Ed ou zanfan adolesan pour progrese

1, 2. Ki difikilte ek lazwa bann lannen ladolesans i kapab anmennen?

ANNAN en adolesan kot lakour i tre diferan avek ler ou annan en zanfan senk an oubyen menm en zanfan dis an. Bann lannen ladolesans i anmenn difikilte ek problenm, me zot kapab osi anmenn lazwa ek rekonpans. Bann legzanp tel konman Zozef, David, Yosiya, ek Timote i montre ki bann zenn i kapab azir responsab e annan en bon relasyon avek Zeova. (Zenez 37:2-11; 1 Samyel 16:11-13; 2 Lerwa 22:3-7; Akt 16:1, 2) Bokou adolesan ozordi i montre menm legzanp. Probableman, ou konn serten parmi zot.

² Toutfwa, pour serten, ladolesans i en peryod letan ki pa fasil pour zot pas atraver. Zot pa stab emosyonnelman. En moman zot byen, me en lot moman zot kapab pa byen. Bann fiy ek garson adolesan i kapab anvi vin pli endepandan, e zot kapab pa dakor avek bann limit ki zot paran i mete. Kantmenm sa, sa bann zenn napa leksperyans e zot bezwen lanmour ek led zot paran. Wi, bann lannen ladolesans i kapab eksitan me zot kapab osi konfizan pour paran ek adolesan. Ki mannyer bann zenn i kapab ganny ede pandan sa bann lannen?

 3. Konman bann paran i kapab donn zot zanfan adolesan en bon loportinite dan lavi?

³ Bann paran ki aplik konsey Labib i donn zot zanfan adolesan sa pli bon loportinite pour sirmont sa bann leprev e pour zot vin bann adilt responsab. Dan tou pei e dan tou moman listwar imen, bann paran ek bann adolesan ki’n aplik prensip Labib in ganny bann bon rezilta.​—Psonm 119:1.

 4. Akoz kominikasyon konfidansyel i sirtou enportan pandan bann lannen ladolesans?

⁴ Labib i dir: “Bann plan pa reisi kot napa konversasyon konfidansyel.” (Proverb 15:22) Si kominikasyon konfidansyel ti neseser ler zanfan ti ankor pli zenn, i pli esansyel ankor pandan bann lannen ladolesans. Parski a sa staz, bann zenn i pas mwens letan kot lakour e plis letan avek bann zanmi lekol oubyen lezot zanmi. Si napa kominikasyon konfidansyel, setadir napa kominikasyon ouver e fran ant zanfan ek paran, bann adolesan i kapab vin bann etranze kot lakour. Alors, konman ki sa laliny kominikasyon i kapab reste ouver?

 5. Ki pwennvi lo kominikasyon avek zot paran bann adolesan i ganny ankouraze pour annan?

⁵ Adolesan ek paran i annan sakenn son rol pour zwe ladan. I vre, bann adolesan i kapab vwar li pli difisil pour koz avek zot paran ki letan zot ti pli zenn. Antouka, rapel ki “ler napa bon gidans, lepep i tonbe; me avek en kantite konseye i annan delivrans.” (Proverb 11:14) Sa parol i aplik pour tou, zenn konman vye. Bann adolesan ki realiz sa, pou konpran ki zot ankor bezwen en bon gidans, vi ki zot pe rankontre bann sitiasyon pli konplike ki oparavan. Zot devret rekonnet ki zot paran Kretyen i byen kalifye pour donn zot konsey. Sa se akoz zot pli eksperyanse dan lavi e zot in pran swen avek zot zanfan pour bokou lannen. Alor, bann adolesan ki byen reflesir pa pou elwannyen avek zot paran kan zot in ariv sa staz dan zot lavi.

