Demontre devouman pour vre ladorasyon

“I annan en gran rekolt ki’n pare me napa ase zouvriye.”—MAT. 9:37.

 1. Ki mannyer nou azir ler nou annan en keksoz irzan pour fer?

OU ABSOLIMAN bezwen fer en serten dimoun verifye en dokiman avan ki lazournen i terminen. Ki ou pou fer? Pa ou pou ekrir “IRZAN” lo la! Ou lo semen pe al en randevou enportan, me ou an retar. Ki ou pou fer? Pa ou pou dir avek sa drayver, “depese silvouple, mon annan en keksoz IRZAN pour fer!” I vre, ler ou annan en keksoz enportan pour fer e letan pe ale, ou santi ou strese e eksite. Ou lekor i konmans desarz adrenalin e ou travay pli vit ki ou kapab. Sanmenm sa ki arive ler nou annan en keksoz irzan pour fer!

 2. Ki sa travay pli irzan bann Kretyen i annan pour fer ozordi?

² Sa travay pli irzan pour bann vre Kretyen ozordi i pour anons sa bon nouvel lo Rwayonm e fer tou pep vin bann disip. (Mat. 24:14; 28:19, 20) Disip Mark ki ti sit parol Zezi ti dir ki sa travay i bezwen ganny fer “avan” ki lafen i arive. (Mark 13:10) Koumsa menm keksoz i devret ete. Zezi ti dir: “I annan en gran rekolt ki’n pare me napa ase zouvriye.” Kan rekolt in pare i pa posib pour espere, fodre ki i ganny anmase avan ki sezon i fini.—Mat. 9:37.

 3. Ki mannyer serten in azir anver sa bezwen irzan pour prese?

³ Vi ki sa travay predikasyon i vreman enportan pour nou, nou merit depans bokou letan, lenerzi e donn li tou nou latansyon posib. Sanmenm sa ki bokou frer ek ser pe fer e nou felisit zot. Serten in senplifye zot lavi pour ki zot kapab pran servis a plen tan konman pionye, misyonner, ouswa zot pe servi dan enn bann Betel dan lemonn. Zot vreman okipe. I kapab ki zot in fer en ta sakrifis e zot annan en kantite defi pour fer fas avek. Me, Zeova i beni zot en kantite. Nou kontan pour zot. (Lir Lik 18:28-30.) I annan ki pa kapab pran servis a plen tan, me zot partisip otan ki zot kapab dan sa travay ki sov lavi, sa i enplik ed nou bann zanfan pour ganny sove.—Det. 6:6, 7.

 4. Akoz serten i kapab tant pour pa gard antet ki letan i kourt?

⁴ Parey nou’n vwar, ler nou dir ki en sityasyon i irzan, i vedir ki i annan en serten kantite letan pour fer en keksoz e i annan en lafen. Nou pe viv dan letan lafen e i annan en kantite levidans swa dan Labib oubyen dapre listwar ki prouv sa. (Mat. 24:3, NW, 33; 2 Tim. 3:1-5) Kantmenm sa, napa okenn imen ki konnen kan egzakteman lafen pou arive. Ler Zezi ti pe donn bann detay konsernan “sa siny” ki pou mark “konklizyon sa sistenm,” i ti dir: “Konsernan sa zour e sa ler personn pa konnen kan i pou arive, pa menm bann lanz dan lesyel, ni menm Garson Bondye, me Papa tousel ki konnen.” (Mat. 24:36) Akoz sa, serten i kapab vwar li difisil pour gard antet ki letan i kourt lannen ale, lannen vini, sirtou si zot pe fer sa depi en bon pe letan. (Prov. 13:12) Eski parfwa ou santi koumsa? Kwa ki kapab ed nou devlop sa leta lespri oubyen gard antet ki letan i kourt ler nou pe akonplir sa travay ki Zeova ek Zezi Kri i oule nou fer ozordi?

Annou egzamin legzanp ki Zezi in kite pour nou

 5. Dan ki fason Zezi ti demontre ki i ti irzan pour li akonplir son minister?

⁵ Parmi tou bann dimoun ki’n demontre ki i ti irzan pour akonplir zot servis pour Bondye, Zezi Kri i sirman sa pli bon legzanp. En rezon ki ti fer li gard antet ki letan ti kourt i akoz i ti annan en kantite keksoz pour fer dan zis trwa-z-an edmi. Toudmenm, Zezi ti akonplir plis ki nenport ki an rapor avek vre ladorasyon. I ti fer konnen non son Papa ek son plan, i ti pres sa bon nouvel lo Rwayonm, ekspoz lipokrizi ek fo lansennyman bann sef relizye e menm siport souvrennte Zeova ziska lanmor. I ti fer tou son posib pour al partou pour ansenny bann dimoun, ed zot e geri zot. (Mat. 9:35) Napa personn ki’n deza fer sitan kantite keksoz dan zis en ptigin letan. Zezi ti travay vreman dir.—Zan 18:37.

