Judas

1 I chaʼan Judas, i yijtsʼiñon Santiago yicʼot xyaj eʼtelon i chaʼan Jesucristo, woli c tsʼijbubeñob jiñi yajcʌbiloʼ bʌ yicʼot cʼuxbibiloʼ bʌ ti Dios, jiñi lac Tat, yicʼot cʌntʌbiloʼ bʌ chaʼan miʼ yajñelob yicʼot Jesucristo:

2 Ñumen tajala jiñi pʼuntaya, ñʌchʼtʌlel yicʼot cʼuxbiya.

3 Cʼuxbibiletbʌla, tsaʼ c lon chaʼle wersa c tsʼijbubeñetla chaʼan bʌ jiñi laj coltʌntel. Pero tsaʼ j qʼuele chaʼan yom mic tsʼijbun baqui mic subeñetla chaʼan mi laʼ ñumen chaʼlen wersa ti jiñi laʼ ñopoñel, junsujtel jach bʌ* tsaʼ aqʼuenti jiñi chʼujuloʼ bʌ. 4 Woli c tsʼijbubeñetla come yaʼ baqui añetla tsaʼ mucu ochiyob wiñicob añix bʌ ora tsaʼ ajli yaʼ ti Tsʼijbujel chaʼan mi caj i jisʌntelob. Iliyob maʼañic miʼ bʌcʼñañob Dios, miʼ cʼʌñob jiñi ñuc bʌ i yutslel Dios chaʼan maʼañobic i quisin miʼ melob mach bʌ weñic* yicʼot mach xucʼulobic tiʼ tojlel jiñi cojach bʌ lac Yum Jesucristo.

5 Anquese wen laʼ wujilix, com j c’ajtesʌbeñetla chaʼan Jehová* tsiʼ colta loqʼuel i tejclum yaʼ ti Egipto, pero ti wiʼil tsiʼ jisa jiñi maʼañic bʌ tsiʼ pʌsʌyob i ñopoñel. 6 I jiñi ángelob mach bʌ añic tsaʼ cʌyleyob yaʼ tiʼ yajñib i tsiʼ cʌyʌyob jiñi i chumlib, tsiʼ cʌchʌyob ti cadena mach bʌ añic miʼ jilel yaʼ ti icʼchʼipan bʌ ajñibʌl chaʼan i qʼuiñilel meloñel. 7 Cheʼ jaʼel, Sodoma yicʼot Gomorra i jiñi tejclum tac yaʼ bʌ an tiʼ joytʌlel, ñumeñix ti pʼis tsiʼ chaʼleyob tsʼiʼlel* i tsiʼ meleyob cheʼ bajcheʼ yomob tiʼ bʌcʼtal anquese mach cheʼic acʼbilob. Cheʼ bʌ tsaʼ junyajl jisʌntiyob, chaʼañʌch mi laj cʌybentel jumpʼejl laj cʌntesʌntel.

8 Anquese ujtem tac iliyi, ili wiñicob miʼ wen ñaʼtañob mach bʌ wentaquic, miʼ bibʼesañob i bʌcʼtal,* maʼañic miʼ qʼuelob ti ñuc añoʼ bʌ i yeʼtel yicʼot miʼ yʌlob mach bʌ weñic tiʼ tojlelob jiñi añoʼ bʌ i ñuclel. 9 Pero cheʼ bʌ jiñi arcángel Miguel tsiʼ chaʼle leto* yicʼot jiñi Diablo chaʼan jiñi i bʌcʼtal Moisés, tsiʼ pʌsʌ i pecʼlel i maʼañic tsiʼ chaʼle meloñel tiʼ tojlel, tsaʼ jach i sube: «Laʼto i chaʼlen meloñel Jehová* ti a tojlel». 10 Pero jiñi wiñicob miʼ yʌlob mach bʌ wentaquic chaʼan chuqui tac mach bʌ añic miʼ chʼʌmbeñob i sujm. I woliʼ bajñel asiñob i bʌ chaʼan jiñi mucʼʌch bʌ i poj chʼʌmbeñob i sujm cheʼ bajcheʼ miʼ bajñel ñaʼtañob, lajalob bajcheʼ añimal.

