Swiv Lareg-d-or dan predikasyon

“Fer pour lezot sa ki ou oule lezot i fer pour ou.”​—MAT. 7:12.

KI OU POU REPONN?

Ki mannyer nou devret tret sak dimoun ki nou zwenn dan predikasyon?

Ki Matye 7:12 i ansenny nou lo kote, kan e ki mannyer nou rankontre bann dimoun?

Ki sizesyon ki nou’n diskite dan sa lartik ou pe plàn pour servi?

 1. Eski fason nou tret dimoun dan predikasyon i kapab annan en lefe lo zot? Donn en legzanp. (Vwar portre anler.)

DETRWA lannen pase, en koup Kretyen Fidi ti pe partisip dan en kanpanny pour envit dimoun Memoryal lanmor Kris. Lapli ti konmans tonbe anmezir ki zot ti pe koz avek en madanm an deor son lakour. Sa frer ti donn sa madanm en parasol tandis ki li i ti kouver ansanm avek son madanm. Sa koup ti byen kontan pour vwar sa madanm prezan sa zour swar Memoryal. Sa madanm ti admet ki i pa ti rapel bokou ki sa koup ti’n dir li ler zot ti’n vizit li, me i ti enpresyonnen par lafason ki zot ti’n tret li e i ti santi ki i ti bezwen asiste Memoryal. Kwa ki ti kontribye pour fer sa madanm byen reazir? Sa koup ti swiv sa ki apel Lareg-d-or.

 2. Kisisa Lareg-d-or e ki mannyer nou kapab aplik li?

² Kisisa Lareg-d-or? I sa konsey ki Zezi ti donnen kan i ti dir: “Fer pour lezot sa ki ou oule lezot i fer pour ou.” (Mat. 7:12) Ki mannyer nou kapab aplik sa lareg? Senpleman, par de fason. Premyerman, nou devret demann nou lekor, ‘Si mon ti dan plas sa lot dimoun, ki mannyer mon ti pou kontan ganny trete?’ Apre, nou bezwen tret sa dimoun parey nou ti a kontan ganny trete e demontre konsiderasyon anver li o tan ki posib.​—1 Kor. 10:24.

3, 4. (a) Eksplike akoz Lareg-d-or pa aplik zis dan nou fason azir anver bann frer ek ser dan lafwa. (b) Ki nou pou diskite dan sa lartik?

³ Nou souvan aplik Lareg-d-or dan nou fason azir anver nou bann frer ek ser. Me Zezi pa ti endike ki nou devret montre konsiderasyon zis avek nou bann frer ek ser dan lafwa. Anfet, i ti koz lo Lareg-d-or kan i ti pe diskit lo ki mannyer nou devret tret bann dimoun an zeneral e menm nou bann lennmi. (Lir Lik 6:27, 28, 31, 35.) Si nou sipoze aplik Lareg-d-or anver nou bann lennmi, konbyen plis nou devret fer li anver bann dimoun ki nou pres avek, ki bokou parmi zot i kapab “annan sa bon kondisyon leker pour lavi eternel.”​—Akt 13:48, NW.

⁴ Aprezan nou pou diskit kat kestyon ki nou kapab gard antet kan nou dan predikasyon: Lekel sa bann dimoun ki mon pou rankontre? Kote mon pou rankontre zot? Kan ki i sa pli bon moman pour rankontre zot? Ki mannyer mon devret apros zot? Parey nou pou vwar, sa bann kestyon i kapab ed nou pran a ker santiman bann dimoun ki nou pres avek e adapte nou lapros.​—1 Kor. 9:19-23.

LEKEL SA BANN DIMOUN KI MON POU RANKONTRE?

 5. Ki kestyon nou kapab demann nou lekor?

⁵ Dan nou predikasyon nou souvan koz avek zis en dimoun dan plas en group dimoun. Sak dimoun i annan son prop lanvironnman ki i’n grandi ladan ek son prop problenm. (2 Kron. 6:29) Ler ou pe partaz sa bon nouvel avek en dimoun, demann ou lekor: ‘Si mon ti dan plas sa dimoun ki mannyer mon ti a kontan sa dimoun i vwar mwan? Eski mon ti pou kontan si sa dimoun i vwar mon parey nenport ki dimoun dan zanmirant? Oubyen eski mon ti a pli kontan i demontre en lentere personnel dan mwan?’ Kan nou egzamin sa bann kestyon sa i kapab fer nou rapel pour tret sak dimoun dapre son sityasyon.

