SAPIT 5

Ladorasyon Lekel Bondye i Aksepte?

 1. Ki en fanm Samariten ti anvi konnen konsernan ladorasyon?

ESKI ou’n deza mazinen, ‘Bondye i aksepte ladorasyon lekel?’ En serten fanm ti kapab annan en tel kestyon parey vin dan son lespri kan i ti koz avek Zezi Kri, pre avek montanny Gerezim an Samari. An dirizan latansyon lo en diferans ant ladorasyon bann Samariten ek bann Zwif, i ti dir: “Mon bann zanset ti ador Bondye lo sa montanny, me zot Zwif zot dir nou devre ador Bondye Zerizalenm.” (Zan 4:20) Eski Zezi ti dir avek sa fanm Samariten ki Bondye i aksepte tou ladorasyon? Oubyen eski i ti dir ki serten keksoz i esansyel pour fer plezir Bondye?

 2. Ki Zezi ti dir an reponn sa fanm Samariten?

² Zezi ti donn sa repons sirprenan: “Letan pe vini kot zot pa pou ador Bondye ni lo sa montanny ni Zerizalenm.” (Zan 4:21) Bann Samariten, pour bokou letan, ti’n annan respe pour Zeova e zot ti ador lezot bondye lo Montanny Gerezim. (2 Lerwa 17:33) Aprezan Zezi Kri ti dir ki ni sa landrwa ni Zerizalenm pa ti pou enportan dan vre ladorasyon.

ADOR AN-ESPRI E AN VERITE

 3. (a) Akoz bann Samariten pa ti vreman konn Bondye? (b)  Konman bann Zwif fidel ek lezot ti kapab aprann konn Bondye?

³ Zezi ti kontinyen an dizan avek sa fanm Samariten: “Zot zot pa konnen ki zot adore, me nou nou konnen sa ki nou adore, akoz delivrans i vin atraver bann Zwif.” (Zan 4:22) Bann Samariten ti annan bann fo krwayans relizyez e ti aksepte selman premye senk liv Labib konman enspire—e inikman dan zot prop revizyon koni konman Pantatek Samariten. Se pour sa, ki zot pa ti vreman konn Bondye. Toutfwa, se bann Zwif ki ti’n ganny konfye avek konnesans dan Lekritir. (Romen 3:1, 2) Bann Zwif fidel e nenport ki, ki ti pare pour ekoute ti resevwar bann lansennyman neseser pour zot konn Bondye atraver Lekritir.

 4. Dapre Zezi, ki bann Zwif ek bann Samariten ti pou bezwen fer pour Bondye aksepte zot ladorasyon?

⁴ An realite, Zezi ti pe demontre ki pour fer plezir Bondye bann Zwif osi byen ki bann Samariten, ti pou bezwen modifye zot ladorasyon. I ti dir: “Ler pe vini e i’n fini arive pour bann vre ladorater ador Bondye an-espri e an verite, parski se koumsa ki Bondye i oule ki nou ador li. Bondye i Lespri e tou sa ki ador li, i devre ador li an-espri e an verite.” (Zan 4:23, 24) Nou bezwen ador Bondye “an-espri,” motive par en leker ranpli avek lafwa ek lanmour. I posib pour ador Bondye ‘an verite’ an etidyan son Parol, Labib, e ador li an akor avek son laverite ki’n ganny revele. Eski ou vreman anvi fer sa?

 5. (a) Ki savedir “adore?” (b)  Ki nou bezwen fer si nou oule ki Bondye i aksepte nou ladorasyon?

⁵ Zezi ti met lanfaz ki Bondye i reklanm vre ladorasyon. Sa i demontre ki i annan serten kalite ladorasyon ki Zeova pa aksepte. Pour ador Bondye i vedir pour onor li avek profon respe e ofer li en servis sakre. Si ou ti oule montre respe pour en dirizan pwisan, ou ti pou anvi servi li e fer keksoz ki fer li plezir. Sirman, nou oule fer plezir Bondye. Plito ki nou senpleman dir, ‘Mon larelizyon i satisfer mwan,’ nou bezwen fer sir ki nou ladorasyon i satisfer sa ki Bondye i ekspekte.

FER LAVOLONTE BONDYE

 6, 7. Akoz Zezi pa rekonnet serten ki pretann i son disip?

⁶ Annou lir Matye 7:21-23 e vwar si nou kapab fer resorti en fakter esansyel ki determinen si Bondye i aksepte tou ladorasyon. Zezi ti dir: “Pa tou sa ki apel mwan Senyer, Senyer ki pou antre dan Rwayonm lesyel, me zis bann ki fer lavolonte mon Papa ki dan lesyel [ki pou antre]. Kan sa zour pou arive, bokou pou dir mwan, ‘Senyer, Senyer! an ou non nou’n profetize, an ou non, nou’n sas en kantite demon e an ou non, nou’n fer en kantite mirak.’ Alor mon a reponn zot, ‘Mon pa’n zanmen konn zot. Sorti la, zot ki pratik lemal!’”

