Eski ou benefisye avek ou bann moman detant?

“Konn disteng sa ki fer plezir Bondye.”​—EFE. 5:10.

1, 2. (a) Ki mannyer Parol Bondye i montre ki Zeova i anvi ki nou lavi i gou? (b) Nou pou ganny motive pour fer kwa si nou konsider divertisman konman en “kado sorti kot Bondye”?

PARTOU dan Labib, i annan bann verse ki montre ki Zeova pa zis anvi ki nou viv me ki nou annan en lavi ki gou. Par egzanp, Psonm 104:14, 15 i dir ki Zeova i “fer later prodwir manze, i fer diven ki fer leker zonm kontan, i fer figir klate avek delwil e dipen ki soutenir leker zonm.” Zeova i fer pouse bann plant ki prodwir legren, delwil ek diven pour soutenir nou. Me diven i osi ‘fer nou leker kontan.’ I pa zis soutenir nou lavi me i osi fer nou zwaye. (Ekle. 9:7; 10:19) Wi, Zeova i anvi ki nou ere e ki nou leker i ranpli avek “lazwa.”​—Akt 14:16, 17.

² Alor nou pa bezwen santi nou koupab ler detanzaot nou met en pe letan dekote pour “get bann zwazo ki anvole dan lezer” ek “bann lis maron,” oubyen pran plezir dan lezot aktivite ki fer nou lavi pli gou e enteresan. (Mat. 6:26, 28; Ps. 8:3, 4) Sa bann bon moman dan lavi i en “kado sorti kot Bondye.” (Ekle. 3:12, 13) Si nou konsider letan lwazir konman en kado, sa pou pous nou pour servi li dan en fason ki pou fer plezir sa Enn ki’n donn nou sa kado.a

Varyete ek limit dan moman detant

 3. Akoz i toutafe normal ki i annan diferan kalite detant?

³ Bann ki annan en pwennvi balanse lo detant i konnen ki i annan tou sort kalite detant, me zot osi rekonnet ki i annan serten limit dan sa ki zot kapab fer. Akoz? Pour reponn sa kestyon, annou konpar divertisman avek manze. Dan sak pei, i annan en manze ki tou dimoun i kontan. Anfet, sa ki dimoun dan serten pei i kontan i kapab pa apetisan pour lezot dan en lot landrwa. Pareyman, sa ki bann Kretyen dan en serten landrwa i konsider konman en divertisman ki gou, i kapab pa sitan atiran pour lezot Kretyen dan en lot landrwa. Menm parmi bann Kretyen ki pe viv dan menm landrwa, sa ki enn i kapab konsider konman en bon detant (par egzanp asize lir en bon liv), en lot dimoun i kapab vwar li annwiyan. Sa ki en dimoun i kapab konsider konman eksitan (par egzanp vizit diferan landrwa lo en bisiklet), en lot i kapab vwar li fatigan. Kantmenm sa, nou pou dakor ki dan domenn detant ek manze, i annan diferan kalite e sakenn i annan son preferans.​—Rom. 14:2-4.

 4. Akoz i bezwen annan en limit lo kalite divertisman ki nou swazir? Donn en legzanp.

⁴ Par kont, nou osi realize ki pa akoz i annan diferan kalite divertisman ki sa i vedir ki nou devret toultan pe diverti kontan. Pour donn en legzanp, reflesir ankor en kou lo manze. Menm si nou kapab anvi manz diferan kalite manze, nou pa pou manz en manze ki’n gate par ekspre. I pa fer sans pour manz en manze ki’n gate e met nou lavi an danze. Pareyman, menm si i annan en kantite bon divertisman ki nou kapab swazir, nou pa ti pou swazir sa ki vyolan, ki sal moralman oubyen ki ti pou met nou lavi an danze. Si nou ti partisip dan bann divertisman koumsa, nou ti pou azir kont bann prensip Labib e i ti pou met nou lavi an danze fizikman e spirityelman. Pour fer sir ki nou etablir bann limit rezonnab an sa ki konsern bann moman detant, i pou byen si nou egzamin davans serten divertisman ki nou kontan pour vwar si i anmenn byenfe pour nou oubyen non. (Efe. 5:10) Ki mannyer nou kapab fer sa?

