Lucas

15 Pejtelel jiñi xchʼʌm tojoñelob yicʼot jiñi xmulilob miʼ tempañob i bʌ tiʼ joytʌlel Jesús chaʼan miʼ yubibeñob i tʼan. 2 Jiñi fariseojob yicʼot jiñi xtsʼijbayajob woliʼ wulwul alob: «Ili wiñic wen miʼ qʼuel jiñi xmulilob i miʼ chaʼlen uchʼel yicʼotob». 3 Cheʼ jiñi, Jesús tiʼ subeyob ili lajiya: 4 «¿Majqui ti laʼ tojlel, mi an i chaʼan 100 tiñʌmeʼ i miʼ sʌt juncojt, maʼañic miʼ cʌy jiñi 99 yaʼ ti jamil i miʼ majlel i sʌclan jiñi tsaʼ bʌ i sʌtʌ jinto miʼ taj? 5 Cheʼ bʌ miʼ taj, wen tijicña miʼ qʼuech tiʼ quejlab. 6 I cheʼ bʌ miʼ cʼotel tiʼ yotot, miʼ pʌy jiñi i yamigojob yicʼot jiñi lʌcʼʌl bʌ chumulob i miʼ subeñob: ‹¡Ubinla laʼ tijicñʌyel laʼ wicʼoton come tsaʼ c taja jiñi c tiñʌmeʼ, jiñi tsaʼ bʌ i sʌtʌ i bʌ!›. 7 Mic subeñetla chaʼan cheʼʌch jaʼel yaʼ ti panchan, ñumen an tijicñʌyel chaʼan juntiquil xmulil muʼ bʌ i chaʼ ñaʼtan i bʌ* cheʼ bajcheʼ tiʼ tojlel jiñi 99 tojoʼ bʌ mach bʌ cʼʌñʌlic miʼ chaʼ ñaʼtañob i bʌ».

8 «¿O majqui bʌ xʼixic, mi an i chaʼan 10 taqʼuin melbil bʌ ti plata* i miʼ sʌt jumpʼejl, maʼañic ba miʼ tsʼʌb jumpʼejl candil, miʼ misun i yotot i tsajal jach* miʼ sʌclan jinto miʼ taj? 9 I cheʼ bʌ miʼ taj, miʼ pʌy jiñi i yamigajob yicʼot jiñi lʌcʼʌl bʌ chumulob i miʼ subeñob: ‹¡Ubinla laʼ tijicñʌyel laʼ wicʼoton come tsaʼ c taja jiñi taqʼuin melbil bʌ ti plata tsaʼ bʌ c sʌtʌ!›. 10 Mic subeñetla chaʼan cheʼʌch jaʼel tiʼ tojlel jiñi i yángelob Dios, tijicña miʼ yubiñob cheʼ bʌ juntiquil xmulil miʼ chaʼ ñaʼtan i bʌ».

11 Cheʼ jiñi tsiʼ yʌlʌ: «Juntiquil wiñic an chaʼtiquil i yalobil. 12 I jiñi ijtsʼiñʌl bʌ tiʼ sube i tat: ‹C tat, aqʼueñon jiñi a chubʌʼan yom bʌ mic taj›. Jin chaʼan tiʼ chaʼticlelob tsiʼ tʼoxbeyob i chubʌʼan. 13 Cheʼ ñumeñix chaʼpʼejl uxpʼejl qʼuin, jiñi ijtsʼiñʌl bʌ tsiʼ luʼ tempa chuqui an i chaʼan i tsaʼ majli ti ñajt bʌ tejclum, baqui tsiʼ jisa i chubʌʼan tiʼ caj ñumeñix ti pʼis chuqui tsiʼ mele. 14 Cheʼ bʌ tsaʼix i luʼ jisa, tsaʼ caji tsʌts bʌ wiʼñal ti jiñi tejclum, i tsaʼ caji i ñusan wiʼñal. 15 Tsaʼ majli i tsaʼ sujti ti xʼeʼtel i chaʼan juntiquil chʼoyol bʌ yaʼ ti tejclum, i tsiʼ choco majlel tiʼ lum chaʼan miʼ cʌntʌben i chitam. 16 I wen yom i ñusan i wiʼñal ti jiñi woli bʌ i cʼux jiñi chitam tac, pero maʼañic majqui miʼ yʌqʼuen chuqui miʼ cʼux».

