1 Corintios
10 Hermanojob, com mi laʼ ñaʼtan chaʼan pejtelel jiñi lac ñojteʼelob tsaʼ ajñiyob tiʼ yebal jiñi tocal, tiʼ pejtelelob tsaʼ cʼaxiyob ti mar, 2 tiʼ pejtelelob tsiʼ chʼʌmʌyob jaʼ ti Moisés cheʼ bʌ yaʼañob tiʼ yebal tocal yicʼot cheʼ bʌ tsaʼ cʼaxiyob ti mar, 3 junsujm jach bʌ bʌlñʌcʼʌl tilem bʌ ti Dios tsiʼ cʼuxuyob 4 i junsujm jach bʌ jaʼ tilem bʌ ti Dios tsiʼ japʌyob. Mach junsujtelic jach tsiʼ japʌyob jiñi jaʼ yaʼ ti colem xajlel* añoʼ bʌ tiʼ tʼejl. Ili tilemʌch ti Dios yicʼot i wentʌlelʌch Cristo. 5 Pero lʌcʼʌ tiʼ pejtelelob maʼañic tsiʼ meleyob chuqui utsʼat tiʼ wut Dios, tsaʼ chʌmiyob yaʼ tiʼ tiquiñal lum.
6 Iliyi miʼ cʼʌjñibʌyel lac chaʼan bajcheʼ ejemplo chaʼan maʼañic mi lac mulan tac muʼ bʌ i mejlel i ticʼlañonla, cheʼ bajcheʼ tsiʼ meleyob. 7 Cheʼ jaʼel, mach lac chʼujutesan jiñi melbil tac jach bʌ dios, cheʼ bajcheʼ tsiʼ meleyob chaʼtiqui uxtiquilob, cheʼʌch bajcheʼ tsʼijbubil: «Jiñi lac piʼʌlob tsaʼ buchleyob i cʼuxob i waj yicʼot i japob chuqui miʼ japob, cheʼ jiñi tsaʼ tejchiyob chaʼan miʼ tijicñesañob i bʌ». 8 Cheʼ jaʼel, mach lac chaʼlen tsʼiʼlel,* cheʼ bajcheʼ tsiʼ chaʼleyob tsʼiʼlel* chaʼtiqui uxtiquilob, jin chaʼan ti jumpʼejl jach qʼuin tsaʼ chʌmiyob 23 mil. 9 Mach laj qʼuelben i pusicʼal Jehová* jaʼel, cheʼ bajcheʼ tsiʼ meleyob chaʼtiqui uxtiquilob i cheʼ jiñi tsaʼ chʌmiyob cheʼ bʌ tsaʼ cʼuxleyob ti lucum. 10 Cheʼ jaʼel, mach yomic mi lac chaʼlen wulwul tʼan, cheʼ bajcheʼ tsiʼ chaʼleyob wulwul tʼan chaʼtiqui uxtiquilob i ti wiʼil tsaʼ chʌmiyob tiʼ cʼʌb jiñi xjisaya. 11 Weno, pejtelel iliyi tsaʼ ujti chaʼan miʼ cʼʌjñibʌyel bajcheʼ laj cʌntesʌntel, i tsaʼ tsʼijbunti chaʼan lac ticʼol, joñonla chumulonbʌla tiʼ yujtibal ili ora.
12 Jin chaʼan, jiñi muʼ bʌ i ñaʼtan chaʼan xucʼulʌch an, laʼ i cʌntan i bʌ chaʼan maʼañic miʼ yajlel. 13 Jiñi i qʼuelbentel laʼ pusicʼal muʼ bʌ laʼ ñusan jiñʌch muʼ bʌ i ñusañob pejtelel lac piʼʌlob. Pero Dios xucʼulʌch i maʼañic mi caj i yʌcʼ chaʼan mi laʼ qʼuelbentel laʼ pusicʼal baqui jaxʌl maʼañix miʼ mejlel laʼ lʌtʼ, i cheʼ bʌ mi laʼ qʼuelbentel laʼ pusicʼal mi caj i yʌqʼueñetla laʼ loqʼuib jaʼel chaʼan miʼ mejlel laʼ cuch.
14 Jin chaʼan, cʼuxbibiletbʌla c chaʼan, putsʼtanla jiñi i chʼujutesʌntel melbil tac jach bʌ dios. 15 Mic pejcañetla bajcheʼ lac piʼʌlob añoʼ bʌ i ñaʼtʌbal. Jatetixla mi laʼ qʼuel mi i sujm o mach i sujmic jiñi woli bʌ cʌl. 16 Mi la cʌqʼuen wocolix i yʌlʌ Dios chaʼan jiñi copa chaʼan bʌ vino, iliyi i wentʌlelʌch i chʼichʼel Cristo, ¿mach ba cheʼiqui? Jiñi pan muʼ bʌ lac xutʼ i wentʌlelʌch i bʌcʼtal Cristo jaʼel, ¿mach ba cheʼiqui? 17 An jach jumpʼejl pan, jin chaʼan, anquese cabʌlonla, jumpʼejl lon jachla ti lac bʌcʼtal, ti lac pejtelel mi laj cʼux jiñi cojach bʌ pan.
