‘Mwan, mon servant Zeova!’

1, 2. (a) Ki sa viziter ti dir Mari? (b) Ki desizyon enportan Mari ti pros pour fer dan son lavi?

MARI pa oule krwar son lizye ler i vwar sa viziter antre dan son lakaz. I pa demann li pour kriy son manman ni son papa. I’n vin vwar li menm li! I asire ki sa dimoun pa kapab i’n sorti Nazaret. Dan sa pti lavil kot i reste, i fasil remark bann etranze. Sa enn i vreman diferan. Lafason ki i konmans koz avek Mari i konpletman nouvo pour li. I dir li: “Bonzour, ou ki’n ganny faver Bondye, [“Zeova,” NW] i avek ou!”​—Lir Lik 1:26-28.

² Se dan sa fason ki Labib i entrodwir nou avek Mari, fiy Eli, sorti dan lavil Nazaret, Galile. Mari i pros pour fer en desizyon enportan dan son lavi. I’n fiyanse avek en sarpantye ki apel Zozef, ki pov me ris spirityelman akoz son lafwa for dan Bondye. I paret ki Mari in fini desid son lavenir. Konman madanm Zozef, son lavi pou enn ki senp. I pou siport Zozef anmezir zot elve zot zanfan ansanm. Me en sel kou, i vwar li fas a fas avek en viziter ki pe donn li en mesaz sorti kot son Bondye, konsernan en responsabilite ki pou sanz son lavi.

3, 4. Pour nou konn Mari, ki nou bezwen konsantre lo la?

³ En kantite dimoun i sirprann ler zot vwar ki Labib pa dir bokou lo Mari. I pa dir bokou lo son lepase, ni lo son personnalite e nanryen lo son laparans fizik. Par kont, sa ki Parol Bondye i dir lo li i revel en kantite.

⁴ Pour nou kapab konn Mari, nou pa devret konsantre lo bann fo lansennyman ki ganny promote par diferan larelizyon. Nou pa devret les sa kantite stati ek portre enfliyans lafason ki nou imazin Mari. Nou pa devret krwar bann lansennyman konplike ki donn sa madanm bann gran gran tit tel ki i “Manman Bondye” ek “Larenn Lesyel” ki tou lekontrer avek Mari, ki ti en madanm ki ti annan bokou limilite. Annou plito konsantre lo sa ki Labib i vreman dir lo li. Labib i ed nou konpran pli byen son lafwa remarkab e konman nou kapab imit li.

 5. (a) Ki nou kapab aprann atraver reaksyon Mari ler Gabriyel ti koz avek li? (b) Ki leson enportan nou aprann avek Mari?

⁵ I pa ti en senp zonm ki ti’n vin vizit Mari, i ti lanz Gabriyel. Ler i ti dir Mari: “Ou ki’n ganny faver Bondye,” Mari ti “trouble” par sa parol e i ti demann son lekor ki sa parol ti vedir. (Lik 1:29) Eski i ti pou vreman ganny faver oubyen benediksyon Bondye? Mari pa ti ekspekte nanryen spesyal avek zonm, me la sa lanz ti pe koz lo ganny benediksyon Zeova. Menm si i ti enportan pour li ganny benediksyon Bondye, Mari pa ti ekspekte okenn benediksyon spesyal sorti kot li. Mari ti’n konpran en leson enportan, se ki nou devret fer zefor pour ganny benediksyon Bondye, me avek limilite nou pa devret zanmen krwar ki nou pou otomatikman ganny li. Bondye i opoz bann dimoun arogan, me i kontan e siport bann senp dimoun ki annan limilite.​—Zak 4:6.

 6. Ki privilez Mari ti pe al gannyen?

⁶ Mari ti pou bezwen annan bokou limilite, akoz sa lanz ti’n vin dir li ki i ti pe al ganny en privilez enkrwayab. I ti eksplik li ki i ti pou ganny en zanfan ki ti pou vin sa imen pli enportan lo later. Gabriyel ti dir: “Bondye pou donn li tronn son papa, David. I pou renny lo tou desandans Zakob pour touzour, e son renny pa pou zanmen fini.” (Lik 1:32, 33) Sirman, Mari ti deza konn sa promes ki Bondye ti fer avek David, plis ki mil an pase, ki enn son desandans ti pou rennyen pour touzour. (2 Sam. 7:12, 13) Alor, son garson ti pou sa Mesi ki pep Bondye ti pe espere depi lontan!