6, 7. Ki nou devret fer si en dimoun ki nou zwenn dan predikasyon i paret agresif?

⁶ Personn pa kontan ganny konsidere konman en dimoun negatif. Par egzanp: Konman Kretyen nou fer nou mye pour aplik sa konsey Labib, ‘ki nou parol i touzour agreab.’ (Kol. 4:6) Par kont, vi ki nou enparfe par ler nou dir bann keksoz ki nou regrete pli tar. (Zak 3:2) Si nou mal koz avek en dimoun petet akoz nou’n mal leve, nou pa ti pou anvi ganny konsidere konman en dimoun sovaz oubyen ki napa konsiderasyon. Nou ti pou swete ki sa dimoun i konpran nou. Pa nou devret montre sa menm konsiderasyon anver lezot?

⁷ Si en dimoun ki ou zwenn dan predikasyon i paret agresif, eski pa i ti a byen pour demontre sa menm konsiderasyon? Eski i kapab ki i anba presyon kot i travay oubyen kot lekol? Eski i pe fer fas avek en gro problenm lasante? Dan bokou ka, bann met lakour ki ti ofanse avan in byen reazir kan bann Temwen Zeova in tret zot avek ladouser ek respe.​—Prov. 15:1; 1 Pyer 3:15, NW.

 8. Akoz nou pa devret evite partaz mesaz Rwayonm avek “tou dimoun”?

⁸ Dan predikasyon nou zwenn bann dimoun ki annan diferan ran sosyal. Par egzanp, zis detrwa lannen pase plis ki 60 leksperyans in ganny pibliye dan sa seri dan Latour Veyer ki annan pour tit “Labib i sanz lavi.” Avan, serten sa bann dimoun ki ganny mansyonnen dan sa bann lartik ti bann voler, soular, manm bann geng oubyen menm adikt avek drog. Lezot ti bann politisyen, sef relizye oubyen bann dimoun ki ti pe mazin zis zot karyer. I annan ki ti pe viv en lavi imoral. Pourtan, zot tou zot in tann sa bon nouvel, aksepte en letid Labib, fer bann sanzman dan zot lavi e vin dan laverite. Pour sa rezon, nou pa devret mazinen ki serten dimoun pa pou zanmen aksepte laverite. (Lir 1 Korentyen 6:9-11.) Plito, nou rekonnet ki “tou dimoun” i kapab aksepte sa bon nouvel.​—1 Kor. 9:22.

KOTE MON POU RANKONTRE BANN DIMOUN?

 9. Akoz nou devret montre respe pour lakour lezot?

⁹ Kote nou rankontre dimoun dan predikasyon? Souvan kot zot. (Mat. 10:11-13) Nou apresye kan lezot i montre respe pour nou lakour ek nou bann keksoz personnel. Apre tou, nou lakour i enportan pour nou. Nou anvi ki i en landrwa prive kot nou santi nou an sekirite. Nou devret montre sa menm respe anver nou vwazen. Alor, dan nou predikasyon portanport i ti a byen nou mazin lo ki mannyer nou tret zot lakour.​—Akt 5:42.

10. Ki mannyer nou kapab evite agas bann dimoun se zot ler nou pe prese?

¹⁰ Ozordi sa lemonn i ranpli avek krim, alor bokou met lakour i mefye bann dimoun ki zot pa konnen. (2 Tim. 3:1-5) Nou pa devret fer zot annan plis mefyans. Meton nou ariv kot en lakaz e nou tap laport. Si personn pa reponn, nou kapab tant pour anvi get par lafnet oubyen fer letour lakaz pour rod sa met lakour. Kot ou reste, eski sa ti pou agas sa met lakour? Ki son vwazen ti pou kapab panse? I vre, nou devret pres plennman dan predikasyon. (Akt 10:42) Nou vreman anvi anons en mesaz pozitif e nou annan bon motivasyon. (Rom. 1:14, 15) Toutfwa, nou saz kan nou evite fer bann keksoz ki pou kapab agas bann dimoun dan nou teritwar san okenn rezon. Zapot Pol ti ekrir: “Nou pa oule plas okenn lobstak devan personn, pour ki nou servis pour Bondye pa ganny blanmen.” (2 Kor. 6:3) Ler nou demontre respe pour lakour ek propriyete bann dimoun dan nou teritwar, nou kondwit i kapab atir serten dimoun ver laverite.​—Lir 1 Pyer 2:12.

