Ki mannyer Bondye i ete?

Pli nou konn bann kalite ki en dimoun i annan, nou konn li pli byen e sa i fer nou vin son pli bon zanmi. Pareyman, pli nou konn bann kalite Zeova, pli nou pou konn li byen e nou lanmitye avek li pour agrandi. Parmi tou bann zoli kalite ki Bondye i annan, kat parmi i enpresyonan. Sa i son pwisans, lasazes, lazistis ek lanmour.

“Senyer [Zeova!] Kan ou ti kree lesyel ek later, ou ti montre ki pouvwar e ki lafors ou annan.”​—ZEREMI 32:17.

Bann keksoz ki Bondye in kree i montre ki I pwisan. Par egzanp, ler ou sorti deor en zour byen ansoleye, ou santi lasaler soley lo ou lapo. Sa lasaler i gras a Zeova ki’n kree soley. Ki kantite pwisan soley i pwisan? Dan milye soley, tanperatir i apepre 15 milyon degre santigrad. Tou le segonn soley i larg bann lenerzi ki son lafors i parey lenerzi plizyer santenn milyon bonm nikleer.

Kantmenm i larg sa kantite lenerzi, soley i pti konpare avek bokou lezot bilyon zetwal dan liniver. Bann syantis i prezimen ki enn parmi bann pli gro zetwal ki apel UY Scuti i apepre 1, 700 fwa groser soley. Si UY Scuti ti ranplas soley, i ti pou depas orbit plannet later e menm plannet Jupiter ti pou tonm ladan. Anfet, sa i ed nou pli byen konpran parol Zeremi ler i ti dir Zeova in kree lesyel ek later, setadir liniver, avek son gran pwisans.

Ki mannyer pwisans Bondye i kapab ed nou? Nou lavi i depan lo bann keksoz ki Bondye in kree, tel parey soley ek tou bann zoli keksoz lo later. An plis, Bondye i servi son pwisans pour ed sak dimoun. Ki mannyer i fer sa? Dan premye syek, Bondye ti donn Zezi sa pouvwar pour fer bann mirak. Labib i dir: “Bann aveg pe vwar aprezan, bann ki bwete pe marse, bann ki annan lalep pe vin pir, bann sourd pe tande, bann mor pe ganny resisite.” (Matye 11:5) Me ki mannyer Bondye i fer sa ozordi? “I donn lafors sa enn ki fatige” e “bann ki met zot konfyans dan [Zeova] ava reganny lafors.” (Izai 40:29, 31) Nou kapab ganny “lafors ki sorti kot Bondye” pour ed nou andir bann difikilte ek problenm dan lavi. (2 Korentyen 4:7) Ler nou konnen ki Bondye i servi son gran pwisans pour ed nou, pa nou anvi devlop en lanmitye avek li?

“[Zeova!] Ou’n fer tou keksoz; tou in ganny fer avek lasazes.”​—PSONM 104:24.

Pli nou aprann lo bann keksoz ki Bondye in kree, pli nou admir son lasazes. Anfet, i annan en letid ki apel biomimetics oubyen biomimicry kot bann syantis i etidye kreasyon e pran bann keksoz dan kreasyon pour amelyor bann keksoz ki zot fer. Sa bann keksoz ki zot fer i kapab senp parey lakol oubyen menm en keksoz konplike parey en avyon.

Nou kapab vwar lasazes ekstraordiner Bondye dan lafason ki lekor imen in ganny kree. Annou vwar ki mannyer lekor en pti baba i devlope. Sa prosesis i konmans avek en selil ki’n ganny fertilize e tou bann lenformasyon zenetik ki neseser i dan sa selil. Sa selil i divize e ganny lezot selil ki parey li. Me dan sa moman apropriye, sa bann selil i divize e vin plizyer santenn diferan kalite selil tel parey selil disan, selil nerf ek selil lezo. Apre en pe letan bann lorgann i konmans formen e konmans fonksyonnen. Dan zis nef mwan, sa selil ki ti ganny fertilize i devlope pour vin en pti baba e dan sa pti baba i annan plizyer bilyon selil. Sa lasazes ki nou vwar dan tou bann keksoz ki Bondye in kree, i fer bokou dimoun dakor avek sa ki sa ekriven Labib i dir: “Mon loue ou, akoz ou’n fer mwan en kreatir vreman merveye.”​—Psonm 139:14.

Ki mannyer lasazes Bondye i kapab ed nou? Nou Kreater i konnen ki nou bezwen pour nou ere. Vi ki i annan en gran konnesans ek konprenezon, i kapab donn nou bann konsey ki saz dan son Parol, Labib. Par egzanp, i ankouraz nou pour “kontinyen . . . pardonn kanmarad volonterman.” (Kolosyen 3:13) Pa sa i en konsey saz? Resers i montre ki ler en dimoun i pare pour pardonnen sa i fer li dormi byen e fer desann son tansyon. I osi kapab ede pour pa ganny depresyon ek lezot problenm lasante. Bondye i parey en zanmi ki kontan nou e i toultan pare pour donn nou bann konsey ki pou ed nou. (2 Timote 3:16, 17) Pa ou ti pou kontan annan en zanmi koumsa?

