Ki mannyer nou devret tret lezot

“Fer pour lezot parey ou ti a kontan, ki lezot i fer pour ou.”—LIK 6:31.

1, 2. (a) Ki si sa sa Sermon lo Montanny? (b) Lo kwa nou pou diskite dan sa lartik ek lartik swivan?

ZEZI KRI ti vreman sa Gran Ansennyan. Ler son bann lennmi relizye ti anvoy bann zonm pour aret li, sa bann zofisye ti retournen lanmen vid e ti dir: “Personn pa’n zanmen deza koz parey sa zonm.” (Zan 7:32, 45, 46) Enn parmi bann diskour enpresyonan ki Zezi ti fer ti sa Sermon lo Montanny. I’n ganny rikorde dan Levanzil Matye sapit 5 ziska 7, e sa menm lenformasyon i ganny prezante dan Lik 6:20-49.a

² Petet sa parol ki dimoun i konn pli byen dan sa Sermon i sa enn kot Zezi ti dir: “Fer pour lezot parey ou ti a kontan, ki lezot i fer pour ou.” (Lik 6:31) I koz konsernan ki mannyer nou devret tret lezot. Pa Zezi ti fer dibyen anver lezot! I ti geri bann malad e resisit bann mor. Me bann dimoun ti sirtou ganny beni, ler zot ti aksepte sa bon nouvel ki i ti partaz avek zot. (Lir Lik 7:20-22.) Konman Temwen Zeova, nou partisip avek plezir dan sa aktivite predikasyon parey Zezi. (Mat. 24:14; 28:19, 20) Dan sa lartik ek lartik swivan, nou pou egzamin parol Zezi konsernan sa travay ensi ki lezot pwen dan sa Sermon lo Montanny ki dir nou konman nou devret tret lezot.

Demontre ladouser

3. Ki mannyer ou ti pou dekrir ladouser?

³ Zezi ti dir: “Byennere bann ki dou, akoz zot pou posed later.” (Mat. 5:5) Dan Labib, ladouser napa nanryen pour fer avek febles. I sa ladouser ki nou demontre pour obeir bann standar Bondye. Nou demontre sa ladouser dan lafason ki nou konport nou avek lezot. Par egzanp, nou “pa rann mal pour mal.”—Rom. 12:17-19.

4. Akoz dimoun ki demontre ladouser i ere?

⁴ Bann dimoun ki demontre ladouser zot ere akoz “zot pou posed later.” Zezi ti “dou e [ti] annan limilite dan [son] leker” e i ti sa enn ki’n ganny “etabli konman zeritye lo tou keksoz,” alors i sa zeritye prensipal later. (Mat. 11:29; Ebr. 1:2; Ps. 2:8) I ti’n ganny predir ki ti pou annan lezot dirizan avek Mesi ki li menm fisdelonm dan Rwayonm Bondye. (Dan. 7:13, 14, 21, 22, 27) Konman bann “zeritye ansanm avek Kris,” sa 144,000 Kretyen swazir ki’n demontre ladouser pou osi posed later. (Rom. 8:16, 17; Rev. 14:1) Lezot dimoun ki demontre ladouser pou ganny beni pour viv eternelman lo later anba dominasyon Rwayonm Bondye.—Ps. 37:11.

5. Ler nou imit lafason ki Zezi ti demontre ladouser ki lefe sa i annan lo nou personnalite?

⁵ Si nou en dimoun ki dir anver lezot, i tre probab ki nou pou fer zot perdi pasyans e zot pou evit nou. Me, ler nou imit lafason ki Zezi ti demontre ladouser sa pou fer nou azir dan en fason zantiy e ankourazan anver lezot dan kongregasyon. Ladouser i form parti fri ki lespri sen Bondye i prodwir dan nou si nou ‘viv par lespri e les li kontrol nou lavi.’ (Lir Galat 5:22-25.) Sirman nou ti a kontan ganny konsidere parmi bann ki demontre ladouser e ki ganny gide par lespri sen Bondye!

Pa sa ki demontre mizerikord i byennere!

6. Ki bann kalite remarkab en dimoun ki demontre mizerikord i annan?

⁶ Dan son Sermon lo Montanny, Zezi ti dir: “Byennere bann ki pran pitye [oubyen “ki demontre mizerikord,” NW] pour lezot, akoz Bondye pou pran pitye pour zot.” (Mat. 5:7) Bann ki “demontre mizerikord” i annan konpasyon, tandres, labonte ek konsiderasyon, zot pran pitye pour dimoun ki dan bezwen. Zezi ti fer mirak pour soulaz bann dimoun ki ti pe soufer akoz i ti “pran pitye” pour zot. (Mat. 14:14; 20:34) Alors pitye ek konsiderasyon i devret pous nou pour demontre mizerikord.—Zak 2:13.

