Romanos

15 Pero joñonla, pʼʌtʌlonbʌla, yom mi laj cuchben i cʼunlel jiñi mach bʌ pʼʌtʌlobic, i mach lac mel muʼ bʌ i bajñel aqʼueñonla lac wenlel. 2 Ti jujuntiquilonla laʼ lac mel muʼ bʌ i yʌqʼuen i wenlel lac piʼʌl i laʼ lac mel chuqui wen chaʼan mi lac pʼʌtʼesan. 3 Come mi jiñicto Cristo tsiʼ bajñel sʌcla i wenlel, cheʼʌch tsaʼ ujti bajcheʼ tsʼijbubil: «Jiñi i tʼan jiñi woli bʌ i pʼajetob* tsaʼix juli tic tojlel». 4 Come pejtelel tsaʼ bʌ tsʼijbunti ti wajali tsaʼ tsʼijbunti chaʼan laj cʌntesʌntel, chaʼan mi lac taj lac pijtaya cheʼ mi laj cuch wocol yicʼot cheʼ miʼ ñuqʼuesʌntel lac pusicʼal ti jiñi Tsʼijbujel. 5 Jiñi Dios muʼ bʌ i coltañonla laj cuch wocol yicʼot muʼ bʌ i ñuqʼuesan lac pusicʼal, laʼ i yʌcʼ chaʼan ti laʼ pejtelel mi laʼ taj laʼ ñaʼtʌbal bajcheʼ i chaʼan Cristo Jesús, 6 chaʼan juntemeletla cheʼ mi laʼ wʌqʼuen i ñuclel jiñi Dios yicʼot i Tat lac Yum Jesucristo.

7 Jin chaʼan yom utsʼat mi laʼ chʼʌm laʼ bʌ, cheʼ bajcheʼ Cristo utsʼat tsiʼ chʼʌmʌyetla jaʼel, cheʼ bajcheʼ jiñi miʼ taj i ñuclel Dios. 8 Come mic subeñetla chaʼan Cristo tsaʼ sujti ti xʼeʼtel tiʼ tojlelob jiñi tsepbiloʼ bʌ i pʌchʌlel* chaʼan miʼ pʌs chaʼan i sujmʌch muʼ bʌ i yʌl Dios yicʼot chaʼan miʼ pʌs chaʼan jiñi tsaʼ bʌ i sube Dios jiñi i ñojteʼelob i sujmʌch, 9 yicʼot chaʼan jiñi tejclum tac miʼ yʌqʼueñob i ñuclel Dios chaʼan jiñi i pʼuntaya. Cheʼʌch bajcheʼ tsʼijbubil: «Jin chaʼan, mi caj c jamʌ sub a ñuclel tiʼ tojlel jiñi tejclum tac i mi caj j cʼʌyiben cʼay tac jiñi a cʼabaʼ». 10 I miʼ yʌl jaʼel: «Tejclum tac, ubinla laʼ tijicñʌyel laʼ wicʼot jiñi i wiñicob Dios». 11 Ti yambʌ parte miʼ yʌl: «Pejtelel mach bʌ judíojeticla aqʼuenla i ñuclel Jehová.* Pejtelel tejclum tac laʼ i yʌqʼueñob i ñuclel». 12 Isaías miʼ yʌl jaʼel: «Mi caj i pʌs i bʌ jiñi i wiʼ Jesé, jiñi tal bʌ chaʼan miʼ yuman tejclum tac, jiñi tejclum tac mi caj i yʌcʼ i pijtaya tiʼ tojlel». 13 Laʼ i yʌqʼueñetla laʼ tijicñʌyel yicʼot laʼ ñʌchʼtʌlel chaʼan laʼ ñopoñel jiñi Dios muʼ bʌ i yʌcʼ pijtaya, chaʼan cabʌl laʼ pijtaya tiʼ coltaya i pʼʌtʌlel jiñi chʼujul bʌ espíritu.

14 Quermañujob, mic wen ñop chaʼan jatetla jaʼel butʼuletla ti laʼ wutslel yicʼot ti laʼ ñaʼtʌbal, yicʼot chaʼan miʼ mejlel laʼ comol ticʼ laʼ bʌ. 15 Pero jamʌ tsiquil chuqui tsaʼ c tsʼijbubeyetla come an chuqui com c chaʼ cʼajtesʌbeñetla. Mic mel tiʼ caj jiñi ñuc bʌ i yutslel Dios tsaʼ bʌ i pʌsbeyon 16 chaʼan mic sujtel ti xʼeʼtel i chaʼan Cristo tiʼ tojlel jiñi tejclum tac. Woli c mel jiñi chʼujul bʌ eʼtel chaʼan bʌ jiñi wen tʼan tiʼ tojlel Dios chaʼan ili tejclum tac miʼ sujtel ti utsʼat bʌ majtañʌl yicʼot sʌqʼuesʌbil bʌ tiʼ coltaya jiñi chʼujul bʌ espíritu.

