Zenn, mazin ou Gran Kreater la konmela

“Mazin ou Gran Kreater letan ou ankor zenn.”—EKLE. 12:1.

1. Ki mannyer Zeova i eksprim son konfyans dan bann zenn ki ador li?

ZEOVA i vwar bann zenn Kretyen agreab parey laroze e vreman presye. Anfet, i ti predir ki pandan letan “lafors militer” son Garson, bokou zenn fiy e zenn garson ti pou “ofer zot lekor volonterman” dan servis Kris. (Ps. 110:3) Sa profesi ti pou ganny akonplir dan en letan kot lamazorite dimoun pa ti pou enterese avek Bondye. Zot ti pou dezobeisan e preokipe avek zis zot lekor ek larzan. Parkont, Zeova ti konnen ki bann zenn ki ador li ti pou diferan. Pa Zeova i vreman annan en gran konfyans dan zot, zenn frer ek ser!

2. Mazin Zeova i enplik kwa?

² Zis mazin sa lazwa ki Bondye i santi kan i vwar bann zenn pe mazin li konman zot Gran Kreater. (Ekle. 12:1) Mazin Zeova i normalman enplik plis ki zis mazin li dan nou lespri. I annan pou fer avek aksyon, setadir fer keksoz ki fer li plezir e les son bann prensip ek lalwa gid nou dan nou lavi tou le zour. I osi enplik annan konfyans dan Zeova e rekonnet ki i vreman konsernen avek nou byennet. (Ps. 37:3; Iza. 48:17, 18) Eski se koumsa ki ou santi anver ou Gran Kreater?

“Met ou konfyans dan Zeova avek tou ou leker”

3, 4. Ki mannyer Zezi ti demontre konfyans dan Zeova e akoz i enportan pour nou annan konfyans dan Zeova ozordi?

³ Sa pli bon legzanp en dimoun ki ti annan konfyans dan Bondye se byensir Zezi Kri. I ti viv an armoni avek sa parol dan Proverb 3:5, 6: “Met ou konfyans dan Zeova avek tou ou leker e pa apiy lo ou prop konprenezon. Dan tou ou semen pran li an konsiderasyon, e li i pou fer drwat ou bann santye.” En pti pe letan apre ki Zezi ti’n batize, Satan ti apros li e esey tant li pour aksepte laglwar ek pouvwar dan sa lemonn. (Lik 4:3-13) Zezi pa ti les li ganny anbete. I ti konnen ki sa vre “larises ek laglwar ek lavi” i vin atraver “limilite ek lakrent pour Zeova.”—Prov. 22:4.

⁴ Lemonn ozordi i ganny dominen par vorasite ek legoism. Dan en tel lanvironnman i pli saz pour nou swiv legzanp Zezi. Gard antet osi ki Satan pou fer tou sa ki i kapab pour fer bann serviter Zeova sorti lo sa semen etrwat ki anmenn ver lavi. I anvi vwar tou dimoun mars lo sa semen larz ki anmenn ver destriksyon. Pa les li anbet ou! O kontrer, reste determinen pour mazin ou Gran Kreater. Met ou konfyans total dan li e tenir ferm sa “vre lavi” ki sirman pe aprose byen vit.—1 Tim. 6:19.

Zenn, vin saz!

5. Ki mannyer ou santi anver lavenir sa lemonn?

⁵ Bann zenn ki mazin zot Gran Kreater i pli saz ki lezot zenn ki menm laz avek zot. (Lir Psonm 119:99, 100.) Lefet ki zot annan menm pwennvi avek Bondye, zot konsyan ki sa lemonn pou byento disparet. Menm si ou’n viv zis en ptigin letan ziska aprezan, konman en zenn ou’n sirman remark lafreyer ek lenkyetid ki pe kontinyelman ogmante. Si ou ankor pe lekol petet ou’n tann koz lo bann size konsernan polisyon, lesofman later, destriksyon lafore ek lezot problenm parey. Bokou dimoun i konsernen avek sa bann devlopman, me zis Temwen Zeova ki vreman konpran ki tousala i form parti sa siny ki endik lafen sa lemonn ki pe ganny dominen par Satan.—Rev. 11:18.