 6. Konman bann bon paran ki kontan zot zanfan i konsider kominikasyon avek zot?

⁶ Pour ankouraz kominikasyon, sa paran i bezwen esey tou sa ki i kapab pour fer li disponib ler sa adolesan i santi li anvi koze. Si ou en paran, fer sir ki ou la e pare pour kominik avek ou zanfan. Sa i kapab pa fasil. Labib i dir ki i annan “en letan pour reste trankil e en letan pour koze.” (Eklezyast 3:7) Ler ou zanfan adolesan i santi ki i lemoman pour koze, pour ou i kapab lemoman pour reste trankil. Petet ou’n met sa letan dekote pour letid personnel lo Labib, pour relaks, oubyen pour fer detrwa travay kot lakour. Me si ou zanfan i anvi koz avek ou, esey aziste ou plan e ekout li. Sankwa, i kapab pa esey ankor. Rapel legzanp Zezi. En fwa, i ti’n progranm en letan pour li relaks. Me olye repoze, Zezi ti konmans ansenny bann dimoun ki ti’n vin antour li pour ekout li. (Mark 6:30-34) Laplipar adolesan i konpran ki zot paran i byen okipe, me zot bezwen annan lasirans ki zot paran i la pour zot kan zot bezwen li. Alors, paran i bezwen toultan fer zot disponib e konpran zot zanfan.

 7. Ki bann paran i bezwen evite?

⁷ Esey rapel ki mannyer ti ete kan ou ti en adolesan. Pa fodre ki ou serye toultan, esey vwar keksoz dan en fason anmizan! Bann paran i bezwen rezwir an konpanni zot zanfan. Ler zot annan letan lib, ki mannyer bann paran i servi sa letan? Si zot toultan anvi servi zot letan lib pour fer bann keksoz ki pa enkli zot fanmiy, zot zanfan adolesan pou fasilman remarke. Si bann adolesan i panse ki zot bann zanmi lekol i apresye zot plis ki zot paran, definitivman zot pou rankontre problenm.

 8. Ki mannyer paran i kapab fer zot zanfan apresye lonnekte, travay dir, ek bon kondwit?

⁸ Si bann paran pa ankor ansenny zot zanfan lapresyasyon pour lonnekte ek travay dir, zot devret fer tou fason pour fer li pandan zot lannen ladolesans. (1 Tesalonisyen 4:11; 2 Tesalonisyen 3:10) I osi tre enportan pour zot fer sir ki zot zanfan i senserman konvenki lenportans pour viv en lavi moralman prop. (Proverb 20:11) En paran i kominik en kantite dan sa bann domenn par donn legzanp. Zis parey bann mari ki pa Temwen i kapab “aksepte lafwa san laparol” gras a kondwit zot madanm, bann adolesan osi i kapab aprann bann bon prensip atraver kondwit zot paran. (1 Pyer 3:1) Me legzanp lo li menm pa zanmen ase, vi ki bann zanfan i osi ganny ekspoze avek bokou move legzanp e avek bokou fo lenformasyon an deor lakour. Bann paran ki annan lentere dan zot zanfan, i bezwen fer bann bon konversasyon avek zot pour konn pwennvi zot adolesan lo sa ki zot vwar e tande.​—Proverb 20:5.

9, 10. Akoz bann paran i devret fer sir ki zot enstri zot zanfan konsernan seksyalite, e ki mannyer zot kapab fer sa?

⁹ Sa i vre, sirtou konsernan bann keksoz ki annan pour fer avek seksyalite. Paran, eski ou anbarase pour koz lo sèks avek ou zanfan? Menm si sa i leka, fer zefor pour fer li, parski zot pou sirman aprann lo sa size avek en lot dimoun. Si zot pa aprann avek ou, sa ki dir ou zot pa ava aprann bann move lenformasyon avek lezot? Dan Labib, Zeova pa’n evite koz lo bann keksoz ki konsern seksyalite, e bann paran osi i devret fer parey.​—Proverb 4:1-4; 5:1-21.

¹⁰ Erezman, dan Labib i annan gidans kler dan domenn kondwit seksyel. Temwen Zeova in pibliy bokou lenformasyon itil ki montre ki sa gidans i ankor aplikab dan sa lemonn aktyel. Akoz ou pa servi sa led? Par egzanp, akoz ou pa revwar avek ou garson ouswa ou fiy sa seksyon “La sexualité et la moralité” dan liv Les jeunes s’interrogent—Réponses pratiques? Ou kapab sirprann avek rezilta ki sa i anmennen.