 7. (a) Ki nou aprann atraver kestyon Mari? (b) Ki bann zenn dan nou letan i kapab aprann avek Mari?

⁷ De plis, sa lanz ti dir li ki son garson ti pou ‘apel Garson Bondye Tre O.’ Ki mannyer en imen ti pou kapab donn nesans Garson Bondye? Mari ti’n fiyanse avek Zozef me i pa ti ankor marye avek li, alor ki mannyer i ti pou kapab ganny en zanfan? Mari ti koz fran avek sa lanz e i ti demann li: “Ki mannyer sa pour arive, parski mon en fiy vyerz?” (Lik 1:34) Remarke ki olye kanmi, Mari ti fyer ki i ti ankor en vyerz. Ozordi, bokou zenn i prese pour annan relasyon seksyel e zot kontan sikann bann ki ankor vyerz. Lemonn in sirman sanze. Par kont, Zeova li, i pa’n sanze. (Mal. 3:6) Parey dan letan Mari, bann ki reste atase avek son bann standar moral i annan bokou valer dan son lizye.​—Lir Ebre 13:4.

 8. Vi ki i ti enparfe, ki mannyer Mari ti pou ganny en zanfan parfe?

⁸ Menm si i ti en serviter fidel Bondye, Mari ti en imen enparfe. Alor ki mannyer i ti pou kapab donn nesans Garson Bondye, en zanfan parfe? Gabriyel ti eksplike: “Lespri Sen i a desann lo ou, Bondye i a kouver ou avek son pwisans. Pour sa rezon, sa zanfan ki pou ne pou ganny apele sen, Garson Bondye.” (Lik 1:35) Sen i vedir “prop,” “pir” oubyen “sakre.” Normalman, bann zanfan i erit lenperfeksyon avek zot paran. Me dan sa ka, Zeova ti pe al fer en mirak ki i pa ti’n zanmen fer. I ti pou transfer lavi son Garson dan vant Mari e apre servi son lafors oubyen lespri sen pour “kouver” Mari, andotmo protez sa zanfan avek okenn tras pese. Eski Mari ti krwar dan promes sa lanz? Ki mannyer i ti reazir?

 9. (a) Akoz bann dimoun ki pa krwar dan Labib i dout sa resi lo Mari? (b) Dan ki fason ki Gabriyel ti fortifye lafwa Mari?

⁹ Bann dimoun ki pa krwar dan Labib, enkli bann ki’n etidye larelizyon, i ganny difikilte pour krwar ki en fiy vyerz ti pou kapab ganny en zanfan. Menm si zot byen edike, zot pa’n reisi konpran en laverite byen senp. Parey Gabriyel ti dir, “Napa nanryen ki enposib pour Bondye.” (Lik 1:37) Mari ti krwar sa ki Gabriyel ti dir akoz i ti en zenn fiy ki ti annan en lafwa for. Par kont, menm si i ti annan lafwa, i pa vedir ki i ti pou krwar nenport kwa. Parey nenport ki, Mari ti bezwen levidans pour baz son lafwa lo la. Gabriyel ti’n pare pour donn li dekwa levidans. I ti dir li ki Elizabet enn son fanmir aze ki pa ti kapab fer zanfan ti’n tonm ansent gras a en mirak Bondye.

10. Akoz sa responsabilite ti kapab paret difisil e fer Mari per?

¹⁰ Aprezan ki Mari ti pou fer? I ti’n ganny donnen en responsabilite e i ti konnen ki Bondye ti pou fer tou sa ki Gabriyel ti’n dir li. Sa pa vedir ki Mari pa ti per e ki sa pa ti difisil pour li. Premyerman i ti’n fiyanse avek Zozef. Eski i ti pou ankor anvi marye avek li ler i ti pou tande ki i ti ansent? Dezyenmman, sa ti paret en gro responsabilite. I ti pou bezwen anmenn dan son vant lavi sa enn ki ti pli presye pour Bondye, son prop Garson byenneme! I ti pou bezwen pran swen avek li ler i ti ankor en pti baba tann san defans e protez li dan sa move lemonn. Pa sa ti en gro responsabilite menm!

11, 12. (a) Ki mannyer bann zonm fidel dan lepase ti reazir ler zot ti ganny bann responsabilite difisil avek Bondye? (b) Ki nou aprann lo Mari atraver son larepons avek Gabriyel?