17 Jin chaʼan, añʌch chucoch mic wen ubin c tijicñʌyel ti Cristo Jesús chaʼan jiñi eʼtel tsaʼ bʌ i yʌqʼueyon Dios. 18 Come maʼañic mi caj c wis al melbil bʌ c chaʼan mi mach jiñic chaʼan bajcheʼ tsiʼ cʼʌñʌyon Cristo chaʼan miʼ sujtelob ti xjacʼtʼan jiñi tejclum tac. Tsaʼʌch i tsʼʌctesa ti jiñi c tʼan yicʼot ti chuqui tac tsaʼ c mele, 19 tiʼ pʼʌtʌlel jiñi milagro tac yicʼot chuqui ñuc tac bʌ, tiʼ pʼʌtʌlel jiñi i yespíritu Dios, jin chaʼan tsaʼix c pam subu ñumel jiñi wen tʼan tiʼ tojlel Cristo ti Jerusalén cʼʌlʌl tiʼ ñajtlel Ilírico. 20 Cheʼ bajcheʼ ili, tsaʼ c chaʼle wersa chaʼan maʼañic mic sub jiñi wen tʼan baqui tsaʼix ajqʼui ti cʌjñel jiñi i cʼabaʼ Cristo, chaʼan maʼañic mic bej chaʼlen eʼtel baqui tsaʼix i teche yambʌ wiñic. 21 Cheʼʌch bajcheʼ tsʼijbubil: «Jiñi maʼañic bʌ tsaʼ subentiyob tiʼ tojlel mi caj i qʼuelob, i jiñi maʼañic bʌ tsiʼ yubiyob mi caj i chʼʌmbeñob i sujm».

22 Jin chaʼan maʼañic tsaʼ mejliyon ti majlel baʼañetla, anquese mach junsujtelic jach tsaʼ c ñaʼta c julaʼtañetla. 23 Pero wʌle tsaʼix c pam subu ñumel jiñi wen tʼan ti ili tejclum tac i añix ora com majlel j qʼueletla. 24 Jin chaʼan, cheʼ bʌ mic majlel ti España, mic pijtan chaʼan mij qʼueletla yicʼot chaʼan mi laʼ majlel laʼ cʌyon ti ojli bij cheʼ bʌ tsaʼix jumucʼ tem ajñiyonla chaʼan mi lac ñusan lac bʌ. 25 Pero wʌleʼli muqʼuix caj c majlel ti Jerusalén chaʼan mij coltan jiñi hermanojob* añoʼ bʌ yaʼi. 26 Come jiñi añoʼ bʌ ti Macedonia yicʼot ti Acaya tiʼ pejtelel i pusicʼal tsiʼ tʼoxoyob chuqui añob i chaʼan chaʼan miʼ yʌqʼueñob jiñi hermanojob pʼumpʼuñoʼ bʌ ti Jerusalén. 27 I sujmʌch chaʼan tiʼ pejtelel i pusicʼal tsiʼ meleyob, pero tiʼ sujm, añobʌch i bet yicʼotob come mi jiñi chʼoyoloʼ bʌ ti yambʌ tejclum tac tsiʼ tajayob i wenlel ti jiñi i chaʼan tac bʌ Dios aqʼuebiloʼ bʌ jiñi hermanojob, wersa yom miʼ yʌcʼob i chubʌʼan chaʼan miʼ coltañob jaʼel. 28 Jin chaʼan, cheʼ bʌ mi cujtel c mel ili eʼtel yicʼot mij qʼuel chaʼan miʼ chʼʌmob ili coltʌntel, mi caj c majlel ti España i mi caj c ñumel yaʼ baqui añetla. 29 Cheʼ jaʼel, cujil chaʼan cheʼ bʌ mic majlel c julaʼtañetla yicʼotʌch cabʌl i bendición Cristo mi caj c majlel.

30 Hermanojob, tiʼ tojlel jiñi lac Yum Jesucristo yicʼot tiʼ pʼʌtʌlel Dios muʼ bʌ i yʌqʼueñonla laj cʼuxbin lac bʌ mij cʼajtibeñetla ti wocol tʼan chaʼan mi laʼ chaʼlen wersa laʼ melben oración Dios tic tojlel, cheʼ bajcheʼ mic mel joñon, 31 chaʼan mij coltʌntel tiʼ cʼʌb jiñi mach bʌ xñoptʼañobic ti Judea yicʼot chaʼan jiñi hermanojob ti Jerusalén utsʼat miʼ chʼʌmob jiñi eʼtel muʼ bʌ c mel tiʼ tojlelob. 32 Cheʼ bajcheʼ ili, mi cheʼʌch yom Dios, yicʼot c tijicñʌyel mi caj c julaʼtañetla i mi caj laj comol pʼʌtʼesan lac bʌ. 33 Laʼ ajñic yicʼotetla jiñi Dios muʼ bʌ i yʌcʼ ñʌchʼtʌlel. Amén.