6. Ki mannyer serten zenn in ganny anbete?

⁶ Malerezman serten zenn in aret reste eveye e zot in konpletman oubliye ki sa lemonn pros pour trouv son lafen. (2 Pyer 3:3, 4) Lezot in les zot ganny antrennen pour komet bann pese grav atraver move lasosyasyon ek pornografi. (Prov. 13:20) I pou vreman fer lapenn si nou perdi faver Bondye la ki nou sitan pros avek lafen! Dan plas les sa arive, nou devret tir en leson dan sa ki ti arive avek bann Izraelit lannen 1473 A.N.L. kan zot ti pe kanpe lo laplenn Moab, zot ti vreman pros pour antre dan Later Promiz. Ki ti arive laba?

Zot ti tonbe obor laliny finisyon

7, 8. (a) Ki taktik Satan ti servi lo Laplenn Moab? (b) Ki taktik Satan pe servi ozordi?

⁷ Sa letan i kler ki Satan ti anvi anpes bann Izraelit ganny sa leritaz ki zot ti’n ganny promet. Pli boner i ti esey fer profet Balaam pronons malediksyon lo bann Izraelit me apre ki i pa ti’n reisi, i ti servi en lot taktik pli rize. I ti esey fer zot perdi laprouvasyon Zeova. Dyab ti reisi kan i ti servi bann madanm Moab pour sedwir bann Izraelit. An rezilta sa, bokou zot ti konmans annan relasyon imoral avek bann fiy sorti Moab e ador Baal Peor! Zot leritaz presye, setadir Later Promiz pa ti lwen, me kantmenm sa apepre 24,000 Izraelit ti perdi zot lavi. Sa ti vreman en gran trazedi!—Nom. 25:1-3, 9.

⁸ Pareyman, ozordi nou pe apros sa pli meyer later promiz byen vit e sa se sa nouvo sistenm. Parey labitid Satan pe ankor enn fwa servi limoralite seksyel pour sali pep Bondye. Standar moral in telman degrade ki fornikasyon i ganny vwar konman normal e omoseksyalite i tant pou vin en desizyon personnel. En ser Kretyen ti dir: “Sel landrwa ki mon zanfan i aprann ki omoseksyalite ek seks an deor maryaz i mal dan lizye Bondye, i zis dan lakour e kot Lasal Rwayonm.”

9. Ki kapab arive kan “dezir i tro for” dan en zenn e ki mannyer bann zenn i kapab sirmont sa?

⁹ Bann zenn ki mazin zot Gran Kreater i konnen ki relasyon seksyel i en kado sakre ki annan pour fer avek lavi ek reprodiksyon. Alors zot rekonnet ki relasyon seksyel i devret ganny rezwir zis dan lafason ki Bondye ti’n ordonnen e sa se dan laranzman maryaz. (Ebr. 13:4) Parkont i kapab difisil pour reste pir pandan sa letan kot “dezir i tro for” dan en zenn, andotmo sa peryod letan kot bann dezir seksyel i vin for e i kapab afekte bon zizman en dimoun. (1 Kor. 7:36) Ki ou kapab fer kan bann move panse i vin dan ou lespri? Sipliy Zeova pour li ed ou pour konsantre lo bann keksoz ki pir. Zeova i touzour ekout lapriyer bann ki senserman rod led avek li. (Lir Lik 11:9-13.) Kan ou koz lo keksoz ki pir e ki fortifye ou lafwa sa i kapab ed ou pour konsantre lo bann keksoz pozitif.

Swazir ou bann lobzektif avek lasazes!

10. Ki move fason panse nou merit evite e ki kestyon nou kapab demann nou lekor?

¹⁰ Bokou zenn dan sa lemonn i san en kontrol e zot viv zis pour plezir. En rezon pour sa se ki zot napa en “vizyon,” setadir zot napa gidans Bondye oubyen en vre lespwar pour lavenir. (Prov. 29:18) Zot parey bann Izraelit ki pa ti servi Bondye dan letan Izai ki ti viv zis pour ganny ‘lazwa ek lakontantman, . . . par manz laser e bwar diven.’ (Iza. 22:13) Olye zalou sa bann dimoun, akoz ou pa reflesir lo sa zoli lespwar ki Zeova in promet son bann serviter fidel? Si ou en zenn serviter Bondye, eski ou pe esper avek enpasyans sa nouvo lemonn? Eski ou pe fer tou ou zefor pour “viv en lavi rezonnab . . . an atandan sa gran Zour” oubyen sa lespwar ki fer ou ere ki Zeova in promet ou? (Tit 2:12, 13) Ou larepons pour annan lefe lo ou lobzektif ek ou bann priyorite ki ou etablir pour ou menm.