 5. Ki mannyer nou kapab konnen si kalite divertisman ki nou kontan i annakor avek standar Bondye?

⁵ Pour ki nou bann moman detant i fer plezir Zeova e benefisye nou, fodre zot annakor avek standar Bondye dan Labib. (Ps. 86:11) Pour ou konnen si sa i le ka an rapor avek en kalite divertisman ki ou kontan, ou kapab demann ou lekor sa trwa kestyon, kwa?, kan? e lekel? Annou egzamin zot enn par enn.

Kwa ki enplike?

 6. Ki kalite divertisman nou devret rezete e akoz?

⁶ Premye kestyon ou merit demann ou lekor an rapor avek en kalite divertisman i: ‘Kwa ki enplike dan sa divertisman ki mon kontan?’ Anmezir ki ou rod larepons, i byen pour gard antet ki an realite, divertisman i ganny klasifye dan de kategori. Nou dir ‘non’ avek sa enn premye e ‘petet’ avek sa enn dezyenm. Ki sa enn premye? Dan sa move lemonn ki nou pe viv ladan, en kantite divertisman i direkteman kas lalwa Bondye oubyen bann prensip Labib. (1 Zan 5:19) Bann vre Kretyen i definitivman dir non avek sa bann kalite divertisman. Sa i enkli divertisman kot dimoun i pran plezir pour fer soufer lezot, bann pratik demonyak, omoseksyalite, pornografi, vyolans oubyen nenport kwa ki glorifye sa ki mal oubyen ki imoral. (1 Kor. 6:9, 10; lir Revelasyon 21:8.) Nenport ki landrwa kot nou ete, si nou reste lwen avek sa bann kalite divertisman, nou montre Zeova ki nou “deteste sa ki mal.”​—Rom. 12:9; 1 Zan 1:5, 6.

7, 8. Ki mannyer nou pou konnen si en serten kalite divertisman i bon oubyen non? Donn legzanp.

⁷ Sa dezyenm kategori divertisman i enkli bann aktivite detant ki pa direkteman relye avek bann pratik ki kont Parol Bondye. Dan bann sityasyon koumsa, avan swazir sa divertisman, nou devret konpar sa ki nou pe al fer avek sa ki Zeova i vwar byen, parey bann prensip Labib i montre. (Prov. 4:10, 11) Apre sa, nou bezwen fer en desizyon personnel pour ki nou gard en bon konsyans. (Gal. 6:5; 1 Tim. 1:19) Ki mannyer nou kapab fer sa? Mazin sa: Avan nou manz en nouvo manze, premyerman nou ti pou anvi konnen ki i annan ladan. Pareyman, avan nou pran par dan en aktivite detant, nou bezwen rod lenformasyon konsernan sa ki enplike ladan.​—Efe. 5:17.

⁸ Par egzanp, parey bokou dimoun, petet ou kontan sport. Sport i kapab gou e eksitan. I annan sport ki annan bokou konpetisyon e i vin vyolan ouswa sa bann atlet i met zot lavi an danze. Serten sport i danzere e bann atlet i souvan ganny blese. Tandis ki lezot, bann spektater i selebre dan en fason vyolan e zot krwar ki zot pei i pli siperyer ki lezot. Ki ou pou fer si ou santi ou atire anver sa bann kalite sport? Apre ki ou’n egzamin sa ki enplike dan sa sport, petet ou pou santi ki ou bezwen sanz ou pwennvi pour ki i adapte avek fason panse Zeova e avek sa mesaz lape ek lanmour ki nou koz lo la avek lezot. (Iza. 61:1; Gal. 5:19-21) De lot kote, si en serten aktivite detant i enplik bann keksoz ki byen dapre pwennvi Zeova, alor, ou kapab asire ki ou pou benefisye avek li e i pou gou pour ou.​—Gal. 5:22, 23; lir Filipyen 4:8.

Kan ki mon detann mwan?

 9. Nou larepons pour sa kestyon ‘Kan ki mon detann mwan?’ i montre kwa?

⁹ Dezyenm kestyon ou kapab demann ou lekor i: ‘Kan ki mon detann mwan? Ki kantite letan mon pou pas dan divertisman?’ Nou larepons pour sa premye kestyon: Kwa ki enplike dan mon detant, i montre kwa ki atir nou, sa ki nou nou vwar akseptab e pa akseptab. Larepons pour sa dezyenm kestyon setadir kan ki mon detann mwan, i montre kwa ki nou priyorite, andotmo sa ki enportan e sa ki pa sitan enportan pour nou. Alor, ki mannyer nou kapab konnen ki degre enportan divertisman i ete dan nou lavi?

