‘Lekel ki konn lespri Zeova?’

“‘Lekel ki konn Lespri [“Zeova,” NW] pour kapab ansenny li?’ Me nou, nou annan Lespri Kris.”—1 KOR. 2:16.

1, 2. (a) Ki difikilte en kantite dimoun i pas atraver ozordi? (b) Ki nou bezwen rapel lo nou fason panse konpare avek sa ki pour Zeova?

ESKI ou’n deza trouv li difisil pour konpran fason panse en lot dimoun? Petet ou fek marye e ou santi ki ou pa toultan konpran fason panse ou konzwen. I vre ki msye i annan en fason panse e koze ki diferan avek pour bann madanm. I annan menm serten kiltir kot bann msye ek madanm i annan diferan fason koz menm langaz. An plis ki sa, vi ki i annan diferan kiltir ek langaz, sa i kapab fer dimoun annan diferan fason panse ek latitid. Me pli ou konn lezot, ou annan plis sans pour arive konpran zot fason panse.

² Alor nou pa devret etonnen ki nou fason panse i byen diferan avek fason panse Zeova. Atraver son profet Izai, Zeova ti dir avek bann Izraelit: “Sa ki zot panse i pa parey avek sa ki mon panse, e zot fason fer i pa parey mon fason fer.” Answit, pour donn en legzanp Zeova ti dir: “Parski zis parey lesyel i pli o ki later, pareyman mon semen i pli o ki zot semen, e mon panse i pli o ki zot panse.”—Iza. 55:8, 9.

3. Ki sa de fason nou kapab fer bokou zefor pour arive vin pros avek Zeova?

³ Alor, eski sa i vedir ki nou pa devret ni menm esey konpran fason panse Zeova? Pa ditou. Menm si nou pa pou zanmen kapab arive konpran panse Zeova totalman, Labib i ankouraz nou pour annan en relasyon pros avek li. (Lir Psonm 25:14; Proverb 3:32.a) En fason pour vin pli pros avek Zeova i ler nou demontre respe e annan lentere dan bann keksoz ki i’n fer ki trouve dan son Parol Labib. (Ps. 28:5) En lot fason nou kapab fer sa i ler nou arive konn “Lespri Kris” ki “resanblans vizib Bondye ki envizib.” (1 Kor. 2:16; Kol. 1:15) Ler nou pran letan pour etidye bann resi Labib e medit lo zot, nou kapab arive konpran bann kalite Zeova ek son fason panse.

Pa devlop sa move tandans

4, 5. (a) Ki sa move tandans ki nou bezwen evite? Eksplike. (b) Ki sa move fason panse bann Izraelit ti devlope?

⁴ Anmezir ki nou medit lo sa ki Zeova in fer, nou bezwen evite annan sa tandans pour ziz Bondye dapre standar imen. Parol Zeova i mansyonn sa tandans dan Psonm 50:21: “Ou ti krwar mon pou vreman vin parey ou.” Plis ki 175 an pase, en spesyalis Labib ti fer menm refleksyon kan i ti dir: “Zonm i annan sa tandans pour ziz Bondye dapre zot prop standar e zot krwar ki Bondye i devret swiv menm lalwa ki imen i krwar i devret swiv.”

⁵ Nou pa devret les nou prop standar ek dezir enfliyans nou pwennvi lo Zeova. Akoz sa? Be, anmezir ki nou etidye Labib nou kapab vwar ki serten aksyon Zeova i paret enzis lefet ki nou enparfe e nou pa konn tou keksoz lo en sityasyon. Bann Izraelit dan letan pase ti devlop sa kalite panse e tir move konklizyon lo fason ki Zeova ti azir anver zot. Remarke ki Zeova ti dir zot: “Zot pou kontinyen dir: ‘Bann aksyon Zeova i enzis.’ Ekoute silvouple, O pep Izrael. Eski pa mon bann aksyon i zis? Eski pa zot bann aksyon ki enzis?”—Ezek. 18:25.

