Zot ti pe esper Mesi

“Lafoul ti dan lespektasyon e ti pe demann dan zotmenm, si Zan pa limenm Mesi.”​—LIK 3:15.

 1. Ki en lanz ti dir bann berze?

FERNWANR in fer, bann berze i deor pe vey zot mouton. En sel kou, zot sirprann pour vwar sa landrwa eklere avek laglwar Bondye ek en lanz Zeova debout devan zot. Ekoute! Sa lanz i dir sa parol ekstraordiner: “Pa per, mon annan en bonn nouvel pour zot, ki pou donn tou dimoun lazwa. Ozordi en Sover in ne dan lavil David, li menm Kris, li menm li Senyer,” sa Mesi ki ti’n ganny promet dan Labib. Bann berze ti pou kapab vwar sa pti baba pe dormi dan en loz dan en lavil pros. Toutakou, “en gran kantite lanz” ti konmans loue Zeova an dizan: “Glwar-a-Dye dan lesyel, e lo later lape parmi son bann byenneme.”​—Lik 2:8-14.

 2. Ki savedir “Mesi” e ki mannyer i ti kapab ganny idantifye?

² Byensir, sa bann berze Zwif ti konnen ki “Mesi” ouswa “Kris” ti vedir “sa Enn ki’n ganny swazir” par Bondye. (Egz. 29:5-7) Me ki mannyer zot ti kapab aprann plis e konvenk lezot ki sa pti baba ki lanz ti’n koz lo la ti pou sa Mesi ki Zeova ti’n apwente? Zot ti pou bezwen egzamin bann profesi dan Lekritir Ebre e konpar li avek aksyon ek lavi sa zanfan.

Akoz bann dimoun ti dan ekspektasyon?

3, 4. Ki mannyer nou kapab konpran Danyel 9:24, 25?

³ Plizyer lannen pli tar, ler Zan Batis ti konmans son minister, serten dimoun ti demann zot lekor si pa li ki ti Mesi akoz son parol ek aksyon. (Lir Lik 3:15.) I posib ki serten ti’n byen konpran sa profesi “swasanndis semenn” ki ti aplik lo Mesi. Si i ti le ka, zot ti pou kapab konnen kan Mesi ti pou konmans son minister lo later. Sa profesi i dir: “Depi ler lord pou ganny donnen pour reetablir e rebatir Zerizalenm ziska Mesi sa Gid, i pou annan set semenn, e osi swasannde semenn.” (Dan. 9:24, 25) Serten spesyalis Labib i dakor ki sa bann semenn pa bann semenn zour me bann semenn lannen, setadir en semenn i set lannen. Par egzanp, dan Danyel 9:24 Revised Standard Version i dir: “Swasanndis semenn lannen i ganny ordonnen.”

⁴ Ozordi, pep Zeova in konpran ki 69 semenn ouswa 483 lannen ki ganny mansyonnen dan Danyel 9:25 ti konmans lannen 455 A.N.L., ler lerwa Pers, Artakzerses ti donn Neemya lotorizasyon pour reetablir e rebatir Zerizalenm. (Nee. 2:1-8) Sa bann semenn ti fini 483 lannen pli tar, lannen 29 N.L., ler Zezi sorti Nazaret ti batize e ganny swazir par lespri sen. Sa zour i ti vin Mesi.​—Mat. 3:13-17.a

 5. Ki profesi nou pou egzaminen?

⁵ Aprezan, annou get enn de profesi konsernan Mesi, ki ti ganny akonplir an rapor avek nesans Zezi, son lavi ek son minister. Sa pou vreman fortifye nou lafwa dan bann profesi ki dan Labib. I pou osi donn nou bann levidans konkret ki Zezi ti sa Mesi ki ti’n ganny promet depi lontan.