11. Ki sa fason pli efikas pour bann paran ansenny zot zanfan lo konman pour servi Zeova?

¹¹ Ki size pli enportan ki paran ek zanfan i devret diskite? Zapot Pol ti koz lo la kan i ti ekrir: “Elve [ou zanfan] dan en ledikasyon ek lenstriksyon Senyer.” (Efezyen 6:4) Bann zanfan i bezwen kontinyen aprann lo Zeova. Zot bezwen sirtou aprann kontan li, e zot devret anvi servi li. La osi, legzanp i kapab en bon fason pour ansennyen. Si bann adolesan i vwar ki zot paran i kontan Bondye ‘avek tou zot leker, avek tou zot lam, e avek tou zot lespri’ e ki sa i prodwir bann bon fri dan lavi zot paran, zot osi zot kapab ganny enfliyanse pour fer menm parey. (Matye 22:37) Pareyman, si bann zenn i vwar ki zot paran i annan en pwennvi rezonnab lo keksoz materyel, e zot pe met Rwayonm Bondye premye, sa pou ed zot devlop sa menm pwennvi.​—Eklezyast 7:12; Matye 6:31-33.

12, 13. Ki bann pwen ki devret ganny gard antet pour ki letid lo Labib an fanmiy i vin en sikse?

¹² En letid lo Labib an fanmiy tou le semenn i en led remarkab pour kominik bann valer spirityel avek bann zenn. (Psonm 119:33, 34; Proverb 4:20-23) I esansyel ki sa letid i ganny fer regilyerman. (Psonm 1:1-3) Paran ek zot zanfan i devret realize ki letid lo Labib an fanmiy i vin avan lezot keksoz ki’n ganny progranmen, pa lekontrer. Deplis, si tou manm fanmiy i annan en bon latitid, sa letid pou en sikse. En papa ti dir: “I enportan ki sa dimoun ki diriz sa letid i kree en latmosfer detant me anmenmtan ki respektab. I pa toultan fasil pour ganny en bon lekilib, e latitid bann zanfan pou souvan bezwen ganny aziste. Si keksoz pa deroul byen pour enn oubyen de fwa, persevere e ekspekte ki prosenn fwa keksoz pou deroul byen.” Sa menm papa ti dir ki dan son lapriyer avan sak letid, i ti spesifikman demann led Zeova pour ki tou sa ki pe partisipe i annan en bon pwennvi.​—Psonm 119:66.

¹³ Bann paran Kretyen i annan sa responsabilite pour kondwir en letid lo Labib an fanmiy. I vre, petet serten paran pa bann bon ansennyan, e i kapab difisil pour zot trouv fason pour fer sa letid enteresan. Alors, si ou kontan ou zanfan adolesan ‘pa zis par parol me osi par laksyon,’ dan en fason ki senp e avek senserite ou pou anvi ed zot pour progrese spirityelman. (1 Zan 3:18, NW) Zot kapab konplent tanzantan, me san dout zot pou santi ki ou enterese avek zot byennet.

14. Konman ki Deterononm 11:18, 19 i kapab ganny aplike ler pe kominik keksoz spirityel avek bann adolesan?

¹⁴ Letid lo Labib an fanmiy pa sa sel lokazyon pour kominik bann keksoz spirityel ki enportan. Eski ou rapel sa komannman ki Zeova ti donn bann paran? I ti dir: “Zot devret met mon bann parol dan zot leker e dan zot lanm e atas zot konman en siny dan zot lanmen, e zot devret vin konman en bando ant zot lizye. Zot devret osi ansenny zot avek zot garson. Koz avek zot lo la ler ou pe asize dan ou lakaz, ler ou pe marse lo semen, ler ou pe alonze, e ler ou leve.” (Deterononm 11:18, 19; vwar osi Deterononm 6:6, 7.) Sa pa vedir ki bann paran i devret pe toultan pres avek zot zanfan. Me en sef fanmiy ki annan lanmour i devret toultan pe rod loportinite pour batir spirityalite son fanmiy.

15, 16. Kisisa disiplin? (b) Lekel ki responsab pour donn disiplin, e lekel ki annan responsabilite pour aksepte disiplin?

