1 Corintios
11 Lajiñonla, cheʼ bajcheʼ joñon mic lajin Cristo.
2 Hermanojob, mic wen aqʼueñetla wocolix laʼ wʌlʌ come mi laʼ cʼajtesañon tiʼ pejtelel chuqui mi laʼ mel yicʼot chaʼan wolʌch laʼ mel pejtelel cheʼ bajcheʼ tsaʼ j cʌntesayetla. 3 Pero com mi laʼ ñaʼtan chaʼan i jol pejtelel wiñic jiñʌch Cristo, jiñi i jol xʼixic jiñʌch jiñi wiñic i jiñi i jol Cristo jiñʌch Dios. 4 Pejtelel wiñic muʼ bʌ i mos i jol cheʼ miʼ mel oración o cheʼ miʼ sub i tʼan Dios miʼ yʌcʼ ti quisin i jol, 5 pero pejtelel xʼixic mach bʌ mosolic i jol cheʼ miʼ mel oración o cheʼ miʼ sub i tʼan Dios miʼ yʌcʼ ti quisin i jol, come lajal bajcheʼ jujchibil i jol. 6 Come mi jiñi xʼixic maʼañic miʼ mos i jol, yom wen pʼots miʼ tsep. Pero mi jiñi xʼixic quisintic miʼ yubin cheʼ wen pʼots miʼ tsep i tsutsel i jol o cheʼ miʼ jujchin, laʼ i mos i jol.
7 Jiñi wiñic mach yomic miʼ mos i jol, come jiñʌch i yejtal yicʼot i ñuclel Dios, pero jiñi xʼixic i ñuclelʌch jiñi wiñic. 8 Come jiñi wiñic mach tilemic ti xʼixic, jiñi xʼixic tilem ti wiñic. 9 Cheʼ jaʼel, jiñi wiñic mach tiʼ cajic jiñi xʼixic tsaʼ mejli, jiñi xʼixic tsaʼ mejli tiʼ caj jiñi wiñic. 10 Tiʼ caj iliyi yicʼot tiʼ caj jiñi ángelob jiñi xʼixic añʌch chuqui yom an tiʼ jol muʼ bʌ i pʌs chaʼan añʌch baqui chucul.
11 Pero yaʼ tiʼ congregación lac Yum, jiñi wiñic i cʼʌjñibal i chaʼan jiñi xʼixic i jiñi xʼixic i cʼʌjñibal i chaʼan jiñi wiñic. 12 Come cheʼ bajcheʼ jiñi xʼixic tilem ti wiñic, jiñi wiñic miʼ yilan pañimil ti xʼixic jaʼel. Pero pejtelel chuqui an tilem ti Dios. 13 Jatetla mi laʼ ñaʼtan mi cheʼʌchi o mach cheʼiqui: ¿Toj ba cheʼ jiñi xʼixic miʼ melben oración Dios mi mach mosbilic i jol? 14 Jiñi bajcheʼ melbil lac piʼʌlob, ¿maʼañic ba miʼ pʌsbeñetla chaʼan tiʼ tojlel jiñi wiñic quisintic jax cheʼ tam i jol, 15 pero cheʼ bʌ jiñi xʼixic tam i jol chaʼañʌch i ñuclel? Come jiñi i tsutsel i jol tsaʼ aqʼuenti bajcheʼ i moslib. 16 Pero mi an majqui yom i coltan yambʌ costumbre, laʼ i ñaʼtan chaʼan mi joñoñicto lon i mi jiñicto jiñi i congregación tac Dios an yambʌ lon j costumbre.
17 Pero yicʼot ili ujtel bʌ c subeñetla maʼañic woli cʌl chaʼan weñʌch chuqui woli laʼ mel, come cheʼ bʌ mi laʼ tempan laʼ bʌ, maʼañic mi laʼ taj laʼ wenlel, mucʼ jach laʼ ticʼlan laʼ bʌ. 18 Com bʌ c ñaxan subeñetla jiñʌch chaʼan tsaʼ cubi chaʼan cheʼ bʌ mi laʼ tempan laʼ bʌ bajcheʼ congregación an tʼox bʌ ti laʼ tojlel, i mucʼʌch c tsʼitaʼ ñop. 19 Come tiʼ sujm an muʼ bʌ caj i tʼoxob tac i bʌ ti laʼ tojlel, chaʼan miʼ jamʌ tsictiyel majqui mucʼʌch i qʼuejlel ti utsʼat tiʼ tojlel Dios.
