Akoz Komemor Repa Senyer?

“Lansennyman ki mon’n resevwar avek nou Senyer e ki mon’n transmet zot.” —1 KORENTYEN 11:23.

 1, 2. Ki Zezi ti fer sa zour swar Lapak lannen 33 N.L.?

I TI ZEDI le 31 Mars, lannen 33 N.L., e tre probab, plennlin ti’n dekor lesyel parlao Zerizalenm sa zour swar. Zezi, sel garson Zeova ti ansanm avek sa 11 zonm ki ‘ti’n reste fidel anver li dan tou son difikilte ek soufrans.’ (Lik 22:28) Zezi Kri ek son bann zapot ti’n fek fini selebre Lapak. Zida Iskaryot, sa enn ki ti trai Zezi, ti ganny demande pour ale, me pa ti ankor ler pour lezot ale. Akoz? Parski Zezi ti pe al fer en keksoz vreman enportan. Ki sa keksoz?

² Vi ki Matye ti la sa zour, les li rakont nou. I ti ekrir: “Zezi ti pran dipen, ti beni, ti kase, e ti donn son bann disip an dizan, ‘Pran manze, sa i mon lekor.’ Apre i ti pran lakoup, apre ki i ti’n beni, i ti donn zot, an dizan, ‘Bwar zot tou. Sa i mon disan, disan lalyans ki’n koule pour bokou, pour pardon pese.’ ” (Matye 26:26-28) Eski sa ti en levennman ki ti ariv zis enn fwa? Ki lenportans i ti annan? Eski i annan okenn sinifikasyon pour nou ozordi?

‘Kontinyen fer sa’

 3. Akoz sa ki Zezi ti fer sa zour swar le 14 Nizan, lannen 33 N.L., ti enportan?

³ Sa ki Zezi ti fer sa zour swar le 14 Nizan, lannen 33 N.L., pa ti zis en keksoz ki ti arive par azar dan son lavi. Plis ki 20 an plitar bann Kretyen swazir an Korent ti ankor pe komemor lanmor Kris, ler Pol ti diskit lo sa levennman dan son let ki i ti ekrir zot. Kantmenm Pol pa ti avek Zezi ek sa 11 zapot lannen 33 N.L., sirman serten zapot ti fer li konnen ki ti arive sa zour. Deplis, Pol ti sertennman ganny bann revelasyon enspire ki ti konfirm bann laspe sa levennman. Pol ti dir: “Lansennyman ki mon’n resevwar avek nou Senyer e ki mon’n transmet zot, se ki dan lannwit ki i ti ganny livre Senyer Zezi ti pran dipen, e apre ki i ti’n remersi Bondye, i ti kase e dir: ‘Sa i mon lekor ki mon’n donnen pour zot. Fer sa an mon souvenir.’ Demenm, apre repa, i ti pran lakoup dizan, ‘Sa lakoup i nouvo lalyans par mon disan, fer sa an mon souvenir sak fwa ki zot bwar li.’ ”—1 Korentyen 11:23-25.

 4. Akoz bann Kretyen i devret komemor Repa Senyer?

⁴ Lik ki ti ekrir Levanzil, ti konfirmen ki Zezi ti donn sa lord: “Fer sa an mon memwar.” (Lik 22:19) Dan en lot tradiksyon Labib, sa parol in ganny tradwir konman “fer sa an mon souvenir.” Anfet, sa komemorasyon i souvan ganny apele Memoryal lanmor Kris. Pol i osi apel li Repa Senyer. (1 Korentyen 11:20) Bann Kretyen i ganny demande pour komemor Repa Senyer. Me akoz sa komemorasyon ti ganny entrodwir?

Akoz Repa Senyer ti ganny entrodwir

 5, 6. (a) Nonm en rezon akoz Zezi ti entrodwir Memoryal. (b) Donn en lot rezon akoz Repa Senyer ti ganny entrodwir.

