Hebreos
1 Ti wajali, Dios tsiʼ wen cʼʌñʌ jiñi xʼaltʼañob chaʼan miʼ pejcan lac ñojteʼelob i cabʌl bajcheʼ tsiʼ mele. 2 Wʌle, tiʼ yujtibal jiñi qʼuin tac, tsiʼ pejcayonla tiʼ tojlel juntiquil i Yalobil, tsaʼ bʌ i waʼchoco chaʼan miʼ yʌqʼuentel pejtelel chuqui an yicʼot tsaʼ bʌ i cʼʌñʌ chaʼan miʼ mel chuqui tac an ti pañimil yicʼot ti panchan. 3 I yejtalʌch* jiñi i ñuclel Dios i jiñʌch muʼ bʌ i pʌs ti tsʼʌcʌl bajcheʼ yilal, tiʼ pʼʌtʌlel i tʼan miʼ chuc pejtelel chuqui an. I cheʼ bʌ tsaʼix i sʌqʼuesayonla ti lac mul, tsaʼ buchle yaʼ tiʼ ñoj jiñi Ñuc bʌ Dios, yaʼ ti panchan. 4 Jin chaʼan, ñumen ñuc tsaʼ sujti bajcheʼ jiñi ángelob, come tsaʼ aqʼuenti ñumen wem bʌ i cʼabaʼ bajcheʼ i chaʼañob.
5 Jumpʼejl ejemplo, ¿tsaʼ ba i sube Dios juntiquil ángel: «Jatet calobilet, wʌle tsaʼix sujtiyon ti a tat»? ¿O tsaʼ ba i sube: «Joñon mi caj c sujtel tiʼ tat, i mi caj i sujtel ti calobil»? 6 I cheʼ bʌ miʼ chaʼ choc tilel ti pañimil jiñi Ñaxam bʌ i Yalobil, miʼ yʌl: «Pejtelel jiñi i yángelob Dios yom miʼ ñocchocoñob i bʌ tiʼ tojlel».
7 Cheʼ jaʼel, Dios miʼ yʌl tiʼ tojlel jiñi ángelob: «Miʼ sujtesan ti espíritu jiñi i yángelob, i jiñi i wiñicob miʼ sujtesañob bajcheʼ lemlemña bʌ cʼajc». 8 Pero tiʼ tojlel jiñi i Yalobil miʼ yʌl: «Dios jiñʌch a trono tiʼ pejtelel ora, i jiñi a Yumʌntel mi caj i mel chuqui toj. 9 Tsaʼ cʼuxbi chuqui toj i tsaʼ tsʼaʼle jiñi jontolil.* Jin chaʼan Dios, jiñi a Dios, ñumen on tsiʼ muluyet ti jiñi aceite chaʼan bʌ tijicñʌyel bajcheʼ jiñi a piʼʌlob». 10 Miʼ yʌl jaʼel: «Tiʼ tejchibal, c Yum, jatet tsaʼ melbe i cʼʌclib jiñi lum, i jiñi panchan i melbalʌch a cʼʌb. 11 Jiñi mi caj i jilel tac, pero jatet cuxul mi caj a wajñel, jiñi mi caj i jilel tac bajcheʼ lac pislel 12 i jatet mi caj a bʌl bajcheʼ pʌl bʌ bujcʌl, i mi caj i qʼuextʌntel bajcheʼ lac pislel. Pero jatet maʼañic maʼ qʼuextʌyel, i maʼañic baʼ ora mi caj i jilel jiñi a cuxtʌlel».
13 Pero ¿am ba juntiquil ángel tsaʼ bʌ subenti: «Buchiʼ tic ñoj jinto mi cʌcʼ tiʼ yebal a woc jiñi a contrajob»? 14 ¿Mach ba laj espíritujobic muʼ bʌ i melob chʼujul bʌ eʼtel, chocbiloʼ bʌ tilel chaʼan miʼ coltañob jiñi muʼ bʌ caj i tajob i coltʌntel?