Sa ki Rwayonm Bondye pou fer

Rwayonm Bondye pe deza dirize. Byento i pou fer bann gran sanzman lo later. Annou vwar enn de bon keksoz ki nou eksite pour vwar ler Rwayonm Bondye i diriz later.

1. Ki mannyer Rwayonm Bondye pou anmenn lape ek lazistis lo later?

Zezi, Lerwa dan Rwayonm Bondye, pou detri bann move dimoun ek bann gouvernman dan lager Armagedon. (Revelasyon 16:14, 16) Sa pou akonpli sa promes ki dan Labib: “Dan ankor en pti pe letan, bann move dimoun pou nepli la.” (Psonm 37:10) Atraver Rwayonm Bondye, Zezi pou fer sir ki i annan lape ek lazistis partou lo later.​—Lir Izai 11:4.

2. Ki mannyer lavi pou ete ler lavolonte Bondye pou ganny fer lo later?

Ler Rwayonm Bondye i dirize lo later, “bann dimoun ki fer sa ki byen pou ganny donnen later e zot pou viv lo la pour touzour.” (Psonm 37:29) Zis mazin ou pe viv dan en lemonn kot tou dimoun pe fer sa ki byen, zot kontan Zeova e kontan kanmarad! Napa personn ki malad e tou dimoun i viv pour touzour.

3. Ki Rwayonm Bondye pou fer apre ki bann move dimoun i ganny detrir?

Apre ki bann move dimoun i ganny detrir, Zezi pou dirize konman Lerwa pour 1,000 an. Pandan sa letan, Zezi ek sa 144,000 ki pou diriz ansanm avek li pou ed bann imen lo later pour aret fer pese e vin parfe. A lafen sa 1,000 an, later antye pou’n vin en zoli paradi e tou dimoun pou ere akoz zot obei lalwa Zeova. Alor Zezi pou rann Rwayonm avek son Papa Zeova. Finalman, “non” Zeova pou’n “ganny sanktifye.” (Matye 6:9, 10) Sa pou montre ki Zeova i en bon Dirizan ki enterese avek son bann sitwayen. Apre sa, Zeova pou detri Satan, son bann demon ek tou lezot dimoun ki swazir pour rebel kont Son lotorite. (Revelasyon 20:7-10) Sa lavi parfe ki Rwayonm Bondye pou anmennen lo later pou reste pour touzour.

AL PLI O PROFON

4. Rwayonm Bondye pou met en lafen avek bann gouvernman imen

“Dimoun in domin lezot dimoun e fer zot prop maler.” (Eklezyas 8:9) Zeova pou servi son Rwayonm pour met en lafen avek lenzistis.

Lir Danyel 2:44 ek 2 Tesalonisyen 1:6-8 e apre reponn sa bann kestyon:

• Ki Zeova avek son Garson Zezi pou fer avek bann gouvernman imen ek bann ki siport zot?

• Ki mannyer sa ki ou’n aprann lo Zeova ek Zezi i asir ou ki zot pou azir dan en fason zis?

5. Zezi i sa pli bon Lerwa

Konman Lerwa dan Rwayonm Bondye, Zezi pou fer bokou pour son bann sitwayen lo later. Zwe sa VIDEO pour vwar ki mannyer Zezi in deza demontre ki i annan sa dezir pour ed bann dimoun e osi sa pouvwar pour fer li.

VIDEO: Zezi ti montre sa ki Rwayonm Bondye pou fer (1:13)

Ler i ti lo later, Zezi ti donn nou en avangou lo sa ki Rwayonm Bondye pou fer. Dan sa lalis, ki benediksyon ou eksite pour vwar? Lir sa bann verse Labib ki koz lo sa bann benediksyon.

6. Rwayonm Bondye pou anmenn en zoli lavenir

VIDEO: En lavenir merveye pe esper nou (4:38)

Lir Psonm 145:16 e apre reponn sa kestyon:

• Ki mannyer ou santi ler ou konnen ki Zeova pou satisfer dezir tou dimoun?

REZIMEN

Rwayonm Bondye pou akonpli son plan. I pou fer sa later antye vin en paradi avek bann bon dimoun ki pou ador Zeova pour touzour.

Revizyon

• Ki mannyer Rwayonm Bondye pou sanktifye non Zeova?

• Akoz nou kapab asire ki Rwayonm Bondye pou akonpli bann promes dan Labib?

• Ki Rwayonm Bondye pou fer ki ou enpasyan pour vwar?

FER PLIS RESERS

Dekouver ki Armagedon i vedir.

“What Is the Battle of Armageddon?” (Lartik lo jw.org)

Vwar bann levennman ki pou arive pandan sa ki Zezi ti apel “gran ladetres.”​—Matye 24:21.

“What Is the Great Tribulation?” (Lartik lo jw.org)

Vwar ki mannyer bann fanmir i kapab imazin zot dan Paradi.

Imazin ou dan Paradi (1:50)

Dan sa lartik “I Was Troubled by Many Questions,” vwar ki mannyer en aktivis politik ti arive trouv solisyon ki i ti pe rode.

“The Bible Changes Lives” (Latour Veyer 1 Zanvye 2012 an Angle)