Annou ed bann zonm pour progrese spirityelman

“Dezorme ou pou lapes [dimoun]!”​—LIK 5:10.

1, 2. (a) Ki ti reaksyon bann zonm anver predikasyon Zezi? (b) Ki nou pou etidye dan sa lartik?

ZEZI ti pe prese dan rezyon Galile, ansanm avek son bann disip zot ti anbark dan en bato pour al dan en landrwa izole. Me lafoul ti swiv zot apye. Dan sa lafoul, i ti annan “anviron senk mil zonm . . san kont bann madanm ek bann zanfan.” (Mat. 14:21) En lot fwa, en lafoul ti vin kot Zezi, zot ti anvi ganny geri e ekout li. Parmi i ti annan “kat mil zonm . . . san kont bann madanm ek bann zanfan.” (Mat. 15:38) I evidan ki bokou msye ti parmi bann dimoun ki ti vin kot Zezi e kontan son lansennyman. An realite, Zezi ti ekspekte ki bokou plis zonm ankor ti pou aksepte son lansennyman. Apre ki i ti’n fer mirak kot son bann disip ti lapes en kantite pwason, i ti dir Simon: “Dezorme ou pou lapes zonm [ouswa dimoun].” (Lik 5:10) Son disip ti pou bezwen larg lasenn, pa pour tyonbo pwason me pour tyonbo dimoun, enkli en kantite zonm.

² Pareyman denozour, bann zonm osi in ekoute e aksepte mesaz ki sorti dan Labib. (Mat. 5:3) Par kont, en kantite zonm i ezite oubyen menm zot pa progrese spirityelman. Ki mannyer nou kapab ed zot? Menm si minister Zezi pa ti zis target bann zonm, i evidan ki i ti koz lo bann size ki ti enteres bann zonm dan son lepok. Parey li, annou vwar ki mannyer nou kapab ed bann zonm fer fas avek trwa keksoz ki konsern zot dan nou letan: (1) travay, (2) per sa ki lezot i panse, e (3) per ki zot pa alaoter.

Travay

3, 4. (a) Kwa ki pli enportan pour bokou zonm? (b) Akoz serten zonm i pli konsernen avek zot travay ki bann keksoz spirityel?

³ En profeser Lalwa ti dir Zezi: “Met mon pare pour swiv ou partou kot ou pou ale.” Toudmenm, ler Zezi ti dir li ki “Fis-de-Lonm li napa en landrwa kot i kapab repoz son latet,” sa zonm pa ti tro asire si i ti pou vreman swiv li. Aparaman, sa zonm pa ti swiv Zezi, kekfwa akoz i ti enkyet ki i pa ti pou konnen ki mannyer i ti pou ganny dekwa manze ek landrwa reste.​—Mat. 8:19, 20.

⁴ Souvandfwa, bann zonm i pli konsernen avek zot sekirite materyel ki avek bann keksoz spirityel. Par egzanp, ledikasyon avanse, en louvraz stab e byen peye i en priyorite pour bokou zot. Pour zot, ganny larzan i pli enportan e i fer plis sans ki okenn benediksyon ki zot ti kapab gannyen si zot ti etidye Labib e annan en relasyon pros avek Bondye. Bann lansennyman Labib i kapab atir zot, me “traka lavi [ek] plezir larises” i kapab touf sa lentere ki zot kapab annan. (Mark 4:18, 19) Annou vwar ki mannyer Zezi ti ed son bann disip konpran sa ki pli enportan e konman nou kapab imit li.

5, 6. Kwa ki ti ed Andre, Pyer, Zak ek Zan pour sanz zot priyorite konsernan predikasyon ek zot travay?

⁵ Andre ek son frer Simon Pyer ti travay ansanm dan biznes lapes. I ti osi le ka pour Zan, son frer Zak ek zot papa Zebede. Zot biznes ti mars ase byen akoz zot ti anploy bann zonm pour ed zot. (Mark 1:16-20) Ler Andre ek Zan ti tann Zan Batis koz lo Zezi, zot ti konvenki ki Zezi ti sa Mesi. Andre ti al dir son frer Simon Pyer e petet Zan osi ti fer parey avek son frer Zak. (Zan 1:29, 35-41) Dan bann mwan ki ti swiv, tou le kat ti akonpanny Zezi ler i ti al prese Galile, Zide ek Samari. Pli tar selman, sa kat disip ti rekonmans zot biznes lapes. Zot ti’n demontre en lentere pour bann keksoz spirityel, me predikasyon pa ti premye keksoz dan zot lavi.

