1 Timoteo
5 Mach a ticʼ ti tsʌts bʌ tʼan juntiquil wiñic ñoxix bʌ. Tiqʼui bajcheʼ juntiquil a tat, jiñi maxto bʌ ñoxobic, cheʼ yom maʼ mel bajcheʼ a werañob, 2 jiñi xʼixicob añobix bʌ i jabilel, cheʼ yom maʼ mel bajcheʼ a mamá, jiñi xchʼocobto bʌ, cheʼ yom maʼ mel bajcheʼ a chich o a wijtsʼin, yom sʌc a melbal tiʼ tojlelob.
3 Chʼʌmʌla ti ñuc jiñi xʼixicob mebaʼoʼ bʌ tiʼ sujm.* 4 Pero mi an juntiquil mebaʼ xʼixic am bʌ i yalobilob o i butsob, laʼ i ñaxan cʌñob i pʌs i xucʼtʌlel ti Dios cheʼ bʌ miʼ cʌntañob i familia. Yom miʼ yʌqʼueñob jiñi i tat i ñaʼob yicʼot i tatuchob* jiñi yom bʌ miʼ yʌqʼuentelob, come iliyi utsʼatʌch tiʼ wut Dios. 5 Pero jiñi xʼixic mebaʼʌch bʌ tiʼ sujm i maʼañic chuqui an i chaʼan miʼ yʌcʼ i pijtaya ti Dios i maʼañic miʼ cʌy i melben oración yicʼot i pejcan ti wocol tʼan ti qʼuiñil yicʼot ti acʼʌlel. 6 Pero jiñi muʼ bʌ i yʌcʼ i bʌ tiʼ melol chuqui yom i bʌcʼtal lajal bajcheʼ chʌmeñix anquese cuxulto. 7 Jin chaʼan, chʌn acʼʌ ili mandar tac chaʼan mi juntiquilic miʼ tajbentel i mul. 8 Come mi an maʼañic bʌ miʼ mʌcʼlan jiñi i chaʼañoʼ bʌ, ñumento jiñi añoʼ bʌ tiʼ yotot, tsaʼix i cʌyʌ i ñopoñel i ñumen an i mul bajcheʼ juntiquil mach bʌ añic i ñopoñel.
9 Jiñi mebaʼ xʼixic muʼ bʌ i yochel i cʼabaʼ yaʼ ti jun yom ñumeñix ti 60 i jabilel, yom juntiquil jach i ñoxiʼal tsiʼ taja 10 i yom cʌmbil chaʼan tsiʼ mele chuqui tac wem bʌ, bajcheʼ i cosʌntel i yalobilob, mi tsiʼ mele chuqui wen tiʼ tojlel yambʌlob, mi tsiʼ pocbe i yoc jiñi chʼujuloʼ bʌ, mi tsiʼ colta jiñi muʼ bʌ i ñusañob wocol yicʼot mi tsiʼ yʌcʼʌ i bʌ tiʼ melol pejtelel chuqui wem bʌ.
11 Pero mach a wotsan ti jun jiñi mebaʼ xʼixicob maxto bʌ wen añobic i jabilel, come cheʼ bʌ jiñi i mulʌntel piʼleya miʼ mʌctañob chaʼan miʼ melbeñob i yeʼtel Cristo, mi caj i mulañob ñujpuñel. 12 Ili xʼixicob tsaʼix i tajayob i mul tiʼ caj maʼañic tiʼ tsʼʌctesayob i tʼan tsaʼ bʌ i yʌcʼʌyob ti ñaxan. 13 Cheʼ jaʼel, miʼ ñʌmʼañob cheʼ maʼañic chuqui miʼ melob yicʼot cheʼ miʼ chaʼleñob julaʼ ñumel ti ototʌl tac. Cheʼʌchi, mach muqʼuic jach i ñʌmʼañob chaʼan maʼañic chuqui miʼ melob, miʼ ñʌmʼañob i yʌl yambʌlob i miʼ yotsañob i bʌ baqui mach i wentajobic, miʼ yʌlob mach bʌ yomic miʼ yʌlob. 14 Jin chaʼan com chaʼan jiñi mebaʼ xʼixicob maxto bʌ wen añobic i jabilel miʼ ñujpuñelob, laʼ tilic i yalobilob, laʼ i qʼuelob i yotot i mach i wis acʼob chaʼan jiñi laj contra miʼ yʌl mach bʌ weñic ti lac tojlel. 15 Tiʼ sujm, an tsaʼix bʌ i cʌyʌyob jiñi wem bʌ bij chaʼan miʼ tsajcañob Satanás. 16 Mi an juntiquil xʼixic xñoptʼan bʌ am bʌ i piʼʌlob mebaʼ xʼixicoʼ bʌ, laʼ i coltañob chaʼan mach jiñic jiñi congregación miʼ chʼʌm tiʼ wenta, i cheʼ bajcheʼ jiñi, jiñi congregación miʼ mejlel i coltan jiñi mebaʼoʼ bʌ tiʼ sujm.*
17 Jiñi ancianojob muʼ bʌ i qʼuelob ti wen jiñi congregación yom miʼ wen qʼuejlelob ti ñuc, ñumento jiñi muʼ bʌ i chaʼleñob tsʌts bʌ eʼtel ti tʼan yicʼot ti cʌntesa. 18 Come yaʼ ti Tsʼijbujel an baqui miʼ yʌl: «Mach a mʌcben i yej jiñi tat wacax cheʼ bʌ woliʼ tʼuchtan jiñi trigo». I ti yambʌ miʼ yʌl: «Jiñi xʼeʼtel yomʌch miʼ yʌqʼuentel i tojol». 19 Mach laʼ ñʌchʼtan muʼ bʌ i yʌjlel tiʼ contra juntiquil anciano,* pero mi chucul ti chuqui miʼ yʌl chaʼtiquil o uxtiquil testigo añʌch chuqui miʼ mejlel laʼ mel. 20 Tiʼ wut pejtelel yaʼ bʌ añob, tojʼesan jiñi muʼ bʌ i chaʼleñob mulil, chaʼan jiñi yambʌlob miʼ qʼuelob bajcheʼ i wʌn subentelob.* 21 Tiʼ tojlel Dios, Cristo Jesús yicʼot jiñi ángelob yajcʌbiloʼ bʌ mic subeñet: Chʌn jacʼʌ ili tʼan tac pero mach a chaʼlen meloñel mi maxto a cʌñʌyic chuqui tsaʼ ujti yicʼot mach muqʼuic jach a yajcan majqui tiʼ tojlel maʼ mel.
22 Mach ti orajic yom maʼ wʌcʼ a cʼʌb tiʼ tojlel juntiquil wiñic.* Mach a coltan juntiquil am bʌ i mul. Yom sʌc maʼ wajñel.
23 Mach a chʌn jap jaʼ,* tsʼitaʼ japʌ vino tiʼ caj a ñʌcʼ yicʼot tiʼ caj jujumujcʼ maʼ cʼamʼan.
24 An i mul wiñicob muʼ bʌ i jamʌ tsictiyel tiʼ tojlel lac piʼʌlob i miʼ pʌjyelob chaʼan miʼ yujtel meloñel tiʼ tojlelob, pero jiñi i mul yambʌlob wiʼilto miʼ tsictiyel. 25 Cheʼʌch miʼ yujtel jaʼel chaʼan jiñi melbalʌl tac, jiñi wen tac bʌ miʼ jamʌ tsictiyel i jiñi mach bʌ weñic maʼañic miʼ mejlel ti mujquel.