Profesi lo lanfans Mesi

 6. Eksplike ki mannyer Zenez 49:10 ti ganny akonplir.

⁶ Mesi ti pou ne dan tribi Zida. Zis avan son lanmor, Zakob ti beni son bann garson. I ti dir: “Baton lerwa pou reste avek Zida, baton komandan pou reste dan son lipye, ziska ki Silo i vini; e tou bann pep pou obeir li.” (Zen. 49:10) Bann ansenyan Zwif dan lepase ti’n toultan krwar ki sa bann parol ti aplik pour Mesi. Sa baton lerwa oubyen baton komandan i reprezant lotorite ek pouvwar ki en lerwa i annan. Premye lerwa dan tribi Zida ki ti ganny sa baton ti Lerwa David e Tsidkya ti dernyen lerwa dan sa menm tribi. Dapre sa profesi, Bondye ti dir Tsidkya ki i ti pou annan en lot lerwa apre li. I ti pou Lerwa pour touzour e ganny apele “Silo,” ki vedir “sa Enn ki annan drwa ganny sa baton” oubyen dominasyon. (Ezek. 21:26, 27) Apre Tsidkya, Zeova ti promet zis avek Zezi, en desandans Lerwa David ki i ti pou vin lerwa. Avan nesans Zezi, lanz Gabriyel ti dir Mari: “Bondye pou donn li tronn son papa, David. I pou renny lo tou desandan Zakob pour touzour, e son renny pa pou zanmen fini.” (Lik 1:32, 33) Alor, Silo i bezwen Zezi Kri, en desandans Zida ek David.​—Mat. 1:1-3, 6; Lik 3:23, 31-34.

 7. Kote Mesi ti ne e akoz sa i enportan?

⁷ Mesi ti pou ne Betleenm. Profet Mika ti ekrir: “E ou, O Betleenm Efrata, enn parmi bann pli pti lavil Zida, sa enn ki pou vin dirizan Izrael pou sorti kot ou pour vin kot mwan, sa enn ki egziste depi bann premye letan, depi bann zour letan endefini.” (Mik. 5:2) Mesi ti pou ne Betleenm, en lavil Zida ki aparaman ti osi ganny apele Efrata dan lepase. Mari, manman Zezi ek son papa sonnyen Zozef ti viv Nazaret. Ler dirizan Ronm ti demann tou bann zonm pour al anrezistre dan lavil kot zot ti ne, Zozef ti al Betleenm e Zezi ti ne laba lannen 2 A.N.L. (Mat. 2:1, 5, 6) Pa lafason ki sa profesi ti ganny realize i ekstraordiner!

8, 9. Ki ti ganny predir konsernan nesans Mesi ek bann levennman ki ti swiv apre?

⁸ Manman Mesi ti pou en vyerz. (Lir Izai 7:14.b) Sa mo Ebre bethu·lahʹ i vedir “vyerz.” Me i annan en lot mo (ʽal·mahʹ) ki aparet dan Izai 7:14. Dan sa verse, Izai ti profetize ki “en zenn fiy [ha·ʽal·mahʹ]” ti pou donn nesans en garson. Sa mo ʽal·mahʹ ti ganny servi dan ka Rebeka avan i ti marye. (Zen. 24:16, 43) Matye ti servi sa mo Grek (par·theʹnos) ki vedir vyerz kan i ti pe montre ki Izai 7:14 ti ganny akonplir an rapor avek nesans Zezi. Dan Levanzil, Matye ek Lik i dir ki Mari ti en vyerz ler i ti tonm ansent par lespri sen.​—Mat. 1:18-25; Lik 1:26-35.

⁹ Bann pti zanfan ti pou ganny touye apre nesans Mesi. En keksoz parey ti arive plizyer syek oparavan ler Faraon ti donn lord ki tou bann pti garson Ebre ti ganny zete dan Larivyer Nil. (Egz. 1:22) Me, i enteresan pour not sa ki Zeremi 31:15, 16 i dir lo Rasel ki ganny dekrir pe plere akoz son bann garson in ganny anmennen kot “pei lennmi.” Dimoun ti pou kapab tann son leokri ziska lavil Rama ki ti dan teritwar Benzamen, nor avek Zerizalenm. Matye i montre ki parol Zeremi ti ganny realize ler Lerwa Erod ti donn lord pour touy tou bann pti garson Betleenm e dan zalantour. (Lir Matye 2:16-18.) Zis mazin latristes sa bann dimoun!

