envit ou pour etidye sa size pli oprofon, ou kapab fer sa par diskit li ansanm avek bann Temwen Zeova, oubyen par kontakte editer sa magazin.

[Not anba lo paz]

[Portre lo paz 4]

Labib i klerman koz lo en Paradi lo later ki pou ganny etabli alavenir

[Portre lo paz 7]

Eski sa model lapriyer Zezi ti pou fer sans si later ti pou ganny detri?