10, 11. Ki mannyer parol Zezi dan Matye 6:33 i ed nou pour deside ki kantite letan nou devret pase dan divertisman?

¹⁰ Zezi Kri ti dir son bann disip: “Kontan [“Zeova,” NW] Bondye avek tou ou leker, tou ou lam, tou ou lespri e avek tou ou lafors.” (Mark 12:30) Alors, nou lanmour pour Zeova i devret vin premye dan nou lavi. Nou demontre ki sa i vreman le ka kan nou swiv sa konsey Zezi: “Rod plito Rwayonm Bondye ek son lazistis, e limenm i a donn zot anplis tou lezot keksoz osi.” (Mat. 6:33) Ki mannyer sa verse i kapab ed nou pour konnen ki degre enportan divertisman i ete dan nou lavi e ki kantite letan nou pase ladan?

¹¹ Remark sa pti detay: Zezi ti konsey nou pour kontinyen ‘rod plito Rwayonm Bondye.’ I pa ti dir nou kontinyen ‘rod zis Rwayonm Bondye.’ I evidan ki Zezi ti konnen ki nou ti pou bezwen rod lezot keksoz dan lavi apard ki Rwayonm. Nou bezwen landrwa reste, manze, lenz, ledikasyon de baz, en travay, divertisman ensidswit. Par kont, dan tou sa keksoz ki nou pe rode, zis Rwayonm Bondye ki merit vin premye dan nou lavi. (1 Kor. 7:29-31) Sa pwen enportan i merit motiv nou pour fer lezot aktivite ki pa sitan enportan enkli divertisman dan en fason ki pou permet nou met lentere Rwayonm premye dan nou lavi. Si nou fer sa, divertisman ki nou fer detanzaot pou benefisye nou.

12. Ki mannyer sa prensip dan Lik 14:28 i kapab aplik pour divertisman?

¹² An rapor avek detant, i byen alor pour estimen konbyen i pou kout nou. (Lik 14:28) Nou bezwen reflesir lo lakantite letan nou pou pase dan en kalite aktivite lwazir. Apre, nou bezwen deside ki kantite letan ki vo lapenn pase dan sa divertisman. Si ou remarke ki en kalite detant pou fer ou negliz bann keksoz enportan parey letid Labib personnel, ladorasyon fanmir, asiste renyon oubyen partisip dan predikasyon, i pa vo lapenn fer li. (Mark 8:36) Me si en kalite detant ki nou fer detanzaot i donn nou plis lafors pour kontinyen met lentere Rwayonm premye, nou kapab dir ki sa kalite detant i vo lapenn.

Lekel mon pas letan avek?

13. Akoz nou merit swazir byen dimoun ki nou pou pas letan avek?

¹³ Trwazyenm kestyon ki ou merit demann ou lekor i: ‘Lekel ki mon anvi pas letan avek?’ I enportan pour reflesir lo sa laspe detant. Akoz? Parski kalite dimoun ki nou pas letan avek pou annan en gran lefe lo nou divertisman. Zis parey i pli gou ler ou manz en repa avek bann bon zanmi, i pou osi pli gou si ou detann ou avek bann bon zanmi. Pour sa rezon alor, nou kapab konpran akoz bokou parmi nou, sirtou bann zenn i kontan detann zot avek lezot. Me pour fer sir ki sa detant i benefisye nou, i byen pour nou swazir davans ki kalite dimoun nou pou pas letan avek e lekel ki nou pa pou frekante.​—2 Kron. 19:2; lir Proverb 13:20b; Zak 4:4.

14, 15. (a) Ki legzanp Zezi in kite an rapor avek swazir bann bon zanmi? (b) Ki kestyon nou merit demann nou lekor an rapor avek nou bann zanmi?

