Me si ou fer en pese grav?

Menm si ou kontan Zeova en kantite e ou fer ou mye pour pa fer okenn keksoz ki pou bles li, i kapab arive parfwa ki ou fer en fot. Par kont, i annan serten pese ki pli grav ki lezot. (1 Korentyen 6:9, 10) Si ou’n fer en pese grav, pa bliye ki Zeova i ankor kontan ou. I anvi pardonn ou e i anvi ed ou.

1. Ki nou bezwen fer pour Zeova pardonn nou?

Bann ki kontan Zeova i vreman tris ler zot realize ki zot in fer en pese grav. Me sa promes ki Zeova ti fer avek son pep i rekonfort zot: “Menm si zot bann pese i rouz, zot pou vin blan parey lanez.” (Izai 1:18) Si nou senserman repantir, Zeova pou pardonn nou totalman. Ki mannyer nou repantir? Nou vreman regrete pour sa ki nou’n fer, alor nou aret fer sa ki mal e sipliy Zeova pour pardonn nou. Apre nou fer bokou zefor pour sanz sa move fason panse oubyen move labitid ki’n fer nou arive fer sa pese. Nou osi fer nou mye pour viv en lavi ki fer plezir Zeova​—Lir Izai 55:6, 7.

2. Ki mannyer Zeova i servi bann ansyen pour ed nou ler nou fer pese?

Si nou fer en pese grav, Zeova i dir nou “apel bann ansyen dan kongregasyon.” (Lir Zak 5:14, 15.) Bann ansyen i kontan Zeova ek son bann mouton. Zot kalifye pour ed nou aranz nou relasyon avek Zeova.​—Galat 6:1.

Ki mannyer bann ansyen i ed nou ler nou fer en pese grav? De oubyen trwa ansyen pou servi bann konsey dan Labib pour koriz nou. Zot pou osi donn nou bann sizesyon pratik ek lankourazman ki pou ed nou evite fer sa pese ankor. Si en dimoun in fer en pese grav e i pa oule repantir, bann ansyen pou retir li dan kongregasyon pour protez kongregasyon kont move lenfliyans.

AL PLI O PROFON

3. Ler nou konfes nou pese, sa i ed nou pour geri

Tou pese ki nou fer i enplik Zeova. Alor nou bezwen konfes avek li. Lir Psonm 32:1-5 e apre reponn sa kestyon:

• Akoz i byen pour nou konfes nou pese avek Zeova olye esey kasyet?

VIDEO: “Zeova i disiplin sa bann ki i kontan” (3:01)

• Dan sa video, ki mannyer bann ansyen ti ed Canon pour retourn kot Zeova?

Nou bezwen fran e onnet avek bann ansyen, zot la pour ed nou. Lir Zak 5:16 e apre reponn sa kestyon:

• Akoz i pli fasil pour bann ansyen ed nou ler nou onnet avek zot?

4. Zeova i pran pitye pour bann kiʼn fer pese

Si en dimoun ki’n fer en pese grav i refize swiv standar Zeova, i pou ganny tire dan kongregasyon e nou pa pou frekant li. Lir 1 Korentyen 5:6, 11 e apre reponn sa kestyon:

• Zis parey lelven i fer monte lapat dipen, ki mannyer ler nou frekant en peser ki pa repantir sa i afekte kongregasyon?

Akoz lafason ki Zeova i azir anver bann ki fer en fot grav i montre ki i rezonnab, i pran pitye e i annan lanmour?

5. Zeova i pardonn nou ler nou repantir

Zezi ti servi en legzanp ki ed nou konpran ki mannyer Zeova i santi ler en dimoun i repantir. Lir Lik 15:​1-7 e apre reponn sa kestyon:

• Ki sa i ansenny ou lo Zeova?

Lir Ezekyel 33:11 e apre reponn sa kestyon:

• Ki nou bezwen fer pour montre ki nou vreman repantir?

REZIMEN

Si nou fer en pese grav me nou vreman regrete e nou determinen pour aret fer sa ki mal, Zeova pou pardonn nou.

Revizyon

• Akoz i byen pour nou konfes nou pese avek Zeova?

• Ki nou bezwen fer pour nou pese ganny pardonnen?

• Si nou fer en pese grav, akoz nou devret rod led avek bann ansyen?

FER PLIS RESERS

Vwar ki mannyer en msye ti eksperyans pardon Zeova parey i ganny dekrir dan Izai 1:18.

Pa zanmen doute ki Zeova i annan konpasyon (5:02)

Ki mannyer bann ansyen i esey ed bann kiʼn fer en pese grav?

“Ki mannyer bann ansyen i demontre pitye ek lanmour anver bann ki fer en pese grav?” (Latour Veyer Out 2024)

Vwar ki mannyer lanmour ek konpasyon i ganny demontre anver bann ki pa repantir.

“Led pour bann kiʼn ganny tire dan kongregasyon” (Latour Veyer Out 2024)

Dan sa zistwar “I Needed to Return to Jehovah,” vwar akoz en msye ki ti kit laverite ti santi ki Zeova ti ed li pour retournen.

“The Bible Changes Lives” (Latour Veyer 1 Avril 2012 an Angle)