⁷ Rekonnet Zezi Kri konman Senyer i esansyel dan vre ladorasyon. Me serten keksoz ti pou manke dan ladorasyon bann ki pretann ki zot disip Zezi. I ti dir ki serten pou akonpli bann “mirak,” ler zot pretann fer bann gerizon mirakilez. Sepandan, zot pou neglize fer sa ki Zezi ti dir i esansyel. Zot pa pou pe “fer lavolonte [son] Papa.” Si nou oule fer plezir Bondye, nou devret aprann pour konnen ki sa son lavolonte e apre fer li.

KONNESANS EGZAKT—EN PROTEKSYON

 8. Kwa ki neseser pour fer lavolonte Bondye, e ki bann fo pwenn-vi nou bezwen evite?

⁸ Pour fer lavolonte Bondye nou bezwen annan konnesans egzakt lo Zeova Bondye e Zezi Kri. Tel konnesans i anmenn ver lavi eternel. Sirman, nou tou nou pou vwar lenportans pour pran sa konnesans egzakt atraver Parol Bondye, Labib. Serten i dir ki nou pa bezwen enkyet osi lontan ki nou senser e aktif dan nou ladorasyon. Lezot i afirmen, ‘Pli pti gin ki ou konnen, pli pti gin i ekspekte avek ou.’ Toutfwa, Labib i ankouraz nou pour ogmant nou konnesans lo Bondye e lo son bann plan.—Efezyen 4:13; Filipyen 1:9; Kolosyen 1:9.

 9. Konman konnesans egzakt i protez nou, e akoz nou bezwen tel proteksyon?

⁹ Tel konnesans i en proteksyon kont kontaminasyon nou ladorasyon. Lapot Pol ti koz lo en serten kreatir spirityel ki ti pretann i en “lanz lalimyer.” (2 Korentyen 11:14) Ensi degize, sa kreatir spirityel—Satan—i esey anbet nou pour fer bann keksoz ki kont lavolonte Bondye. Lezot kreatir spirityel ki asosye avek Satan in osi polye ladorasyon bann dimoun, akoz Pol ti dir: “Sakrifis ki bann payen i ofer, zot ofer li avek bann demon, non pa avek Bondye.” (1 Korentyen 10:20) Pareyman, bokou ti panse ki zot ti pe ador dan sa bon fason, menm si zot pa ti pe fer sa ki Bondye ti anvi. Zot ti pe ganny antrennen pour pratik fo ladorasyon enpir. Nou pou aprann plis lo Satan ek bann demon plitar, me sa bann lennmi Bondye in definitivman polye ladorasyon limanite.

10. Ki ou ti pou fer si en dimoun i ekspreseman anpwazonn ou sours delo, e ki konnesans egzakt Parol Bondye i ekip ou pour fer?

¹⁰ Si ou konnen ki en dimoun i’n ekspreseman anpwazonn ou sours delo, eski ou ti pou kontinyen bwar li? Sirman, ou pou imedyatman pran aksyon pour rod en lot sours delo ki prop e san danze. E byen, en konnesans egzakt Parol Bondye i ekip nou pour idantifye vre relizyon e pour rezet bann keksoz enpir ki rann en ladorasyon pa akseptab pour Bondye.

BANN KOMANNMAN KI’N FER PAR ZONM

11. Kwa ki ti mal avek ladorasyon bokou Zwif?

¹¹ Kan Zezi ti lo later, bokou bann Zwif pa ti pe azir an akor avek konnesans egzakt Bondye. Par konsekan, zot ti perdi loportinite pour ganny konsidere konman prop devan Zeova. Konsernan zot, Pol ti ekrir: “Mon kapab dir dan zot faver, ki zot ranpli avek motivasyon pour Bondye, me zot motivasyon pa baze lo en vre konnesans.” (Romen 10:2) Zot ti deside pour zot menm konman pour ador Bondye olye ekout sa ki i ti dir.

12. Kwa ki ti kontamin ladorasyon bann Izraelit, e avek ki rezilta?

¹² Bann Izraelit ti okonmansman pratik larelizyon pir ki zot ti ganny avek Bondye, me i ti ganny kontaminen avek bann lansennyman ek filozofi zonm. (Zeremi 8:8, 9; Malaki 2:8, 9; Lik 11:52) Menm si bann sef relizye Zwif, bann Farizyen, ti panse ki Bondye i aksepte zot ladorasyon, Zezi ti dir zot: “Izai ti byen profetize lo zot, ipokrit, kan i ti ekrir: ‘Sa pep, i onor mwan avek zot labous, me zot leker i lwen avek mwan. Zot ladorasyon i initil, zot ansenny bann komannman ki’n fer par zonm.’”—Mark 7:6, 7.