¹⁴ I pou vreman ede si nou swiv legzanp Zezi an rapor avek swazir nou zanmi. Depi kreasyon, Zezi in toultan kontan bann imen. (Prov. 8:31) Ler i ti lo later, i ti kontan e demontre lentere dan tou sort kalite dimoun. (Mat. 15:29-37) Par kont, pour Zezi, i ti annan en diferans ant vin amikal anver lezot e vin zot zanmi pros. I vre ki Zezi ti amikal anver tou dimoun an zeneral, me i ti en zanmi pros pour sa bann ki ti annan serten kalite spesifik. Zezi ti dir sa avek son onz zapot fidel: “Zot mon bann zanmi, si zot obei mon konmannman.” (Zan 15:14, nou ki’n met an italik; vwar osi Zan 13:27, 30.) Bann dimoun ki Zezi ti konsider konman son zanmi ti selman sa bann ki ti swiv li e servi Zeova.

¹⁵ Alor, ler ou pe mazinen si en serten dimoun i kapab vin ou zanmi pros, i pou byen si ou gard antet sa ki Zezi ti dir. Demann ou lekor bann kestyon koumsa: ‘Eski sa dimoun i demontre an parol ek aksyon ki i pe obeir bann komannman Zeova ek Zezi? Eski i annan menm standar moral ek prensip baze lo Labib parey mwan? Eski si mon frekant li, i pou ankouraz mwan pour met Rwayonm premye dan mon lavi e reste fidel avek Zeova?’ Si ou asire ki larepons pour sa bann kestyon i wi, savedir ou’n zwenn en bon dimoun ki ou kapab pas bann moman detant avek.​—Lir Psonm 119:63c; 2 Kor. 6:14; 2 Tim. 2:22.

Eski nou divertisman i pas sa tes?

16. Ki nou bezwen demann nou lekor an rapor avek nou divertisman?

¹⁶ An bref, nou’n egzamin trwa laspe dan lafason ki nou detann nou. Sa i kalite detant, kantite letan nou pas ladan e avek lekel. Pour nou benefisye, nou divertisman i devret annakor avek bann standar Labib dan sak sa bann laspe. Alor, avan pran par dan nenport ki kalite detant, nou bezwen fer en tes. Konsernan sa kalite divertisman, nou bezwen demann nou lekor: ‘Kwa ki enkli ladan? Eski i annakor avek standar Zeova ouswa i kas bann prensip Zeova?’ (Prov. 4:20-27) Konsernan lakantite letan, nou bezwen demann nou lekor: ‘Konbyen letan mon pou pase dan sa detant? Eski sa kantite letan i apropriye oubyen non?’ (1 Tim. 4:8) Konsernan dimoun nou asosye avek, nou bezwen demann nou lekor: ‘Lekel ki mon pou pas bann moman detant avek? Eski zot bann bon frekantasyon ouswa bann ki move?’​—Ekle. 9:18; 1 Kor. 15:33.

17, 18. (a) Ki tes nou ti kapab fer pour konnen si nou divertisman i annakor avek bann standar Labib? (b) Ki ou personnelman determinen pour fer konsernan ou swa divertisman?

¹⁷ Si en kalite divertisman pa annakor avek bann standar Labib dan sa trwa laspe, savedir ki i fel sa tes. De lot kote, si nou fer sir ki nou bann aktivite detant i annakor avek tou le trwa laspe, savedir nou divertisman i anmenn loner pour Zeova e i pou benefisye nou.​—Ps. 119:33-35.

¹⁸ Alor, kan nou deside pour detann nou, annou fer bokou zefor pour fer sa bon swa, dan sa bon moman e avek bann bon dimoun. Wi, nou devret toultan annan sa dezir pour swiv sa konsey Labib: “Ki ou manze, oubyen ki ou bwar, ou nenport kwa ki ou fer, fer tou pour laglwar Bondye.”​—1 Kor. 10:31.

[Not anba lo paz]

Eski ou kapab eksplike?

Konsernan divertisman, ki mannyer ou kapab met an aplikasyon sa prensip dan . . .

• Filipyen 4:8?

• Matye 6:33?

• Proverb 13:20?

[Portre lo paz 11]

(For fully formatted text, see publication)

✔Kwa?

[Portre lo paz 12]

(For fully formatted text, see publication)

✔Kan?

[Portre lo paz 14]

(For fully formatted text, see publication)

✔Lekel?

[Portre lo paz 12]

Ki mannyer nou kapab swiv legzanp Zezi kan nou pe swazir nou zanmi ek nou bann aktivite detant?