Kestyon lekter

Sa bann verse avan dan sa menm sapit i ed nou konpran ki Pol ti pe koz lo mesaz Bondye ki annan pour fer avek son plan ki Labib i koz lo la.

Nou souvan sit Ebre 4:12 dan nou bann piblikasyon pour montre ki Labib i annan sa pouvwar oubyen pwisans pour sanz lavi en dimoun e sa i vre. Me i byen ki nou konpran lo kwa Pol ti pe koz lo la, kan i ti ekrir sa parol dan Ebre 4:12. I ti pe ankouraz bann Kretyen Ebre pour viv an armoni avek plan Bondye. Lekritir sakre i koz lo diferan plan ki Bondye ti annan. Pol ti servi legzanp bann Izraelit ler Bondye ti liber zot Lezip. Zot ti annan sa lespwar pour al dan Later Promiz “en pei kot dile ek dimyel i koule,” kot zot ti pou kapab ganny vre repo.​—Egzod 3:8; Deterononm 12:9, 10.

Sa ti plan Bondye. Me bann Izraelit pa ti swiv gidans Zeova e zot pa ti demontre lafwa, alor laplipar zot pa ti antre dan sa repo. (Nonm 14:30; Zozye 14:6-10) Pol ti osi dir ki “Bondye in les nou sa promes konmkwa nou pou kapab antre dan son repo.” (Ebre 3:16-19; 4:1) Sa “promes” i form parti sa plan ki Bondye in fer nou konnen. Parey bann Kretyen Ebre, nou kapab lir e viv an armoni avek sa plan. Pour byen fer sorti ki sa promes i baze lo Labib, Pol ti sit en parti Zenez 2:2 ek Psonm 95:11.

Lefet ki nou konnen ki i ankor annan “sa promes pour rantre dan repo Bondye,” sirman sa i tous nou leker. Nou annan konfyans ki sa ki Labib i ansenny nou konsernan sa posibilite pour antre dan repo Bondye i vre e nou’n fer serten keksoz pour nou kapab antre dan sa repo. Nou pa fer sa par esey swiv Lalwa Moiz oubyen fer bann bon aksyon zis pour annan laprouvasyon Zeova. Plito, akoz nou lafwa dan Bondye, nou’n kontan pour viv an armoni avek son plan e nou pe kontinyen fer li. Plizyer milye dimoun dan lemonn antye in osi konmans etidye Labib e aprann konsernan plan Bondye. Sa in fer ki bokou parmi zot in sanz zot lavi, demontre lafwa e apre batize. Lefe ki sa in fer lo zot i bann levidans kler ki “Parol Bondye i vivan e pwisan.” Sa ki Bondye in dir dan Labib konsernan son plan in annan en lefe dan nou lavi e i pou kontinyen demontre son pwisans dan nou lavi.