7. Pitye ki Zezi ti annan pour lezot ti pous li pour fer kwa?

⁷ Kan en lafoul ti zwenn Zezi pe al dan en landrwa pour repoze, “son leker ti touse avek konpasyon. I ti pran pitye pour zot, akoz zot ti parey bann mouton ki napa berze.” Alors, “i ti konmans ansenny zot bokou keksoz.” (Mark 6:34) Pa nou eksperyans lazwa parey Zezi ler nou partaz sa mesaz Rwayonm e koz avek lezot konsernan gran mizerikord Zeova!

8. Akoz dimoun ki demontre mizerikord i ere?

⁸ Bann dimoun ki demontre mizerikord i ere akoz lezot pou “demontre mizerikord” anver zot. Ler nou tret lezot avek mizerikord, zot souvan azir dan sa menm fason anver nou. (Lik 6:38) Deplis, Zezi ti dir: “Si zot pardonn bann ki’n fer zot ditor, zot Papa ki dan lesyel i a osi pardonn zot.” (Mat. 6:14) Zis bann dimoun ki demontre mizerikord ki pou ere akoz zot ganny pardonnen zot pese e ganny laprouvasyon Bondye.

Akoz “bann ki fer lape” i ere?

9. Ki mannyer nou azir si nou en dimoun ki fer lape?

⁹ An sitan en lot rezon pour ere, Zezi ti dir: “Byennere bann ki fer lape, akoz zot pou ganny apele bann garson Bondye.” (Mat. 5:9) Si nou en dimoun ki fer lape, nou pa pou aksepte oubyen partisip dan okenn keksoz, parey kalonmni, ki kapab “kre divizyon ant bann bon zanmi.” (Prov. 16:28) Par nou parol ek aksyon, nou pou fer lape avek bann dimoun ki dan kongregasyon e osi an deor kongregasyon. (Ebr. 12:14) Sirtou nou pou fer tou sa ki nou kapab pour anpe avek Zeova.—Lir 1 Pyer 3:10-12.

10. Akoz “bann ki fer lape” i ere?

¹⁰ Zezi ti dir ki “sa bann ki fer lape” zot ere, “akoz zot pou ganny apele bann garson Bondye.” Bann Kretyen swazir i resevwar “pouvwar pour vin zanfan Bondye” akoz zot demontre lafwa dan Zezi konman Mesi. (Zan 1:12; 1 Pyer 2:24) Ki pou arive avek bann “lezot mouton” Zezi? Zezi pou vin zot “Papa Eternel” pandan sa mil an ki i pou dirize ansanm avek son bann zeritye dan lesyel. (Zan 10:14, 16; Iza. 9:6; Rev. 20:6) Alafen son Renny Milener, bann ki promot lape pou vreman vin bann zanfan Bondye lo later.—1 Kor. 15:27, 28.

11. Ki mannyer nou pou tret lezot si nou pe ganny gide par “lasazes ki sorti dan lesyel”?

¹¹ Pour annan sa relasyon pros avek Zeova, sa “Bondye, ki donn nou son lape,” nou bezwen imit son bann kalite e sa i enkli lape. (Fili. 4:9) Si nou les nou ganny gide par “lasazes ki sorti dan lesyel,” nou pou tret lezot dan en fason ki promot lape. (Zak 3:17) Wi, nou pou bann dimoun ere ki promot lape.

“Zot lalimyer i devre klere”

12. (a) Ki Zezi ti dir konsernan lalimyer spirityel? (b) Ki mannyer nou kapab les nou lalimyer klere?

¹² Nou tret lezot dan sa pli bon fason ler nou ed zot pour ganny sa lalimyer spirityel sorti kot Bondye. (Ps. 43:3) Zezi ti dir avek son bann disip: “Se zot lalimyer lemonn” e i ti ankouraz zot pour les zot lalimyer klere pour ki tou dimoun i kapab vwar zot bann “bon aksyon,” oubyen dibyen ki zot fer anver lezot. Zezi ti pe refer avek sa bon nouvel ki ti pou ganny anonse par son bann disip “devan tou dimoun” ki ti pou benefisye tou imen. (Lir Matye 5:14-16.) Ozordi, nou les nou lalimyer klere par fer dibyen nou prosen e par partisip dan sa travay pour pres sa bon nouvel “partou . . . dan lemonn,” savedir “avek tou bann nasyon.” (Mat. 26:13; Mark 13:10) Pa nou annan en zoli privilez!