11. Akoz bann zenn Kretyen ki ankor pe lekol i merit travay dir?

¹¹ Sa lemonn i anvi ki bann zenn i depans tou zot lenerzi pour pourswiv bann lobzektif dan sa lemonn. Tou bann ki ankor pe lekol i devret normalman travay dir pour ganny en bon ledikasyon neseser. Apre tou, ou bi se pa zis pour rod en travay akseptab me osi pour ou vin itil dan kongregasyon e vin en proklanmater Rwayonm ki prodwir fri. Pour arive akonplir sa lobzektif, i enportan ki ou kapab kominik byen, reflesir dan en fason lozik, rezonn byen e avek respe anver lezot. Bann zenn ki etidye Labib e lalit pour aplik sa bann prensip dan zot lavi i ganny sa pli bon ledikasyon ki disponib e zot etablir en bon fondasyon pour en bon lavenir kot zot pou reisi pour touzour.—Lir Psonm 1:1-3.a

12. Ki legzanp bann fanmir Kretyen i merit imite?

¹² An Izrael, ledikasyon ki en zanfan ti gannyen avek son paran ti en keksoz vreman enportan. Sa kalite ledikasyon ti kouver tou laspe lavi, espesyalman dan domenn spirityel. (Det. 6:6, 7) Alors, bann zenn Izraelit ki ti ekout zot paran e lezot dimoun pli aze ki ti annan lakrent pour Bondye pa ti zis ganny konnesans. Zot ti ganny osi lasazes, bon zizman, konprenezon ek abilite pour rezonnen, bann kalite rar ki zot ti kapab ganny zis atraver ledikasyon sorti kot Bondye. (Prov. 1:2-4; 2:1-5, 11-15) Bann fanmir Kretyen denozour i merit port menm latansyon lo ledikasyon zot zanfan.

Ekout bann ki kontan ou

13. Ki kalite konsey serten zenn i gannyen e akoz zot bezwen fer atansyon?

¹³ Bann zenn i ganny gidans avek diferan kalite dimoun enkli bann ansennyan kot lekol ki konsey bann zenn dan domenn karyer avek bi pour fer zot reisi dan lavi. Kan ou ganny sa bann konsey, silvouple reflesir lo zot byen dan lapriyer. Rod gidans dan Parol Bondye e dan bann piblikasyon ki lesklav fidel e pridan in fourni nou. Atraver ou letid Labib ou konnen ki bann zenn napa bokou leksperyans e zot en target ki Satan i souvan atak premye. Dan zarden Edenn par egzanp, Ev ki ti napa bokou leksperyans ti ekout Satan, en etranze ki pa ti’n demontre ni menm en pti poursantaz lanmour pour li. Rezilta ti pou totalman diferan si zis i ti’n ekout Zeova, sa enn ki ti’n prouv son lanmour pour li dan bokou fason.—Zen. 3:1-6.

14. Akoz nou devret ekout Zeova ek nou paran?

¹⁴ Ou Gran Kreater i kontan ou osi e i fer sa avek en bon lentansyon. I anvi ki ou ere pa zis la konmela me pour touzour! Deplis, avek menm tandres ki en paran ki pran byen swen avek son zanfan i demontre, Zeova i dir ou e tou bann ki ador li: “La sa semen. Mars lo la.” (Iza. 30:21) Si ou paran i Temwen Zeova e zot vreman kontan Zeova, sa i en lot benediksyon. Avek respe, ekout zot konsey kan ou pe etablir bann priyorite ek lobzektif dan lavi. (Prov. 1:8, 9) Apre tou, zot anvi ki ou ganny lavi e sa i annan plis valer ki larises ek popilarite dan sa lemonn.—Mat. 16:26.

15, 16. (a) Ki konfyans nou kapab annan dan Zeova? (b) Ki leson enportan nou kapab aprann atraver legzanp Barouk?

¹⁵ Bann ki mazin zot Gran Kreater i viv en lavi senp. Zot annan konfyans ki Zeova “pa pou” kit zot e i “pa pou zanmen” abandonn zot. (Lir Ebre 13:5.) Vi ki sa bon latitid i diferan avek fason panse sa lemonn, nou devret fer atansyon pour pa les lespri sa lemonn enfliyans nou. (Efe. 2:2) An rapor avek sa, egzamin legzanp sekreter Zeremi ki ti apel Barouk. I ti viv dan bann dernyen zour difisil avan ki Zerizalenm ti ganny detrir an 607 A.N.L.