⁵ En rezon akoz Repa Senyer ti ganny entrodwir ti annan pour fer avek en lobzektif ki lanmor Zezi ti akonpli. I ti mor pour defann drwa ki son Papa i annan pour dirize dan lesyel. Satan Dyab in akiz bann dimoun pour servi Bondye selman par legoism. Kris in alor prouve ki Satan Dyab i en manter. (Zob 2:1-5) Fidelite ki Zezi ti garde ziska lanmor ti prouve ki largiman Satan ti fo e sa ti fer leker Zeova rezwir.—Proverb 27:11.

⁶ En lot rezon akoz Repa Senyer ti ganny entrodwir se pour rapel nou ki par son lanmor konman en imen parfe e san pese, Zezi ti “donn son lavi konman pri pour liberasyon bokou dimoun.” (Matye 20:28) Kan premye zonm ti fer pese kont Bondye i ti perdi lavi imen parfe ek tou lespwar. Me Zezi ti dir: “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16) Anfet, “rekonpans pour pese i lanmor, me don gratwit ki Bondye i donnen i lavi eternel dan Kris-Zezi nou Senyer.” (Romen 6:23) Komemorasyon Repa Senyer i rapel nou sa gran lanmour ki Zeova ek son garson in montre an rapor avek lanmor sakrifisyel Zezi. Pa nou devret apresye sa lanmour!

Kan pour komemor Repa Senyer?

 7. Akoz ki bann Kretyen swazir i pran lanblenm Memoryal “sak fwa”?

⁷ Konsernan Repa Senyer, Pol ti dir: “Sak fwa ki zot manz sa dipen e bwar sa lakoup zot anons lanmor Senyer Zezi ziska ki i vini.” (1 Korentyen 11:26) Bann Kretyen swazir pou pran lanblenm Memoryal ziska zot lanmor. Alors, devan Zeova e osi devan lemonn, zot pou kontinyelman proklanm zot lafwa dan sakrifis Zezi, ki en laranzman Bondye.

 8. Ziska kan ki sa group Kretyen swazir pou komemor Repa Senyer?

⁸ Ziska kan ki sa group Kretyen swazir pou komemor Memoryal lanmor Kris? Pol ti dir: “Ziska ki i vini.” Evidaman, Pol ti oule dir ki sa komemorasyon pou kontinyen ziska ki Zezi i vini pour resevwar son bann konpanyon swazir dan lesyel par en rezireksyon pandan son “prezans.” (1 Tesalonisyen 4:14-17, NW ) Sa i an armoni avek sa ki Zezi ti dir son 11 zapot fidel: “Apre ki mon al prepar en plas pour zot, mon pou retournen e pran zot avek mwan, pour ki zot a la kot mwan mon ete.”—Zan 14:3.

 9. Ki parol Zezi rikorde dan Mark 14:25 i vedir?

⁹ Kan Zezi ti entrodwir Memoryal, i ti refer avek sa lakoup diven e dir son bann zapot fidel: “Mon pa pou bwar ankor diven ziska sa zour ki mon bwar nouvo dan Rwayonm Bondye.” (Mark 14:25) Vi ki Zezi pa ti pou literalman bwar diven dan lesyel, aparaman i ti pe mazin sa lazwa ki parfwa i ganny senbolize par diven. (Psonm 104:15; Eklezyast 10:19) Kan Zezi ek son bann disip pou ansanm dan lesyel, sa pou en moman zwaye ki lontan zot ti pe espere.—Romen 8:23; 2 Korentyen 5:2.

10. Ki kantite fwa Memoryal i devret ganny komemore?

¹⁰ Eski lanmor Zezi i devret ganny komemore tou le mwan, tou le semenn, oubyen toulezour? Non. Zezi ti entrodwir Repa Senyer e i ti ganny touye zour Lapak. Bann Zwif ti selebre Lapak “konman en memoryal” zot delivrans anba lesklavaz an Lezip lannen 1513 A.N.L. (Egzod 12:14) Lapak ti ganny selebre zis enn fwa par an, tou le katorzyenm zour mwan Nizan, dapre kalandriye Zwif. (Egzod 12:1-6; Levitik 23:5) Sa i endike ki lanmor Zezi i devret ganny komemore osi souvan ki Lapak, savedir tou le zan, non pa tou le mwan, ni tou le semenn, oubyen toulezour.