¹⁵ Disiplin i en fason pour korize e i enplik kominikasyon. Disiplin i donn sa lide koreksyon olye ki pinisyon, menm si pinisyon i kapab neseser. Ou zanfan ti bezwen ganny disiplinen kan zot ti ankor pli pti, e aprezan ki zot in vin bann adolesan, zot ankor bezwen serten form disiplin, petet plis ki avan. Bann adolesan ki rezonn byen i konnen ki sa i vre.

¹⁶ Labib i dir: “Nenport ki ki mank respe pour disiplin son papa i bet, me nenport ki ki pran kont reprimann i pridan.” (Proverb 15:5) Nou aprann en kantite dan sa verse. I endike ki disiplin pou ganny donnen. En adolesan pa kapab “pran kont reprimann” ki pa’n ganny donnen. Zeova in konfye bann paran responsabilite pour donn disiplin, sirtou bann papa. Toutfwa, i responsabilite sa adolesan pour ekout sa disiplin. I pou aprann plis e fer pli pti gin fot si i aksepte sa bon disiplin ki son manman ek son papa i donn li. (Proverb 1:8) Labib i dir: “Sa enn ki negliz disiplin pou ganny dezonnore e pou tonm dan lanmizer, me sa enn ki pran kont reprimann pou ganny onore.”​—Proverb 13:18.

17. Ki lekilib bann paran i bezwen annan ler pe donn disiplin?

¹⁷ Kan paran pe disiplin bann adolesan, zot bezwen ekilibre. Zot devret evite vin tro strik ki fer zot zanfan mekontan, petet menm fer zot zanfan mank konfyans dan zot lekor. (Kolosyen 3:21) Anmenmtan paran pa devret tro soutir zot bann adolesan ki fer zot mank formasyon neseser. Soutir zanfan i kapab annan bann move rezilta. Proverb 29:17 i dir: “Koriz ou garson, e i pou donn ou lape lespri e donn ou bokou lazwa.” Toutfwa, verse 21 i dir: “Si en dimoun i gat son serviter dan son zenes, apre dan son lavi plitar i pou vin engra.” Menm si sa verse pe koz konsernan en serviter, i aplik osi pour nenport zenn dan lafanmiy.

18. Disiplin i laprev kwa, e ki paran i devret evite ler zot donn disiplin dan en fason konsistan?

¹⁸ An realite, disiplin ki apropriye i en laprev lanmour ki paran i annan pour son zanfan. (Ebre 12:6, 11) Si ou en paran, ou konnen ki i difisil pour gard en disiplin ki rezonnab e konsistan. Pour gard lape, i kapab paret pli fasil pour les en adolesan antete fer sa ki i anvi. Me avek letan, en paran ki fer sa pou perdi kontrol lo son lakour.​—Proverb 29:15; Galat 6:9.

19, 20. Konman bann paran i kapab azir dan en fason pridan konsernan divertisman zot zanfan adolesan?

¹⁹ Lontan, i ti normal pour ekspekte ki bann zanfan i ede kot lakour oubyen lo laferm. Denozour bokou adolesan i annan en kantite letan lib lo zot tousel san ki zot ganny sirveye. Pour fer bann zenn okipe pandan zot letan lib, lemonn komersyal in fourni en gran kantite keksoz. Deplis, vi ki lemonn pa akord tro gran lenportans avek bann standar Labib lo moralite, sa i kree en sitiasyon tre danzere pour bann zenn.

²⁰ Alor, en paran ki pridan pou fer desizyon final konsernan divertisman pour son zanfan. Me pa oubliye ki sa adolesan pe grandi. Sak lannen ki pase, sa fiy oubyen sa garson adolesan pou anvi ki ou tret li parey en adilt. Se pour sa ki i bon pour en paran les sa zanfan annan en pe plis liberte pour swazir son divertisman anmezir ki i grandi, pour vi ki sa bann swa i reflekte progre ver matirite spirityel. Parler, sa adolesan i kapab fer bann move swa konsernan lanmizik ki i ekoute, zanmi, eksetera. Kan sa i arive, ou devret diskit sa avek sa adolesan afen ki i ava fer bann pli bon swa dan lavenir.