17 «Cheʼ bʌ tsiʼ chaʼ ñaʼta pañimil, tsiʼ yʌlʌ: ‹¡Jiñi xʼeʼtelob i chaʼan c tat wen añob i bʌl i ñʌcʼ, i joñon woli c chʌmel ti wiʼñal wʌʼi! 18 Mi caj c sujtel i mi caj c majlel tiʼ yotot c tat. Mi caj c suben: «C tat, tsaʼ c chaʼle mulil tiʼ tojlel jiñi panchan yicʼot ti a tojlel. 19 Mach yomix mic chʌn subentel ti a walobil. Meleyon bajcheʼ juntiquil xʼeʼtel a chaʼan»›. 20 Jin chaʼan tsaʼ sujti i tsaʼ majli tiʼ yotot i tat. Cheʼ bʌ ñajtto an, jiñi i tat tsiʼ taja i qʼuel i tsaʼ wen ñijcʌyi i pusicʼal. Ti ajñel tsaʼ majli i taj, tsiʼ meqʼue i tiʼ tsʼujtsʼu. 21 Cheʼ jiñi, jiñi i yalobil tiʼ sube: ‹C tat, tsaʼ c chaʼle mulil tiʼ tojlel jiñi panchan yicʼot ti a tojlel. Mach yomix mic chʌn subentel ti a walobil›. 22 Pero jiñi i tat tiʼ sube jiñi xyaj eʼtelob i chaʼan: ‹¡Orajetla! Locʼsanla jumpʼejl pʌl bʌ bujcʌl, jiñi ñumen wem bʌ, i lʌpbenla. Otsʌbenla jumpʼejl anillo tiʼ cʼʌb yicʼot lʌpbenla i warach. 23 Cheʼ jaʼel, pʌyʌla tilel jiñi jujpʼem bʌ alʌ tat wacax i tsʌnsanla chaʼan mi laj cʼux i laʼ lac mel jumpʼejl qʼuiñijel 24 come ili calobil chʌmeñix ti ñaxan i tsaʼ chaʼ cuxtʌyi, lon sajtem i tsaʼix chaʼ tajle›. I tsaʼ caji i ñusañob i bʌ».

25 «Jiñi ascuñʌl bʌ i yalobil an tiʼ lum. Cheʼ bʌ wolix i sujtel yicʼot woliʼ lʌcʼtiyel tiʼ yotot, tsiʼ yubi jiñi música yicʼot jiñi son. 26 Jin chaʼan, tsiʼ pʌyʌ juntiquil xʼeʼtel i chaʼan i tsiʼ cʼajtibe chuqui woliʼ yujtel. 27 Tsiʼ jacʼbe: ‹Jiñi a wijtsʼin tsaʼix chaʼ juli, i jiñi a tat tiʼ tsʌnsa jiñi jujpʼem bʌ alʌ tat wacax come cʼocʼ tsiʼ taja jiñi i yalobil›. 28 Pero jiñi ascuñʌl bʌ tsaʼ michʼa i maʼañic tsiʼ chʼujbi ochel. Cheʼ jiñi tsaʼ loqʼui i tat i tsaʼ caji i suben ti wocol tʼan chaʼan miʼ yochel. 29 Tsiʼ jacʼbe jiñi i tat: ‹Qʼuele, pejtelel ili jabil chaʼlebil c chaʼan eʼtel bajcheʼ juntiquil xyaj eʼtel i mi junyajlic ñusʌbil c chaʼan jiñi a tʼan, pero maʼañic baʼ ora tsaʼ wʌqʼueyon juncojt alʌ chivo chaʼan mic ñusan c bʌ quicʼot camigojob. 30 Pero jin jach tsaʼ juli jiñi a walobil tsaʼ bʌ i toʼol jisa a chubʌʼan yicʼot jiñi xʼixicob muʼ bʌ i choñob i bʌ tsaʼ tsʌnsʌbe jiñi jujpʼem bʌ alʌ tat wacax›. 31 Cheʼ jiñi, jiñi i tat tiʼ sube: ‹Calobil, jatet tiʼ pejtelel ora wʌʼañet a wicʼoton, i pejtelel am bʌ c chaʼan a chaʼañʌch. 32 Pero laʼ lac mel jumpʼejl qʼuiñijel i laʼ lac tijicñesan lac bʌ come jiñi a wijtsʼin chʌmeñix ti ñaxan i tsaʼ chaʼ cuxtʌyi. Lon sajtem i tsaʼix chaʼ tajle›».