10. Eksplike ki mannyer Osea 11:1 ti ganny akonplir lo Zezi.

¹⁰ Parey bann Izraelit, Mesi ti pou sorti Lezip. (Ose. 11:1) Avan ki Erod ti touy sa bann pti garson, en lanz ti demann Zozef, Mari ek Zezi sov Lezip. Zot ti reste laba “ziska ler Erod ti mor. Sa ti arive pour fer realize sa ki Senyer ti’n dir atraver son profet [Osea]: ‘Mon’n fer mon garson sorti Lezip.’” (Mat. 2:13-15) Byensir, i ti pou’n enposib pour Zezi kontrol tou sa bann levennman ki ti’n ganny profetize an rapor avek son nesans ek son lanfans.

Mesi i pran aksyon!

11. Ki mannyer semen ti ganny prepare pour sa Enn ki Zeova ti’n swazir?

¹¹ En mesaze ti pou prepar semen sa Enn ki Bondye in swazir. Malaki ti predir ki “profet Eliya” ki ti pou fer sa. I ti pou prepar leker lepep pour larive Mesi. (Lir Malaki 4:5, 6.c) Zezi ti dir ki Zan Batis ti sa “Eliya” ki ti’n ganny promet. (Mat. 11:12-14) Mark osi ti dir ki minister Zan ti akonplir profesi Izai. (Iza. 40:3; Mark 1:1-4) Zezi pa ti fer laranzman pour Zan fer sa travay parey Eliya pour prepar son minister. Travay sa “Eliya” ki ti’n ganny promet ti ganny fer an armoni avek lavolonte Bondye e i ti en mwayen pour ede idantifye Mesi.

12. Ki travay spesyal ki ti pou ede idantifye Mesi?

¹² Bondye ti pou donn Mesi en travay spesyal pour li fer. Dan sinagog Nazaret, en lavil kot Zezi ti’n grandi, Zezi ti lir roulo Izai e aplik sa bann parol lo li menm: “Lespri Senyer i lo mwan, akoz in konsakre mwan pour anons Bonn Nouvel pour bann pov. I’n anvoy mwan pour proklanm delivrans pour bann prizonnyen, e fer bann aveg war kler, pour donn laliberte bann ki ganny oprimen, pour proklanm en lannen kot Senyer pou montre son faver.” Lefet ki i ti vreman sa Mesi, Zezi ti kapab dir: “Ozordi sa parol Lekritir ki zot in tande in akonpli.”​—Lik 4:16-21.

13. Kwa ki ti ganny profetize konsernan minister Zezi Galile?

¹³ En profesi ti anonse ki Mesi ti pou konmans son minister Galile. Konsernan “pei Zeboulonn ek Naftali . . . Galile bann nasyon,” Izai ti ekrir: “Sa pep ki ti pe mars dan teneb in vwar en gran lalimyer. Me bann ki pe reste dan pei gran fernwanr, lalimyer in klere lo zot.” (Iza. 9:1, 2) Zezi ti konmans son minister piblik Galile. I ti reste Kapernaoum, kot bann dimoun sorti Zeboulonn ek Naftali ti benefisye avek lalimyer spirityel ki Zezi ti anmennen. (Mat. 4:12-16) Letan i ti Galile, Zezi ti fer son Sermon lo Montanny, swazir son zapot, fer son premye mirak e tre probab laba menm ki i ti aparet avek apepre 500 disip apre son rezireksyon. (Mat. 5:1–7:27; 28:16-20; Mark 3:13, 14; Zan 2:8-11; 1 Kor. 15:6) Dan sa fason, i ti akonplir profesi Izai par pres dan “pei Zeboulonn ek Naftali.” Byensir, plitar Zezi ti al pres sa mesaz Rwayonm dan lezot landrwa Izrael.

