Pa zanmen perdi konfyans dan Zeova!

1-3. Kwa ki ti ranforsi konfyans Pol dan Zeova? (Vwar portre anler.)

POUR en Kretyen, i ti danzere pour viv dan lavil Ronm sa letan. Vi ki bann disip Kris ti’n ganny blanmen pour met dife dan sa lavil an 64 N.L. e akize konmkwa ki zot ti ay lezot dimoun, zot ti ganny persekite en kantite. Si ou ti en Kretyen sa letan, petet sak zour ti pou en kosmar pour ou akoz ou ti konnen ou ti pou kapab ganny arete e martirize. Petet serten parmi ou bann frer ek ser Kretyen ti’n ganny desire par bann zannimo oubyen kloute lo en poto e brile vivan pour servi konman lalimyer pour klere aswar.

² I tre probab ki i ti pandan sa letan difisil ki zapot Pol ti ganny met dan prizon Ronm pour en dezyenm fwa. Eski lezot Kretyen ti pou vin ed li? Aparaman Pol ti konsernen avek sa sityasyon, i pour sa rezon ki i ti ekrir Timote: “Personn pa ti asiste mwan ler mon ti prezant mon premye defans; me tou dimoun ti abandonn mwan. Mon demande ki Senyer pa gard sa kont.” Menm si Pol ti dir sa, i ti admet ki i pa ti konpletman tousel. I ti ekri: “Me, Senyer in soutenir mwan e i’n fortifye mwan.” Wi, Senyer Zezi ti donn Pol sa lafors ki i ti bezwen. Dan ki fason pratik Bondye ti ed li? Pol i dir: “Mon’n ganny delivre dan lagel lyon.”​—2 Tim. 4:16, 17.a

³ Ler zapot Pol ti rapel sa leksperyans, sa ti bezwen ranforsi son lafwa e ed li annan konfyans ki Zeova ti pou donn li lafors pour andir bann leprev ki i ti pe pas ladan aktyelman e okenn difikilte ki ti kapab arive. Anfet, deswit i ti dir: “Senyer pou delivre mwan dan tou sa ki mal.” (2 Tim. 4:18) Pol ti konnen ki menm dan en sityasyon kot son bann frer ek ser pa ti pou kapab ed li, i ti annan konfyans ki Zeova ek Zezi ti pou ed li.

4, 5. (a) Lekel ki toultan kapab donn ou sa led ki ou bezwen? (b) Ki mannyer ou kapab ranforsi ou relasyon avek Zeova?

⁴ Eski par ler ou santi ou tousel kan ou pe fer fas avek en sityasyon difisil? Petet ou napa travay oubyen ou annan presyon kot lekol. Kekfwa osi ou kapab annan en problenm lasante oubyen pe fer fas avek lezot sirkonstans difisil. I kapab ki ou demann led avek lezot dimoun me ou dezapwente akoz zot pa’n donn ou sa led ki ou ti bezwen. I vre, i annan serten problenm kot imen i tou senpleman pa kapab rezourd. Dan sa bann sirkonstans, eski konsey ki Labib i donnen pour “met ou konfyans dan Zeova” i anven? (Prov. 3:5, 6) Eski ou kapab asire ki i pou ed ou? Wi! Led ki Bondye i donnen i reel parey bokou resi Labib i montre.

⁵ Alor, pa gard rankin ler ou pa ganny led ki ou pe ekspekte avek lezot. Parey Pol, esey vwar sa bann sityasyon konman bann loportinite pour depan totalman lo Zeova e vwar ki mannyer i pran swen avek ou avek lanmour. Sa pou ranforsi ou konfyans dan li e fer ou relasyon avek li vin pli reel ankor.

 6. Akoz i kapab difisil pour met konfyans dan Zeova kan nou dan problenm?

⁶ Petet ou annan en problenm ki pe fatig ou e ou’n koz avek Zeova lo la dan lapriyer. Eski aprezan ou kapab santi ou anpe pour konnen ki ou’n fer sa ki ou kapab e ki Zeova pou pran swen avek larestan? Byensir! (Lir Psonm 62:8;b 1 Pyer 5:7.) I enportan pour aprann fer sa pour ou kapab devlop en relasyon avek Zeova. Me, i kapab difisil pour annan konfyans ki Zeova pou donn ou sa ki ou bezwen. Akoz? En rezon se ki Zeova pa toultan reponn lapriyer deswit.​—Ps. 13:1, 2; 74:10; 89:46; 90:13; Aba. 1:2.