13. Konman nou kapab fer parey bann Farizyen?

¹³ Eski i posib ki nou ti a fer parey bann Farizyen? Sa ti a kapab arive si nou swiv bann tradisyon relizye ki nou’n ganny transmet, olye egzaminen ki Bondye in dir konsernan ladorasyon. Pol ti met nou an gard kont sa danze byen reel kan i ti dir: “Lespri i dir klerman ki dan dernyen tan, serten dimoun pou abandonn lafwa pour atas zot avek bann lespri tronper, e swiv bann lansennyman demon.” (1 Timote 4:1) I pa ase pour senpleman prezimen ki nou ladorasyon i fer plezir Bondye. Parey sa fanm Samariten ki ti rankontre Zezi, nou’n kapab erit nou fason adore avek nou paran. Me nou bezwen fer sir ki Bondye i aprouv sa ki nou pe fer.

VEYE KI OU PA OFANS BONDYE

14, 15. Menm si nou annan serten konnesans konsernan lavolonte Bondye, akoz nou bezwen fer atansyon?

¹⁴ Si nou pa fer atansyon, nou pou kapab fer keksoz ki Bondye pa aksepte. Par egzanp, lapot Zan ti tonm azenou devan en lanz “pour ador li.” Me lanz ti averti li: “Atansyon, pa fer sa! Mon en kanmarad travay parey ou e parey ou bann frer ki posed temwanyaz Zezi. Ador Bondye.” (Revelasyon 19:10) Eski ou vwar nesesite pour fer sir ki ou ladorasyon pa’n ganny kontaminen par okenn form idolatri?—1 Korentyen 10:14.

¹⁵ Kan serten kretyen ti konmans pratik bann koutim relizye ki pa ti fer plezir Bondye, Pol ti demande: “Ki mannyer i posib pour zot anvi retourn lesklav sa bann pov lespri? Zot gard bann zour ek bann mwan, bann sezon ek bann lannen. Mon per ki tou sa travay ki mon’n fer pour zot i anven.” (Galat 4:8-11) Sa bann endividi zot ti’n akeyir konnesans Bondye me plitar zot ti komet en fot an obzervan bann koutim relizye e bann zour sen ki Zeova pa aksepte. Parey Pol ti dir, nou bezwen kontinyen fer sir ki nou “konn disteng sa ki fer plezir Bondye.”—Efezyen 5:10.

16. Konman Zan 17:16 ek 1 Pyer 4:3 i ed nou pour determinen si Bondye i aksepte serten lafet ek koutim?

¹⁶ Nou bezwen fer sir ki nou evit bann lafet relizye ek lezot koutim ki vyol bann prensip Bondye. (1 Tesalonisyen 5:21) Par egzanp, Zezi ti dir konsernan son bann disip: “Zot pa fer parti lemonn parey mon pa fer parti lemonn.” (Zan 17:16) Eski ou relizyon i partisip dan bann seremoni ek lafet ki vyol sa prensip konsernan bann levennman lemonn? Eski parfwa bann manm ou relizyon i partisip dan bann koutim ek lafet ki antrenn zot pour adopte en kondwit ki koresponn avek deskripsyon ki lapot Pol i mansyonnen? I ti ekrir “Pandan ase lontan zot in viv konman bann payen, dan vis, move dezir, lavi soular, bann parti bwar avek move laksyon, e ladorasyon zidol.”—1 Pyer 4:3.

17. Akoz nou bezwen evit nenport kwa ki reflekte lespri lemonn?

¹⁷ Lapot Zan ti met lanfaz lo nesesite pour evit tou bann pratik ki reflekte lespri lemonn degradan ki otour nou. Zan ti ekrir “Pa bezwen kontan lemonn ni sa bann keksoz ki dan lemonn. Si en dimoun i kontan lemonn, i napa lanmour pour nou Papa dan li. Tou sa ki dan lemonn: dezir natir imen, dezir atraver nou lizye ek lorgey dan lavi toulezour, tousala pa sorti kot nou Papa me i sorti dan lemonn. Lemonn pou disparet ek tou son bann dezir; me sa ki fer lavolonte Bondye i reste eternelman.” (1 Zan 2:15-17) Eski ou’n remarke, sa ki fer lavolonte Bondye pou reste pour touzour? Wi, si nou fer lavolonte Bondye e evit bann aktivite ki reflekte lespri lemonn, nou kapab annan lespwar lavi eternel!

