Filipenses
3 Jin chaʼan, quermañujob, yom tijicñayetla tiʼ caj lac Yum tiʼ pejtelel ora. Maʼañic mij cʼojyel c tsʼijbubeñetla anquese chʌn jin jach bʌ tʼan, chaʼañʌch mi laʼ cʌntan laʼ bʌ.
2 Cʌntan laʼ bʌ tiʼ tojlel jiñi lajaloʼ bʌ bajcheʼ tsʼiʼ, cʌntan laʼ bʌ tiʼ tojlel jiñi muʼ bʌ i ticʼlañob yañoʼ bʌ, cʌntan laʼ bʌ tiʼ tojlel jiñi muʼ bʌ i tsepob lac bʌcʼtal. 3 Come joñonla an lac chaʼan jiñi i sujm bʌ tsep pʌchʌlel,* joñonla woli bʌ lac mel jiñi chʼujul bʌ eʼtel tiʼ coltaya i yespíritu Dios i woli laj qʼuel lac bʌ ti ñuc ti Cristo i maʼañic mi la cʌcʼ lac ñopoñel ti chuqui tac tilem bʌ ti wiñicob, 4 anquese, mi an majqui miʼ mejlel i ñop ti chuqui tac tilem bʌ ti wiñicob, joñoñʌch.
Mi an muʼ bʌ i ñaʼtan chaʼan añʌch chucoch miʼ mejlel i ñop ti chuqui tac tilem bʌ ti wiñicob, ñumento joñon: 5 Tsaʼ tsepbentiyon c pʌchʌlel cheʼ bʌ añon jaxto 8 qʼuin, tilemon ti tejclum Israel, tiʼ pʼolbal Benjamín, hebreojon come hebreojob jiñi c tatob, fariseojon come mic laj jacʼ jiñi mandar, 6 joñon tsaʼ c wen contraji jiñi congregación i, chaʼan bʌ jiñi i melol chuqui toj cheʼ bajcheʼ miʼ yʌl jiñi mandar, tsaʼ c pʌsʌ chaʼan maʼañic c mul. 7 Pero jiñi lon ñuc tac bʌ i cʼʌjñibal chaʼañon, maʼañix i cʼʌjñibal mij qʼuel* come xcʌntʼañon i chaʼan Cristo. 8 Cheʼ jaʼel, maʼañic i cʼʌjñibal mij qʼuel pejtelel chuqui an tiʼ caj bajcheʼ cʼamel i cʼʌjñibal jiñi tsaʼ bʌ j cʌñʌ tiʼ tojlel Cristo Jesús jiñi c Yum. Tiʼ caj jiñi, maʼañic i cʼʌjñibal mij qʼuel pejtelel chuqui an i mij qʼuel bajcheʼ yonlel basura, chaʼan mic taj Cristo 9 i chaʼan mij cʌjñel bajcheʼ xcʌntʼan i chaʼan, pero mach chaʼañic tsaʼ c bajñel mele chuqui toj cheʼ tsaʼ c tsʼʌctesa jiñi Mandar, chaʼañʌch jiñi tojel muʼ bʌ i tajtʌl ti lac ñopoñel ti Cristo, jiñi tojel tilem bʌ ti Dios i chucul ti lac ñopoñel. 10 Jiñi com bʌ jiñʌch cheʼ mij cʌn, mij cʌmben i pʼʌtʌlel jiñi i chaʼ chʼojyesʌntel* yicʼot chaʼan mic ñusan jiñi wocol tac tsaʼ bʌ i ñusa, cheʼ mi cʌcʼ c bʌ ti chʌmel cheʼ bajcheʼ tsaʼ chʌmi, 11 chaʼan mij qʼuel mi an bajcheʼ miʼ mejlel c taj jiñi ñaxam bʌ i chaʼ chʼojyesʌntel chʌmeñoʼ bʌ.
12 Mach yomic i yʌl chaʼan tsaʼix c taja jiñi c majtan yicʼot chaʼan tojoñix, woli c bej chaʼlen wersa chaʼan mij qʼuel mi mucʼʌch i mejlel c taj jaʼel jiñi tsaʼ bʌ i yajca Cristo chaʼañon. 13 Hermanojob, maʼañic mi cʌl chaʼan tsaʼix c taja. Pero añʌch junchajp muʼ bʌ c mel: Cheʼ bʌ woli c ñajʌtesan pejtelel tsaʼ bʌ j cʌyʌ tic pat i woli c sʌtsʼ c bʌ chaʼan mic taj jiñi muʼto bʌ caj i tilel, 14 woli c chaʼlen wersa chaʼan mij cʼotel yaʼ baqui yom mij cʼotel chaʼan mic taj jiñi majtañʌl, ili jiñʌch cheʼ pʌybilon ti Dios chaʼan mic majlel ti panchan tiʼ coltaya Cristo Jesús. 15 Jin chaʼan, joñonla añix bʌ laj colel cheʼ yom mi lac ñaʼtan bajcheʼ ili tsaʼix bʌ c subeyetla, pero mi qʼuexel bajcheʼ mi laʼ ñaʼtan jatetla, Dios mi caj i coltañetla chaʼan cheʼ mi laʼ ñaʼtan bajcheʼ iliyi. 16 Pero, mach yʌlʌyic bajcheʼix cʼamel lac taja laj colel, toj yom mi lac bej chaʼlen xʌmbal ti jin jach bʌ bij.
17 Hermanojob, juntemeletla yom mi laʼ lajiñon i qʼuelela jiñi chumuloʼ bʌ cheʼ bajcheʼ chumulon lojon tsaʼ laʼ qʼuele. 18 Come cabʌlob chumuloʼ bʌ bajcheʼ i contra jiñi teʼ chaʼan bʌ wocol* i chaʼan bʌ Cristo, ti ñaxan muʼto c wen tajob ti tʼan i wʌle yicʼot i yaʼlel c wut mic tajob ti tʼan jaʼel. 19 Ti wiʼil, mi caj i jisʌntelob i jiñi i diosob jiñʌch i yebalob i ñʌcʼ, ñuc miʼ yubiñob i bʌ chaʼan tac jiñi yom bʌ miʼ yʌqʼueñob i yubin quisin i yaʼañob i ñaʼtʌbal ti chuqui tac an ti pañimil. 20 Pero joñonla yaʼʌch an lac chumlib ti panchan, i woli lac wen pijtan juntiquil xcoltaya tilem bʌ ti panchan, lac Yum Jesucristo, 21 muʼ bʌ caj i cʼʌn jiñi ñuc bʌ i pʼʌtʌlel chaʼan miʼ qʼuextan jiñi lac bʌcʼtal mach bʌ añic i cʼʌjñibal chaʼan miʼ sujtel bajcheʼ jiñi wen ñuc bʌ i bʌcʼtal, jiñi i pʼʌtʌlel miʼ yʌqʼuen i chʼʌm tiʼ wenta pejtelel chuqui an.