Eski ou pou les okenn keksoz fer ou aret swiv Zezi?

 1. Kwa ki ti sirprann ou ler ou ti esey koz avek lezot konsernan bann laverite dan Labib?

ESKI ou rapel sa moman ler ou ti realize ki ou’n trouv laverite? Bann lansennyman dan Labib ti vreman kler. Ou ti krwar ki tou dimoun ti pou kontan pour aprann sa bann laverite. Ou ti asire ki sa bann lansennyman ti pou fer zot ere e donn zot en lespwar pour lavenir. (Ps. 119:105) Alor, ou ti dir tou ou bann fanmir ek zanmi sa bann lansennyman ki ou’n aprann. Me ou ti sirprann ler serten pa ti aksepte sa ki ou ti’n dir zot.

2-3. Ki mannyer laplipar dimoun dan letan Zezi ti reazir anver Zezi?

² Nou pa devret sirprann ler lezot pa aksepte sa mesaz ki nou anonse. Dan letan Zezi, laplipar dimoun pa ti swiv li, menm si i ti fer bann mirak ki ti montre ki i ti annan sipor Bondye. Par egzanp, ler Zezi ti resisit Lazar, bann ki ti opoz li pa ti kapab dir ki sa mirak pa ti’n arive. Kantmenm sa, bann sef Zwif pa ti aksepte Zezi konman Mesi. Zot ti menm anvi touy li e touy Lazar osi.​—Zan 11:47, 48, 53; 12:9-11.

³ Zezi ti konnen ki laplipar dimoun ti pou refize krwar ki i ti Mesi. (Zan 5:39-44) I ti dir serten disip Zan ki batize: “Ere bann ki napa rezon pour tonbe akoz mwan.” (Mat. 11:2, 3, 6) Me akoz bokou dimoun pa ti swiv Zezi?

 4. Ki nou pou vwar dan sa lartik?

⁴ Dan sa lartik e osi sa enn ki swiv, nou pou vwar plizyer rezon akoz bokou dimoun dan premye syek pa ti krwar dan Zezi. Nou pou osi vwar akoz bokou dimoun ozordi, pa aksepte nou mesaz. Pli enportan ankor, nou pou aprann akoz nou bezwen annan en lafwa for dan Zezi pour ki nanryen pa anpes nou kontinyen swiv son legzanp.

 5. Akoz serten ti’n kapab krwar ki Zezi pa ti Mesi?

⁵ Bokou dimoun pa ti swiv Zezi akoz landrwa kot i ti grandi. Zot ti admet ki Zezi ti en bon ansenyan e ki i ti fer bann mirak. Me zot ti krwar ki i ti garson en senp sarpantye. I ti sorti Nazaret, en lavil ki dimoun ti krwar pa enportan. Menm Natanael ki pli tar ti vin en disip Zezi ti dir: “Eski i kapab annan okenn bon keksoz sorti Nazaret?” (Zan 1:46) I kapab ki Natanael pa ti kontan Nazaret ouswa i ti pe mazin sa profesi ki dan Mika 5:2, ki dir ki Mesi ti pou ne an Betleenm me pa Nazaret.

 6. Kwa ki ti’n kapab ed bann dimoun dan letan Zezi pour rekonnet ki Zezi i Mesi?

⁶ Ki Labib i dir? Profet Izai ti dir ki bann lennmi Zezi pa ti pou enterese pour rod ‘detay konsernan zanset Mesi.’ (Iza. 53:8, NWT) Bokou sa bann lenformasyon ti’n ganny profetize. Si bann dimoun ti pran letan pour rod bann lenformasyon egzakt, zot ti pou konnen ki Zezi ti ne an Betleenm e ki i ti en desandans Lerwa David. (Lik 2:4-7) Alor parey i ti’n ganny predir dan Mika 5:2, Zezi ti ne an Betleenm. Me ki ti zot problenm? Bann dimoun ti fer en desizyon vit. Zot pa ti get tou bann lenformasyon e akoz sa, zot pa ti swiv Zezi.