6. Ki leson Zob ti aprann e ki mannyer nou kapab benefisye avek son leksperyans?

⁶ En keksoz ki kapab ed nou evite ziz Zeova dapre nou prop standar i ler nou rekonnet ki nou pa konn tou lo en sityasyon e parfwa nou kapab annan en move pwennvi. Zob ti bezwen aprann sa leson. Letan Zob ti pe soufer, i ti annan bann santiman dezespwar e i ti tant pour mazin zis son lekor. I ti oubliy sa ki ti pli enportan. Me avek lanmour, Zeova ti ed li pour annan en pli bon pwennvi. Zeova ti demann Zob apepre 70 diferan kestyon e i pa ti kapab reponn ni menm enn parmi sa bann kestyon. Par fer sa, Zeova ti montre Zob ki i pa ti pe vreman konpran tou sa ki ti pe pase. Zob ti azir dan en fason ki ti demontre limilite e i ti sanz son pwennvi.—Lir Zob 42:1-6.b

Ki mannyer nou kapab devlop “Lespri Kris”

7. Akoz ler nou egzamin sa ki Zezi i fer sa i ed nou pour konpran fason panse Zeova?

⁷ Zezi ti imit son Papa parfetman dan tou sa ki i ti dir e fer. (Zan 14:9) Alor, ler nou egzamin sa ki Zezi ti fer sa pou ed nou konpran fason panse Zeova. (Rom. 15:5; Fili. 2:5) Aprezan annou egzamin de resi ki trouve dan Levanzil.

8, 9. Parey nou’n vwar dan Zan 6:1-5, kwa ki ti fer Zezi demann Filip en kestyon e akoz Zezi ti fer sa?

⁸ Mazin sa senn. I ti zis avan lafet Lapak, lannen 32 N.L. Bann zapot Zezi ti’n fek retournen apre ki zot ti’n fer en tournen predikasyon remarkab partou dan Galile. Vi ki zot ti fatige apre ki zot ti’n fini fer sa aktivite, Zezi ti pran zot e anmenn zot dan en landrwa izole dan nordes Lanmer Galile. Me i ti annan plizyer milye dimoun ki ti swiv zot laba. Apre ki Zezi ti geri sa bann dimoun e ansenny zot en kantite keksoz, i ti annan ankor en problenm pour rezourd. Ki mannyer tou sa dimoun ti pou kapab ganny en keksoz pour manze dan sa landrwa izole? Ler Zezi ti realiz sa, i ti demann Filip ki ti sorti dan sa rezyon: “Kote nou pou kapab aste dekwa manze pour tou sa dimoun?”—Zan 6:1-5.

⁹ Akoz Zezi ti demann Filip sa kestyon? Eski i ti enkyet akoz i pa ti konnen ki pour fer? Non. Kwa ki ti vreman dan son lespri? Zapot Zan ki ti la li osi, i donn leksplikasyon: “[Zezi] ti dir sa zis pour war ki Filip pou dir, i ti konnen deza ki i ti pou fer.” (Zan 6:6) Zezi ti pe teste progre spirityel son bann disip. Par demann sa kestyon, i ti ganny zot latansyon e i ti donn zot sa loportinite pour eksprim zot lafwa konsernan sa ki i ti pou kapab fer. Me zot pa ti sezi sa loportinite e sa ti montre ki zot pa ti vreman konpran tou keksoz. (Lir Zan 6:7-9.) Apre sa Zezi ti montre ki i ti kapab fer en keksoz ki zot pa ti pe ni menm ekspekte. I ti nouri sa plizyer milye dimoun ki ti la.—Zan 6:10-13.

10-12. (a) Kekfwa, akoz Zezi pa ti satisfer toudswit demann sa madanm Grek? Eksplike. (b) Ki nou pou egzaminen aprezan?

¹⁰ Sa resi i kapab ed nou konpran fason panse Zezi dan en lot moman. En pti pe letan apre ki sa group dimoun ti’n ganny nouri, Zezi ek son bann zapot ti vwayaz dan nor. Zot ti desot frontyer Izrael e al dan rezyon Tir ek Sidon. Ler zot ti laba, zot ti zwenn en madanm Grek ki ti sipliy Zezi pour geri son fiy. O konmansman Zezi ti inyor sa madanm. Me vi ki i ti kontinyen ensiste, Zezi ti dir avek li: “Les bann zanfan manze avan, parski i pa byen pour pran zot manze pour zet avek [“pti,” NW] lisyen.”—Mark 7:24-27.