KAN KI MON POU RANKONTRE BANN DIMOUN?

11. Akoz nou apresye ler lezot i respekte nou letan?

¹¹ Konman Kretyen, laplipar nou i tre okipe. Pour kapab akonpli nou bann lobligasyon, nou fikse bann priyorite e byen planifye nou progranm. (Efe. 5:16; Fili. 1:10, NW) Si en keksoz i kas nou progranm nou kapab santi nou fristre. Alor nou apresye ler lezot i respekte nou letan par montre zot rezonnab ler zot apros nou e pa pran tro bokou nou letan. Anmezir ki nou gard Lareg-d-or antet, ki mannyer nou kapab montre ki nou annan respe pour sa bann ki nou pres avek?

12. Ki mannyer nou kapab konn sa pli bon moman pour zwenn dimoun dan teritwar?

¹² Nou devret esey rod sa pli bon moman pour zwenn bann met lakour. Kan ki dimoun i souvan kot zot dan nou teritwar? Kan ki zot pli pare pour ekoute? Lefet ki nou konn larepons sa bann kestyon, i ti a byen ki nou rod fason pour aziste nou progranm. Dan serten parti lemonn i pli efikas pour pres portanport dan tar apre midi. Si sa i leka dan ou teritwar, eski ou kapab fer laranzman pour esey pres portanport dan sa bann ler? (Lir 1 Korentyen 10:24.) Nou kapab asire ki Zeova pou beni nenport sakrifis ki nou fer pour partisip dan predikasyon dan sa bann ler ki pli apropriye pour bann dimoun dan teritwar.

13. Ki mannyer nou kapab demontre respe anver en met lakour?

¹³ Ki lezot fason nou kapab demontre respe anver en dimoun? Ler nou zwenn en dimoun ki enterese, nou devret donn li en bon temwannyaz me nou pa devret reste tro bokou letan kot li. I kapab ki sa met lakour in met dekote sa letan pour fer en lot keksoz enportan ki i ti’n prevwar. Si i dir ki i okipe, nou kapab dir li ki nou pa pou pran bokou son letan e nou devret gard nou parol. (Mat. 5:37) Kan nou pe termin en konversasyon, i ti a byen ki nou demann sa dimoun kan i ti pou pli konvenab pour revwar li. Serten proklanmater i vwar li efikas pour dir: “Mon ti a kontan vizit ou ankor. Eski i ti pou pli bon si mon telefonn ou oubyen anvoy en mesaz avan mon vini?” Ler nou adapte avek progranm bann dimoun dan teritwar, nou pe swiv legzanp Pol ki ‘pa ti pe rod son prop lentere, me lentere en gran kantite dimoun pour ki zot ganny sove.’​—1 Kor. 10:33.

KI MANNYER MON DEVRET APROS DIMOUN?

14-16. (a) Akoz nou devret fer konnen klerman bi nou vizit avek en met lakour? Donn en legzanp. (b) Ki lapros en sirveyan rezyonal in vwar efikas?

¹⁴ Fer konmsi en zour ou ganny en koud telefonn me ou pa rekonnet lekel ki pe koze. Ou pa ni konn li me i pe demann ou ki kalite manze ou pli kontan. Ou esey mazinen lekel sa e ki i pe rode. Par respe pour sa dimoun petet ou koz avek li en pti pe letan, me apre i tre probab ou ti pou fer li konpran ki ou anvi aret sa konversasyon. De lot kote, fer konmsi sa dimoun i dir ou lekel li, i dir ou ki i travay dan domenn nitrisyon e ki i annan bann bon lenformasyon. I tre probab ki ou ti pou pli enterese pour ekout li. Apre tou, nou tou nou kontan kan dimoun i koz fran me avek respe. Ki mannyer nou kapab demontre sa menm lapolites avek bann dimoun ki nou zwenn dan predikasyon?