 7. Akoz bokou dimoun ozordi pa dakor avek Temwen Zeova?

⁷ Eski i annan sa menm problenm ozordi? Wi. Laplipar Temwen Zeova pa bann dimoun ris ouswa bann dimoun enportan. Alor, bokou dimoun i krwar ki zot bann dimoun ordiner e ki zot napa bokou ledikasyon. (Akt 4:13) Serten i dir ki bann Temwen Zeova pa kapab ansenny sa ki Labib i dir akoz zot pa’n etidye dan bann lekol larelizyon. Lezot dimoun i dir ki Temwen Zeova i en “larelizyon Ameriken,” menm si laplipar Temwen Zeova pa reste Leta-z-ini. Lezot ankor i ganny dir ki Temwen Zeova pa krwar dan Zezi. Pandan bann lannen ki’n pase, dimoun in dir ki Temwen Zeova i bann “kominis,” “espyon Ameriken” e bann “ekstremis.” Vi ki bann dimoun ki tann sa bann zistwar napa tou lenformasyon ouswa zot pa aksepte lenformasyon ki egzakt, zot pa aksepte nou mesaz.

 8. Dapre Akt 17:11, ki bann dimoun i devret fer si zot anvi konnen lekel pep Bondye ozordi?

⁸ Kwa ki pou ed dimoun aprann laverite konsernan pep Zeova? Dimoun i bezwen rod bann lenformasyon ki egzakt. Sanmenm sa ki ekriven Levanzil Lik ti determinen pour fer. I ti fer “resers lo tou sa bann keksoz depi o konmansman dan en fason egzakt.” I ti anvi ki bann ki lir Levanzil Lik i asire ki bann keksoz ki zot in tande lo Zezi i vre. (Lik 1:1-4) Bann Zwif ki reste Bere ti parey Lik. Ler zot ti tann sa bon nouvel lo Zezi, zot ti etidye Lekritir Ebre pour vwar si sa ki zot ti’n tande i vre. (Lir Akt 17:11.) Dan menm fason, dimoun ozordi i bezwen rod lenformasyon egzakt. Zot bezwen konpar sa ki pep Zeova i ansenny zot avek sa ki Labib i dir. Zot osi bezwen etidye sa ki pep Zeova in fer dan nou letan. Si zot rod byen bann lenformasyon, zot pa pou les bann prezidis ek sa ki dimoun i dir anbet zot.

 9. Ki ti arive ler Zezi ti refize montre en siny sorti dan lesyel?

⁹ Serten dimoun dan letan Zezi pa ti satisfe avek sa ki i ti pe ansennyen. Zot ti anvi plis. Zot ti demande ki i prouve ki li menm li Mesi, par montre zot “en siny sorti dan lesyel.” (Mat. 16:1) Petet zot ti anvi i fer sa parski zot ti’n mal konpran sa ki zot in lir dan Danyel 7:13, 14. Me i pa ti ankor ler pour sa profesi ganny akonplir. Sa ki Zezi ti ansennyen ti devret ase pour konvenk zot ki li menm li Mesi. Me ler i ti refize pour montre zot sa siny ki zot ti pe demande, zot pa ti aksepte li.​—Mat. 16:4.

10. Ki mannyer Zezi ti akonpli sa ki Izai ti ekri konsernan Mesi?

¹⁰ Ki Labib i dir? Konsernan Mesi, profet Izai ti dir: “I pa pou kriye ni lev son lavwa, i pa pou fer tande son lavwa dan semen.” (Iza. 42:1, 2, NWT) Zezi pa ti fer vantar ler i ti pe fer son travay predikasyon. I pa ti konstri bann gran gran tanp e i pa ti met bann lenz spesyal oubyen anvi ki dimoun i donn li bann tit spesyal. Ler Zezi ti pe ganny zize, i ti refize fer mirak pour enpresyonn Lerwa Erod menm si son lavi ti an danze. (Lik 23:8-11) Zezi ti fer serten mirak me sa keksoz pli enportan pour li, ti pou anons sa bon nouvel. I ti dir son bann disip: “Se pour sa rezon ki mon’n vini.”​—Mark 1:38.

