Ki lefe bann vizyon ki Zekarya ti gannyen i annan lo ou?

1-3. (a) Ki ti sityasyon pep Zeova ler Zekarya ti konmans profetize? (b) Akoz Zeova ti demann son pep pour retourn kot li?

I ANNAN en kantite vizyon eksitan ki Zekarya ti gannyen. Par egzanp, i ti vwar en roulo ki pe anvole, en madanm ki pe asize dan en pannyen e de madanm ki ti annan bann lezel parey pelikan pe anvole dan divan. (Zekarya 5:1, 7-9) Akoz Zeova ti fer son profet vwar sa bann vizyon enkrwayab? Ki ti sityasyon bann Izraelit sa letan? Ki mannyer sa bann vizyon i kapab benefisye nou ozordi?

² I ti lannen 537 avan Kris e pep Zeova ti dan en gran lazwa. Zot ti’n an egzil pour 70 an Babilonn, me aprezan zot ti lib! Zot ti enpasyan pour retourn Zerizalenm pour rekonstri tanp e ador Zeova laba. Enn an pli tar, bann Izraelit ti poz fondasyon tanp. Dimoun ti dan lazwa e “sa gran tapaz lepep, ti kapab ganny tande depi tre lwen.” (Ezra 3:10-13) Par kont, lopozisyon kont konstriksyon tanp ti vin deplizanpli pli for. Bann Izraelit ti sitan dekouraze ki zot ti aret konstri tanp. Zot ti plito konsantre lo konstri zot prop lakaz e kiltiv zot bann plantasyon. Sez an pli tar, tanp pa ti ankor fini ganny konstrir. Pep Bondye ti bezwen ganny rapel pour retourn kot Zeova e aret mazin zis zot prop lekor. Zeova ti anvi ki zot ador li avek kouraz ek devouman.

³ Alor lannen 520 avan Kris, Zeova ti anvoy profet Zekarya pour ed son pep rapel rezon ki I ti’n liber zot Babilonn. I enteresan pour konnen ki sa non Zekarya i vedir “Zeova in rapel.” Menm si bann Izraelit ti’n oubliy sa ki Zeova ti’n fer pour zot, Zeova ti ankor rapel zot. (Lir Zekarya 1:3, 4.) Zeova ti promet ki i ti pou ed zot reetabli vre ladorasyon. Me i ti averti zot ki i ti pou aksepte zot ladorasyon si selman zot ti donn li zot meyer. Annou egzamin sizyenm ek setyenm vizyon ki Zekarya ti gannyen. Nou pou vwar ki mannyer Zeova ti motiv bann Izraelit e ki mannyer sa de vizyon i kapab ed nou ozordi.

 4. Ki Zekarya ti vwar dan son sizyenm vizyon? Akoz i ti annan lekritir lo tou le de kote sa roulo? (Vwar premye portre o konmansman sa lartik.)

⁴ Sapit 5 dan liv Zekarya i konmans avek en vizyon drol. (Lir Zekarya 5:1, 2.) Zekarya ti vwar en roulo pe anvole dan lezer. Sa roulo ti 9 met longer e 4.5 met larzer. Sa roulo ti ouver e i ti annan en mesaz ki ti’n ganny ekrir lo la. (Zekarya 5:3) I ti en mesaz zizman serye. Dan letan lontan, dimoun ti ekri zis lo en kote roulo, me sa mesaz ti sitan enportan ki tou le de kote sa roulo ti ganny servi pour ekri lo la.

5, 6. Ki mannyer Zeova i santi konsernan tou sort kalite vole?

⁵ Lir Zekarya 5:3, 4. Tou dimoun i bezwen rann kont avek Bondye pour zot aksyon. Sa i espesyalman vre pour pep Zeova, parski zot ganny apele par son non. Zot kontan li e zot konnen ki vole i anmenn laont lo son non. (Proverb 30:8, 9) Serten dimoun i kapab panse ki i pa mal pour vole si zot annan en bon rezon. Menm si i kapab paret ki en dimoun i annan en bon rezon pour vole, sa dimoun ki fer sa i montre ki son vorasite i pli enportan ki Zeova, Son non ek Son lalwa.

⁶ Eski ou’n remarke ki Zekarya 5:3, 4 i dir ki sa malediksyon ti pou “antre dan lakaz sa voler” e ki i ti pou “reste dan sa lakaz e detri tou”? Alor, Zeova i kapab revel e ziz bann parmi son pep ki fer okenn keksoz mal. Menm si en dimoun ki vole i kapab kasyet sa avek lapolis, son anplwayer, bann ansyen oubyen son paran, i pa kapab kasyet sa avek Zeova. Bondye pou fer sir ki tou sort kalite vole pou ganny met o kler. (Ebre 4:13) Nou vreman kontan ki nou parmi bann dimoun ki fer zot mye pour onnet “dan tou keksoz”!​—Ebre 13:18.

