Swiv Model Bann Lerwa

“Fodre ki i ekri en kopi sa lalwa pour li menm dan en liv . . . E i bezwen kontinyen reste avek li, e i bezwen lir li toulezour dan son lavi.”—DETERONONM 17:18, 19.

 1. En Kretyen i kapab anvi vin parey lekel?

PETET ou pa pou zanmen mazin ou konman en lerwa oubyen en larenn. Lekel sa Kretyen fidel oubyen etidyan Labib ki ti pou mazin li avek pouvwar rwayal dan son lanmen, parey bann lerwa fidel konman David, Yosiya, Izkiya, oubyen Yeosafat? Pourtan, ou kapab e ou devret vin parey zot dan omwen en fason spesyal. Dan ki fason? E akoz ou devret anvi vin parey zot dan sa laspe?

2, 3. Ki Zeova ti konnen konsernan en lerwa imen, e ki sa lerwa ti bezwen fer?

² Dan letan Moiz, en bon pe letan avan ki Bondye ti aksepte en lerwa imen pour bann Izraelit, i ti konnen ki Son pep pou ganny sa dezir pour annan en lerwa. Alors, i ti enspir Moiz pour enkli bann lenstriksyon konsernan sa dan lalyans Lalwa. Zot ti bann lenstriksyon rwayal, bann direktiv pour en lerwa.

³ Bondye ti dir: “Kan ou finalman antre dan sa pei ki Zeova ou Bondye pe donn ou, . . . e ou’n dir, ‘Les mwan etablir en lerwa lo mwan parey tou lezot nasyon ki otour mwan’; fodre ki ou etabli lo ou en lerwa ki Zeova ou Bondye in swazir. . . . E i devret ariv sa: kan i pran son plas lo tronn son rwayonm, fodre ki i ekri en kopi sa lalwa pour li menm dan en liv . . . E i bezwen kontinyen reste avek li, e i bezwen lir li toulezour dan son lavi, pour ki i aprann annan lakrent pour Zeova son Bondye afen ki i gard tou parol dan sa lalwa ek sa bann regilasyon par met zot an pratik.”—Deterononm 17:14-19.

 4. Ki sa bann lenstriksyon ki Bondye ti donnen pour bann lerwa ti enkli?

⁴ Anfet, sa lerwa ki Zeova ti pou swazir pour son bann adorater ti bezwen fer en kopi personnel bann lekritir ki ozordi ou kapab trouve dan ou Labib. Apre, sa lerwa ti bezwen lir sa kopi sak zour, kontinyelman. Sa pa ti en legzersis pour amelyor son memwar. I ti en letid, e sa letid ti annan en lobzektif ki ti pou benefisye li. Pour sa lerwa ganny laprouvasyon Zeova, i ti bezwen pourswiv en tel letid pour devlop e mentenir en bon dispozisyon leker. I ti osi bezwen etidye sa bann lekritir enspire pour vin en lerwa ki vreman reisi e ki annan disernman.—2 Lerwa 22:8-13; Proverb 1:1-4.

Aprann parey en Lerwa

 5. Ki bann porsyon Labib ki Lerwa David ti annan pour kopye e lir, e konman i ti santi anver sa?

⁵ Ki ou krwar David ti pou bezwen fer letan i ti vin lerwa Izrael? I ti pou bezwen fer en kopi bann liv Pentatek (Zenez, Egzod, Levitik, Nonm, Deterononm). Mazin lefe profon ki sa ti’n bezwen fer lo lespri ek leker David vi ki i ti servi son prop lizye ek lanmen pour fer en kopi Lalwa. Petet Moiz ti’n ekrir liv Zob ensi ki Psonm 90 ek 91. Eski David ti kopye sa osi? I kapab. Petet i ti osi annan liv Zozye, Ziz, ek Rit. Alor ou kapab vwar ki Lerwa David ti annan en bon porsyon Labib pour lir e konpran. E ou annan rezon pour krwar ki i ti fer sa, parski remark sa bann komanter ki i ti fer konsernan Lalwa Bondye, ki nou kapab trouve dan Psonm 19:7-11.