 7. Akoz Zeova pa toultan reponn nou lapriyer deswit?

⁷ Akoz Zeova pa toultan reponn nou lapriyer deswit? Rapel ki i dir ki nou relasyon avek li i parey relasyon bann zanfan avek en papa. (Ps. 103:13) En zanfan pa kapab ekspekte son paran donn li tou sa ki i demande, oubyen fer tou sa ki i oule deswit. Zot kapab anvi en keksoz e apre de minit pli tar zot nepli anvi. Lezot keksoz zot bezwen espere pour gannyen. I kapab osi ki sa keksoz ki sa zanfan pe demande i pa pour son byennet ni pour lezot. An plis, si ou donn sa zanfan tou sa ki i demande i ti pou konmsi ou vin lesklav e sa zanfan ou met. Pareyman, Zeova i kapab les letan pase avan ki i reponn nou lapriyer dan en fason evidan, pour nou prop byennet. Zeova, nou Papa dan lesyel i kontan nou. Konman nou Kreater ki saz i annan sa pouvwar pour fer sa. Si Zeova ti deswit donn nou tou sa ki nou demann li, nou relasyon avek Zeova pa ti pou apropriye.​—Konpar Izai 29:16; 45:9.

 8. Ki Zeova i promet konsernan sa ki nou kapab siporte?

⁸ En lot fakter i ki Zeova i konn tre byen nou bann limit. (Ps. 103:14) Alor i pa ekspekte nou pour andir avek nou prop lafors, me i donn nou son led parey en papa. Byensir, par ler nou kapab santi ki nou nepli kapab kontinyen. Me Zeova i asir nou ki i pa pou zanmen les son bann serviter soufer plis ki zot kapab siporte. I pou “donn mwayen pour sorti.” (Lir 1 Korentyen 10:13.) Alor, nou annan bon rezon pour annan konfyans ki Zeova i konnen ki kantite nou kapab siporte.

 9. Ki nou devret fer si ler nou priy Zeova pour led i pa reponn nou deswit?

⁹ Si ler nou priye pour ganny led nou pa ganny larepons deswit, annou esper sa Enn ki konn egzakteman kan pour ed nou. Rapel ki li osi i pe demontre pasyans parski i anvi vin sov nou. “Zeova pe esper avek pasyans pour donn zot son laprouvasyon e i pou azir pour demontre pitye anver zot. Parski Zeova i en Bondye lazistis. Ere tou bann ki kontinyen esper li.”​—Izai 30:18.

10-12. (a) Kwa ki kapab fer li difisil pour pran swen avek en manm fanmir ki malad? (b) Ler ou met konfyans dan Zeova pandan bann moman difisil, ki lefe sa pou annan lo ou relasyon avek Zeova? Donn en legzanp.

¹⁰ Kan ou dan bann sityasyon difisil, ou kapab santi parey Pol, setadir ki ou dan oubyen pre avek “lagel lyon.” Sa i bann moman kot i pli difisil me pli enportan pour met konfyans dan Zeova. Par egzanp, meton ou pe pran swen avek en manm ou fanmir ki ganny en maladi kronik. Petet ou’n priye pour ganny lasazes ek lafors.c Lefet ki ou konnen ki ou’n fer tou sa ki ou kapab aprezan ou annan en serten lape lespri. Ou konnen ki Zeova i vwar ou e i pou donn ou sa ki ou bezwen pour andire fidelman.​—Ps. 32:8.

¹¹ Nou sirkonstans i kapab fer nou krwar ki Zeova pa pe ed nou. Petet bann dokter i kapab annan diferan lopinyon lo kwa ki devret ganny fer. I kapab osi ki ou fanmir ki ou ti panse pour siport ou i fer keksoz pli difisil. Kontinyen depan lo Zeova pour donn ou lafors. Kontinyen apros avek li. (Lir 1 Samyel 30:3, 6.d) Kan ou ganny led, ou relasyon avek li pou vin pli for.

¹² Sanmenm sa ki Lindae ti eksperyanse apre detrwa lannen ki i ti’n okip son paran malad avan zot mor. I dir: “Kan nou ti dan sa sityasyon, souvandfwa mwan, mon msye ek mon frer nou ti vwar li difisil pour konnen ki pour fer. Par ler nou pa ti kapab fer nanryen. Me ler nou mazin lo tou sa ki’n pase, la ki nou vwar ki mannyer Zeova ti avek nou. I ti fortifye nou e donn nou egzakteman sa ki nou ti bezwen, menm ler i ti paret ki nou ti napa okenn lezot swa.”