⁶ Pli tar, Zezi ti envit Pyer ek Andre pour swiv li e vin “lapes dimoun.” Ki mannyer zot ti reazir? “Deswit zot ti kit zot lasenn e zot ti swiv li.” Zak ek Zan osi ti fer parey. “Deswit zot ti kit zot kannot ek zot papa e swiv Zezi.” (Mat. 4:18-22) Kwa ki ti ed sa bann zonm pour dedye tou zot letan dan zot minister avek Zezi? Eski zot ti pran sa desizyon koumsa menm san reflesir? Pa ditou! Depi plizyer mwan, sa bann zonm ti’n ekout Zezi, vwar li fer mirak, vwar son devouman pour sa ki byen e vwar avek zot prop lizye ki mannyer dimoun ti aksepte mesaz Zezi. Finalman zot lafwa ek konfyans dan Zeova ti vin pli for.

 7. Ki mannyer nou kapab ed bann etidyan Labib pour batir zot konfyans dan lefet ki Zeova i pran swen avek son pep?

⁷ Ki mannyer nou kapab imit Zezi e ed nou bann etidyan Labib batir zot konfyans dan Zeova? (Prov. 3:5, 6) Lafason ki nou ansennyen pou annan bokou lefe lo zot. Dan nou lansennyman, nou kapab met lanfaz lo promes ki Bondye pou beni en kantite bann ki met lentere Rwayonm premye dan zot lavi. (Lir Malaki 3:10a; Matye 6:33.) I bon si nou servi diferan verse Labib pour montre ki Zeova i pran swen avek son pep, me i osi enportan ki nou toultan mazinen ki nou legzanp i kapab annan en lefe lo zot. Nou kapab partaz nou prop leksperyans e sa pou ed nou bann etidyan pour aprann met zot konfyans dan Zeova. Nou osi kapab rakont zot bann leksperyans ki nou’n lir dan nou bann piblikasyon.b

 8. (a) Akoz i enportan pour en etidyan Labib “goute e vwar konman Zeova i bon”? (b) Ki mannyer nou kapab ed nou etidyan pour li eksperyans personnelman labonte Zeova?

⁸ I pa sifi zis pour ekoute oubyen lir lo ki mannyer lezot in eksperyans benediksyon Zeova pour devlop en lafwa for. En dimoun ki etidye Labib i osi bezwen eksperyans personnelman labonte Zeova. En psalmis ti sante: “O zot lepep, goute e vwar konman Zeova i bon. Ere sa zonm kosto ki pran refiz dan li.” (Ps. 34:8) Ki mannyer nou kapab ed sa etidyan pour vwar ki Zeova i bon? Fer konmsi en etidyan ki rankontre problenm larzan pe osi esey aret en move labitid parey fimen, zwe larzan oubyen bwar tro bokou. (Prov. 23:20, 21; 2 Kor. 7:1; 1 Tim. 6:10) Si ou montre sa etidyan konman pour demann led Zeova pour sirmont son move labitid, pa sa pou ed li pour eksperyans personnelman labonte Zeova? I enteresan pour remark sa ki pou arive si nou ankouraz nou etidyan pour met bann keksoz spirityel premye, parey son letid Labib tou le semenn e prepar e asiste bann renyon kongregasyon. Pa son lafwa pou vin deplizanpli for anmezir ki i eksperyans benediksyon Zeova lo son bann zefor dan lavi!

Per sa ki lezot i panse

9, 10. (a) Akoz Nikodenm ek Zozef ti kasyet lentere ki zot ti annan dan lansennyman Zezi? (b) Akoz serten zonm ozordi i ezite pour swiv Kris?

⁹ Serten zonm i ezite pour vreman vin bann disip Kris akoz zot per sa ki lezot pou dir lo zot. Nikodenm ek Zozef sorti dan lavil Arimate ti kasyet zot lentere dan lansennyman Zezi akoz zot ti per sa ki lezot Zwif ti’n kapab dir oubyen fer si zot ti’n konnen. (Zan 3:1, 2; 19:38) Dan en sans, nou konpran zot akoz bann sef relizye ti sitan ay Zezi ki finalman nenport ki ki ti krwar dan Zezi ti ganny ekskli dan sinagog.​—Zan 9:22.