 6. Ki Zezi ti met premye plas dan son lavi?

⁶ Kwa ki ti pous Zezi pour travay vreman dir tou dilon son minister? Dapre profesi Danyel, Zezi ti pou’n kapab konnen ki kantite letan ti reste li pour fer sa travay ki Zeova ti’n demann li pour fer. (Dan. 9:27) Alor, parey nou’n vwar, i ti pou termin son minister “pandan lanmwatye lasemenn” oubyen apre trwa-z-an edmi. En pti pe letan apre ki i ti antre Zerizalenm konman en lerwa pandan prentan lannen 33 N.L., Zezi ti dir: “Ler in aprezan arive pour ki Fis-de-Lonm i resevwar gran laglwar.” (Zan 12:23) Menm si Zezi ti konnen ki i ti pros pour mor, pa sa ki ti pe preokip li plis e i pa ti sa rezon prensipal ki ti fer li travay dir. I ti plito konsantre son latansyon lo servi tou loportinite ki i ti annan pour fer lavolonte son Papa e demontre lanmour anver bann imen. Son lanmour ki ti pous li pour rasanble son bann disip, form zot e anvoy zot prese. I ti fer tousala pour ki zot kapab kontiny sa travay ki i ti’n konmanse e fer li lo en pli gran lanpler.—Lir Zan 14:12.

 7, 8. Ki mannyer bann disip Zezi ti reakte ler Zezi ti pirifye tanp e kwa ki ti fer Zezi azir koumsa?

⁷ I annan en levennman dan lavi Zezi ki donn nou en laprev konvenkan lo sa kalite devouman ki i ti annan. Pandan sezon Lapak lannen 30 N.L., o konmansman son minister, Zezi ek son bann disip ti vin Zerizalenm e la dan tanp zot ti vwar ‘bann vander bef, mouton ek pizon, ek bann sanzer larzan pe asiz la kot zot latab.’ Ki mannyer Zezi ti reakte ler i ti vwar tousala e ki lefe sa ti annan lo son bann disip?—Lir Zan 2:13-17.

⁸ Sa ki Zezi ti fer e dir sa zour ti fer bann disip rapel sa parol profetik dan enn bann psonm David ki dir: “En gran devouman pour ou lakaz i brile dan mwan.” (Ps. 69:9) Akoz? Par lafason ki i ti reakte i ti pe vreman met son lekor dan danze e i ti pe riske son lavi. Apre tou, sa bann ki ti okip tanp setadir bann pret, profeser lalwa ek lezot ankor ki ti par deryer sa komers ki ti pe ganny fer dan tanp. Lefet ki Zezi ti ekspoz e anpes zot fer zot bann magouy, sa ti fer bann sef relizye dan sa letan konsider li konman zot lennmi. Kan bann disip ti egzamin sa sityasyon, i ti evidan ki Zezi ti annan ‘devouman pour lakaz Bondye’ setadir devouman pour vre ladorasyon. Me ki si sa devouman? Eski i annan en diferans ant fer en keksoz irzan e fer li avek devouman?

Diferans ant fer en keksoz avek devouman e fer en keksoz irzan

 9. Ki si sa devouman?

⁹ Dan en diksyonner, “devouman” i ganny defini konman sa “gran lentere oubyen dezir pour fer en keksoz.” Pour ranplas sa mo devouman, sa diksyonner i servi lezot mo parey pasyonan, larder ek lantouzyasm. Definitivman, nou kapab dir ki Zezi ti demontre tou sa bann kalite ler i ti akonplir son minister. Pour sa rezon ki dan Today’s English Version sa verse i ganny tradwir koumsa: “Mon devosyon pour ou lakaz, O Bondye, pe brile parey en dife dan mwan.” I enteresan pour vwar ki dan serten langaz sa mo pour “devouman” i sorti dan de mo ki orizinalman vedir “leker ki so,” konmsi i annan en dife ladan ki pe brile. I pa drol alor ki ler bann disip ti vwar ki mannyer Zezi ti reakte kot tanp sa zour, sa ti fer zot rapel parol David. Alor kwa ki ti motiv Zezi, konmsi ti annan en dife ki ti pe brile dan son leker, e fer li azir koumsa?