21. Ler en adolesan i rezonnab dan lakantite letan ki ganny rezerve pour divertisman, konman sa i protez li?

²¹ Ki kantite letan ki devret ganny konsakre pour divertisman? Dan serten pei, bann adolesan i ganny enfliyanse pour krwar ki zot annan drwa pour zot anmize zanmen fini. Alors, en adolesan i kapab progranm son letan afen ki i toultan pe anmize. Se bann paran ki devret ansenny zot zanfan ki letan i devret osi ganny servi pour fer lezot keksoz, tel parey letid personnel lo Labib oubyen an fanmiy, frekant bann dimoun matir spirityelman, al bann renyon Kretyen, e fer bann travay kot lakour. Sa pou anpes “plezir lavi” etouf Parol Bondye.​—Lik 8:11-15.

22. Divertisman i devret ganny balanse avek kwa dan lavi en adolesan?

²² Lerwa Salomon ti dir: “Mon’n aprann ki napa nanryen pli byen pour zot ki pour rezwir e fer sa ki byen diran zot lavi; e osi ki tou zonm i devret manze, bwar e vwar dibyen pour tou zot travay dir. Sa i don Bondye.” (Eklezyast 3:12, 13) Wi, divertisman i form parti en lavi balanse. Me travay dir osi i form parti en lavi balanse. En kantite adolesan ozordi pa konn satisfaksyon ki travay dir i anmennen, oubyen santi respe pour zot menm ler zot fer fas avek en problenm e apre arive rezourd li. Serten pa ganny sa loportinite pour devlop en abilite oubyen aprann en metye ki zot pou kapab depan lo la dan lavenir. I pa fasil pour en paran akonpli tousala. Eski ou pou kapab fer sir ki ou zenn zanfan i ganny bann tel loportinite? Si ou kapab reisi ansenny ou zanfan adolesan pour vwar lenportans e menm apresye travay dir, i pou devlop en bon pwennvi ki pou benefisye li toudilon son lavi.

23. Ki mannyer paran i kapab ankouraz zot bann zanfan adolesan?

²³ Menm ler ou ganny bann problenm avek ou zanfan adolesan, sa verse i aplikab: “Lanmour i reste pour touzour.” (1 Korentyen 13:8) Pa zanmen arete demontre sa lanmour ki ou annan. Demann ou lekor, ‘Eski mon felisit sak zanfan kan zot rezourd bann problenm oubyen sirmont bann lobstak? Eski mon sezi bann loportinite pour eksprim mon lanmour ek lapresyasyon pour zot?’ Menm si parler i kapab annan bann malantandi, bann adolesan pou pli anvi demontre lanmour pour ou si zot santi ki ou vreman kontan zot.

24. Ki prensip Labib ki zeneralman i touzour vre konsernan elve zanfan, me ki paran i devret gard antet?

²⁴ Byensir, anmezir ki bann zanfan i grandi pour vin adilt, zot pou finalman fer bann pli gro desizyon lo zot menm. Dan serten ka, paran i kapab pa kontan sa bann desizyon. Si par egzanp, ou zanfan i deside pour aret servi Zeova? Sa i kapab arive. Menm serten garson spirityel Zeova ti rezet son konsey e rebele. (Zenez 6:2; Zid 6) Bann zanfan pa bann konpiter, ki kapab ganny progranmen pour azir lafason ki nou nou anvi. Zot annan liberte pour swazir, e zot responsab devan Zeova pour bann desizyon ki zot fer. Toudmenm, an zeneral sa prensip dan Proverb 22:6 i touzour vre: “Edik en garson dapre semen ki i devret marse, menm ler i vin vye i pa pou kit sa semen.”

25. Ki pli bon fason pour bann paran montre rekonesans pour Zeova pour sa privilez ki zot in gannyen pour annan zanfan?

²⁵ Alors, montre ou zanfan ki ou kontan li en kantite. Fer ou mye pour swiv bann prensip Labib pour elve zot. Donn en bon legzanp konman en dimoun ki viv an armoni avek bann prensip Labib. Se koumsa ki ou pou donn ou zanfan pli bon loportinite pour grandi pour vin bann adilt responsab e ki annan respe pour Bondye. Sa i pli bon fason pour bann paran montre rekonesans pour Zeova pour sa privilez ki zot in gannyen pour annan zanfan.