¹¹ Labib i montre ki menm bann zonm fidel e for in parfwa ezite pour aksepte bann responsabilite difisil ki Bondye ti donn zot. Moiz ti dir ki i pa ti konn koz ase byen pour li vin port parol Bondye. (Egz. 4:10) Zeremi osi ti dir ki i ti “ankor tro zenn” pour fer sa ki Bondye ti’n dir li. (Zer. 1:6) Yona li, i ti sove pour pa akonpli son misyon! (Yona 1:3) Me ki Mari ti pou fer li?

¹² Menm ozordi, tou dimoun ki annan lafwa i konn son parol senp kot i ti eksprim son limilite ek lobeisans. I ti dir avek Gabriyel: “Mwan, mon servant [“Zeova,” NW], ki i ariv mwan parey ou’n dir mwan.” (Lik 1:38) Sa mo ki Mari ti servi pour servant ti refer avek dernyen servant dan en lakaz. Lavi sa servant ti antyerman dan lanmen son met. Se sa fason ki Mari ti santi anver son Met, Zeova. I ti konnen ki i ti an sekirite dan son lanmen, ki Zeova i fidel avek bann ki fidel avek li e ki i ti pou beni li anmezir ki i fer son mye pour desarz son responsabilite.​—Ps. 18:25.

13. Si nou santi ki sa ki Bondye i demann nou pour fer i paret difisil ouswa menm enposib, ki mannyer nou pou benefisye avek legzanp Mari?

¹³ Parfwa Bondye i demann nou pour fer serten keksoz ki paret difisil, menm enposib dan nou lizye. Par kont, son Parol i donn nou en kantite rezon pour nou met nou konfyans dan li e met nou lavi dan son lanmen, parey Mari ti fer. (Prov. 3:5, 6) Eski nou pou met nou konfyans dan Zeova? Si nou fer sa, i pou rekonpans nou e nou lafwa dan li pou vin pli for.

14, 15. (a) Ki mannyer Zeova ti beni Mari ler i ti vizit Elizabet ek Zekarya? (b) Ki konversasyon Mari ki dan Lik 1:46-55 i revele lo li?

¹⁴ Bann parol Gabriyel konsernan Elizabet ti ankouraz Mari en kantite. Lekel ankor ki ti pou konpran son sityasyon pli byen ki Elizabet ki ti pe pas dan menm sityasyon ki li? Mari ti deswit al dan Montanny Zida, en vwayaz ki ti kapab pran trwa ouswa kat zour. Kan i ti antre dan lakour Elizabet ek Zekarya ki ti en pret, Zeova ti beni Mari par donn li en lot laprev pour fortifye son lafwa. Ler Elizabet ti tann salitasyon Mari, deswit i ti santi son pti baba bouze dan son vant. I ti ranpli avek lespri sen e i ti apel Mari: “Manman mon Senyer.” Bondye ti’n revel avek Elizabet ki garson Mari ti pou vin son Senyer, sa Mesi. De plis, i ti ganny enspire pour felisit Mari pour son lobeisans fidel, an dizan: “Byennere sa enn ki’n krwar.” (Lik 1:39-45) Wi, tou sa ki Zeova ti’n promet Mari ti pou vin vre!

¹⁵ Apre sa, Mari osi ti koze. Son parol in ganny prezerve dan Parol Bondye. (Lir Lik 1:46-55.) I pli gran konversasyon ki Mari ti fer ki’n ganny rikorde dan Labib e i revel en kantite lo li. I montre lapresyasyon ek rekonesans Mari ler i ti loue Zeova pour sa privilez pour vin manman Mesi. I osi montre ki kantite for son lafwa ti ete, ler i ti koz lo Zeova konman sa Enn ki abes bann ki arogan e pwisan e konman sa Enn ki ed bann senp dimoun ek bann pov ki anvi servi li. Son parol i osi montre ki kantite konnesans i ti annan akoz dapre serten i ti sit apepre 20 fwa Lekritir Ebre!a

16, 17. (a) Ki mannyer Mari ek son garson ti montre en latitid ki nou bezwen imite? (b) Ki nou aprann atraver lanmitye ki Elizabet ek Mari ti annan?

¹⁶ I kler ki Mari ti reflesir bokou lo Parol Bondye. Pourtan, i ti kontinyen demontre limilite, i ti prefere servi Lekritir pour eksprim son santiman olye servi son prop parol. Son garson ki ti pe grandi dan son vant ti pou en zour montre sa menm limilite, an dizan: “Lansennyman ki mon donnen i pa mon prop lansennyman, me i sorti kot Bondye ki’n anvoy mwan.” (Zan 7:16) Nou kapab demann nou lekor: ‘Eski mon montre menm respe ek lapresyasyon pour Parol Bondye? Ouswa mon prefer mon prop nide ek lansennyman?’ Pwennvi Mari ti kler.