“[Zeova] i kontan lazistis.”​—PSONM 37:28.

Bondye i toultan fer sa ki byen. Anfet “i pa kestyon ki Bondye i komet lemal. I pa posib ki Bondye liniver i fer sa ki mal.” (Zob 34:10) I toultan ziz byen parey sa psalmis ti dir ler i ti koz avek Zeova: “Ou gouvern bann pep avek lazistis.” (Psonm 67:4) Vi ki Zeova i vwar “dan leker,” nou pa kapab anbet li. I toultan kapab konn laverite e ziz avek lazistis. (1 Samyel 16:7) An plis, Bondye i vwar tou lenzistis ek koripsyon ki i annan lo later e i’n promet ki byento “bann malfeter . . . ava ganny derasinen [oubyen tire] lo sa later.”​—Proverb 2:22.

Par kont, Bondye pa parey bann ziz sever ki kontan pini dimoun. I demontre pitye ler i neseser. Labib i dir ki Zeova i annan pitye ek konpasyon menm anver bann move dimoun si zot senserman repantir. Pa sa i vre lazistis?​—Psonm 103:8; 2 Pyer 3:9.

Ki mannyer lazistis Bondye i kapab ed nou? Zapot Pyer ti dir: “Bondye pa fer lapreferans, me dan tou nasyon, sa ki annan en gran respe pour li e ki fer sa ki drwat i ganny son laprouvasyon.” (Akt 10:34, 35) I kler alor ki lazistis Bondye i fer li pa fer lapreferans. Nenport ki ras, nasyonalite, ledikasyon oubyen ran sosyal ki nou annan, nou kapab apros avek Bondye e vin son bann serviter.

Bondye in donn nou en konsyans akoz i anvi nou konpran e benefisye avek son lazistis. Labib i dir ki nou konsyans i parey en lalwa ki’n ganny ‘ekrir dan nou leker’ ki montre nou si sa ki nou fer i byen ouswa mal. (Romen 2:15) Ki mannyer nou konsyans i kapab ed nou? Ler nou konsyans in ganny byen antrennen, sa i kapab ed nou evit bann keksoz ki kapab danzere oubyen i kapab anpes nou fer bann move aksyon. Si nou fer en fot, nou konsyans i kapab ed nou pour repantir e koriz nou move aksyon. San dout, ler nou konpran lazistis Bondye sa i ed nou e fer nou vin pli pros avek li!

“Bondye i lanmour.”​—1 ZAN 4:8.

Bondye i demontre son pwisans, lasazes ek lazistis me Labib pa dir ki Bondye i pwisans, lasazes oubyen lazistis. Me i dir Bondye i lanmour. Akoz? Parski nou kapab dir ki pwisans Bondye i permet li azir e son lazistis ek lasazes i gid lafason i azir. Me son lanmour i motiv li pour azir. Lanmour i enfliyans tou keksoz ki i fer.

Menm si Zeova pa ti mank nanryen, son lanmour ti motiv li pour kree bann kreatir entelizan dan lesyel ek lo later. Sa bann kreatir i kapab apresye lanmour ek swen Bondye. I ti kree later avek tou sa ki imen i bezwen pour viv. Bondye i kontinyen demonte lanmour anver tou imen ler “i fer soley tap lo bon konman move dimoun e i fer lapli tonm lo bann ki drwat e bann ki move.”​—Matye 5:45.

An plis, “Zeova i annan en kantite konpasyon ek mizerikord.” (Zak 5:11) I demontre son lanmour anver bann ki senserman fer zefor pour aprann konn e apros avek li. Bondye i enterese avek sak dimoun. Anfet, ‘i enterese avek ou.’​—1 Pyer 5:7.

Ki mannyer lanmour Bondye i kapab ed nou? Nou apresye en zoli soley kouse. Nou kontan pour tann en pti baba riye. Nou apresye lanmour ki en manm nou fanmir i demontre anver nou. Sa bann keksoz i kapab pa vreman neseser me i fer lavi gou.

Nou osi benefisye avek en lot keksoz ki montre ki Bondye i kontan nou e sa i lapriyer. Labib i ankouraz nou: “Pa bezwen trakas pour nanryen, me dan tou sirkonstans, fer Bondye konn zot bann demann dan lapriyer ek siplikasyon ensi ki remersiman.” Parey en papa ki kontan nou, Bondye i anvi ki nou rod son led ler nou annan problenm. Ler nou fer sa, nou pou ganny “lape Bondye ki depas tou sa ki nou kapab konpran.” Zeova in fer sa promes akoz i kontan nou.​—Filipyen 4:6, 7.

Eski sa bann zoli kalite Zeova ki nou’n diskit lo la tel parey pwisans, lasazes, lazistis ek lanmour i ed ou pli byen konpran ki mannyer Bondye i ete? Pour ed ou kontinyen devlop plis lapresyasyon pour Bondye, nou envit ou pour aprann lo sa ki in fer e sa ki i pou fer pour ed ou dan lavenir.