18 Ñaʼtancula jiñi israelitajob. Cheʼ bʌ miʼ cʼuxob jiñi tsʌnsʌbil bʌ majtañʌl muʼ bʌ i yʌjqʼuel yaʼ ti pulʌntib, ¿mach ba lajalic bajcheʼ woliyob ti uchʼel yicʼot Dios? 19 Cheʼ jiñi, ¿chuqui com cʌl? ¿Chaʼan ba an i cʼʌjñibal jiñi majtañʌl muʼ bʌ i yʌqʼuentel jiñi melbil tac jach bʌ dios? ¿O chaʼan an i cʼʌjñibal jiñi melbil tac jach bʌ dios? 20 Maʼañic. Jiñi com bʌ cʌl jiñʌch chaʼan jiñi tsʌnsʌbil bʌ majtañʌl muʼ bʌ i yʌcʼob jiñi tejclum tac, miʼ yʌqʼueñob xibajob i mach jiñic Dios, i mach comic mi laʼ wis otsan laʼ bʌ tiʼ chaʼan tac bʌ xibajob. 21 Maʼañic miʼ mejlel laʼ jap tiʼ copa Jehová* yicʼot tiʼ copa xibajob. Cheʼ jaʼel maʼañic miʼ mejlel laʼ cʼux chuqui an «tiʼ mesa Jehová»* yicʼot tiʼ mesa xibajob. 22 ¿O ‹woli la cʌcʼ ti michʼ Jehová›?* Joñonla mach ñumen pʼʌtʌloñicla, ¿o cheʼʌchi?
23 Miʼ laj mejlel lac mel, pero mach tiʼ pejtelelic miʼ yʌcʼ wenlel. Miʼ laj mejlel lac mel, pero mach tiʼ pejtelelic miʼ pʼʌtʼesañonla. 24 Maʼañic majqui yom miʼ bajñel sʌclan i wenlel, laʼ i sʌclʌben i wenlel yambʌlob.
25 Cʼuxula pejtelel muʼ bʌ i chojñel yaʼ baqui miʼ chojñel weʼel i mach laʼ mel cʼajtiya tac chaʼan ñʌchʼʌl miʼ yajñel laʼ conciencia, 26 come «i chaʼañʌch Jehová* jiñi lum yicʼot pejtelel jiñi i bʌl». 27 Mi juntiquil mach bʌ xñoptʼañic miʼ pʌyetla ti uchʼel i laʼ womʌch majlel, cʼuxula chuqui jach mi laʼ wʌqʼuentel i mach laʼ mel cʼajtiya tac chaʼan ñʌchʼʌl miʼ yajñel laʼ conciencia. 28 Pero mi an majqui miʼ subeñetla «Iliyi tsaʼ aqʼuenti tiʼ majtan jiñi melbil tac jach bʌ dios», mach laʼ cʼux chaʼan maʼañic mi laʼ wʌcʼ ti yajlel jiñi tsaʼ bʌ i subeyetla iliyi yicʼot chaʼan maʼañic majqui mi laʼ lowben i conciencia. 29 Mach jiñic woli c taj ti tʼan jiñi a conciencia, jiñʌch i chaʼan jiñi yambʌ lac piʼʌl. Come ¿chucoch yom miʼ chaʼlen meloñel tic tojlel jiñi i conciencia yambʌ tiʼ caj librejon? 30 Cheʼto jaʼel, mi tsaʼ c chaʼle uchʼel i mi cʌqʼuen wocolix i yʌlʌ Dios chaʼan iliyi, ¿yomʌch ba mic mel mi miʼ yʌcʼ chaʼan jiñi yambʌlob miʼ yʌloñob?
31 Jin chaʼan, mach yʌlʌyic mi woliyetla ti uchʼel, mi an chuqui woli laʼ jap o jin jach chuqui woli laʼ mel, laj melela chaʼan i ñuclel Dios. 32 Mach laʼ wʌcʼ ti yajlel judíojob, griegojob yicʼot jiñi i congregación Dios, 33 cheʼ bajcheʼ joñon mic ñop c mel chuqui utsʼat ti laʼ tojlel tiʼ pejtelel chuqui mic mel cheʼ maʼañic mic bajñel sʌclan c wenlel, mic sʌclʌben i wenlel cabʌlob, chaʼan miʼ mejlelob ti coltʌntel.