Hebreos

9 Pero jiñi trato am bʌ ti ñaxan an i chaʼan mandar tac chaʼan jiñi chʼujul bʌ eʼtel yicʼot an chʼujul bʌ i yajñib wʌʼ ti lum. 2 Jiñi pisil bʌ otot tʼoxbil ti chaʼpʼejl. Ti jiñi ñaxam bʌ yaʼan jiñi candelabro, jiñi mesa yicʼot jiñi chʼujul bʌ pan,* i cʼabaʼ jiñi ñaxam bʌ jiñʌch Chʼujul bʌ ajñibʌl. 3 Pero yaʼ tiʼ pat jiñi yambʌ cortina yaʼan jiñi i chaʼpʼejlel, cʌmbil bʌ bajcheʼ jiñi Wen chʼujul bʌ ajñibʌl. 4 Yaʼan i yajñib pom melbil bʌ ti oro yicʼot jiñi arca chaʼan trato melbil bʌ ti oro. Yaʼ tiʼ malil yaʼan jiñi jarra melbil bʌ ti oro am bʌ i chaʼan jiñi maná, jiñi i teʼ Aarón tsaʼ bʌ i yʌcʼʌ i ñich yicʼot jiñi wechel tac bʌ xajlel* chaʼan bʌ trato, 5 i yaʼ tiʼ pam yaʼan jiñi querubiñob wen añoʼ bʌ i ñuclel woli bʌ i mʌcob tiʼ yʌxñal jiñi ajñibʌl baqui miʼ ñusʌntel mulil. Pero wʌleʼli mach i yorajlelic chaʼan mi lac laj tsictesan iliyi.

6 Cheʼ chajpʌbilix tac iliyi, jiñi sacerdotejob ti jujumpʼejl qʼuin miʼ yochelob yaʼ ti ñaxam bʌ i mal jiñi pisil bʌ otot chaʼan miʼ melob chʼujul bʌ eʼtel, 7 pero ti jiñi i chaʼpʼejlel, jiñi ñumen ñuc bʌ sacerdote junsujtel jach miʼ yochel ti jumpʼejl jab, i bajñel jach, i miʼ chʼʌm ochel jiñi chʼichʼ muʼ bʌ i yʌcʼ chaʼan jiñi i mul yicʼot chaʼan jiñi i mul mach bʌ yilolic i chaʼan miʼ taj jiñi tejclum. 8 Cheʼ bajcheʼ iliyi, jiñi chʼujul bʌ espíritu miʼ pʌs chaʼan, cheʼ bʌ anto jiñi ñaxam bʌ pisil otot, maxto tsictiyemic baqui bʌ jiñi bij chaʼan jiñi chʼujul bʌ ajñibʌl. 9 Ili pisil bʌ otot jumpʼejlʌch lajiya chaʼan ili ora i miʼ pʌs chaʼan jiñi majtañʌl tac yicʼot jiñi tsʌnsʌbil bʌ añimal tac muʼ bʌ i yʌjqʼuel maʼañic miʼ mejlel i yʌqʼuen sʌc bʌ i conciencia jiñi wiñic muʼ bʌ i mel chʼujul bʌ eʼtel. 10 Pejtelel iliyi chaʼan tac jach bʌlñʌcʼʌl, chuqui tac miʼ jajpel yicʼot bajcheʼ tac miʼ sʌqʼuesʌntel jiñi lac piʼʌlob yicʼot chuqui tac an. Ili jiñʌch mandar tac chaʼan chuqui tac yom miʼ mejlel ti lac bʌcʼtal i wersa yom miʼ tsʼʌctesʌntel jinto miʼ tsʼʌctiyel jiñi i yorajlel waʼchocobil bʌ chaʼan miʼ tojʼesʌntel chuqui tac an.

11 Pero cheʼ bʌ Cristo tsajñi bajcheʼ ñumen ñuc bʌ sacerdote chaʼan miʼ chʼʌm tilel chuqui tac wem bʌ wolix bʌ i tsʼʌctiyel, tsaʼ ochi ti jiñi pisil bʌ otot ñumen ñuc bʌ i cʼʌjñibal yicʼot ñumen toj bʌ, mach bʌ melbilic tiʼ cʼʌb wiñicob, yom i yʌl, mach bʌ wʌʼic an ti lum. 12 Junsujtel tsaʼ ochi yaʼ ti chʼujul bʌ ajñibʌl i chaʼañʌch tiʼ pejtelel ora, pero mach yicʼotic i chʼichʼel chivo yicʼot alʌ tat wacax, yicʼotʌch i bajñel chʼichʼel, i tsiʼ tojo laj coltʌntel chaʼan tiʼ pejtelel ora. 13 Jiñi sacerdotejob miʼ cʼʌñob i chʼichʼel chivo yicʼot tat wacax i miʼ pʼujpʼuñob i tʌñil xchʼoc wacax tiʼ tojlel jiñi bibiʼoʼ bʌ i cheʼ bajcheʼ jiñi sʌc miʼ qʼuejlelob tiʼ wut Dios, 14 mi jiñi tsʌnsʌbil bʌ añimal tac tiʼ sʌqʼuesa jiñi lac piʼʌlob, ñumento jiñi i chʼichʼel Cristo miʼ mejlel i sʌqʼuesan jiñi laj conciencia ti jiñi mach tac bʌ weñic tsaʼ lac mele ti wajali chaʼan miʼ mejlel lac chʼujutesan jiñi cuxul bʌ Dios. Come tiʼ coltaya jiñi chʼujul bʌ espíritu tsiʼ yʌqʼue Dios jiñi i cuxtʌlel bajcheʼ jumpʼejl tsʼʌcʌl bʌ majtañʌl.

