Juan

15 «Joñoñʌch jiñi i sujm bʌ i teʼel uva i jiñi c Tat jiñʌch jiñi xʼeʼtel yaʼ ti lum. 2 Miʼ tsep loqʼuel tic tojlel jiñi i cʼʌb tac maʼañic bʌ miʼ yʌcʼ i wut, i pejtelel muʼ bʌ i yʌcʼ i wut miʼ sʌqʼuesan* chaʼan miʼ ñumen acʼ i wut. 3 Jatetla sʌquetixla tiʼ caj jiñi tʼan tac tsaʼ bʌ c subeyetla. 4 Temel yom mi laʼ wajñel laʼ wicʼoton i joñon temel mi caj cajñel quicʼotetla. Cheʼ bajcheʼ jiñi i cʼʌb uva maʼañic miʼ mejlel i bajñel acʼ i wut, yom chucul ti jiñi i teʼel uva, jatetla maʼañic miʼ mejlel laʼ wʌcʼ laʼ wut mi mach temeleticla laʼ wicʼoton. 5 Joñon jiñi i teʼel uva i jatetla jiñi i cʼʌb tac. Jiñi temel bʌ miʼ yajñel yicʼoton, i joñon temel quicʼot, miʼ yʌcʼ cabʌl i wut. Come mi maʼañic chuculetla tic tojlel, maʼañic chuqui miʼ mejlel laʼ mel. 6 Mi an mach bʌ temelic miʼ yajñel quicʼot, miʼ chojquel cheʼ bajcheʼ i cʼʌb uva i miʼ tiquin. Jiñi i cʼʌb tac miʼ tempʌntel, miʼ chojquel ti cʼajc i miʼ pulel. 7 Mi temel mi laʼ wajñel yicʼoton i jiñi c tʼan miʼ yajñel ti laʼ tojlel, cʼajtinla chuqui jach i mi caj laʼ wʌqʼuentel. 8 Ili miʼ yʌqʼuen i ñuclel c Tat: Cheʼ tiʼ pejtelel ora mi laʼ wʌcʼ cabʌl laʼ wut i mi laʼ pʌs chaʼan xcʌntʼañetla c chaʼan. 9 Cheʼ bajcheʼ jiñi Tatʌl tsaʼix i cʼuxbiyon, joñon tsaʼix j cʼuxbiyetla, chʌn ajñenla tij cʼuxbiya. 10 Mi mucʼʌch laʼ jacʼ jiñi c mandar tac, mi caj laʼ wajñel tij cʼuxbiya, cheʼ bajcheʼ joñon tsaʼix c jacʼbe i mandar tac jiñi Tatʌl i mic chʌn ajñel tiʼ cʼuxbiya».

11 «Tsaʼ c subeyetla iliyi chaʼan mi laʼ wubin jiñi tijicñʌyel muʼ bʌ cubin* yicʼot chaʼan tsʼʌcʌl jiñi laʼ tijicñʌyel. 12 Ili jiñʌch c mandar: Chaʼan mi laʼ cʼuxbin laʼ bʌ cheʼ bajcheʼ tsaʼ j cʼuxbiyetla. 13 Maʼañic ñumen ñuc bʌ i cʼuxbiya bajcheʼ jiñi muʼ bʌ i yʌcʼ i cuxtʌlel tiʼ tojlel i yamigojob. 14 Jatetla camigojetla mi mucʼʌch laʼ mel muʼ bʌ c subeñetla. 15 Maʼañix mic subeñetla ti xyaj eʼtel, come jiñi xyaj eʼtel mach yujilic chuqui miʼ mel i yum. Mic subeñetla ti camigojob, come tsaʼix c subeyetla pejtelel tsaʼ bʌ cubi i yʌl jiñi c Tat. 16 Jatetla maʼañic tsaʼ laʼ yajcayon. Joñon tsaʼ c yajcayetla. Tsaʼ cʌqʼueyetla laʼ weʼtel chaʼan mi laʼ majlel i mi laʼ chʌn acʼ laʼ wut, laʼ wut muʼ bʌ i jalijel. Cheʼ bajcheʼ jiñi, jiñi Tatʌl mi caj i yʌqʼueñetla chuqui jach mi laʼ cʼajtiben tij cʼabaʼ».

17 «Mic subeñetla iliyi chaʼan mi laʼ cʼuxbin laʼ bʌ. 18 Mi jiñi pañimil miʼ tsʼaʼleñetla, laʼ wujilix chaʼan ñaxan tiʼ tsʼaʼleyon bajcheʼetla. 19 Cheʼ i chaʼañeticla pañimil, jiñi pañimil miʼ cʼuxbiñetla come i chaʼañetla. Pero come mach i chaʼañeticla pañimil, joñon tsaʼ c yajcayetla ti ili pañimil, jin chaʼan jiñi pañimil miʼ tsʼaʼleñetla. 20 Yom cʼajal laʼ chaʼan tsaʼ bʌ c subeyetla: Jiñi xyaj eʼtel mach ñumen ñuquic bajcheʼ i yum. Mi tsaʼʌch i contrajiyoñob, mi caj i contrajiñetla jaʼel, mi tsaʼʌch i jacʼʌyob jiñi c tʼan, mi caj i jacʼob laʼ tʼan jaʼel. 21 Pero mi caj i melob pejtelel iliyi ti laʼ tojlel tiʼ caj jiñi j cʼabaʼ, come mach i cʌñʌyobic jiñi tsaʼ bʌ i chocoyon tilel. 22 Machic tsaʼ tiliyon i machic tsaʼ c pejcayob, maʼañobic i mul. Pero wʌleʼli maʼañic miʼ mejlel i yʌlob chaʼan maʼañobic i mul. 23 Jiñi muʼ bʌ i tsʼaʼleñon miʼ tsʼaʼlen jaʼel jiñi c Tat. 24 Machic tsaʼ c mele tiʼ tojelob i wut jiñi eʼtel tac maʼañic bʌ majqui melbil i chaʼan, maʼañobic i mul, pero wʌle tsaʼix i qʼueleyoñob, tsaʼix i tsʼaʼleyoñob i tiʼ tsʼaʼleyob jiñi c Tat jaʼel. 25 Pero tsaʼ ujti iliyi chaʼan miʼ tsʼʌctiyel jiñi tʼan tac tsʼijbubil bʌ yaʼ tiʼ Mandarob: ‹Maʼañic i sujmlel cheʼ tiʼ tsʼaʼleyoñob›. 26 Cheʼ bʌ miʼ tilel jiñi xcoltaya muʼ bʌ caj c chocbeñetla tilel tiʼ tojlel jiñi Tatʌl, jiñi chʼujul bʌ espíritu muʼ bʌ i coltan jiñi i sujmlel, tilem bʌ ti jiñi Tatʌl, jiñʌch muʼ bʌ caj i chaʼlen tʼan tic tojlel, 27 i jatetla yom mi laʼ chaʼlen tʼan tic tojlel jaʼel, come añetla laʼ wicʼoton cʼʌlʌl tiʼ tejchibal».