 6. Kwa ki fer nou asire ki Zezi ti annan en lentere dan Lekritir parey son zanset David?

⁶ Pli Gran David—Zezi, Garson David—ti swiv menm model. Zezi ti annan labitid pour al dan sinagog tou le semenn. Laba, i ti tann Lekritir pe ganny lir e eksplike. Deplis, en zour Zezi li menm ti lir Parol Bondye piblikman aotvwa e i ti eksplik son laplikasyon. (Lik 4:16-21) Ou kapab fasilman vwar ki i ti familye avek Lekritir. Zis lir bann Levanzil, e ou a remarke ki souvan Zezi ti dir “dan Lekritir i’n dir” oubyen i ti refer avek bann pasaz spesifik dan Lekritir dan lezot fason. Par egzanp, parey Matye i rikorde, Zezi ti sit Lekritir Ebre 21 fwa dan son Sermon lo montanny.—Matye 4:4-10; 7:29; 11:10; 21:13; 26:24, 31; Zan 6:31, 45; 8:17.

 7. Ki mannyer Zezi ti diferan avek bann sef relizye?

⁷ Zezi ti swiv sa konsey dan Psonm 1:1-3: “Ere sa zonm ki pa’n mars dan konsey bann mesan, . . . me son plezir i dan lalwa Zeova e dan son lalwa i lir avwabas lizour ek aswar. . . . Tou keksoz ki i fer pou reisi.” Sa pa i diferan avek bann sef relizye son letan, ki ti’n “asiz dan plas Moiz” me ki ti inyor “lalwa Zeova”!—Matye 23:2-4.

 8. Akoz pa ti servi dan nanryen pour bann sef relizye Zwif lir e etidye Labib?

⁸ Toutfwa, serten dimoun i kapab konfize par en pasaz ki ti a kapab ganny enterprete konmsi Zezi ti pe dekouraz letid Labib. Dan Zan 5:39, 40, nou lir sa ki Zezi ti dir avek serten dimoun dan son letan: “Zot etidye Lekritir akoz zot mazinen ki ladan zot a trouv lavi eternel, e se zisteman limenm ki servi temwen an mon faver. E pourtan zot pa oule vin kot mwan pour zot ganny lavi eternel.” Par sa komanter, Zezi pa ti pe dekouraz sa bann Zwif ki ti pe ekout li pour etidye Labib. Plito, i ti pe montre ki zot pa senser oubyen konsistan. Zot ti rekonnet ki Lekritir ti kapab gid zot ver lavi eternel, me sa menm Lekritir ki zot ti pe reserse ti devret osi anmenn zot ver Mesi, Zezi. Pourtan, zot ti refize pour aksepte li. Ti napa okenn litilite pour etidye alor, parski zot pa ti senser e zot pa ti les zot ganny ansennyen.—Deterononm 18:15; Lik 11:52; Zan 7:47, 48.

 9. Ki bon legzanp bann zapot ek bann ansyen profet in donnen?

⁹ Parkont, bann disip Zezi, enkli bann zapot, ti vreman diferan. Zot ti etidye “Lekritir sakre, ki kapab donn [en dimoun] lasazes ki kondir dan lavi eternel.” (2 Timote 3:15) Zot ti parey bann ansyen profet dan sa domenn, ki ti fer “bann resers ek bann lenvestigasyon.” Pour sa bann profet, sa resers pa ti zis en letid entansif pour detrwa mwan oubyen en lannen. Zapot Pyer i dir ki “zot in fer en gro zefor pour dekouver,” sirtou konsernan Kris ek laglwar ki ti enplike dan son rol pour sov limanite. Dan son premye let, 34 fwa Pyer ti sit Lekritir sorti dan dis liv Labib.—1 Pyer 1:10, 11.

10. Akoz nou tou nou devret enterese pour etidye Labib?

¹⁰ I kler alor ki etidye Parol Bondye atantivman ti en latas rwayal pour bann lerwa dan ansyen Izrael. Zezi ti swiv sa model. E bann ki ti pou renny ansanm avek Kris konman lerwa dan lesyel, ti osi annan sa devwar pour etidye Parol Bondye. (Lik 22:28-30; Romen 8:17; 2 Timote 2:12; Revelasyon 5:10; 20:6) Sa model ki bann lerwa ti swiv i osi esansyel pour tou dimoun ozordi ki pe esper avek enpasyans bann benediksyon lo later anba dominasyon Rwayonm.—Matye 25:34, 46.