11, 12. Ki listwar i revele konsernan bann komemorasyon Memoryal dan lepok bann premye Kretyen?

¹¹ Alors, i apropriye pour komemor Memoryal le 14 Nizan tou le zan. En travay referans i dir: “Bann Kretyen dan Lazi Miner ti ganny apele Bann Katorzyenm akoz zot ti toultan swiv sa dat le 14 Nizan dapre zot koutim pour selebre Repa Senyer . . . Sa dat ti kapab tonm en zour Vandredi oubyen nenport lezot zour dan lasemenn.”—The New Schaff-Herzog Encyclopedia of Religious Knowledge, Volim 4, paz 44.

¹² Dan son komanter konsernan sa ki bann Kretyen ti fer dan dezyenm syek N.L., istoryen J. L. Von Mosheim i dir ki Bann Katorzyenm ti komemor Memoryal le 14 Nizan akoz “zot ti konsider sa legzanp ki Kris in kite parey en lalwa.” En lot istoryen i dir: “Koutim dan bann legliz Bann Katorzyenm an Lazi ti menm parey avek legliz an Zerizalenm. Dan dezyenm syek, zour Lapak le 14 Nizan, sa bann legliz ti komemor sa delivrans ki ti ganny etablir par lanmor Kris.”—Studia Patristica, Volim 5, 1962, paz 8.

Ki sa Dipen i sinifye

13. Ki kalite dipen Zezi ti servi kan i ti entrodwir Repa Senyer?

¹³ Kan Zezi ti entrodwir Memoryal, i “ti pran dipen, i ti beni, i ti kase, e i ti donn son bann [zapot].” (Mark 14:22) Sa dipen ki ti disponib pour sa lokazyon ti sa menm kalite dipen ki ti’n fek ganny servi pour Lapak. (Egzod 13:6-10) Vi ki i ti ganny kwi san lelven, i ti mens e krokan e i ti bezwen ganny kase pour distribye. Kan Zezi ti fer mirak e partaz dipen avek plizyer milye dimoun, sa dipen osi ti mens e krokan akoz i ti kas li pour li kapab partaze. (Matye 14:19; 15:36) I evidan alor ki kas dipen zour Memoryal i pa en koutim relizye.

14. (a) Akoz i apropriye ki sa dipen ki ganny servi pour Memoryal napa lelven ladan? (b) Ki kalite dipen ki nou kapab gannyen oubyen kwi pour servi zour Repa Senyer?

¹⁴ Konsernan sa dipen ki ti ganny servi kan i ti pe entrodwir Memoryal, Zezi ti dir: “Sa i mon lekor ki mon’n donnen pour zot.” (1 Korentyen 11:24; Mark 14:22) I ti apropriye ki sa dipen ti ganny fer san servi lelven. Akoz? Parski lelven i kapab reprezant keksoz mal, mesanste, oubyen pese. (1 Korentyen 5:6-8) Sa dipen ti reprezant lekor Zezi ki ti parfe e san pese, ki dan en fason apropriye ti ganny ofer konman en sakrifis ranson. (Ebre 7:26; 10:5-10) Bann Temwen Zeova i gard sa antet e swiv legzanp ki Zezi ti donnen par servi dipen san lelven dan bann komemorasyon Memoryal. Dan serten ka, zot servi matzo, en kalite dipen san lelven ki bann Zwif i servi dan letan Lapak, ki pa kontyen zengredyen anplis parey zonnyon oubyen dizef. Oubyen, dipen san lelven i kapab ganny fer avek en pti gin lafarin (dible, si posib) melanze avek en pti gin delo. Sa lapat i devret ganny roule ziska i vin mens e i kapab ganny kwi dan en pwalon avek en pti gin delwil ziska ki sa dipen i sek e krokan.