11. Ki move pwennvi serten dimoun i annan ozordi?

¹¹ Eski i annan sa menm problenm ozordi? Wi. Ozordi, en kantite dimoun i enpresyonnen avek bann gran katedral ki annan bann dekorasyon ser. Zot enpresyonnen avek bann sef relizye ek zot bann tit ki fer zot paret enportan. Zot osi kontan bann seremoni ki laplipar dimoun in oubliye ki i pa sorti dan Labib. Me bann dimoun ki asiste sa bann rankont pa aprann bokou lo Bondye ek son plan. De lot kote, bann ki asiste renyon Temwen Zeova, i aprann sa ki Zeova i anvi nou fer. Zot osi aprann ki mannyer pour fer sa ki Zeova i demann nou. Nou bann Lasal Rwayonm i prop e napa bann dekorasyon ser. Bann ki dirize dan kongregasyon pa met bann lenz spesyal e zot napa bann tit ki fer zot paret enportan. Sa ki nou ansennyen e krwar ladan i sorti dan Labib. Kantmenm sa, en kantite dimoun ozordi pa aksepte nou mesaz parski nou pa fer bann gran seremoni e sa ki nou ansennyen i pa sa ki zot anvi tande.

12. Dapre Ebre 11:1, 6, nou lafwa i devret ganny batir lo kwa?

¹² Ki nou devret fer pour fer sir ki nou kontinyen swiv Zezi? Zapot Pol ti dir bann Kretyen ki ti pe reste Ronm: “En dimoun i ganny lafwa apre ki i’n tann mesaz e i tann sa mesaz ler dimoun i koz konsernan Kris.” (Rom. 10:17) Alor, nou batir nou lafwa ler nou etidye Labib me non pa ler nou partisip dan bann seremoni relizye ki Labib i montre i mal. Menm si sa bann seremoni i zoli ouswa enpresyonan. Nou bezwen devlop en lafwa for ki baze lo konnesans egzakt akoz “san lafwa i enposib pour vreman fer plezir Bondye.” (Lir Ebre 11:1, 6.) Nou pa bezwen vwar en gran siny sorti dan lesyel pour montre nou ki nou’n ganny laverite. Ler nou etidye byen bann lansennyman ki dan Labib, sa i ase pour konvenk nou ki nou dan laverite e pour retir okenn dout ki nou annan.

13. Akoz en kantite dimoun pa ti aksepte Zezi?

¹³ Dan letan Zezi, bann disip Zan ki batize, pa ti konpran akoz bann disip Zezi pa ti zennen. Zezi ti dir ki i napa okenn rezon pour zot zennen tan ki i ti ankor la. (Mat. 9:14-17) Kantmenm sa, bann Farizyen ek lezot dimoun ki ti opoz li, ti akiz li parski i pa ti swiv zot bann tradisyon ek koutim. Zot ti ankoler ler i ti geri dimoun zour Saba. (Mark 3:1-6; Zan 9:16) Menm si zot ti fyer pour dir ki zot ti obei Lalwa Saba, zot pa ti vwar li en problenm pour fer biznes dan tanp. Zot ti ankoler ler Zezi ti dir ki sa ki zot ti pe fer i mal. (Mat. 21:12, 13, 15) Bann ki Zezi ti anons sa bon nouvel avek dan sinagog Nazaret, ti ankoler ler Zezi ti servi legzanp sa ki ti arive avek pep Izrael dan lepase, pour dir ki zot ti pe mazin zis zot prop lekor e ki zot ti napa lafwa. (Lik 4:16, 25-30) Alor, en kantite dimoun pa ti aksepte Zezi parski i pa ti fer sa ki zot ti krwar i ti pou fer.​—Mat. 11:16-19.

14. Akoz Zezi pa ti aksepte bann tradisyon zonm ki pa ti annakor avek sa ki dan Labib?

¹⁴ Ki Labib i dir? Atraver profet Izai, Zeova ti dir: “Sa i parey ler sa pep i apros mwan avek son labous. I onor mwan avek zis son lalev, me son leker i lwen avek mwan; respe ki i annan pour mwan, i zis en komannman zonm ki i’n aprann.” (Iza. 29:13) Zezi ti annan rezon pour pa aksepte bann koutim ki dapre Labib i mal. Bann ki ti krwar ki bann lareg ek tradisyon zonm ti pli enportan ki sa ki dan Labib, pa ti aksepte Zeova ek sa enn ki i’n anvoye konman Mesi.