¹⁶ I kapab ki Barouk ti anvi viv en lavi pli meyer lo kote materyel. Zeova ti remark sa e avek douser i ti averti Barouk pour aret rod “bann gran keksoz.” Barouk ti sirviv destriksyon Zerizalenm akoz i ti prouve ki i ti saz e annan limilite par ekout Zeova. (Zer. 45:2-5) De lot kote, bann dimoun dan letan Barouk ki ti rod “bann gran keksoz” materyelman e met Zeova dan dezyenm plas ti perdi tou kan bann Kaldeen (Babilonnyen) ti kaptir Zerizalenm. Bokou ti osi perdi zot lavi. (2 Kron. 36:15-18) Leksperyans Barouk i ed nou pour vwar ki en bon relasyon avek Bondye i pli enportan ki larises ek popilarite dan sa lemonn.

Imit sa pli bon legzanp

17. Akoz Zezi, Pol ek Timote i bann bon legzanp pour bann serviter Zeova swiv ozordi?

¹⁷ Parol Bondye i donn nou bann bon legzanp ki nou kapab swiv ki pou ed nou pour mars lo sa semen ki anmenn ver lavi. Par egzanp Zezi ti sa sel zonm ki’n deza egziste ki ti annan bokou talan, pourtan i ti konsantre lo sa “Bonn Nouvel konsernan Rwayonm” ki ti pou ed bann dimoun pour touzour. (Lik 4:43) Pour li donn Zeova son meyer, zapot Pol ti abandonn en karyer prometan e i ti servi son letan ek lenerzi pour pres sa bon nouvel. Timote, en “vre garson dan lafwa” ti imit bon legzanp Pol. (1 Tim. 1:2) Eski Zezi, Pol ek Timote ti regret lafason ki zot ti’n viv zot lavi? Definitivman non! Anfet, Pol ti dir ki i ti konsider sa ki sa lemonn i annan pour ofer konman “en pert” konpare avek sa privilez pour servi Bondye.—Fili. 3:8-11.

18. Ki gran sanzman en zenn frer ti fer e akoz i napa regre?

¹⁸ Bokou zenn ozordi i imit lafwa Zezi, Pol ek Timote. Par egzanp en zenn frer ki ti annan en bon plas travay ti ekrir: “Vi ki mon pe viv dapre bann prensip Labib, mon pa ti tarde pour ganny promosyon. Kantmenm mon ti pou ganny bokou larzan, mon ti santi ki mon ti pe tay deryer divan. Kan mon ti apros konmite egzekitif lakonpannyen e eksprim mon dezir pour pourswiv servis aplentan, deswit zot ti ofer mwan en pli gro lapey avek lespwar ki mon ti pou reste. Me mon ti’n determinen. Bokou pa ti konpran akoz mon ti’n kit en bon travay pour pourswiv en servis aplentan. Mon larepons se ki mon vreman anvi viv mon lavi annakor avek mon dedikasyon anver Bondye. Aprezan vi ki mon lavi i santre lo bann keksoz spirityel, mon annan plis lazwa ek satisfaksyon ki okenn sonm larzan oubyen popilarite pa ti pou kapab donn mwan.”

19. Ki desizyon saz bann zenn i ganny ankouraze pour fer?

¹⁹ Pareyman, dan lemonn antye bokou zenn in fer bann swa ki saz. Alor zenn, kan ou pe mazin lo ou lavenir touzour gard zour Zeova antet. (2 Pyer 3:11, 12) Pa bezwen zalou bann ki pe profit o maksimonm dan sa lemonn. O kontrer, ekout bann ki vreman kontan ou. Akimil “larises dan lesyel” i sa lenvestisman pli an sekirite ou kapab fer e i sa sel keksoz ki pou anmenn bann byenfe pour ou pour touzour. (Mat. 6:19, 20; lir 1 Zan 2:15-17.) Wi, mazin ou Gran Kreater. Pandan ki ou fer li Zeova pou beni ou.

[Not anba lo paz 21]

Eski ou rapel?

• Ki mannyer nou demontre konfyans dan Bondye?

• Lekel sa pli bon ledikasyon?

• Ki leson nou kapab aprann avek Barouk?

• Lekel ki bann bon model pour nou swiv e akoz?

[Portre lo paz 21]

Zeova i fourni sa pli bon ledikasyon