11 Mi caj i tajob wocol come woliʼ tsajcʌbeñob i bijlel Caín, tsiʼ lajibeyob i melbal Balaam chaʼan miʼ tajob i chobejtʌbal i tsaʼ jisʌntiyob chaʼan tsiʼ chañʼesayob i bʌ tiʼ tʼan bajcheʼ Coré. 12 Ili wiñicob lajalob bajcheʼ ñuqui xajlel* am bʌ tiʼ malil jaʼ cheʼ bʌ miʼ chaʼleñob uchʼel yicʼotetla yaʼ ti ñuc bʌ uchʼibʌl tac muʼ bʌ laʼ mel chaʼan mi laʼ pʌs cʼuxbiya, lajalob bajcheʼ xcʌnta tiñʌmeʼob mach bʌ añobic i bʌqʼuen miʼ bajñel weʼsañob i bʌ, lajalob bajcheʼ tocal mach bʌ añic miʼ chʼʌm tilel jaʼal cheʼ jach bʌ miʼ wetsʼ ñumel icʼ, lajalob bajcheʼ teʼ mach bʌ añic miʼ yʌcʼ i wut tiʼ yorajlel, tsaʼix bʌ junyajl chʌmi i cʼʌlʌl bʌ tiʼ wiʼ tsaʼ bojqui, 13 bʌbʌqʼuentic bʌ wʌlʌcña bʌ jaʼ ti mar, miʼ chocob loqʼuel i tsuculel yom bʌ miʼ yʌcʼob ti quisin, ecʼ tac mach bʌ junsujmic i bijlel, Dios tsiʼ yʌcʼʌyob yaʼ ti ñumen icʼchʼipan bʌ ajñibʌl chaʼan miʼ yajñelob tiʼ pejtelel ora.

14 Enoc, jiñi i sietejlel bʌ tiʼ pʼolbal Adán, tsiʼ wʌn alʌ tiʼ tojlelob jaʼel: «¡Laʼ wilan! Jehová* tsaʼ tili yicʼot yonlel i yángelob 15 chaʼan miʼ chaʼlen meloñel tiʼ tojlel pejtelel lac piʼʌlob yicʼot chaʼan miʼ pʌs chaʼan jiñi mach bʌ i cʌñʌyobic Dios yicʼotob i jontolil tsiʼ meleyob mach bʌ weñic yicʼot tsiʼ yʌlʌyob mach bʌ wentaquic tiʼ tojlel».

16 Ili wiñicob miʼ chaʼleñob wulwul tʼan, mach tijicñayobic yicʼot jiñi i chubʌʼañob i miʼ melob cheʼ bajcheʼ bajñel yomob. Ñuc miʼ yubiñob i bʌ tiʼ tʼan, miʼ subeñob utsʼatax bʌ tʼan jiñi yambʌlob chaʼan jach miʼ tajob i wenlel.

17 Pero jatetla, cʼuxbibiletbʌla, cʼajtesanla tsaʼ bʌ i ñaxan alʌyob jiñi apóstolob i chaʼan lac Yum Jesucristo. 18 Tsiʼ wen subeyetobla: «Ti jiñi cojix tac bʌ qʼuin, tal xwajleyajob muʼ bʌ caj i melob mach bʌ weñic cheʼ bajcheʼ bajñel yomob». 19 Iliyob miʼ chaʼleñob tʼox bʌ, lajalob i melbal bajcheʼ añimal, maʼañobic i chaʼan i yespíritu Dios. 20 Pero jatetla, cʼuxbibiletbʌla, xucʼchoconla jiñi chʼujul bʌ laʼ ñopoñel yicʼot chaʼlenla oración tiʼ coltaya jiñi chʼujul bʌ espíritu 21 chaʼan mi laʼ chʌn ajñel tiʼ cʼuxbiya Dios, cheʼ wolito laʼ pijtan laʼ pʼuntʌntel ti lac Yum Jesucristo chaʼan mi laʼ taj laʼ cuxtʌlel mach bʌ yujilic jilel. 22 Cheʼ jaʼel, chʌn pʼuntanla jiñi tile bixelobto bʌ i pusicʼal chaʼan chuqui miʼ ñopob, 23 coltanla chaʼan maʼañic miʼ jisʌntelob. Chʌn pʼuntanla jaʼel jiñi yambʌlob pero yom tsajaletla,* i tsʼaʼlenla jiñi melbalʌl tac bibʼesʌbil bʌ ti mulil.

24 Wʌleʼli, jiñi muʼ bʌ i mejlel i cʌntañetla chaʼan maʼañic mi laʼ yajlel ti mulil yicʼot chaʼan toj mi laʼ wajñel, chaʼan maʼañic laʼ sajtemal yicʼot wen tijicñayetla tiʼ tojel i ñuclel, 25 jiñi cojach bʌ Dios, la caj Coltaya tiʼ tojlel lac Yum Jesucristo, laʼ sujbic i ñuclel, i yumʌntel, i pʼʌtʌlel yicʼot i yeʼtel tiʼ pejtelel ora: Ti wajali, ti ili ora yicʼot tiʼ pejtelel ora. Amén.