En Devwar pour bann Lerwa e pour ou

11. (a) Ki danze ki i annan pour bann Kretyen ki pa etidye Labib? (b) Ki kestyon ki ti a byen nou demann nou lekor?

¹¹ Nou ensiste e dir fransman ki sak vre Kretyen i devret fer son prop egzaminasyon dan Labib. Sa pa en keksoz ki nou bezwen fer zis kan nou etidye Labib okonmansman avek Temwen Zeova. Nou tou nou bezwen determinen pour evite vin parey serten dan letan zapot Pol ki avek letan ti negliz letid personnel. Zot ti’n aprann “bann premye prensip elemanter mesaz Bondye,” tel konman “lansennyman elemanter lo Kris.” Pourtan, zot pa ti kontinyen avek zot letid e alor zot pa ti “avanse pour ariv dan en matirite adilt.” (Ebre 5:12–6:3) Donk, nou kapab demann nou lekor: ‘Ki mon panse lo letid personnel Parol Bondye, menm si mon fek asosye avek kongregasyon Kretyen oubyen mon’n asosye pour en bon pe letan? Pol ti priye ki bann Kretyen dan son letan i kontinyen “progrese dan konnesans Bondye.” Eski mon montre ki mon annan menm dezir?’—Kolosyen 1:9, 10.

12. Akoz i enportan pour kontinyen annan lanmour pour Parol Bondye?

¹² Pour annan en bon labitid pour etidye, i esansyel ki ou devlop en lanmour pour Parol Bondye. Psonm 119:14-16 i montre ki reflesir seryezman lo Parol Bondye regilyerman i en mwayen pour nou arive pran plezir ladan. Ankor enn fwa, sa i aplikab menm si i fer lontan ki ou en Kretyen oubyen non. Pour met plis lanfaz lo sa, mazin legzanp Timote. Menm si i ti en ansyen ki ti pe deza servi konman “en bon solda Kris Zezi,” Pol ti enplor li pour fer son mye pour “anons byen mesaz laverite.” (2 Timote 2:3, 15; 1 Timote 4:15) I kler ki fer nou “mye” i enplik annan en bon labitid pour etidye.

13. (a) Konman ki nou kapab fer plis letan pour etidye Labib? (b) Ki bann azisteman ki ou kapab fer pour ganny letan pour etidye?

¹³ Met dekote letan pour etidye Labib regilyerman i en pa anver bon labitid letid. Ki mannyer ou pe ale dan sa domenn? Nenport ki larepons onnet ki ou donnen, eski ou krwar ou pou benefisye si ou dedye plis letan pour fer letid personnel? Ou kapab demande, ‘Ki mannyer mon kapab fer letan pour sa?’ Serten in ogmant lakantite letan ki zot pase an tou pour etidye, par lev en pe pli boner dan bomaten. Zot kapab lir Labib pour 15 minit oubyen travay lo en proze pour zot letid personnel. Konman en lot posibilite, akoz ou pa fer en pti sanzman dan ou progranm lasemenn? Par egzanp, si preski toulezour ou abitye lir zournal oubyen get nouvel aswar lo televizyon, eski i posib pour ou pa fer li pour zis en zour dan lasemenn? Ou kapab servi sa letan pour etidye en pe plis. Si ou ranplas sa lespas 30 minit ki ou pase pour get nouvel dan en zour avek letid personnel, dan enn an ou pou’n ganny 25 er-d-tan letid anplis. Mazin benefis ki ou gannyen dan 25 er-d-tan lektir oubyen letid Labib anplis! La en lot lide: Pandan sa semenn ki pe vini, analiz ou bann aktivite ki ou fer alafen sak lazournen. Gete si ou kapab trouv en keksoz ki ou ti a kapab pa fer oubyen redwir letan ki ou pase lo la pour ganny en pe plis letan pour lir oubyen etidye Labib.—Efezyen 5:15, 16.