Ki sa Diven i sinifye

15. Kwa ki ti dan sa lakoup kan Kris ti entrodwir Memoryal son lanmor?

¹⁵ Apre ki i ti’n fini pas dipen, Zezi ti pran en lakoup, “i ti remersi Bondye, e i ti donn [son bann zapot] e zot tou zot ti bwar.” Zezi ti eksplike: “Sa i mon disan, disan lalyans ki pou koule pour en kantite dimoun.” (Mark 14:23, 24) Kwa ki ti dan sa lakoup? Dan sa lakoup ti annan diven, me pa dyous rezen. Kan Lekritir i refer avek diven, i pa pe refer avek dyous rezen ki pa’n fermante. Par egzanp, parey Zezi ti dir se diven ki ti pou pet bann “vye sak” me non pa dyous rezen. Bann lennmi Kris ti fer fo lakizasyon ki i ti en bwarer diven, ki i ti “en soular.” Sa lakizasyon pa ti pou fer sans si sa diven ti senpleman dyous rezen. (Matye 9:17; 11:19) Diven ti ganny bwar pandan komemorasyon Lapak, e Kris ti servi li kan i ti entrodwir Memoryal son lanmor.

16, 17. Ki kalite diven ki apropriye pour bann komemorasyon Memoryal, e akoz?

¹⁶ Selman diven rouz ki en senbol apropriye pour reprezant, disan Zezi ki’n ganny verse. I ti dir li menm: “Sa i mon disan, disan lalyans ki pou koule pour en kantite dimoun.” Zapot Pyer ti ekrir li osi: “Zot [bann Kretyen swazir] konnen avek ki pri, zot in ganny delivre dan zot mannyer viv initil ki zot ti erite avek zot zanset, pa par mwayen bann lobze ki perdi valer, konman lor oubyen larzan, me par disan presye Kris, ki’n ofer limenm konman en lanyo san defo e san okenn tas.”—1 Pyer 1:18, 19.

¹⁷ Sa diven ki Zezi ti servi pour entrodwir Memoryal, ti san dout diven rouz ki’n ganny fer avek rezen. Me serten diven rouz ki annan konmela, pa akseptab akoz lezot lalkol in ganny azoute avek pour fer zot vin pli for. Oubyen bann zepis in ganny azoute avek zot. Disan ki Zezi ti verse ti sifi pour fourni sa ranson, pa ti bezwen azout nanryen avek. Alors, bann diven parey Port, Sherry, ek Vermouth pa pou apropriye pour servi. Sa lakoup ki ganny servi pour Memoryal i devret kontyen diven rouz ki pa dou e ki okenn lezot lalkol pa’n ganny azoute avek. Diven rouz ki ganny fer dan lakour e ki pa dou i kapab ganny servi, osi byen ki bann diven parey Bourgogne ek Bordeaux.

18. Akoz Zezi pa ti fer en mirak avek dipen ek diven ki ti ganny servi pour Memoryal?

¹⁸ Kan i ti entrodwir Memoryal, Zezi pa ti fer en mirak pour sanz bann lanblenm pour fer vin son lekor ek disan. Manz lekor dimoun e bwar disan pou vedir vyol lalwa Bondye. (Zenez 9:3, 4; Levitik 17:10) Zezi ti ankor annan son lekor antye ek tou son disan sa zour swar. Son lekor ti ganny ofer konman en sakrifis parfe, e son disan ti ganny verse son lannmen apremidi (ki dapre kalandriye Zwif, i ti ankor menm zour, le 14 Nizan.) Alors, dipen ek diven ki ganny servi pour Memoryal i zis bann lanblenm, ki pe reprezant lekor ek disan Kris.a