¹⁷ Mari ti reste avek Elizabet pour apepre trwa mwan, san okenn dout i ti resevwar e donn en kantite lankourazman. (Lik 1:56) Sa zoli resi lo vizit Mari i rapel nou ki kantite presye en lanmitye i kapab ete. Si nou fer zanmi avek bann ki vreman kontan nou Bondye Zeova, nou pou sirman progrese spirityelman e vin pli pros avek li. (Prov. 13:20) Finalman, i ti’n ariv ler pour Mari retourn kot li. Ki Zozef ti pou dir ler i ti pou konn tou sa ki ti’n arive?

18. Ki Mari ti dir Zozef e ki mannyer Zozef ti reazir?

¹⁸ I paret ki Mari pa ti esper dimoun remarke ki i ti ansent pour li dir Zozef. Petet, i ti kapab mazinen ki mannyer sa zonm ki ti en serviter fidel Bondye ti pou reazir anver sa ki i ti pe al dir li. Toudmenm, i ti apros li e dir li tou sa ki ti’n ariv li. Parey ou kapab mazinen, Zozef ti vreman trakase. I ti anvi krwar Mari, me i paret ki i pa ti’n reste fidel avek li. Labib pa dir ki Zozef ti vreman panse. Me i dir ki Zozef ti deside pour li divorse avek li, akoz sa letan bann dimoun ki ti’n fiyanse ti konmsi zot ti’n marye. Me, i pa ti anvi fer tou dimoun konnen e fer li kanmi, alor i ti swazir pour divors li an sekre. (Mat. 1:18, 19) Mari ti’n bezwen byen sagren ler i ti vwar Zozef ki ti en bon dimoun pe trakase en kantite akoz sa ki ti’n arive. Pourtan, Mari pa ti ankoler avek Zozef.

19. Ki mannyer Zeova ti ed Zozef fer sa pli bon desizyon?

¹⁹ Avek lanmour, Zeova ti ed Zozef fer sa pli bon desizyon. Dan en rev, lanz Bondye ti dir li ki lansentman Mari ti vreman en mirak. Dwatet, sa ti’n en soulazman pour li! La Zozef ti fer sa ki Mari ti’n fer depi o konmansman, i ti azir an armoni avek lavolonte Zeova. I ti marye avek Mari e i ti met li pare pour pran swen avek Garson Zeova.​—Mat. 1:20-24.

20, 21. Ki bann koup marye ek bann ki pe anvizaze marye i aprann avek legzanp Mari ek Zozef?

²⁰ Bann koup marye ek bann ki pe anvizaze marye i devret swiv legzanp sa zenn koup ki ti viv apepre 2,000 an pase. Ler Zozef ti vwar son zenn madanm pe zwe son rol konman en manman, sirman i ti kontan ki i ti’n ekout sa ki sa lanz ti’n dir li fer. Zozef ti’n bezwen vwar lenportans pour depan lo Zeova pour fer bann desizyon enportan. (Ps. 37:5; Prov. 18:13) Nou asire ki Zozef ti byen reflesir avan i fer desizyon pour son fanmir e ki i ti toultan bon anver son fanmir.

²¹ Par kont, ki nou kapab dir lo lefet ki Mari ti pare pour marye avek Zozef? Menm si o konmansman Zozef ti vwar son zistwar difisil pour krwar, Mari ti esper Zozef deside ki pour fer, akoz i ti konnen ki Zozef ti pou vin sef lafanmir. Sa ti’n definitivman en bon leson pour li, parey pour bann madanm Kretyen denozour. Finalman, sa ki ti’n arive ti ansenny Zozef ek Mari valer lonnekte ek bon kominikasyon.​—Lir Proverb 15:22.

22. Zozef ek Mari ti konmans zot lavi maryaz lo ki fondasyon e ki lavenir ki ti pe esper zot?

²² Sa zenn koup ti sertennman konmans zot lavi maryaz lo sa pli bon fondasyon. Zot tou le de zot ti kontan Zeova en kantite e zot ti vreman anvi fer li plezir konman bann bon paran responsab. Byensir, zot ti pou ganny bokou benediksyon me bann gro defi osi. Zot ti annan sa responsabilite pour elve Zezi, ki ti grandi pour vin sa zonm pli enportan lo later.