15. Akoz en kantite dimoun ozordi pa kontan Temwen Zeova?

¹⁵ Eski i annan sa menm problenm ozordi? Wi. En kantite dimoun i ankoler avek Temwen Zeova akoz zot pa zwenn avek zot pour selebre bann tradisyon ki pa fer plezir Bondye, parey lanniverser nesans ek Nwel. Lezot i ankoler ler Temwen Zeova pa partisip dan bann selebrasyon nasyonal oubyen pa swiv bann koutim lanterman ki Parol Bondye i montre i mal. Bann ki ankoler avek Temwen Zeova akoz sa bann rezon, i kapab krwar ki Bondye i aksepte lafason ki zot ador li. Me zot pa kapab fer plezir Bondye si zot pli kontan bann tradisyon zonm ki bann lansennyman ki sorti dan Labib.​—Mark 7:7-9.

16. Dapre Psonm 119:97, 113, 163-165, ki nou devret fer e ki nou devret evite fer?

¹⁶ Ki nou devret fer pour fer sir ki nou kontinyen swiv Zezi? Nou bezwen annan en gran lanmour pour bann lalwa ek bann prensip Zeova. (Lir Psonm 119:97, 113, 163-165, NWT.)b Ler nou kontan Zeova, nou pa pou swiv okenn tradisyon ki pa fer li plezir. Nou pa pou les nanryen vin pli enportan ki nou lanmour pour Zeova.

17. Ki bokou dimoun dan letan Zezi ti ekspekte ki Mesi i fer?

¹⁷ Serten dimoun dan letan Zezi ti anvi en sanzman gouvernman. Zot ti ekspekte ki Mesi i liber zot anba dominasyon bann Romen. Me ler zot ti esey fer Zezi vin zot lerwa, i ti refize. (Zan 6:14, 15) De lot kote, bann pret ek lezot ti per ki Zezi i esey sanz gouvernman akoz bann Romen ti pou ankoler e zot ti pou pran lotorite ki zot ti’n donn sa bann pret. Alor, vi ki en kantite dimoun ti enkyet konsernan politik, zot pa ti aksepte Zezi.

18. Ki serten profesi konsernan Mesi ki en kantite dimoun ti inyore?

¹⁸ Ki Labib i dir? Menm si en kantite profesi ti predir ki en zour Mesi ti pou vin en Gerye ki ranport laviktwar, lezot profesi ti montre ki i ti pou bezwen mor pour nou pese avan sa i arive. (Iza. 53:9, 12, NWT) Alor, akoz bann Zwif ti ekspekte ki Mesi i rezourd zot problenm deswit? En kantite dimoun dan letan Zezi ti inyor bann profesi ki pa ti promet pour anmenn en solisyon vitman pour bann problenm ki zot ti annan.​—Zan 6:26, 27.

19. Kwa ki fer en kantite dimoun ozordi rezet nou mesaz?

¹⁹ Eski i annan sa menm problenm ozordi? Wi. En kantite dimoun ozordi pa dakor avek nou akoz nou pa partisip dan politik. Zot krwar ki nou devret vote dan eleksyon. Me nou realize ki si nou swazir en dirizan imen, nou pe rezet Zeova. (1 Sam. 8:4-7) Petet dimoun i osi santi ki nou devret konstri bann lekol, lopital e fer lezot keksoz ki kapab ed dimoun dan kominote. Zot pa aksepte nou mesaz parski nou fer bokou zefor pour anons sa bon nouvel olye rezourd bann problenm ki i annan dan lemonn.

20. Dapre sa ki Zezi ti dir dan Matye 7:21-23, nou devret konsantre lo kwa?

²⁰ Ki nou devret fer pour fer sir ki nou kontinyen swiv Zezi? (Lir Matye 7:21-23.) Nou devret konsantre dan sa travay ki Zezi in donn nou lord pour fer. (Mat. 28:19, 20) Nou pa devret zanmen les nou ganny distrer avek bann problenm sosyal ek politik sa lemonn. Nou kontan nou prosen e nou ti a kontan ed zot. Me nou konnen ki sa pli bon fason pour ed zot, i par ansenny zot konsernan Rwayonm Bondye e par ed zot pour devlop en lanmitye avek Zeova.

21. Ki nou devret determinen pour fer?

²¹ Dan sa lartik, nou ti vwar kat keksoz ki ti fer dimoun pa aksepte Zezi dan premye syek e ki kapab fer serten dimoun pa aksepte bann disip Zezi ozordi. Dan sa lartik ki swiv, nou pou vwar kat lezot keksoz ki kapab fer dimoun pa aksepte Zezi. Annou reste determinen pour pa zanmen rezet Zezi e pour kontinyen gard nou lafwa for.