¹⁰ Dan serten landrwa ozordi osi, si en zonm i demontre lentere dan Bondye, dan Labib oubyen dan larelizyon, son bann koleg travay, zanmi ouswa fanmir i kapab met en kantite presyon lo li. Parfwa, i kapab menm danzere pour koz lo larelizyon. En zonm ki dan larme oubyen politik ouswa ki annan en o pozisyon dan lasosyete i kapab vwar li anba en kantite presyon. Par egzanp, en zonm Lalmanny ti rekonnet: “Sa ki Temwen i ansennyen lo Labib i vre. Me si mon ti vin en Temwen ozordi, tou dimoun ti pou konnen demen. Ki zot pou dir lo mwan dan travay, dan vwazinaz e dan klib ki mwan ek mon fanmir nou frekante. Mon zis pa kapab fer fas avek sa.”

11. Ki mannyer Zezi ti ed son bann disip pour sirmont lafreyer ki zot ti annan?

¹¹ Menm si bann zapot Zezi ti ase kouraze an zeneral, zot tou zot ti per sa ki lezot ti panse lo zot. (Mark 14:50, 66-72) Ki mannyer Zezi ti ed zot progrese malgre presyon lezot? I ti annan diferan keksoz ki Zezi ti fer pour ed son bann disip fer fas avek bann diferan lopozisyon ki zot ti pou rankontre pli tar. I ti dir: “Byennere, zot, si zonm i ay zot, i rezet zot, ensilte zot e [maltret] zot akoz [zot] swiv Fis-de-Lonm!” (Lik 6:22) Zezi ti averti son bann disip ki pa tou dimoun ki ti pou tret zot byen. Me i ti dir zot ki sa ti pou arive “akoz [zot] swiv Fis-de-Lonm.” Zezi ti asir zot ki Bondye ti pou toultan avek zot osi lontan ki zot ti annan konfyans ki Bondye ti pou ed zot e donn zot lafors. (Lik 12:4-12) Deplis, Zezi ti ankouraz bann nouvo pour pas plis letan avek son disip e fer zanmi avek zot.​—Mark 10:29, 30.

12. Dan ki fason nou kapab ed bann nouvo pour pa per sa ki lezot i panse?

¹² Nou osi nou devret ed nou bann etidyan Labib pour pa per sa ki lezot i panse. Souvandfwa, i pli fasil pour fer fas avek en problenm si nou konn davans ki pou arive. (Zan 15:19) Par egzanp, akoz ou pa esey ed ou etidyan pour prepar bann larepons senp e rezonnab ki baze lo Labib pour ed li defann son lafwa e reponn bann kestyon ki son koleg travay ek lezot dimoun i kapab demande? Ou menm ou ti kapab vin son zanmi e osi entrodwir li avek lezot manm kongregasyon, sirtou bann ki ti kapab annan serten keksoz an komen avek li. An tou le ka, nou devret montre li konman pour priye regilyerman e avek tou son leker. Sa pou ed li pour vin pros avek Bondye e Zeova pou vin son Refiz ek son Ros.​—Lir Psonm 94:21-23c; Zak 4:8.

Per ki zot pa alaoter

13. Akoz serten zonm ki santi zot pa alaoter i kapab vwar li difisil pour progrese spirityelman?

¹³ Serten frer i tarde pour progrese spirityelman akoz zot pa konn lir byen, eksprim zot byen oubyen zis akoz zot timid. Lezot i vwar li difisil pour donn zot pwennvi oubyen eksprim zot santiman devan lezot. Pour zot, etidye Labib, reponn dan renyon kongregasyon oubyen menm koz avek lezot lo zot lafwa i kapab paret enposib. En frer batize ti rekonnet: “Ler mon ti zenn, mon ti al kot laport en dimoun, fer konmsi mon sonn laklos e apre kit sa landrwa san fer tapaz pour ki personn pa tann oubyen vwar mwan. . . .  Zis la lide pour al portanport ti fer mwan malad.”