 10. Ki “devouman” i vedir dapre Labib?

¹⁰ Sa mo “devouman” dan psonm David i sorti dan en mo Ebre ki kapab ganny tradwir par “zalou” oubyen “zalouzi” dan lezot parti Labib. Parler dan New World Translation sa mo zalou oubyen zalouzi i ganny tradwir par sa lekspresyon, “en devosyon zis pour mwan tousel.” (Lir Egzod 20:5; 34:14; Zozye 24:19.a) Konsernan sa lekspresyon, en diksyonner Labib i dir: “I souvan ganny servi an rapor avek relasyon maryaz . . . Zis parey dan ka en msye oubyen madanm, sa bon kalite zalouzi i fer zot annan sa drwa pour ekspekte ki son konzwen i konpletman fidel avek li. Pareyman Bondye i annan sa drwa pour demann tou bann ki pour Li pour demontre devosyon anver zis Li.” Alor, dapre Labib devouman i plis ki zis fer en keksoz avek larder oubyen lantouzyasm, sa latitid ki bokou siporter i demontre anver zot sport prefere. Sa devouman ki David ti demontre, ti plito sa bon kalite zalouzi ki pa toler okenn lopozisyon avek Zeova oubyen repros lo Son non. Sa kalite devouman i pous en dimoun pour protez repitasyon oubyen repar en ditor ki’n ganny fer kont en lot dimoun.

 11. Kwa ki ti pous Zezi pour demontre sa gran devouman?

¹¹ Bann disip Zezi ti annan rezon relye parol David avek sa ki zot ti vwar Zezi fer kot tanp. Zezi ti demontre sa determinasyon pa zis akoz i ti annan en ptigin letan devan li, me akoz i ti annan devouman, setadir i ti annan sa bon kalite zalouzi pour non son Papa ek vre ladorasyon. Ler i ti vwar ki non son Papa ti pe ganny sali e blasfenmen, i ti toutafe normal pour li demontre son devouman e azir pour koriz sa sityasyon. Ler Zezi ti vwar bann dimoun ki annan limilite pe soufer e ganny eksplwate par bann sef relizye, son devouman ti pous li pour soulaz zot e i ti osi ekspoz dan en fason fran bann move keksoz ki sa bann sef relizye kriyel ti pe fer.—Mat. 9:36; 23:2, 4, 27, 28, 33.

Annan devouman pour vre ladorasyon

 12, 13. Ki bann sef relizye ozordi ki pretann ki zot Kretyen in fer an rapor avek (a) non Bondye? (b) Rwayonm Bondye?

¹² Bann dimoun ozordi ki pretann ador Bondye i azir parey sa bann sef relizye, defwa menm pli pir ki sa bann sef relizye dan letan Zezi. Par egzanp, pa oubliye ki sa premye keksoz ki Zezi ti ansenny son bann disip pour priy lo la ti konsernan non Bondye: “Ki ou non sen i ganny glorifye.” (Mat. 6:9) Eski nou vwar bann sef relizye, sirtou bann ki pretann ki zot Kretyen, pe ansenny bann dimoun pour konn Bondye par son non e sanktifye oubyen onor sa non? Zot in fer tou lekontrer, zot pa’n dir laverite lo Bondye atraver zot bann lansennyman tel parey Trinite, nanm imortel ek lanfer dife. Sa bann lansennyman i fer Bondye paret konman en mister ki vreman difisil pour konpran, en Bondye kriyel e ki i menm kontan fer soufer lezot. Zot in osi anmenn repros lo Bondye akoz zot bann move aksyon ek lipokrizi. (Lir Romen 2:21-24.) Deplis, zot in fer tou sa ki zot kapab pour kasyet non Bondye, menm retir li dan zot bann tradiksyon Labib. Dan sa fason, zot anpes bann dimoun pour apros e menm devlop en relasyon personnel avek Bondye.—Zak 4:7, 8.

¹³ Zezi ti osi ansenny son bann disip pour priy pour Rwayonm Bondye: “Ki ou Renny i ganny etabli; Ki ou lavolonte i ganny akonpli lo later parey dan lesyel.” (Mat. 6:10) Kantmenm bann sef relizye dan bann larelizyon ki pretann ki zot Kretyen i souvan repet sa lapriyer, zot in ankouraz dimoun pour siport bann lorganizasyon politikek lezot lorganizasyon imen. Deplis, zot kontan abes bann dimoun ki fer bokou zefor pour prese e rann temwannyaz lo sa Rwayonm. An rezilta sa, en kantite parmi bann dimoun ki pretann ki zot Kretyen, i nepli annan konfyans dan Rwayonm Bondye e zot pa ni menm koz lo la.