¹⁵ Dan bokou teritwar, nou bezwen fer sa met lakour konn klerman bi nou vizit. I vre ki nou annan bann lenformasyon enportan ki sa met lakour pa konnen, me sipoze nou pa ti entrodwir nou lekor e deswit nou zis konmans nou prezantasyon avek en kestyon parey: “Si ou ti kapab rezourd okenn problenm dan sa lemonn, ki problenm ou ti pou rezourd?” Nou konnen rezon ki nou’n demann sa kestyon se pour konnen ki sa dimoun pe mazinen e apre pour diriz sa konversasyon lo Labib. Me sa met lakour i kapab mazinen: ‘Lekel sa dimoun e akoz i pe demann mon sa kestyon? Ki i pe esey dir?’ Alor nou devret esey fer sa met lakour santi li alez. (Fili. 2:3, 4) Ki mannyer nou kapab fer sa?

¹⁶ En sirveyan rezyonal in vwar sa lapros swivan efikas. Apre ki i’n dir bonzour, i donn sa met lakour en kopi sa trak Eski ou ti a kontan konn Laverite? e i dir: “Ozordi nou pe donn tou dimoun en kopi sa trak dan ou zanmirant. I diskit lo sis kestyon ki bokou dimoun i demande. Sa i ou kopi personnel.” Sa frer i dir ki laplipar dimoun i mwen strese kan zot konn bi nou vizit. Sa i fer li pli fasil pour konmans en konversasyon. Answit sa sirveyan rezyonal i demann sa dimoun: “Eski ou’n deza mazin lo enn sa bann kestyon?” Si sa met lakour i swazir en kestyon, sa frer i ouver sa trak e diskit lo sa ki Labib i dir lo sa kestyon. Si non, i swazir en kestyon e kontiny sa diskisyon san ki i fer sa dimoun santi li anbarase. Byensir, i annan plizyer fason pour konmans en konversasyon. Dan serten rezyon, bann met lakour i kapab ekspekte ki nou fer en pti dyalog avek zot avan ki nou eksplik zot bi nou vizit. Sa ki pli enportan se ki nou adapte nou prezantasyon dan en fason ki bann dimoun dan teritwar i pli abitye avek.

KONTINYEN SWIV LAREG-D-OR DAN PREDIKASYON

17. Parey nou’n vwar dan sa lartik, ki serten fason nou kapab swiv Lareg-d-or?

¹⁷ Alor, ki serten fason nou swiv Lareg-d-or dan nou predikasyon? Nou tret sak met lakour dapre son sirkonstans. Nou montre respe pour lakour ek propriyete sa dimoun. Nou fer bokou zefor pour al prese bann moman kot dimoun i kot lakour e pli pare pour ekoute. Finalman, nou konmans koz lo sa mesaz dan en fason ki apropriye dan nou teritwar.

18. Ki byenfe i annan kan nou tret bann dimoun dan teritwar dan en fason ki nou ti a kontan ganny trete?

¹⁸ I annan bokou byenfe kan nou tret bann dimoun dan teritwar lafason ki nou ti a kontan ganny trete. Kan nou zantiy e annan konsiderasyon nou pe les nou lalimyer briye, met lanfaz lo valer bann prensip Labib e pe rann glwar nou Papa dan lesyel. (Mat. 5:16) Nou kapab atir plis dimoun ver laverite par fason ki nou apros zot. (1 Tim. 4:16) Ki swa bann dimoun ki nou pres avek i aksepte laverite oubyen non, nou ganny sa satisfaksyon kan nou konnen ki nou pe fer nou mye pour akonplir nou minister. (2 Tim. 4:5) Annou imit zapot Pol ki ti ekrir: “Mon fer tousala pour Levanzil, pour mwan ganny en par dan son bann benediksyon.” (1 Kor. 9:23) Pour sa arive, annou touzour swiv Lareg-d-or dan nou predikasyon.

[Portre lo paz 14]

Annou toultan demontre respe anver propriyete ek lavi prive en met lakour (Vwar paragraf 10)