Lezot profesi lo Mesi

14. Ki mannyer Zezi ti akonplir Psonm 78:2?

¹⁴ Mesi ti pou servi bann parabol ek legzanp. Dan en psonm, Azaf ti sante: “Mon pou ouver mon labous pour dir bann proverb.” (Ps. 78:2) Ki mannyer nou konnen sa parol ti pe koz lo Zezi? Matye i dir nou. Apre ki i ti rakont en legzanp ki Zezi ti servi konsernan Rwayonm ki parey lelven oubyen en lagrenn moutard, Matye ti dir: “[Zezi] pa ti dir zot nanryen san servi parabol, pour ki parol profet i ganny realize: ‘Mon pou koz avek zot an parabol! Mon pou dir zot keksoz ki’n reste sekre depi kreasyon lemonn.’” (Mat. 13:31-35) Bann parabol ek proverb ki Zezi ti servi ti fer son lansennyman efikas.

15. Ki mannyer Izai 53:4 ti ganny akonplir?

¹⁵ Mesi ti pou geri bann dimoun. Izai ti profetize: “Vreman i’n anmenn nou maladi e i’n pran nou soufrans.” (Iza. 53:4) Apre ki Zezi ti geri belmer Pyer, Matye ti dir ki Zezi ti geri dimoun “pour ki sa ki profet [Izai] ti dir i ganny realize: ‘I’n pran nou lenfirmite e anmenn nou maladi.’” (Mat. 8:14-17) Sa i zis en legzanp kot Zezi ti geri bann dimoun malad, me i ti annan bokou lezot ankor.

16. Ki mannyer Zan ti montre ki Zezi ti akonplir Izai 53:1?

¹⁶ Menm si Mesi ti fer bann bon keksoz, bokou pa ti pou krwar dan li. (Lir Izai 53:1.d) Pour montre ki mannyer sa profesi ti pou ganny realize, zapot Zan ti dir: “Kanmenm i ti’n fer sitan kantite mirak dan zot prezans, zot pa ti krwar dan li, pour ki sa ki profet [Izai] ti’n dir ti a kapab realize. ‘Senyer lekel ki’n krwar nou mesaz, e avek lekel pouvwar Senyer in ganny revele?’” (Zan 12:37, 38) Deplis, zis en ptigin ki ti met lafwa dan Zezi sa Mesi pandan minister zapot Pol.​—Rom. 10:16, 17.

17. Ki mannyer Zan ti aplik Psonm 69:4?

¹⁷ Dimoun ti pou ay Mesi san okenn rezon. (Ps. 69:4) Zapot Zan ti sit parol Zezi ler i ti dir: “Zot pa ti pou koupab si mon pa ti’n fer sa bann travay ki personn pa’n deza fer. Me aprezan zot in war tou mon travay ki mon’n fer e zot ay nou, mwan ek mon Papa, pour ki sa parol ki’n ganny ekri dan zot lalwa i ganny akonpli: ‘Zot in ay mwan san okenn rezon.’” (Zan 15:24, 25) Ler i ti koz lo “lalwa,” i ti pe refer avek tou Lekritir ki ti egziste sa letan. (Zan 10:34; 12:34) Bann resi dan Levanzil i montre ki bann dimoun, espesyalman bann sef relizye Zwif ti ay Zezi. Deplis, Kris ti dir: “Lemonn pa kapab ay zot, me mwan i ay mwan, akoz mon denonse ki sa ki zot fer i mal.”​—Zan 7:7.

18. Ki nou pou egzaminen dan lot lartik ki pou ranforsi nou lafwa dan Zezi konman Mesi?

¹⁸ Bann disip Zezi dan premye syek ti asire ki Zezi ti Mesi akoz i ti vreman akonplir bann profesi lo Mesi dan Lekritir Ebre. (Mat. 16:16) Parey nou’n vwar, serten sa bann profesi ti ganny akonplir o konmansman lavi Zezi sorti Nazaret. Dan lot lartik, nou pou vwar lezot profesi ankor ki ti pou akonplir dan lavi Mesi. Si nou reflesir o profon dan lapriyer, sa pou vreman ranforsi nou konviksyon ki Zezi ti vreman sa Mesi ki Zeova nou Papa ti’n swazir.

[Not anba lo paz]

Ki ou pou reponn?

• Ki profesi ki ti ganny realize konsernan nesans Zezi?

• Ki mannyer semen ti ganny prepare pour Mesi?

• Ki mannyer profesi dan Izai sapit 53 ti ganny realize lo Zezi?