14, 15. (a) Akoz i enportan pour etablir bann lobzektif an rapor avek letid personnel? (b) Ki bann lobzektif nou kapab etabli kan nou pe lir Labib?

¹⁴ Kwa ki pou fer letid pli fasil e pli atiran pour ou? Bann lobzektif. Ki bann lobzektif rezonnab an rapor avek letid ki ou kapab etabli? Pour bokou, en premye lobzektif onorab ki zot kapab etabli se lir Labib an antye. Petet ziska prezan ou’n lir bann seksyon dan Labib dan serten lokazyon e ou’n benefisye atraver sa. Eski aprezan ou kapab fer li ou rezolisyon pour lir Labib antye? Pour reisi fer sa, ou kapab konmans par lir sa kat Levanzil konman ou premye lobzektif, apre ou kapab lir larestan Lekritir Grek konman ou dezyenm lobzektif. Enn fwa ki ou’n ganny sa satisfaksyon ek benefis ki sa lektir i donnen, ou kapab fer li ou lot lobzektif pour lir bann liv ki Moiz in ekrir, tou bann liv istorik ziska liv Ester. Letan ou’n fini fer sa, ou pa pou vwar li difisil pour fini lir larestan Labib. En madanm ki ti annan apepre 65 an kan i ti vin en Kretyen, ti ekrir dat ki i ti konmans lir Labib e dat ki i ti fini par anndan lapo son Labib. Aprezan i annan senk per dat, setadir i’n lir Labib senk fwa! (Deterononm 32:45-47) Olye lir lo en konpiter oubyen lo en paz ki’n ganny enprimen, i ti annan Labib dan son lanmen.

¹⁵ Bann ki’n deza atenn sa lobzektif pour lir Labib an antye, i pran lezot pa pour kontinyen fer zot letid pli itil e pli satisfezan. En fason pour fer sa se pour swazir bann lenformasyon ki ou kapab etidye avan lir sak liv Labib. Dan liv “Toute Écriture est inspirée de Dieu et utile” ek Étude perspicace des Écritures, nou kapab vwar bann bon lenformasyon lo konteks istorik, stil, ek bann benefis ki nou kapab tire dan sak sa bann liv Labib.a

16. Ki legzanp nou devret evite swiv an rapor avek letid Labib?

¹⁶ Ler ou etidye, evite servi lapros ki bokou swadizan spesyalis Labib i souvan servi. Zot tro konsantre lo analiz bann teks konmsi Labib i annan en lorizin imen. Serten i sey etablir en group lekter ki sak liv in kapab targete oubyen sey imazin en lobzektif ek pwenn-vi ki loter sak liv ti kapab annan antet. Lefe ki en tel rezonnman imen i kapab annan, se ki sa bann liv Labib i ganny konsidere konman senpleman bann liv listwar oubyen konman pe reflekte devlopman progresif en larelizyon. Lezot spesyalis i pas tou zot letan pour etidye mo, parey filolozi literatir Labib. Zot pli preokipe avek letid lo lorizin bann mo e sit bann definisyon Ebre e Grek olye avek sinifikasyon mesaz Bondye. Eski ou krwar ki en tel lapros i kapab transmet en lafwa profon e ki motive?—1 Tesalonisyen 2:13.

17. Akoz nou devret vwar Labib konman annan en mesaz pour tou dimoun?

¹⁷ Eski konklizyon sa bann spesyalis i zistifye? Eski i vre ki sak liv i annan zis en pwen santral oubyen i pe adres zis en serten group lekter? (1 Korentyen 1:19-21) Laverite se ki sa bann liv dan Parol Bondye i annan en valer permanan pour dimoun tou laz e ki’n grandi dan nenport lanvironnman. Menm si en liv in ganny orizinalman adrese avek en dimoun, parey Timote oubyen Tit, oubyen avek en group dimoun an partikilye, petet bann Galat oubyen Filipyen, nou tou nou kapab e nou devret etidye sa bann liv. Zot enportan pour nou tou, e en serten liv i kapab diskit plizyer tenm e benefisye diferan lekter. Wi, mesaz Labib i pour tou dimoun. Sa i ed nou konpran akoz i’n ganny tradwir dan langaz bann dimoun partou dan lemonn.—Romen 15:4.

