SAPIT 17

Trouv Sekirite Parmi Pep Bondye

 1, 2. An kwa sitiasyon limanite i konparab avek sitiasyon bann dimoun dan en rezyon ki’n ganny ravaze avek tanpet?

IMAZINEN ki en tanpet vyolan in ravaz rezyon kot ou reste. Ou lakaz in detrir, e ou’n perdi tou ou posesyon. Manze i limite. Sa sitiasyon i sanble dezespere. Apre sa, bann lasistans ki ou pa ti ekspekte i arive. Manze ek lenz i ganny fourni an abondans. En nouvo lakaz i ganny konstri pour ou. Sirman ou ti pou rekonesan anver sa dimoun ki’n fer sa bann provizyon disponib.

² Nou dan menm sitiasyon ozordi. Parey sa tanpet, rebelyon Adan ek Ev ti koz gran domaz pour laras imen. Paradi, demer limanite, ti perdi. Depi sa, bann gouvernman imen in fel pour protez dimoun kont lager, krim, ek lenzistis. Larelizyon in kit milyon dimoun lafen pour bon nouritir spirityel. Dan domenn spirityel, toutfwa, Zeova Bondye pe aktyelman fourni manze, lenz, ek proteksyon. Konman i pe fer sa?

“LESKLAV FIDEL E PRIDAN”

 3. Konman Zeova i donn provizyon limanite, ki bann legzanp ki demontre sa?

³ Bann lasistans i zeneralman ganny distribye atraver en lorganizasyon, e Zeova in servi menm metod pour fourni son pep avek bann provizyon spirityel. Par egzanp, bann Izraelit ti “kongregasyon Zeova” pour 1500 lannen. Parmi zot ti annan bann ki Bondye ti servi konman son entermedyer pour ansenny son Lalwa. (1 Kronik 28:8; 2 Kronik 17:7-9) Dan premye syek N.L., Zeova ti prodwi lorganizasyon Kretyen. Bann kongregasyon ti formen, e zot ti fonksyonn anba direksyon en konsey direkter ki ti konpri bann zapot ensi byen ki bann ansyen. (Akt 15:22-31) Parey ozordi, Zeova i pran swen avek son pep atraver en group dimoun byen organize. Konman nou konn sa?

 4. Pandan letan modern, lekel ki’n ganny trouve pe servi konman ‘lesklav fidel e pridan’ e konman Bondye i fourni bann provizyon spirityel?

⁴ Zezi ti dir ki diran son prezans, dan pouvwar rwayal, “sa serviter fidel e saz” ti pou ganny trouve pe donn Son bann disip “manze kan i ler.” (Matye 24:45-47) Kan Zezi ti ganny enstale konman Lerwa osyel an 1914, lekel ki ti ganny trouve pe servi konman sa lesklav oubyen “serviter”? Sertennman pa bann dirizan relizyon Kretyente. Pour laplipar letan, zot ti pe fourni zot bann troupo avek propagann ki ti siport zot bann gouvernman nasyonal dan Premye Lager Mondyal. Me nouritir spirityel apropriye ti pe ganny distribye dan son letan par bann vre Kretyen ki ti ganny swazir par lespri sen Bondye, e fer parti sa ki Zezi ti apel “pti troupo.” (Lik 12:32) Sa bann Kretyen swazir ti pres lo Rwayonm Bondye plito ki bann gouvernman imen. An konsekans, pandan bann lannen ki’n pase, milyon ki ti “lezot mouton” avek leker senser ti zwenn sa ‘lesklav’ swazir pour pratik vre relizyon. (Zan 10:16) An servan ‘lesklav fidel e pridan’ ek son Konsey Direkter aktyel, Bondye pe diriz son pep organize pour fer ki nouritir, lenz, ek proteksyon spirityel i disponib pour tou ki dezire pour ganny sa bann provizyon.