13. Kwa ki lezot i remarke lo nou?

¹³ Zezi ti dir: “En lavil konstri lo en montanny pa kapab reste kasyet.” I ti pou fasil pour vwar en lavil ki sitye lo en montanny. Pareyman, lezot i vwar nou bann bon aksyon konman bann proklanmater e osi remark nou bann bon kalite, parey moderasyon ek nou bon kondwit.—Tit 2:1-14.

14. (a) Ki mannyer ou pou dekrir en lalanp ki ti ganny servi dan premye syek? (b) Ki i vedir pour pa kasyet nou lalimyer spirityel anba en ‘pannyen’?

¹⁴ Zezi ti koz konsernan alim en lalanp e pour pa met sa lalanp anba en pannyen, me pour met li anler kot i pou kapab donn laklerte partou dan lakaz. En lalanp senp dan premye syek ti ganny fabrike avek later e i ti annan en lanmes ki ti enbibe dan en likid (souvan delwil zoliv) ki ti permet sa pti dife pour kontinyen reste alimen. Souvan sa lalanp ti ganny mete lo en keksoz dibwa oubyen metal, e ti pou “donn laklerte partou dan lakaz.” Personn pa ti pou alim en lalanp e met li anba en “bol” oubyen en pannyen, setadir en gran resipyan ki ti ganny servi pour mezir keksoz ziska en lavaler 9 lit. Dan en sans senbolik, Zezi pa ti oule ki son bann disip i kasyet zot lalimyer spirityel anba en pannyen. Alors, nou devret les nou lalimyer donn son laklerte e pa zanmen les lopozisyon oubyen persekisyon fer nou kasyet laverite lo Labib oubyen gard li pour nou.

15. Ki lefe nou “bann bonn aksyon” i annan lo serten dimoun?

¹⁵ Se apre ki Zezi ti’n koz konsernan en lalanp ki pe klere, ki i ti dir avek son bann disip: “Alor zot lalimyer i devre klere devan tou dimoun, pour ki zot war byen zot bann bonn aksyon e glorifye zot Papa ki dan lesyel.” Akoz nou “bann bonn aksyon” serten in “glorifye” Bondye par vin son bann serviter. Pa i sa pli bon rezon ki nou annan pour kontinyen “briye konman lalimyer dan lemonn”!—Fili. 2:15.

16. Ki nou bezwen fer pour nou vin “lalimyer lemonn”?

¹⁶ Pour vin “lalimyer lemonn” nou bezwen partisip dan sa travay predikasyon Rwayonm e pour fer disip. Me nou bezwen fer en lot keksoz osi. Zapot Pol ti ekrir: “Alor, mars konman zanfan lalimyer, akoz lalimyer i fer prodwi bokou kalite: labonte, ladrwatir, ek laverite.” (Efe. 5:8, 9) Nou bezwen konport nou dan en fason ki an armoni avek bann standar o nivo Bondye. Byensir, nou merit swiv sa konsey zapot Pyer: “Zot devre annan bonn kondwit parmi bann payen pour ki ler zot ganny akize pour mal fer, bann payen a rekonnet zot bonn aksyon e rann glwar Bondye zour i pou vini.” (1 Pyer 2:12) Me ki nou devret fer si nou ganny en problenm avek en lot Kretyen?

“Fer lape avek ou frer”

17-19. (a) Ki si sa sa “lofrann” ki’n ganny mansyonnen dan Matye 5:23, 24? (b) Akoz i enportan pour rekonsilye avek en frer, e ki mannyer Zezi ti demontre sa?

¹⁷ Dan son Sermon lo Montanny, Zezi ti avertir son bann disip konsernan gard lakoler e mank respe pour en frer. Zot devret plito deswit pare pour fer lape avek sa frer ki’n ganny ofanse. (Lir Matye 5:21-25.) Analiz byen sa konsey Zezi. Si ou ti pe vin prezant ou lofrann devan lotel e la ou ti rapel ki ou frer ti annan en keksoz kont ou, ki ou ti bezwen fer? Ou ti pou bezwen kit ou lofrann devan lotel pandan ki ou ti al fer lape avek ou frer. Apre ki ou ti’n fer sa, ou ti pou kapab retournen e prezant ou lofrann.