¹¹ Akoz Zezi ti refize ed sa madanm o konmansman? Eski Zezi ti pe teste li, parey i ti fer avek Filip pour vwar ki mannyer i ti pou reakte e donn li sa loportinite pour demontre son lafwa? Kantmenm i pa’n ganny mansyonnen dan sa verse lo ki ton Zezi ti dir sa parol avek sa madanm, an tou leka sa madanm pa ti dekouraze. Lefet ki Zezi ti servi sa term pti lisyen, sa i fer sa konparezon pli akseptab. Petet Zezi ti pe azir konman en paran ki annan lentansyon satisfer demann son zanfan, me i pa ti montre toudswit ki ti son lentansyon pour teste ki kantite determinen son zanfan i determinen pour ganny sa ki i’n demande. Nenport ki rezon ki ti fer Zezi azir koumsa, kan sa madanm ti eksprim son lafwa, Zezi ti satisfer son demann.—Lir Mark 7:28-30.

¹² Sa de resi Levanzil i donn nou en bon konprenezon konsernan “Lespri Kris.” Aprezan annou vwar ki mannyer sa bann resi i kapab ed nou pour pli byen konpran fason panse Zeova.

Fason ki Zeova ti azir anver Moiz

13. Ki mannyer konprenezon lo fason panse Zezi i kapab ed nou?

¹³ Ler nou ganny en konprenezon lo fason panse Zezi sa i ed nou pour konpran bann pasaz dan Lekritir ki petet difisil pour konpran. Par egzanp, egzamin parol ki Zeova ti dir avek Moiz apre ki bann Izraelit ti’n fer en pti bef annor pour zot adore. Bondye ti dir: “Mon vwar sa pep e zot en pep antete. Aprezan les mwan azir: pour ki mon vreman ankoler avek zot e ki mon detrir zot e les mwan fer ou vin en gran nasyon.”—Egz. 32:9, 10.

14. Ki mannyer Moiz ti reakte anver sa ki Zeova ti dir?

¹⁴ Sa resi i kontinyen an dizan: “Moiz ti konmans apez lakoler Zeova son Bondye e dir: ‘O Zeova, akoz ou bezwen vreman ankoler avek ou pep ki ou’n fer sorti Lezip avek gran pwisans ek ou lanmen for? Akoz bann Ezipsyen pou bezwen dir: “Eski akoz i ti annan en move lentansyon ki i’n fer zot sorti, pour touy zot dan bann montanny e detrir zot lo later”? Abandonn ou gran lakoler e annan regre pour sa move keksoz ou anvi fer avek ou pep. Mazin Abraam, Izaak ek Izrael ou bann serviter, avek ki ou’n fer serman par ou menm kot ou ti dir zot, “Mon pou fer zot desandans vin bokou parey zetwal lesyel, e tou sa pei ki mon’n swazir mon pou donn zot desandans, pour ki i vreman vin pour zot pour en letan endefini.”’ Zeova ti konmans regrete konsernan sa keksoz mal ki i ti dir i pou fer avek son pep.”—Egz. 32:11-14.c

15, 16. (a) Ki loportinite Moiz ti gannyen apre sa ki Zeova ti dir li? (b) Dan ki sans Zeova ti “regrete”?

¹⁵ Eski vreman Moiz ti bezwen koriz fason panse Zeova? Pa ditou! Menm si Zeova ti eksprim sa ki i ti’n kapab fer, sa pa ti son desizyon final. Annefe, Zeova ti pe teste Moiz zis parey Zezi ti fer plitar avek Filip ek sa madanm Grek. Zeova ti donn Moiz sa loportinite pour eksprim son pwennvi.d Zeova ti’n apwent Moiz konman medyater ant Li ek nasyon Izrael e Zeova ti respekte Son desizyon pour ki Moiz i zwe sa rol. Eski Moiz ti pou les fristrasyon annan en move lefe lo li? Eski i ti pou pran sa loportinite pour ankouraz Zeova pour oubliy nasyon Izrael e fer desandans li menm li Moiz vin en gran nasyon?

¹⁶ Fason ki Moiz ti azir ti montre ki i ti annan lafwa ek konfyans dan lazistis Zeova. I pa ti demontre en latitid egois, me o kontrer i ti konsernen avek repitasyon Zeova. I pa ti oule ki Son non i ganny sali. Lefet ki i ti azir dan sa fason, Moiz ti montre ki i ti konpran ‘lespri Zeova’ konsernan sa sityasyon. (1 Kor. 2:16) Ki rezilta sa ti anmennen? Vi ki sa pa ti desizyon final Zeova, Labib i dir ki i ti “konmans regrete.” Dan langaz Ebre sa lekspresyon i senpleman kapab vedir ki Zeova pa ti fer sa move keksoz ki i ti’n kapab fer avek sa nasyon antye.