“MANZE KAN I LER”

 5. Ki kalite kondisyon spirityel ki egziste dan lemonn ozordi, me ki Zeova pe fer konsernan sa?

⁵ Zezi ti dir: “Zonm pa viv zis lo dipen tousel me lo tou parol ki sorti dan labous Bondye.” (Matye 4:4) Malerezman, gran mazorite dimoun pa pe port latansyon lo bann parol Bondye. Parey ti predir par profet Zeova, Amos, i annan “en lafamin, pa pour dipen, e en swaf, pa pour delo, me pour antann bann parol Zeova.” (Amos 8:11) Menm bann dimoun relizyez i spirityelman lafen. Annefe, lavolonte Zeova i ki “tou dimoun i ganny sove e ganny konnesans laverite.” (1 Timote 2:3, 4) Se pour sa rezon, ki Zeova pe fourni nouritir spirityel an abondans. Me kote nou kapab trouv nouritir spirityel?

 6. Konman ki Zeova in nouri son pep spirityelman dan bann letan ki’n pase?

⁶ Diran listwar, Zeova in distribye nouritir spirityel avek son pep kolektivman. (Izai 65:13) Par egzanp, bann pret Izraelit ti rasanble zonm, fanm, ek zanfan pour ganny enstri konman en group dan Lalwa Zeova. (Deterononm 31:9, 12) Anba direksyon konsey direkter, bann Kretyen premye syek ti organiz bann kongregasyon e prezid bann renyon pour donn lenstriksyon e ankouraz tou. (Romen 16:5; Filemon 1, 2) Bann Temwen Zeova pe swiv menm metod. Ou ganny kordyalman envite pour asiste tou zot bann renyon.

 7. Konman ki asiste regilyerman bann renyon Kretyen i relye avek konnesans ek lafwa?

⁷ Byen sir, ou’n deza kapab aprann en kantite pandan ou letid personnel. Petet en temwen in asiste ou. (Akt 8:30-35) Me ou lafwa i kapab ganny konpare avek en plant ki pou fletri e mor si i pa ganny swen neseser. Donk, ou bezwen resevwar nouritir spirityel apropriye. (1 Timote 4:6) Bann renyon Kretyen i ofer en progranm lenstriksyon permanan ki’n ganny konsevwar pour nouri ou spirityelman e ed ou pour kontinyen agrandir dan lafwa anmezir ki ou konnesans lo Bondye i ogmante.—Kolosyen 1:9, 10.

 8. Akoz nou ganny ankouraze pour asiste bann renyon Temwen Zeova?

⁸ Bann renyon i zwe en lot rol enportan. Pol ti ekrir: “Annou rode konman pous kanmarad pour annan lanmour e fer sa ki byen. Pa abandonn zot lasanble.” (Ebre 10:24, 25) Mo Grek ki ganny tradwir “pous” kanmarad i osi sinifye “fite.” En proverb Labib i deklare: “Feray i fit feray. En zonm i fit figir en lot.” (Proverb 27:17) Nou tou nou bezwen ganny ‘fite’ oubyen afinen kontinyelman. Bann presyon lavi ki nou pe sibir toulezour dan sa monn i kapab afebli nou lafwa. Kan nou asiste bann renyon Kretyen, i annan en lesanz lankourazman. (Romen 1:11, 12) Bann manm kongregasyon i swiv sa konsey ki lapot Pol ti donnen pour kontinyen “ankouraz e fortifye kanmarad” e sa i afin nou lafwa. (1 Tesalonisyen 5:11) Nou prezans regilye dan bann renyon Kretyen i osi endike ki nou annan lanmour pour Bondye e i donn nou loportinite pour loue li.—Psonm 35:18.