14. Akoz bann disip Zezi pa ti arive geri en garson ki ti posede par demon?

¹⁴ Esey imazinen ki mannyer bann disip Zezi ti’n bezwen santi ler zot pa ti kapab geri en garson ki ti’n ganny posede par demon. Papa sa garson ti vin kot Zezi e dir li: “Senyer, pran pitye pour mon garson. I ganny kriz terib e souvan i tonm dan dife oubyen dan delo. Mon ti anmenn li kot ou bann disip me zot pa’n kapab geri li.” Zezi ti sas sa demon e geri sa garson. Pli tar, bann disip ti al kot Zezi e demann li: “Akoz nou pa ti kapab sas sa demon?” Zezi ti reponn: “Akoz zot lafwa i feb. An realite, mon asir zot ki si zot annan lafwa groser en lagrenn moutard zot a kapab dir avek sa montanny, ‘Ale, sanz plas al laba!’ e i pou ale. E napa nanryen ki pou enposib pour zot.” (Mat. 17:14-20) Pour kapab sirmont bann lobstak ki parey bann montanny, nou bezwen annan lafwa dan Zeova. Ki pou arive si en dimoun i perdi lafwa e annan konfyans dan son prop abilite? Si i pa arive sirmont son problenm finalman i kapab perdi konfyans ki i kapab servi Zeova.

15, 16. Ki mannyer nou kapab ed en etidyan Labib si i pa santi li alaoter?

¹⁵ En bon fason pour ed en dimoun ki krwar i pa alaoter se par ankouraz li pour konsantre lo Zeova olye son prop lekor. Lo sa size Pyer ti ekrir: “Avek limilite plas zot anba kontrol pisans Bondye pour ki dan son ler ki i’n fikse, i a elev zot. Desarz tou zot sousi lo li.” (1 Pyer 5:6, 7) I vreman enportan ki nou ed nou etidyan pour progrese spirityelman. En dimoun spirityel i kontan bann keksoz spirityel. I kontan Parol Bondye e i devlop “fri lespri” dan son lavi. (Gal. 5:22, 23) I kontan priye. (Fili. 4:6, 7) Deplis, i toultan demann Bondye pour donn li kouraz ek lafors pour fer fas avek okenn sityasyon ouswa reisi desarz okenn responsabilite.​—Lir 2 Timote 1:7, 8.

¹⁶ Parfwa i pou neseser pour ofer lasistans pratik pour ed serten etidyan pour lir e koze devan lezot. Lezot i kapab santi ki zot pa vo nanryen akoz bann pese ki zot in komet dan lepase avan ki zot ti konn Zeova. Dan tou le de ka, nou led avek lanmour ek pasyans pou sanmenm sa ki zot bezwen. Zezi ti dir: “Dimoun ki an bonn sante pa bezwen dokter, me zis bann ki malad.”​—Mat. 9:12.

Annou “lapes” plis zonm ankor

17, 18. (a) Ki mannyer nou ti kapab zwenn plis zonm dan predikasyon? (b) Ki lot lartik pou koz lo la?

¹⁷ Nou swete ki bokou plis zonm i aksepte sa zoli mesaz sorti dan Labib. (2 Tim. 3:16, 17) Me ki nou kapab fer pour zwenn plis zonm ankor dan predikasyon? Nou ti kapab pas plis letan dan predikasyon apre ler travay, apremidi dan wikenn oubyen pandan bann konze piblik kot plis zonm i kot lakour. Ler i posib, akoz ou pa demande pour koz avek sa msye ki reste kot sa lakour? Annou donn temwannyaz enformel avek nou bann koleg travay zonm si i apropriye ouswa msye bann ser ki pa Temwen dan kongregasyon.

¹⁸ Si nou rann temwannyaz avek tou dimoun ki nou rankontre, nou kapab asire ki bann ki annan leker senser pou aksepte laverite. Avek pasyans, annou ed tou sa bann ki annan en lentere senser pour konn plis lo Bondye. Ki nou kapab fer pour ed bann frer dan kongregasyon pour annan sa dezir pour desarz plis responsabilite dan lorganizasyon Bondye? Lot lartik pou reponn sa kestyon.

[Not anba lo paz]

Ki ou pou reponn?

• Ki mannyer bann zonm i kapab ganny ede pour pourswiv bann lobzektif spirityel?

• Ki mannyer nou kapab ed bann nouvo pour fer fas avek presyon zot kanmarad?

• Ki mannyer nou kapab ed lezot ki pa santi zot alaoter?

[Portre lo paz 25]

Eski ou rod fason pour rann temwannyaz avek bann zonm?

[Portre lo paz 26]

Ki mannyer ou kapab prepar ou etidyan pour fer fas avek difikilte?