Memoryal —En Repa Konminyon

19. Akoz plis ki en lasyet ek en lakoup i kapab ganny servi pour komemorasyon Repa Senyer?

¹⁹ Kan Zezi ti entrodwir Memoryal, i ti envit son bann zapot fidel pour bwar dan enn menm lakoup. Levanzil Matye i dir: “[Zezi] ti pran lakoup, apre ki i ti’n beni, i ti donn zot, an dizan, ‘Bwar zot tou.’ ” (Matye 26:27) Zezi ti servi zis en “lakoup” me non pa plizyer. Sa pa ti koz okenn problenm vi ki ti annan selman 11 partisipan ki ti pe asiz otour en sel latab e ti fasil pour pas sa lakoup avek kanmarad. Sa lannen, plizyer milyon dimoun pou rasanble dan plis ki 94,000 kongregasyon Temwen Zeova partou dan lemonn pour komemor Repa Senyer. Avek sitan kantite dimoun ki pou rasanble pour sa komemorasyon sa menm swar, pa pou posib servi zis en lakoup pour pas avek tou sa dimoun. Me sa prensip i ganny mentenir dan bann gran kongregasyon par servi plizyer lakoup pour ki zot kapab ganny pase avek bann dimoun dan en lespas letan rezonnab. Pareyman, plis ki en lasyet i kapab ganny servi pour pas dipen. Napa okenn landrwa dan Labib ki dir ki sa lakoup oubyen ver i bezwen annan en laform spesifik. Parkont, sa lakoup ek lasyet i bezwen reflekte dinite sa levennman. I byen si nou evite ranpli sa ver tro plen pour ki ler i pe ganny pase, diven pa ava tonm lo personn.

20, 21. Akoz nou kapab dir ki Memoryal i en repa konminyon?

²⁰ Menm si plis ki en lasyet ek en lakoup i kapab ganny servi, Memoryal i en repa konminyon. Dan ansyen Izrael, en zonm ti kapab fourni en repa konminyon par anmenn en zannimo kot tanp Bondye, kot sa zannimo ti ganny touye. En porsyon sa zannimo ti ganny brile lo lotel, en porsyon ti al pour pret ansarz e en lot ti al pour bann garson Aaron. Sa enn ki ofer sa repa ek son fanmiy ti partisip dan sa repa zot osi. (Levitik 3:1-16; 7:28-36) Memoryal i osi en repa konminyon akoz i enplik partaz avek kanmarad.

²¹ Zeova, konman Loter sa laranzman, i enplike dan sa repa konminyon. Zezi i sa sakrifis, e bann Kretyen swazir i pran sa lanblenm konman bann partisipan ki pe partaz sa repa. Ler zot manz lo latab Zeova i vedir ki sa bann partisipan i anpe avek li. Pour sa rezon, Pol ti ekrir: “Sa lakoup benediksyon ki nou beni, pa i en partisipasyon dan disan Kris? E sa dipen ki nou kase, pa i en partisipasyon dan lekor Kris? Akoz i annan en sel dipen, menm si i annan en kantite nou, nou form en sel lekor, parski nou partisip dan en menm dipen.”—1 Korentyen 10:16, 17.

22. Ki kestyon konsernan Memoryal ki nou merit konsidere?

²² Repa Senyer i sa sel selebrasyon relizye ki bann Temwen Zeova i fer tou le zan. Sa i apropriye akoz Zezi ti demann son bann disip pour kontinyen: “Fer sa an mon memwar.” Pandan Memoryal, nou komemor lanmor Zezi, en lanmor ki siport drwa Zeova pour dirize. Parey nou’n remarke, dan sa repa konminyon, sa dipen i sinifye lekor Kris ki’n ganny sakrifye e sa diven i sinifye son disan sakrifisyel. Me zis en pti gin dimoun ki pran sa dipen ek sa diven. Akoz sa? Eski Memoryal i annan okenn sinifikasyon pour bann ki pa pe pran lanblenm? Anfet, ki Repa Senyer i vedir pour ou?

[Not anba lo paz]

Ki ou pou reponn?

• Akoz Zezi ti entrodwir Repa Senyer?

• Ki kantite fwa Memoryal i devret ganny komemore?

• Ki sa dipen san lelven ki ganny servi pour Memoryal i sinifye?

• Ki sa diven ki ganny servi pour Memoryal i reprezante?

[Portre lo paz 11]

Zezi ti entrodwir Repa Senyer