“KOUVER OU AVEK LANMOUR”

 9. Konman Zeova in etabli en legzanp pour manifeste lanmour?

⁹ Pol ti ekrir: “Kouver ou menm avek lanmour, akoz i en lyen linyon parfe.” (Kolosyen 3:14, NW) Avek bonte, Zeova in fourni nou sa lenz. Dan ki fason? Bann Kretyen i kapab demontre lanmour, akoz i en fri ki ganny prodwi par lespri sen Zeova. (Galat 5:22, 23) Zeova li menm in demontre sa pli gran lanmour an anvoyan son sel Garson pour ki nou kapab ganny lavi eternel. (Zan 3:16) Sa demonstrasyon lanmour siprenm in fourni nou en model pour nou eksprim sa kalite. “Si Bondye in kontan nou avek en tel lanmour” lapot Zan ti ekrir, alor “nou osi nou bezwen kontan kanmarad.”—1 Zan 4:11.

10. Konman nou kapab benefisye ler nou asosye avek tou “bann frer dan lafwa”?

¹⁰ An asistan bann renyon kot Lasal Rwayonm, ou pou ganny lokazyon pour montre lanmour. Ou pou rankontre en gran varyete dimoun. Toudswit ou pou santi ou ganny atrakte par en kantite zot. Byensir, bann personnalite i diferan menm parmi bann ki servi Zeova. Petet dan lepase ou’n senpleman evit bann dimoun ki pa partaz ou lentere oubyen ki napa menm tre karakter avek ou. Sepandan, bann Kretyen, i bezwen “kontan [tou, NW] bann frer dan lafwa.” (1 Pyer 2:17) Pour sa rezon, fer li vin ou lobzektif pour vin familye avek bann dimoun kot Lasal Rwayonm—menm bann endividi ki laz, personnalite, ras oubyen nivo ledikasyon i diferan avek pour ou. Probableman ou pou konstate ki sakenn i annan bann tre ki pou fer ou kontan zot.

11. Akoz ki ou pa merit trouble par sa varyete personnalite ki egziste parmi pep Zeova?

¹¹ Bann divers personnalite dan kongregasyon pa merit trouble ou. Pour ilistre, imazinen ki en kantite transpor pe sirkil dan menm direksyon avek ou lo semen. Pa tou ki pe roul dan menm vites, deplis tou sa bann transpor i diferan. Serten in parkour en gran distans, me parey ou, lezot in fek konmans demare. Apar bann diferans, toutfwa, tou pe al dan menm direksyon. I konparab avek bann endividi ki konpoz en kongregasyon. Pa tou ki devlop bann kalite Kretyen dan menm vites. Deplis, pa tou ki dan menm kondisyon fizik e emosyonnel. Serten pe ador Zeova pour plizyer lannen; lezot fek konmanse. Parkont, tou pe travers semen pour lavi eternel, “byen ini ansanm dan en menm lespri e en menm lopinyon.” (1 Korentyen 1:10) Donk, rod bann bon kote olye defo bann ki dan kongregasyon. An fezan sa, ou pou ganny ankouraze akoz ou pou realize ki Bondye i vreman parmi sa bann dimoun. E sertennman i pou en landrwa kot ou pou anvi ete.—1 Korentyen 14:25.

12, 13. (a) Ki ou kapab fer si en dimoun dan kongregasyon i ofans ou? (b) Akoz i enportan pour pa gard rankin?

¹² Lefe ki tou imen i enparfe, parfwa en dimoun dan kongregasyon i kapab dir oubyen fer en keksoz ki irit ou. (Romen 3:23) Avek realism, disip Zak ti ekrir: “Nou komet lerer dan plizyer mannyer. Si en dimoun pa komet lerer dan sa ki i dir i en dimoun parfe.” (Zak 3:2) Konman ou pou reazir si en dimoun i ofans ou? En proverb Labib i dir: “Disernman en zonm pou sertennman retard son lakoler, e i labote lo son par pour les pase en fot.” (Proverb 19:11) Disernman i vedir pour regard en sitiasyon oprofon, pour konpran bann fakter ki pa aparan, ki fer en dimoun koze oubyen reazir dan en serten fason. Plizyer nou, nou servi nou fakilte disernman pour ekskiz nou bann fot. Akoz nou pa servi sa fakilte pour konpran e kouver lenperfeksyon lezot?—Matye 7:1-5; Kolosyen 3:13.