Fason ki Zeova ti azir anver Abraam

17. Ki mannyer Zeova ti demontre bokou pasyans dan lafason ki i ti azir anver Abraam akoz sa ki ti pe preokip li?

¹⁷ En lot legzanp ki montre ki mannyer Zeova ti donn son bann serviter sa loportinite pour eksprim zot lafwa ek konfyans, i an rapor avek sa demann ki Abraam ti fer konsernan Sodonm. Dan sa resi, Zeova ti montre ki i annan en gran pasyans par les Abraam demann wit kestyon enn deryer lot. En moman donnen, Abraam ti vreman eksprim sa ki ti dan son leker an dizan: “Non, mon pa krwar ki ou pou fer sa, ki ou pou detrir bann zonm ki drwat ansanm avek sa ki mesan, ki ou pou tret sa ki drwat parey sa ki mesan! Mon pa krwar ki ou pou fer sa. Eski sa Ziz lo later antye pa pou fer sa ki drwat?”—Zen. 18:22-33.

18. Ki nou aprann atraver fason ki Zeova ti azir anver Abraam?

¹⁸ Ki nou kapab aprann atraver sa resi lo fason panse Zeova? Eski Zeova ti bezwen ki Abraam i rezonn avek li pour ki i pran sa bon desizyon? Non. Byensir depi o konmansman Zeova ti senpleman kapab donn rezon akoz i’n pran sa desizyon. Me Zeova ti permet Abraam demann sa bann kestyon pour donn li letan aksepte sa desizyon e konpran Son fason panse. Sa ti osi permet Abraam konpran an profonder konpasyon ek lazistis Zeova. Wi, Zeova ti azir konman en zanmi anver Abraam.—Iza. 41:8; Zak 2:23.

Leson pour nou

19. Ki mannyer nou kapab imit Zob?

¹⁹ Ki nou aprann konsernan lafason ki Zeova i panse? Nou bezwen les Parol Bondye ed nou byen konpran fason panse Zeova. Nou pa devret enpoz nou limit lo Zeova e ziz li dapre nou prop standar ek fason panse. Zob ti dir: “[Bondye] pa en zonm parey mwan pour ki mon reponn li e ki nou de nou al zize ansanm.” (Zob 9:32) Parey Zob, kan nou konmans konpran fason panse Zeova, nou santi nou pouse pour dir: “Gete! Sa i zis en ptigin sa ki i’n fer, e nou’n tann zis en ptigin lo li! Me lekel ki kapab montre i konpran son loraz pwisan?”—Zob 26:14.

20. Ki nou devret fer si nou tonm lo en verse Labib ki nou trouv difisil pour konpran?

²⁰ Anmezir ki nou lir Labib, ki nou devret fer si nou tonm lo en pasaz ki difisil pour konpran, sirtou an rapor avek fason panse Zeova? Si apre ki nou’n fer resers e ki larepons i touzour pa kler pour nou, nou kapab konsider sa konman en tes an rapor avek nou konfyans dan Zeova. Mazinen, ki parler serten lenformasyon dan Labib i donn nou sa loportinite pour eksprim nou lafwa dan bann kalite Zeova. Annou touzour aksepte avek limilite ki nou pa konpran tou sa ki Zeova i fer. (Ekle. 11:5) Alor nou devret tonm dakor avek sa parol ki zapot Pol ti dir: “Larises Bondye i vreman gran, son konnesans ek son lasazes i vreman profon. Lekel ki kapab eksplik son bann desizyon? Lekel ki kapab konpran son bann plan? Parey lekritir i dir: ‘Lekel ki konn sa ki pas dan lespri Senyer? Lekel ki kapab donn li konsey?’ ‘Oubyen lekel ki’n donn li en kado pour li ganny rekonpanse an retour?’ Parski tou keksoz i sorti kot li, i egziste par li e pour li. Bondye i alor merit laglwar ek loner pour touzour! Amenn.”—Rom. 11:33-36.

[Not anba lo paz]

Eski ou rapel?

• Kwa ki pou ed nou evite annan sa tandans pour ziz Zeova dapre nou prop standar?

• Ki mannyer ler nou konpran aksyon Zezi sa i kapab ed nou vin pros avek Zeova?

• Ki leson nou’n aprann atraver sa konversasyon ki Moiz ek Abraam ti gannyen avek Zeova?

[Portre lo paz 13]

Ki nou aprann lo fason panse Zeova dan lafason ki i ti azir anver Moiz ek Abraam?