 7. Ki mannyer nou kapab evit malediksyon sa roulo ki pe anvole?

⁷ Tou sort kalite vole i ofans Zeova. I en loner pour nou konn e obei bann prensip Zeova lo sa ki byen ek sa ki mal e pour viv dan en fason ki pa anmenn laont lo son non. Ler nou fer sa, nou pou evite ganny menm zizman ki Zeova pou anmennen lo bann ki pa obei li.

8-10. (a) Kisisa en serman? (b) Ki serman Lerwa Zedikya ti kase?

⁸ Apre, sa roulo ki ti pe anvole ti delivre en mesaz lavertisman avek bann ki fer “fo serman” lo non Bondye. (Zekarya 5:4) En serman i en deklarasyon ki konfirmen ki en keksoz i vre oubyen i en promes serye pour fer ouswa pa fer en serten keksoz.

⁹ Pour fer en serman lo non Zeova i en keksoz serye. Nou konn sa atraver sa ki ti arive avek Zedikya, sa dernyen lerwa ki ti diriz an Zerizalenm. Zedikya ti fer en serman lo non Zeova ki i ti pou soumet avek lerwa Babilonn. Me Zedikya pa ti gard son promes. Pour sa rezon, Zeova ti dir ki Zedikya ti pou “mor dan pei sa lerwa ki’n plas li lo tronn, avek ki i’n fer en trete [oubyen “serman,” NWT] e ki i’n kase apre. I pou mor dan Babilonn.”​—Ezekyel 17:16.

¹⁰ Lerwa Zedikya ti’n fer son serman lo non Bondye e Zeova ti ekspekte ki i gard son parol. (2 Kronik 36:13) Me Zedikya ti kas son promes e i ti demann Lezip pour ed li sorti anba dominasyon Babilonn. Me menm Lezip pa ti kapab ed li.​—Ezekyel 17:11-15, 17, 18.

11, 12. (a) Ki sa promes pli enportan ki nou kapab fer? (b) Ki lefe nou dedikasyon i devret annan dan nou lavi toulezour?

¹¹ Dapre sa ki ti arive avek Zedikya, nou aprann ki Zeova i ekout bann promes ki nou fer. Pour fer li plezir, nou devret gard nou bann promes. (Psonm 76:11) Sa promes pli enportan ki nou kapab fer i nou dedikasyon avek Zeova. Ler nou dedye nou lavi avek li, nou promet ki nou pou servi li malgre nenport kwa ki kapab arive dan nou lavi.

¹² Ki mannyer nou kapab gard nou promes avek Zeova? “Sak zour” nou fer fas avek bann gro tes ek bann pti tes. Nou montre ki kalite relasyon nou annan avek Zeova par lafason ki nou reakte ler nou pas atraver sa bann tes. (Psonm 61:8) Par egzanp, ki ou pou fer si en koleg travay oubyen en kanmarad lekol i rod latraksyon avek ou? Eski ou pou refiz sa latansyon e montre ki ou anvi obei Zeova? (Proverb 23:26) Oubyen si zis ou ki ador Zeova dan ou fanmir, eski ou demann Zeova pour ed ou pour kontinyen konport ou konman en Kretyen? Eski ou remersye Zeova sak zour pour son lanmour ek gidans, nenport ki sityasyon ki ou ladan? Eski ou pe fer letan pour lir Labib sak zour? Dan en sans, nou ti promet pour fer sa bann keksoz ler nou ti dedye nou lavi avek Zeova. Ler nou obei li e donn li nou meyer, nou montre Zeova ki nou kontan li e ki nou pour li. Nou ladorasyon i en fason viv. Vi ki nou fidel avek Zeova, i promet nou en lavenir merveye.​—Deterononm 10:12, 13.

13. Ki nou kapab aprann avek sa sizyenm vizyon ki Zekarya ti gannyen?

¹³ Sa sizyenm vizyon ki Zekarya ti gannyen i ed nou konpran ki si nou kontan Zeova, nou pa pou vole ouswa kas nou bann promes. Nou osi aprann ki menm si bann Izraelit ti fer en kantite fot, Zeova ti gard son promes e i pa ti abandonn son pep. I ti konpran ki zot ti dan en sityasyon vreman difisil avek tou sa bann lennmi otour zot. Par son prop legzanp, Zeova i ansenny nou ki nou osi nou devret gard nou bann promes. Nou kapab asire ki i pou ed nou fer sa. En fason ki Zeova i ed nou, i par donn nou en lespwar pour lavenir. Byento i pou retir tou move keksoz lo later. Nou kapab lir lo sa lespwar dan sa vizyon ki Zekarya ti gannyen apre.