15 Come jiñʌch jiñi xcoltaya chaʼan jiñi tsijiʼ bʌ trato, chaʼan jiñi pʌybiloʼ bʌ miʼ yʌqʼuentelob jiñi majtañʌl tsaʼ bʌ wʌn subentiyob chaʼan tiʼ pejtelel ora, come an majqui tsaʼ chʌmi chaʼan, tiʼ tojol jiñi coltʌntel, miʼ cojlelob ti jiñi mulil tsaʼ bʌ i tajayob cheʼ bʌ chuculobto ti jiñi ñaxam bʌ trato. 16 Cheʼ bʌ miʼ mejlel jumpʼejl trato, wersa yom miʼ chʌmel muʼ bʌ i mel jiñi trato, 17 come jiñi trato miʼ cʼʌjñibʌyel cheʼ bʌ an majqui miʼ chʌmel i maʼañic miʼ cʼʌjñibʌyel mi cuxulto jiñi tsaʼ bʌ i mele. 18 Jin chaʼan, wersa tsaʼ bejqʼui chʼichʼ chaʼan miʼ cʼʌjñibʌyel jiñi trato am bʌ ti ñaxan. 19 Come, cheʼ bʌ Moisés tsaʼix i sube jiñi tejclum pejtelel jiñi tʼan tac am bʌ ti Mandar, tsiʼ chʼʌmbe i chʼichʼel jiñi alʌ tat wacax, i chʼichʼel chivo, jaʼ, wen chʌchʌc bʌ pisil yicʼot hisopo,* tiʼ tsijca jiñi libro* yicʼot jiñi tejclum, 20 i tsiʼ yʌlʌ: «Ili jiñʌch i chʼichʼel jiñi trato tsaʼ bʌ i yʌlʌ Dios chaʼan mi laʼ jacʼ». 21 Tiʼ tsijca ti chʼichʼ jaʼel jiñi pisil bʌ otot yicʼot pejtelel muʼ bʌ i cʼʌjñel ti jiñi chʼujul bʌ eʼtel. 22 Cheʼʌchi, cheʼ bajcheʼ miʼ yʌl jiñi Mandar, lʌcʼʌ tiʼ pejtelel chuqui an miʼ sʌqʼuesʌntel ti chʼichʼ, i mi maʼañic miʼ bejqʼuel chʼichʼ maʼañic miʼ ñusʌntel mulil.

23 Jin chaʼan, wersa tsaʼ cʼʌjñi tac iliyi chaʼan miʼ sʌqʼuesʌntel muʼ bʌ i pʌs chuqui tac an ti panchan, pero jiñi an tac bʌ ti panchan yom miʼ yʌqʼuentel ñumen wem bʌ majtañʌl tac. 24 Come Cristo maʼañic tsaʼ ochi ti jumpʼejl chʼujul bʌ ajñibʌl melbil bʌ tiʼ cʼʌb wiñicob, muʼ bʌ i pʌs jiñi i sujm bʌ, tsaʼ ochi ti panchan, jin chaʼan wʌle miʼ pʌs i bʌ tiʼ tojlel Dios chaʼan miʼ coltañonla. 25 Tsaʼ mejli iliyi chaʼan junsujtel jach miʼ yʌcʼ i cuxtʌlel, mach cheʼic bajcheʼ jiñi ñumen ñuc bʌ sacerdote jujumpʼejl bʌ jab miʼ yochel yaʼ ti chʼujul bʌ ajñibʌl pero mach yicʼotic i chʼichʼel. 26 Cheʼ cheʼic bajcheʼ jiñi, cʼʌlʌl tiʼ tejchibal pañimil tsiʼ wen ñusa wocol. Pero wʌle, junsujtel jach i chaʼañʌch tiʼ pejtelel ora tsiʼ pʌsʌ i bʌ tiʼ yorajlel i jilibal ili qʼuin tac chaʼan miʼ jisan jiñi mulil cheʼ miʼ yʌcʼ i bʌ bajcheʼ tsʌnsʌbil bʌ majtañʌl. 27 I cheʼ bajcheʼ maʼañic miʼ mejlel ti mʌctʌntel chaʼan junsujtel jach miʼ chʌmel jiñi wiñicob, pero cheʼ jiñi miʼ yujtel meloñel tiʼ tojlelob, 28 cheʼ jaʼel Cristo junsujtel jach tsaʼ ajqʼui chaʼan miʼ cuchben i mul cabʌl lac piʼʌlob, i cheʼ bʌ miʼ pʌs i bʌ tiʼ chaʼyajlel, mach chaʼañic miʼ jisan jiñi mulil, i mi caj i qʼuelob jiñi woli bʌ i wen pijtañob i coltʌntel.