Benefisye ou ek Lezot

18. Letan ou lir Parol Bondye, lo kwa ou devret reflesir?

¹⁸ Letan ou etidye, ou pou tir bokou benefis si ou sey konpran byen Labib e vwar konman bann detay i relye avek kanmarad. (Proverb 2:3-5; 4:7) Sa ki Zeova in revele dan son Parol i relye etrwatman avek son plan. Alor anmezir ki ou lir, asosye sa bann laverite ek konsey avek plan Bondye. Ou kapab reflesir lo konman ki en lensidan, lide, oubyen profesi i relye avek plan Zeova. Demann ou lekor: ‘Ki sa i dir mwan lo Zeova? Konman ki i relye avek plan Bondye ki pe ganny akonpli atraver son Rwayonm?’ Ou kapab osi reflesir: ‘Konman ki mon kapab servi sa lenformasyon? Eski mon kapab servi li pour ansenny oubyen konsey lezot an servan Labib?’—Zozye 1:8.

19. Lekel ki benefisye kan ou rakont sa ki ou’n aprann avek lezot? Eksplike.

¹⁹ Mazin lezot i osi en benefis dan en lot laspe. Kan ou pe lir e etidye Labib, ou pou aprann nouvo keksoz e ganny en konprenezon pli profon. Esey koz lo la dan bann konversasyon konstriktif ki ou fer avek ou fanmiy oubyen lezot. Si ou fer sa dan en moman apropriye e dan en fason modes, sa bann diskisyon pou sirman anmenn benefis. Kan ou rakont avek lantouzyasm ek senserite sa ki ou’n aprann oubyen bann laspe ki ou’n vwar enteresan, sa i kapab atir lezot. Deplis, i pou benefisye ou personnelman. Dan ki fason? Bann eksper in remarke ki en dimoun i mazin sa ki i’n aprann oubyen egzaminen pli lontan si i servi li oubyen repet li, par egzanp par rakont li avek lezot, kan i ankor fre dan son lespri.b

20. Akoz lir Labib plizyer fwa i anmenn benefis?

²⁰ Sak fwa ki ou lir en liv Labib, sirman ou pou aprann nouvo keksoz. Ou pou sirprann pour vwar bann teks ki oparavan pa ti dir ou tro gran keksoz. Zot pou annan en nouvo sans pour ou. Sa i devret fer nou vwar ki olye zis en liv ki zonm in ekrir, bann liv dan Labib i en trezor ki ou kapab servi pour etidye plizyer fwa e pour ou prop benefis. Mazinen ki en lerwa, parey David, ti bezwen “lir li toulezour dan son lavi.”

21. Ki rekonpans ou kapab ekspekte kan ou etidye plis Parol Bondye?

²¹ Wi, bann ki pran letan pour fer letid profon dan Labib i vreman benefisye en kantite. Zot ganny bann trezor spirityel ek bon konprenezon. Zot relasyon avek Bondye i vin pli solid e pli ris. Zot osi vin en resours presye pour bann manm fanmiy, pour bann frer ek ser dan kongregasyon Kretyen, e pour bann ki pou vin bann adorater Zeova alavenir.—Romen 10:9-14; 1 Timote 4:16.

[Not anba lo paz]

Eski ou rapel?

• Ki bann lerwa an Izrael ti sipoze fer?

• Ki legzanp Zezi ek bann zapot ti donnen an rapor avek letid Labib?

• Ki bann azisteman ou kapab fer pour ogmant letan ki ou fer letid personnel?

• Ki latitid mantal ou devret annan kan ou pe etidye Parol Bondye?

[Bwat lo paz 11]

“Dan nou Lanmen”

“Si nou anvi . . . en konkordans Labib, napa pli bon zouti ki Internet. Me si nou anvi lir Labib, etidye li, mazin lo la, reflesir lo la, nou devret annan sa Labib dan nou lanmen, parski sa i sel mwayen pour fer li antre dan nou lespri e dan nou leker.”—Gertrude Himmelfarb, profeser onorer distenge, Liniversite City, New York.