14, 15. (a) Ki Zekarya ti vwar dan sa setyenm vizyon ki i ti gannyen? (Vwar dezyenm portre o konmansman sa lartik.) (b) Lekel sa madanm ki dan sa pannyen? Akoz sa lanz ti ferm sa pannyen?

¹⁴ Apre ki Zekarya ti’n vwar sa roulo ki ti pe anvole, en lanz ti dir li: “Lev ou lizye!” Zekarya ti vwar en pannyen. (Lir Zekarya 5:5-8.) Sa pannyen ti annan en kouvertir diplon ki ti ron. Ler sa pannyen ti ganny ouver, Zekarya ti vwar “en fanm . . . pe asiz dan pannyen.” Sa lanz ti eksplik Zekarya ki sa madanm dan pannyen ti “mesanste.” Ou kapab mazin lafreyer Zekarya ler sa madanm ti esey sorti! Me deswit sa lanz ti repous sa madanm dan pannyen e remet sa kouvertir lour lo la. Ki sa i vedir?

¹⁵ Sa vizyon i donn nou konfyans ki Zeova pa pou toler okenn move keksoz parmi son pep. Si Zeova i vwar en move keksoz, i pou azir vitman pour retir sa keksoz. (1 Korentyen 5:13) Sa lanz ti demontre sa ler i ti vitman met sa kouvertir lour lo sa pannyen.

16. (a) Ki ti arive avek sa pannyen? (Vwar trwazyenm portre o konmansman sa lartik.) (b) Kote sa de madanm ki ti annan lezel ti anmenn sa pannyen?

¹⁶ Apre, Zekarya ti vwar de madanm ki ti annan bann lezel for parey lezel bann pelikan. (Lir Zekarya 5:9-11.) Sa bann madanm ti konpletman diferan avek sa enn move ki ti dan pannyen. Par servi zot lezel pwisan, zot ti lev sa pannyen ki ti annan “mesanste” ladan e zot ti ale. Kote zot ti anmenn sa move madanm? Zot ti anmenn li “dan pei Babilonn.” Akoz zot ti anmenn li laba?

17, 18. (a) Akoz Babilonn ti sa landrwa apropriye pour “mesanste”? (b) Ki ou determinen pour fer?

¹⁷ Bann Izraelit dan letan Zekarya ti pou’n konpran akoz Babilonn ti sa landrwa apropriye pour anmenn “mesanste.” Zot ti konnen ki sa lavil ti ranpli avek imoralite ek fo ladorasyon. Zekarya ek lezot Zwif ki ti’n viv laba ti’n fer bokou zefor sak zour pour reziste sa bann lenfliyans payen. Alor, sa vizyon ti garanti ki Zeova ti pou gard son ladorasyon pir.

¹⁸ Sa vizyon ti osi rapel bann Zwif ki zot osi zot ti annan sa responsabilite pour gard zot ladorasyon pir. Bann move keksoz pa kapab e pa pou ganny tolere parmi pep Bondye. Ozordi, Zeova in anmenn nou dan son lorganizasyon pir, kot nou santi son lanmour ek proteksyon. Nou tou nou annan sa responsabilite pour gard li pir. Bann move keksoz pa devret egziste parmi pep Zeova.

19. Ki sa bann vizyon eksitan ki Zekarya ti gannyen i vedir pour nou ozordi?

¹⁹ Sizyenm ek setyenm vizyon ki Zekarya ti gannyen i en lavertisman serye pour bann ki fer sa ki mal. Zeova pa pou les bann move keksoz kontinyen. Konman son bann serviter, nou devret ay bann move keksoz. Sa bann vizyon i osi reasir nou ki si nou fer plezir nou Papa lanmour, i pa pou met en malediksyon lo nou, me i pou protez e beni nou. Menm si i kapab difisil pour reste pir dan sa move lemonn, avek led Zeova nou kapab reisi! Me ki mannyer nou kapab asire ki vre ladorasyon pou reste pour touzour? Anmezir ki gran ladetres i vin pli pros, ki mannyer nou konnen ki Zeova pou protez son lorganizasyon? Nou pou diskit lo sa bann kestyon dan sa lot lartik.