Gálatas

5 Cristo tsiʼ yʌcʼʌyonla ti cojlel chaʼan libre mi la cajñel. Jin chaʼan, yom chʌn xucʼul mi laʼ wajñel i mach laʼ chaʼ acʼ laʼ bʌ ti otsʌntel ti xyaj eʼtel.

2 Qʼuelela, joñon, Pablo, mic subeñetla chaʼan mi tsaʼ laʼ tsepe laʼ pʌchʌlel,* maʼañic mi caj i cʼʌjñibʌyel laʼ chaʼan tsaʼ bʌ i mele Cristo. 3 Mic chaʼ suben pejtelel jiñi muʼ bʌ i tsep i pʌchʌlel chaʼan wersa yom miʼ jacʼ pejtelel jiñi Mandar. 4 Jatetla muʼ bʌ laʼ sʌclan qʼuejlel ti toj tiʼ caj jiñi mandar, ñajt añetla tiʼ tojlel Cristo. Tsaʼ laʼ tʌtsʼʌ laʼ bʌ* ti jiñi ñuc bʌ i yutslel. 5 Pero joñon lojon, tiʼ coltaya jiñi espíritu, woli lon c pijtan jiñi tojel muʼ bʌ i tajtʌl chaʼan jiñi ñopoñel. 6 Come cheʼ bʌ temelonla la quicʼot Cristo Jesús, mi jiñicto an i cʼʌjñibal cheʼ tsepbil lac pʌchʌlel o cheʼ mach tsepbilic. Jiñi am bʌ i cʼʌjñibal jiñʌch jiñi lac ñopoñel muʼ bʌ i chaʼlen eʼtel tiʼ coltaya jiñi cʼuxbiya.

7 Wen bajcheʼ woliyetla ti ajñel ti ñaxan. ¿Majqui tsiʼ mʌctayetla chaʼan maʼañix mi laʼ chʌn jacʼ jiñi i sujmlel? 8 Jiñi cʌntesa cheʼ bʌ bajcheʼ jiñi, mach tilemic ti jiñi woli bʌ i pʌyetla. 9 Tsʼitaʼ levadura miʼ pajʼesan pejtelel jiñi xʌcʼbil bʌ harina. 10 Mic ñop chaʼan jatetla, temeletbʌla laʼ wicʼot lac Yum, mach qʼuexelic bajcheʼ mi caj laʼ ñaʼtan. Pero jiñi woli bʌ i yʌqʼueñetla wocol mi caj i yʌqʼuentel i toj i mul, mach yʌlʌyic majqui. 11 Pero joñon, hermanojob, mi wolito c sub chaʼan bʌ jiñi tsep pʌchʌlel, ¿chucoch wolito c bej contrajintel? Mi cheʼ bajcheʼ jiñi, maʼañix miʼ mejlel i mʌctan lac ñopoñel jiñi teʼ chaʼan bʌ wocol.* 12 Yomtoca cheʼ muqʼuic i tsepob loqʼuel i bʌcʼ* jiñi wiñicob muʼ bʌ i ñopob i soquetla.

13 Hermanojob, jatetla tsaʼ pʌjyiyetla chaʼan libre mi laʼ wajñel. Pero mach laʼ qʼuel jiñi laʼ librejlel bajcheʼ junchajp muʼ bʌ i yʌqʼueñetla laʼ mel chuqui yom laʼ bʌcʼtal, yom bʌ mi laʼ mel jiñʌch cheʼ mi laʼ melben i yeʼtel yambʌlob chaʼan laʼ cʼuxbiya. 14 Come pejtelel jiñi Mandar miʼ tsʼʌctiyel ti ili mandar: «Cʼuxbin a piʼʌl cheʼ bajcheʼ maʼ bajñel cʼuxbin a bʌ». 15 Pero mi wolito laʼ cʼux cʼux laʼ bʌ o wolito laʼ bucʼ laʼ bʌ, cʌntan laʼ bʌ chaʼan maʼañic mi laʼ jisan laʼ bʌ.

16 Jin chaʼan mic subeñetla iliyi: Chʌn ajñenla cheʼ bajcheʼ yom jiñi espíritu i cheʼ bajcheʼ jiñi maʼañic mi caj laʼ wis mel chuqui yom laʼ bʌcʼtal. 17 Come jiñi lac bʌcʼtal, tiʼ caj chuqui yom, miʼ yʌcʼ i bʌ tiʼ contra jiñi espíritu i jiñi espíritu miʼ yʌcʼ i bʌ tiʼ contra lac bʌcʼtal. Come ili miʼ contrajiñob i bʌ, jatetla maʼañic mi laʼ mel jiñi laʼ wom bʌ laʼ mel. 18 Cheʼto jaʼel, mi jin woliʼ tojʼesañetla jiñi espíritu, maʼañeticla tiʼ pʼʌtʌlel jiñi mandar.

19 Weno, tsiquilʌch jiñi i melbal tac lac bʌcʼtal, jiñʌch jiñi tsʼiʼlel,* jiñi bibiʼlel, jiñi quisintic jax bʌ melbalʌl* tac, 20 jiñi i chʼujutesʌntel melbil tac jach bʌ dios, jiñi espiritismo,* i contrajintel yambʌlob, leto,* michʼ pusicʼal, michʼ, tech wocol, tʼox bʌ, i tsajcʌntel i cʌntesa wiñicob, 21 i tsʌytsʌyñiyel lac pusicʼal, yʌcʼʌjel,* qʼuiñijel tac ñumeñix bʌ ti pʼis yicʼot yan tac bʌ cheʼ bʌ bajcheʼ iliyi. Mic subeñetla, cheʼ bajcheʼ tsaʼix c wʌn subeyetla, chaʼan jiñi muʼ bʌ i melob tac iliyi maʼañic mi caj i yʌqʼuentelob jiñi i Yumʌntel Dios.

22 Pero jiñi melbalʌl tac* muʼ bʌ i yʌcʼ jiñi espíritu ti lac tojlel jiñʌch cʼuxbiya, tijicñʌyel, ñʌchʼtʌlel, pijt, wem bʌ lac pusicʼal, la cutslel, lac ñopoñel, 23 cheʼ xucʼulon jachla* yicʼot i ticʼol lac bʌ. Maʼañic mandar an tac bʌ tiʼ contra iliyi. 24 Cheʼto jaʼel, jiñi i chaʼañoʼ bʌ Cristo Jesús tsaʼix i chʼijiyob* ti teʼ pejtelel chuqui wen yomob yicʼot muʼ bʌ i mulañob tiʼ bʌcʼtal.

25 Mi chumulonla cheʼ bajcheʼ yom jiñi espíritu, yom toj mi lac bej chaʼlen xʌmbal jaʼel cheʼ bajcheʼ yom jiñi espíritu. 26 Mach laj qʼuel lac bʌ ti ñuc, maʼañic majqui yom mi lac ñijcʌben i pusicʼal chaʼan miʼ laj i bʌ yicʼot yambʌ i mach yomic tsʌytsʌyña lac pusicʼal tiʼ tojlel yambʌlob.