• Eski ou pou les okenn keksoz fer ou aret swiv Zezi?
    Latour Veyer (Letid)—2021 | Me

    • (3) ZEZI PA TI SWIV SERTEN TRADISYON ZWIF

      Bokou dimoun pa ti aksepte Zezi akoz i pa ti swiv serten tradisyon Zwif. Ki mannyer sa bann menm keksoz i kapab fer dimoun pa aksepte Zezi ozordi? (Vwar paragraf 13)e

      13. Akoz en kantite dimoun pa ti aksepte Zezi?

      13 Dan letan Zezi, bann disip Zan ki batize, pa ti konpran akoz bann disip Zezi pa ti zennen. Zezi ti dir ki i napa okenn rezon pour zot zennen tan ki i ti ankor la. (Mat. 9:14-17) Kantmenm sa, bann Farizyen ek lezot dimoun ki ti opoz li, ti akiz li parski i pa ti swiv zot bann tradisyon ek koutim. Zot ti ankoler ler i ti geri dimoun zour Saba. (Mark 3:1-6; Zan 9:16) Menm si zot ti fyer pour dir ki zot ti obei Lalwa Saba, zot pa ti vwar li en problenm pour fer biznes dan tanp. Zot ti ankoler ler Zezi ti dir ki sa ki zot ti pe fer i mal. (Mat. 21:12, 13, 15) Bann ki Zezi ti anons sa bon nouvel avek dan sinagog Nazaret, ti ankoler ler Zezi ti servi legzanp sa ki ti arive avek pep Izrael dan lepase, pour dir ki zot ti pe mazin zis zot prop lekor e ki zot ti napa lafwa. (Lik 4:16, 25-30) Alor, en kantite dimoun pa ti aksepte Zezi parski i pa ti fer sa ki zot ti krwar i ti pou fer.​—Mat. 11:16-19.

      14. Akoz Zezi pa ti aksepte bann tradisyon zonm ki pa ti annakor avek sa ki dan Labib?

      14 Ki Labib i dir? Atraver profet Izai, Zeova ti dir: “Sa i parey ler sa pep i apros mwan avek son labous. I onor mwan avek zis son lalev, me son leker i lwen avek mwan; respe ki i annan pour mwan, i zis en komannman zonm ki i’n aprann.” (Iza. 29:13) Zezi ti annan rezon pour pa aksepte bann koutim ki dapre Labib i mal. Bann ki ti krwar ki bann lareg ek tradisyon zonm ti pli enportan ki sa ki dan Labib, pa ti aksepte Zeova ek sa enn ki i’n anvoye konman Mesi.

  • Eski ou pou les okenn keksoz fer ou aret swiv Zezi?
    Latour Veyer (Letid)—2021 | Me

    • (4) ZEZI TI REFIZE PARTISIP DAN BANN ZAFER POLITIK

      Bokou dimoun pa ti aksepte Zezi akoz i ti refize partisip dan bann zafer politik. Ki mannyer sa bann menm keksoz i kapab fer dimoun pa aksepte Zezi ozordi? (Vwar paragraf 17)f

      17. Ki bokou dimoun dan letan Zezi ti ekspekte ki Mesi i fer?

      17 Serten dimoun dan letan Zezi ti anvi en sanzman gouvernman. Zot ti ekspekte ki Mesi i liber zot anba dominasyon bann Romen. Me ler zot ti esey fer Zezi vin zot lerwa, i ti refize. (Zan 6:14, 15) De lot kote, bann pret ek lezot ti per ki Zezi i esey sanz gouvernman akoz bann Romen ti pou ankoler e zot ti pou pran lotorite ki zot ti’n donn sa bann pret. Alor, vi ki en kantite dimoun ti enkyet konsernan politik, zot pa ti aksepte Zezi.

      18. Ki serten profesi konsernan Mesi ki en kantite dimoun ti inyore?

      18 Ki Labib i dir? Menm si en kantite profesi ti predir ki en zour Mesi ti pou vin en Gerye ki ranport laviktwar, lezot profesi ti montre ki i ti pou bezwen mor pour nou pese avan sa i arive. (Iza. 53:9, 12, NWT) Alor, akoz bann Zwif ti ekspekte ki Mesi i rezourd zot problenm deswit? En kantite dimoun dan letan Zezi ti inyor bann profesi ki pa ti promet pour anmenn en solisyon vitman pour bann problenm ki zot ti annan.​—Zan 6:26, 27.