¹⁸ Sa “lofrann” ti souvan en lofrann pour en sakrifis ki en dimoun ti prezant kot tanp Zeova. Bann sakrifis zannimo ti vreman enportan, akoz anba Lalwa Moiz Bondye ti demann bann Izraelit pour enkli li dan zot ladorasyon. Me si ou ti rapel ki ou frer ti annan en keksoz kont ou, i ti pli irzan pour regle sa sitiasyon ki prezant ou lofrann. Zezi ti dir: “Kit ou lofrann devan lotel, e al fer lape avek ou frer; apre retournen e prezant ou lofrann.” I ti pli enportan pour rekonsilye avek en frer avan desarz en responsabilite ki ti’n ganny etablir par Lalwa.

¹⁹ Zezi pa ti pe koz zis lo en serten kalite lofrann ek pese. Alors, nenport lofrann ti bezwen ganny kennsel si en dimoun ti rapel ki son frer ti annan en keksoz kont li. Si sa zannimo ti vivan, i ti ganny kite “devan lotel” pour lofrann brile dan lakour bann pret. Apre ki sa problenm ti’n ganny rezourd, sa enn ki’n ofans sa lot ti pou retournen e ti pou kapab prezant son lofrann.

20. Akoz nou devret depese pour rezourd en problenm si nou ankoler avek en frer?

²⁰ Dapre pwennvi Bondye, nou relasyon avek nou frer i en laspe vreman enportan dan vre ladorasyon. Bann sakrifis zannimo ti napa okenn valer pour Zeova si sa bann ki ti pe ofer li pa ti tret zot konpanyon dan en bon fason. (Mik. 6:6-8) Alors Zezi ti ankouraz son bann disip pour “depese” pour rezourd en problenm. (Mat. 5:25) Pol ti ekrir preski menm keksoz: “Si zot pran lakoler fer atansyon pour zot pa tonm dan pese, e fer atansyon pa les zot lakoler dire ziska aswar. Pa les dyab pran lavantaz lo zot.” (Efe. 4:26, 27) Menm si nou annan en bon rezon pour ankoler, nou devret depese pour rezourd sa problenm pour ki nou pa les nou lakoler dire e les Dyab pran lavantaz lo nou.—Lik 17:3, 4.

Toultan tret lezot avek respe

21, 22. (a) Ki mannyer nou kapab aplik sa konsey Zezi ki nou fek diskite? (b) Ki nou pou egzaminen dan lartik swivan?

²¹ Par revwar serten parol ki Zezi ti dir dan son Sermon lo Montanny sa i devret ed nou pour tret lezot avek labonte ek respe. Menm si nou enparfe nou kapab aplik konsey Zezi, akoz i pa demann nou pour fer plis ki sa ki nou kapab fer e menm nou Papa dan lesyel pa demann nou pour fer sa. Atraver lapriyer, zefor senser ek led Zeova, nou kapab demontre ladouser, mizerikord e fer lape. Nou kapab reflekte lalimyer spirityel ki briy pour laglwar Zeova. Deplis, nou kapab fer lape avek nou frer kan sa i vin neseser.

²² Tret lezot dan en bon fason i form parti sa ladorasyon ki Zeova i aksepte. (Mark 12:31) Dan sa lot lartik, nou pou egzamin lezot parol dan sa Sermon lo Montanny ki devret ed nou pour kontinyen fer dibyen anver lezot. Apre ki nou pou’n medit lo sa bann pwen ki tire dan sa diskour remarkab ki Zezi ti fer, nou kapab demann nou lekor sa kestyon: ‘Eski nou tret lezot byen?’

[Not anba lo paz]

Ki ou pou reponn?

• Ki savedir demontre ladouser?

• Akoz “sa bann ki demontre mizerikord” i ere?

• Ki mannyer nou kapab les nou lalimyer klere?

• Akoz nou devret depese pour ‘fer lape avek nou frer’?

[Portre lo paz 8]

Anons sa mesaz Rwayonm i en bon fason pour les nou lalimyer klere

[Portre lo pa 9]

Bann Kretyen i merit konport zot dan en fason ki an armoni avek bann standar o nivo Bondye

[Portre lo paz 10]

Fer ou mye pour fer lape avek ou frer