¹³ Si nou oule resevwar pardon Zeova fodre pa ki nou oubliye ki nou bezwen pardonn lezot. (Matye 6:9, 12, 14, 15) Si nou pe pratik laverite, nou pou tret lezot avek lanmour. (1 Zan 1:6, 7; 3:14-16; 4:20, 21) Alor, si ou rankontre en problenm avek en endividi dan kongregasyon, lite pour pa gard rankin. Si ou annan lanmour, ou pou fer ou mye pour rezourd sa problenm, e ou pa pour ezite pour demann leskiz si ou’n ofans en dimoun.—Matye 5:23, 24; 18:15-17.

14. Avek ki bann kalite ki nou bezwen kouver nou?

¹⁴ Nou lenz spirityel i devret enkli lezot bann kalite ki etrwatman relye avek lanmour. Pol ti ekri: ‘Kouver ou avek konpasyon, labonte, limilite, ladouser ek pasyans.’ Sa bann kalite, ki sorti dan lanmour, i fer parti sa “nouvo personnalite” ki an konformite avek lavolonte Bondye. (Kolosyen 3:10, 12, NW) Eski ou pou fer zefor pour sanz dan sa fason? Espesyalman si ou kouver ou avek lanmour fraternel ou pou resevwar en mark ki pou idantifye ou konman en disip Zezi, akoz i ti dir: “Dimoun pou war ki zot mon bann disip si zot kontan kanmarad.”—Zan 13:35.

EN LANDRWA AN SEKIRITE

15. Konman kongregasyon i konparab avek en proteksyon?

¹⁵ Kongregasyon i osi servi konman en proteksyon, en refiz protekter kot ou pou santi ou an sekirite. Dan kongregasyon ou pou trouv bann dimoun ki annan en leker senser ki pe fer zefor pour fer sa ki drwat dan lizye Bondye. Plizyer parmi zot in elimin bann move pratik ek latitid ki ou pe esey sirmonte. (Tit 3:3) Zot kapab ed ou, akoz nou’n ganny demande pour kontinyen “amenn fardo kanmarad.” (Galat 6:2) Natirelman, pour swiv semen ki anmenn ver lavi eternel i finalman ou prop responsabilite. (Galat 6:5; Filipyen 2:12) Sepandan, par mwayen kongregasyon Kretyen, Zeova in fourni en led ek en sipor merveye. Menm si ou bann problenm i paret difisil, i annan en resours presye ki disponib pour ou—en kongregasyon kot lanmour i rennyen, ki pou siport ou dan bann moman letan leprev ek privasyon.—Vwar Lik 10:29-37; Akt 20:35.

16. Ki lasistans ki bann ansyen dan kongregasyon i fourni?

¹⁶ Parmi bann ki pou kapab ed ou i bann “kado [an] zonm”—bann ansyen, oubyen bann sirveyan ki’n ganny apwente dan kongregasyon pour diriz troupo avek bonn volonte ek devouman. (Efezyen 4:8, 11, 12; Akt 20:28; 1 Pyer 5:2, 3) Konsernan zot, Izai ti profetize: “Sakenn i bezwen vin parey en landrwa kasyet kont divan e en retret kont en tanpet lapli, parey bann toran delo dan en landrwa sek, parey lonbraz en gro ros lo en later epize.”—Izai 32:2.

17. (a) Ki kalite led ki Zezi ti oule aporte partikilyerman? (b) Ki provizyon Bondye in promet pour fer an faver son pep?