 14.Ki mannyer bann sef relizye ki pretann ki zot Kretyen in abes standar moral ki sorti dan Labib?

¹⁴ Dan en lapriyer ki Zezi ti fer avek son Papa, i ti dir dan en fason kler: “Ou parol i laverite.” (Zan 17:17) Zis avan ki i ti mont dan lesyel, Zezi ti endike ki i ti pou apwent “sa lesklav fidel e pridan” pour donn manze spirityel son pep. (Mat. 24:45, NW) Kantmenm bann sef relizye ki pretann ki zot Kretyen i dir san ezite ki zot ki’n ganny sa responsabilite dan Parol Bondye, eski zot in prouve ki zot in akonplir sa travay ki Met in konfye zot? Pa ditou! Zot tant pour dir ki Labib i rakont bann fab oubyen lezann. Olye donn zot bann fidel nouritir spirityel ki pou rekonfort zot e donn zot leklersisman, sa bann sef relizye i ansenny zot bann filozofi imen, bann lansennyman ki zot zorey i oule tande. An plis ki sa, zot in abes standar moral Bondye pour adapte avek sa swadizan nouvo moralite ki zot bann fidel pe swiv.—2 Tim. 4:3, 4.

 15. Ki mannyer ou santi konsernan tou sa ki bann sef relizye in fer swadizan o non Bondye?

¹⁵ Bann dimoun senser in dezapwente ouswa konpletman perdi lafwa dan Bondye ek Labib akoz tou sa bann keksoz ki’n ganny fer swadizan o non sa Bondye Labib. Zot in tonm dan pyez Satan ek son move sistenm. Ler ou vwar e tann konsernan sa bann keksoz ki pe arive sak zour, ki mannyer ou santi? Konman en serviter Zeova, eski ou santi ou pouse pour defann Bondye ler ou vwar repros ki zot in anmennen lo son non? Ler ou vwar bann dimoun senser ki annan sa bon kondisyon leker pe ganny tronpe e eksplwate, eski pa ou vreman anvi donn sa bann dimoun ki pe soufer rekonfor? Ler Zezi ti vwar bann dimoun dan son letan “fatige e dekouraze parey bann mouton ki napa berze,” i pa ti zis annan pitye pour zot. I “ti konmans ansenny zot bokou keksoz.” (Mat. 9:36; Mark 6:34) Parey Zezi, nou annan bann bon rezon pour annan devouman pour vre ladorasyon.

 16, 17. (a) Kwa ki devret pous ou pour demontre plis devouman dan ou minister? (b) Ki nou pou vwar dan lot lartik?

¹⁶ Ler nou vwar nou minister dan sa fason, nou konpran pli byen parol zapot Pol dan 1 Timote 2:3, 4. (Lir.) Nou travay dir dan nou minister pa zis akoz nou konnen ki nou pe viv dan bann dernyen zour, me osi akoz nou realize ki i lavolonte Bondye. I oule ki dimoun i ganny en konnesans egzakt lo laverite pour ki zot kapab aprann pour ador e servi li, e i beni zot an retour. Nou ganny motive pour demontre plis devouman dan nou minister, pa akoz nou napa bokou letan, me akoz nou anvi onor non Bondye e ed dimoun pour konn son lavolonte. Nou annan devouman pour vre ladorasyon.—1 Tim. 4:16.

¹⁷ Konman pep Zeova, nou’n ganny beni akoz nou konn laverite lo plan Bondye pour imen ek later. Nou kapab ed bann dimoun pour trouv boner e annan en lespwar pour lavenir. Nou kapab montre zot ki mannyer zot kapab ganny proteze ler sistenm Satan pou ganny detrir. (2 Tesa. 1:7-9) Olye santi nou fristre oubyen dekouraze akoz zour Zeova pa ankor arive, nou devret kontan ki i ankor annan letan pour nou demontre devouman pour vre ladorasyon. (Mik. 7:7; Aba. 2:3) Ki mannyer nou kapab devlop sa kalite devouman? Nou pou vwar sa dan lot lartik.

[Not anba lo paz]

Ki ou pou reponn?

• Kwa ki ti pous Zezi pour travay dir tou dilon son minister?

• Ki si sa “devouman” dapre Labib?

• Ki nou vwar ozordi ki devret pous nou pour demontre devouman pour vre ladorasyon?

[Portre lo paz 16]

Zezi ti konsantre lo fer lavolonte son Papa e demontre lanmour anver bann imen

[Portre lo paz 18]

Nou annan bon rezon pour demontre devouman pour vre ladorasyon