20 Cheʼ bʌ an baqui mi laʼ tempan laʼ bʌ, tiʼ sujm mach chaʼañic mi laʼ cʼux jiñi i Cena lac Yum. 21 Come cheʼ bʌ mi laʼ cʼux, jujuntiquil tsaʼix i ñaxan cʼuxu i waj, jin chaʼan cheʼ bʌ juntiquil an i wiʼñal, yʌquix* jiñi yambʌ. 22 ¿Maʼañic ba laʼ wotot baqui mi laʼ cʼux laʼ waj yicʼot mi laʼ jap chuqui mi laʼ jap? ¿O maʼañic mi laʼ qʼuel ti ñuc jiñi i congregación Dios yicʼot mi laʼ wʌcʼob ti quisin jiñi mach bʌ añobic i chubʌʼan? ¿Chuqui miʼ mejlel c subeñetla? ¿Yom ba mi cʌl chaʼan weñʌch woli bʌ laʼ mel? Tiʼ sujm maʼañic.
23 Come jiñi tsaʼ bʌ c pʌsbeyetla jiñʌch tsaʼ bʌ j cʌñʌ ti lac Yum: Chaʼan ti jiñi acʼʌlel cheʼ bʌ mi caj i yʌjqʼuel tiʼ cʼʌb i contrajob, jiñi lac Yum Jesús tsiʼ chʼʌmʌ jumpʼejl pan 24 i cheʼ bʌ tsaʼ ujti i yʌqʼuen wocolix i yʌlʌ Dios, tsiʼ xutʼu i tsiʼ yʌlʌ: «Iliyi i wentʌlelʌch c bʌcʼtal, muʼ bʌ i yʌjqʼuel chaʼan laʼ wenlel. Chʌn melela iliyi chaʼan mi laʼ cʼajtesañon». 25 Cheʼ bʌ tsaʼ ujtiyob ti cʼux waj ti icʼan, cheʼʌch tsiʼ mele jaʼel yicʼot jiñi copa i tsiʼ yʌlʌ: «Ili copa i wentʌlelʌch jiñi tsijiʼ bʌ trato, muʼ bʌ caj i tejchel cheʼ bʌ miʼ bejqʼuel jiñi c chʼichʼel. Jajayajl mi laʼ jap ili copa chʌn melela chaʼan mi laʼ cʼajtesañon». 26 Come jajayajl mi laʼ cʼux jiñi pan i mi laʼ jap jiñi vino am bʌ ti copa, woli laʼ sub chaʼan tsaʼ chʌmi lac Yum, cʼʌlʌl jinto miʼ tilel.
27 Jin chaʼan, majqui jach miʼ cʼux jiñi pan i miʼ jap jiñi i copa lac Yum pero maʼañic miʼ qʼuel ti ñuc, woliʼ chaʼlen mulil tiʼ contra i bʌcʼtal yicʼot i chʼichʼel lac Yum. 28 Laʼ i ñaxan tsajin i bʌ* jujuntiquil chaʼan miʼ qʼuel mi tojʌch chuqui woli i mel, cojach cheʼ bajcheʼ jiñi miʼ mejlel i cʼux jiñi pan yicʼot miʼ jap jiñi copa. 29 Mi an maʼañic bʌ miʼ ñaʼtan chaʼan jiñi i wentʌlelʌch i bʌcʼtal lac Yum, woliʼ bajñel otsan i mul mi tsiʼ cʼuxu yicʼot mi tsiʼ japʌ. 30 Jin chaʼan cabʌletla cʼuñetbʌla yicʼot cʼametbʌla, i cabʌlob chʌmeñoʼ bʌ.* 31 Pero cheʼ muqʼuic lac tsajin bajcheʼ yilalonla, maʼañic miʼ yujtel meloñel ti lac tojlel. 32 Pero cheʼ bʌ miʼ yujtel meloñel ti lac tojlel, Jehová* miʼ tojʼesañonla chaʼan maʼañic mi la cʌqʼuentel lac toj lac mul la quicʼot jiñi pañimil. 33 Jin chaʼan, quermañujob, cheʼ bʌ mi laʼ tempan laʼ bʌ chaʼan mi laʼ cʼux jiñi bʌlñʌcʼʌl, pijtan laʼ bʌ. 34 Mi an majqui wiʼñal, laʼ i cʼux i waj tiʼ yotot, chaʼan maʼañic mi laʼ tajbentel laʼ mul cheʼ bʌ mi laʼ tempan laʼ bʌ. Chaʼan jiñi yan tac bʌ wocol, jinto mij cʼotel yaʼi mi caj c tojʼesan.