GARD STANDAR ONIVO BONDYE

18. Ki fot serten Korentyen ti komet konsernan kondwit, e ki leson nou kapab retire atraver sa?

¹⁸ Bondye i oule konman son adorater, bann ki konform zot avek son bann standar moral onivo. Dan lantikite, serten kretyen an Korent ti panse ki Bondye i toler bann kondwit imoral. Si nou lir 1 Korentyen 6:9, 10 nou pou vwar konman zot ti mal. Si nou pou ador Bondye dan en fason akseptab, nou bezwen fer li plezir par nou parol ek nou aksyon. Eski lafason ki ou adore i permet ou fer sa?—Matye 15:8; 23:1-3.

19. Dan ki fason vre ladorasyon i enfliyans lafason ki nou tret lezot?

¹⁹ Nou konportman anver lezot i devret osi reflekte bann standar Bondye. Zezi Kri ti ankouraz nou pour tret lezot parey nou ti a kontan ki zot tret nou, akoz sa i form par vre ladorasyon. (Matye 7:12) Remarke lo sa ki i’n dir konsernan lafeksyon fraternel: “Dimoun pou war ki zot mon bann disip si zot kontan kanmarad.” (Zan 13:35) Bann disip Zezi i devret kontan kanmarad e fer sa ki byen anver zot konpanyon dan lafwa e zot sanblab.—Galat 6:10.

LADORASYON AVEK TOU NOU NANM

20, 21. (a) Ki kalite ladorasyon ki Bondye i ekspekte? (b) Akoz Bondye ti rezet ladorasyon Izrael dan lepok Malaki?

²⁰ Dan ou leker ou kapab anvi ador Bondye dan sa fason ki i aksepte. Si sa i leka, ou bezwen annan pwenn-vi Zeova an sa ki konsern ladorasyon. Disip Zak ti fer resorti ki se pwenn-vi Bondye ki pli enportan, pa pour nou. I ti dir: “La sa ki Bondye nou Papa i konsider konman en larelizyon pir e san defo: Pran swen bann orflen ek bann vev dan zot soufrans, e pa les zot ganny sali par move lenflians sa monn.” (Zak 1:27) Avek en dezir pour fer plezir Bondye, sakenn ant nou, nou bezwen egzamin nou ladorasyon pour fer sir ki i pa’n ganny kontaminen par bann pratik enpir oubyen nou pa pe negliz serten keksoz ki Bondye i konsider esansyel.—Zak 1:26.

²¹ Zeova i pran plezir dan ladorasyon ki prop e ki ganny ofer avek tou nou nanm. (Matye 22:37; Kolosyen 3:23) Kan nasyon Izrael pa ti rann Zeova sa kalite ladorasyon, i ti dir: “En garson, pour son par i onor en papa, e en servant son gran met. Be si mon en papa, oli loner pour mwan? E si mon en gran met, oli lakrent pour mwan?” Zot ti pe ofans Bondye an ofer li konman sakrifis bann zannimo aveg, bwate e malad, e i ti rezet sa kalite akt ladorasyon. (Malaki 1:6-8) Zeova i merit en ladorasyon pli pir e i pa aksepte pli mwens ki en latasman absoli.—Egzod 20:5; Proverb 3:9; Revelasyon 4:11.

22. Si nou oule ki Bondye i aksepte nou ladorasyon, kwa ki nou pou evite, e ki nou pou fer?

²² Sa fanm Samariten ki ti koz avek Zezi ti aparaman enterese pour ador Bondye dan fason ki i aprouve. Si sa i nou dezir, nou pou evit tou bann lansennyman ek pratik ki’n ganny kontaminen. (2 Korentyen 6:14-18) Okontrer, nou pou fer bann zefor entans pour akeyir en konnesans egzakt lo Bondye e pour fer son lavolonte. Nou pou obzerv etrwatman sa ki Bondye i ekspekte, pour rann li en ladorasyon akseptab. (1 Timote 2:3, 4) Temwen Zeova pe presizeman sey fer sa, e zot senserman ankouraz ou pour zwenn avek zot pour ador Bondye “an-espri e an verite.” (Zan 4:24) Zezi ti dir: “parski se koumsa ki Bondye i oule ki nou ador li.” (Zan 4:23) Fotespere ki ou enn sa kalite dimoun. Parey sa fanm Samariten, sertennman ou anvi ganny lavi eternel. (Zan 4:13-15) Parey ou vwar, dimoun i vin vye e mor. Sapit swivan i eksplike akoz.

TESTE OU KONNESANS

Parey Zan 4:23, 24 i demontre, ki ladorasyon ki Bondye i aksepte?

Konman ki nou kapab determinen si Bondye i agree avek serten koutim ek lafet?

Ki bann keksoz ki Bondye i ekspekte pour en ladorasyon akseptab?

[Portre lo paz 44]