¹⁷ Kan Zezi ti lo later, bann sef relizyez pa ti egzers en sirveyans avek lanmour. Kondisyon bann dimoun ti tous li oprofon, e i ti sirtou oule ed zot spirityelman. Zezi ti annan pitye pour zot akoz “zot ti fatige e dekouraze parey bann mouton ki napa berze.” (Matye 9:36) Sa deskripsyon i koresponn avek sitiasyon penib bokou dimoun ozordi ki pe andir bann problenm difisil e ki napa personn ver ki zot kapab al rod led spirityel ek konfor! Me pep Zeova i annan lasistans spirityel, akoz i ti promet: “Mon pou fer leve lo zot bann berze ki pou vreman pran swen avek zot; e zot pou nepli per, ni menm frape avek terer e napa enn ki pou manke.”—Zeremi 23:4.

18. Akoz nou bezwen apros en ansyen si nou bezwen led spirityel?

¹⁸ Fer konnesans avek bann ansyen dan kongregasyon. Zot annan plis leksperyans pour aplik konnesans Bondye, akoz zot ranpli bann kalifikasyon pour bann sirveyan parey i ganny defini dan Labib. (1 Timote 3:1-7; Tit 1:5-9) Pa ezite pour apros enn ant zot si ou bezwen led spirityel pour fer fas avek en latitid oubyen en tre karakter ki kontrer avek bann legzizans divin. Ou pou konstate ki bann ansyen i swiv konsey Pol: “Ankouraz bann ki timid, ed bann ki feb, pran pasyans avek zot tou.”—1 Tesalonisyen 2:7, 8; 5:14.

REZWIR SEKIRITE PARMI PEP ZEOVA

19. Ki benediksyon ki Zeova i akord bann ki sers sekirite dan son lorganizasyon?

¹⁹ Menm ki nou pe viv dan bann kondisyon enparfe, Zeova i fourni nou avek bann nouritir, lenz, ek proteksyon spirityel. Byensir, nou bezwen esper sa nouvo monn ki Bondye in promet pour eksperyans bann byenfe en paradi fizik. Me bann ki form par lorganizasyon Zeova, pe aktyelman rezwir sekirite en paradi spirityel. Konsernan zot, Ezekyel ti profetize: “Zot pou vreman abit an sekirite, san ki personn i fer zot tranble.”—Ezekyel 34:28; Psonm 4:8.

20. Konman Zeova pou rekonpans nou pour nenport kwa ki nou’n kapab sakrifye pour son ladorasyon?

²⁰ Konbyen nou kapab rekonesan ki Zeova in fer bann provizyon spirityel atraver son Parol ek son lorganizasyon! Apros pre avek pep Bondye. Pa bezwen ezite par per sa ki ou bann zanmi oubyen bann fanmiy i kapab panse lo ou akoz ou pe aksepte konnesans Bondye. Serten pou kapab kritik ou akoz ou pe asosye avek bann Temwen Zeova e asiste bann renyon kot Lasal Rwayonm. Me Zeova pou fer plis ki rekonpans ou pour nenport kwa ki ou’n sakrifye pour son ladorasyon. (Malaki 3:10) Deplis, Zezi ti dir: “Tou sa ki’n kit son lakaz, son bann frer, son bann ser, son manman, son papa, son bann zanfan, oubyen son later akoz mwan e akoz Levanzil, pou ganny konmela san fwa plis, bann lakaz, bann frer, bann ser, bann manman, bann zanfan, bann later avek bann persekisyon; e dan lemonn fitir i a ganny lavi eternel.” (Mark 10:29, 30) Wi, nenport kwa ki ou’n kit deryer oubyen nenport kwa ki ou bezwen andire, ou pou kapab retrouv bann konpanni agreab e sekirite spirityel parmi pep Bondye.

TESTE OU KONNESANS

Lekel “lesklav fidel e pridan”?

Ki provizyon ki Zeova in fer pour nouri nou spirityelman?

Konman bann ki dan kongregasyon Kretyen i kapab ed nou?

[Portre lo paz 165]