13. Ki mannyer konfyans ki en ser ti annan dan Zeova ti ed li fer fas avek maler ki ti vin enn lo lot?

¹³ Ler nou annan konfyans total dan Zeova sa i osi kapab ed nou andire ler nou fer fas avek maler. Annou vwar leksperyans Rhonda. Son msye ki pa en Temwen ti pe divorse avek li e an menm tan, son frer ti dekouver ki i annan en maladi grav ki apel lupus. Apre, detrwa mwan pli tar madanm son frer ti mor. Ler Rhonda ti santi ki i ti’n konmans refer apre sa bann maler, i ti pran servis pionye ordiner. Me pa bokou letan apre, son manman ti mor. Kwa ki ti ed Rhonda pour andir sa bann maler? I dir: “Mon ti koz avek Zeova toulezour, menm konsernan bann pti desizyon ki mon ti bezwen fer. Sa ti fer ki Zeova ti vin reel pour mwan. Alor, mon ti aprann pour depan lo li olye lo mon menm oubyen lo lezot dimoun. Deplis, sa led ki i ti donn mwan ti reel, mon ti ganny tou sa ki mon bezwen. Akoz sa, mon’n nobou travay lanmen dan lanmen avek Zeova.”

14. Ki konfyans en Kretyen fidel i kapab annan si enn son fanmir i ganny ekskli?

¹⁴ Mazin en lot sityasyon. Meton en dimoun dan ou fanmir i ganny ekskli. Ou konnen ki Labib i dir konsernan lafason pour tret bann dimoun ki’n ganny ekskli. (1 Kor. 5:11; 2 Zan 10) Me vi ki ou kontan sa dimoun, ou kapab santi ki i vreman difisil e petet menm enposib pour obei sa konmann dan Labib.f Eski ou pou annan konfyans ki ou Papa dan lesyel i kapab donn ou sa lafors pour obei li fidelman? Eski ou pou vwar sa sityasyon konman en loportinite pour vin pli pros avek Bondye?

15. Akoz Adan ti dezobei konmann Zeova?

¹⁵ Anliny avek sa, mazin en kou lo sa premye zonm, Adan. Eski i ti vreman krwar ki i ti kapab dezobei Zeova e kontinyen viv? Non, akoz dan Labib nou vwar ki “pa Adan ki ti ganny tronpe.” (1 Tim. 2:14) Alor, akoz i ti dezobei? I bezwen ki Adan ti manz sa fri ki Ev ti ofer li akoz i ti kontan li plis ki Zeova. I ti ekout son madanm dan plas ekout Bondye.​—Zen. 3:6, 17.

16. Lekel ki nou devret kontan plis e akoz?

¹⁶ Eski sa i vedir ki nou pa devret kontan nou fanmir? Non, me selman nou devret kontan Zeova plis ki nou kontan okenn lezot dimoun. (Lir Matye 22:37, 38.) Ler nou kontan Zeova sa kantite, nou kapab ed nou fanmir dan sa pli bon fason, ki swa zot pe servi Zeova oubyen non. Alor, kontinyen ranforsi ou lanmour ek konfyans dan Zeova. Si ou enkyet pour enn ou fanmir ki’n ganny ekskli, devid ou leker avek Zeova dan lapriyer.g (Rom. 12:12; Fili. 4:6, 7) Menm si sa sityasyon i fer ou soufer en kantite, vwar li konman en loportinite pour fer ou relasyon avek Zeova vin pli for. Sa pour fer ki ou kapab met ou konfyans dan li e ou pou asire ki ler ou obei li, sa pou anmenn sa pli bon rezilta posib.

17. Ler nou konsantre lo sa travay predikasyon, ki mannyer nou pe montre ki nou annan konfyans dan Zeova?

¹⁷ Akoz Zeova ti sov Pol “dan lagel lyon”? Li menm i dir: “In fer mwan kapab anons son mesaz e fer tou bann payen tande.” (2 Tim. 4: 17) Parey Pol, anmezir ki nou konsantre lo sa travay predikasyon, nou annan konfyans ki Zeova pou ‘donn nou an plis’ tou lezot keksoz ki nou bezwen. (Mat. 6: 33) Konman bann predikater Rwayonm, nou’n ganny “konfye . . . Levanzil” e “nou pe travay ansanm” avek Bondye. (1 Tesa. 2:4; 1 Kor. 3:9) Si nou fer otan ki nou kapab dan sa travay ki Bondye in donn nou, nou pou vwar li pli fasil pour esper Zeova reponn nou bann lapriyer.

18. Dan ki fason nou kapab annan plis konfyans dan Zeova e ranforsi nou relasyon avek li?

¹⁸ Alor, annou servi sa letan ki nou annan la konmela pour ranforsi nou relasyon avek Bondye. Si i annan okenn sityasyon ki fer nou enkyet, servi li konman en loportinite pour vin pli pros ankor avek Zeova. Annou lir e etidye Parol Bondye o profon, kontinyen priye e konsantre lo bann aktivite spirityel. Si nou fer tousala, nou pou kapab annan konfyans ki Zeova pou ed nou andir tou bann difikilte ki nou pe pas ladan la konmela me osi okenn problenm ki kapab arive a lavenir.