2 Timoteo

3 Pero yom a wujil chaʼan ti jiñi cojix tac bʌ qʼuin wen wocol miʼ cajel yicʼot bʌbʌqʼuen. 2 Come jiñi lac piʼʌlob mi caj i bajñel cʼuxbiñob i bʌ, mi caj i cʼuxbiñob taqʼuin, mi caj i qʼuelob i bʌ ti ñuc, chanchan jax mi caj i melob i bʌ, mi caj i chaʼleñob tʼan tiʼ contra Dios yicʼot tiʼ contra lac piʼʌlob, mi caj i ñusʌbeñob i tʼan i tat i ñaʼ, maʼañic mi caj i yʌcʼob wocolix i yʌlʌ, maʼañic mi caj i pʌsob i xucʼtʌlel, 3 maʼañic mi caj i cʼuxbiñob añoʼ bʌ tiʼ familia, maʼañic mi caj i mulañob i sʌclan ñʌchʼtʌlel, mi caj i sujtelob ti xjopʼtʼan, maʼañic mi caj i ticʼob i bʌ, wen jontolob, maʼañic mi caj i cʼuxbiñob chuqui wen, 4 mi caj i melob mach bʌ weñic tiʼ tojlel i yamigojob, miʼ waʼ melob chuqui yomob, ñumen ñuc mi caj i yubiñob i bʌ, mi caj i cʼuxbiñob chuqui bajñel yomob i mach jiñic Dios, 5 tiʼ tojlel yambʌlob mi caj i poj pʌsob chaʼan miʼ chʼujutesañob Dios, pero mach cheʼic chumulob bajcheʼ jiñi i chʼujutesayajob. Tʌtsʼʌ a bʌ* tiʼ tojlel jiñi cheʼoʼ bʌ bajcheʼ iliyi. 6 Ti ili junmojt miʼ loqʼuelob wiñicob yicʼotoʼ bʌ i jontolil miʼ yochelob ti ototʌl tac, miʼ lotiñob jiñi xʼixicob cʼuñoʼ bʌ cabʌloʼ bʌ i mul yicʼot muʼ bʌ i melob chuqui yomob i pusicʼal, 7 tiʼ pejtelel ora woliʼ cʌñob pero maʼañic baʼ ora miʼ mejlel i cʌñob ti tsʼʌcʌl jiñi i sujmlel.

8 Cheʼ bajcheʼ Janes yicʼot Jambres tsiʼ contrajiyob Moisés, ili wiñicob woliʼ bej contrajiñob jaʼel jiñi i sujmlel. Mach junyajl weñobix jiñi i ñaʼtʌbal i mach utsʼatic miʼ qʼuejlelob ti Dios come miʼ contrajiñob jiñi ñopoñel. 9 Pero maʼañic chuqui mi caj i wen melob come pejtelel lac piʼʌlob mi caj i cʌñob chaʼan tontojob, cheʼ bajcheʼ tsaʼ ujti tiʼ tojlel jiñi chaʼtiquil wiñicob. 10 Pero jatet tsaʼ wen tsajca jiñi j cʌntesa, bajcheʼ chumulon, jiñi com bʌ c taj tij cuxtʌlel, jiñi c ñopoñel, jiñi c pijt, jiñi j cʼuxbiya yicʼot bajcheʼ mij cuch wocol, 11 yicʼot a wujil jiñi ticʼlʌntel yicʼot jiñi wocol tac tsaʼ bʌ c ñusa, bajcheʼ jiñi tsaʼ bʌ c ñusa ti Antioquía, ti Iconio yicʼot ti Listra. Tsaʼ j cuchu pejtelel jiñi ticʼlʌntel, i jiñi lac Yum tsiʼ coltayon tiʼ pejtelel jiñi. 12 Tiʼ sujm, jiñi yomoʼ bʌ i chʼujutesañob Dios tiʼ cuxtʌlel bajcheʼ xcʌntʼañob i chaʼan Cristo Jesús mi caj i ticʼlʌntelob jaʼel. 13 Pero jiñi jontoloʼ bʌ yicʼot jiñi xlotob mi caj i ñumen asiyelob majlel, mi caj i chaʼleñob lot yicʼot mi caj i lotintelob.

14 Pero jatet, mach a cʌy a ñop jiñi tsaʼ bʌ a cʌñʌ yicʼot tsaʼ bʌ aqʼuentiyet a ñop chaʼan i sujmʌch, come a wujil majqui tiʼ tojlel tsaʼ cʌñʌ 15 i cʼʌlʌl cheʼ bʌ tsaʼ wila pañimil* tsaʼ cʌñʌ jiñi chʼujul bʌ tsʼijbujel, muʼ bʌ i mejlel i yʌqʼueñet jiñi a ñaʼtʌbal i cʼʌjñibal bʌ chaʼan jiñi coltʌntel muʼ bʌ i tajtʌl chaʼan lac ñopoñel ti Cristo Jesús. 16 Pejtelel jiñi Tsʼijbujel tilem ti Dios. I cʼʌjñibal chaʼan miʼ cʌntesʌntel lac piʼʌlob, chaʼan miʼ pʌsbentelob chuqui jiñi mach bʌ weñic tiʼ wut Dios, chaʼan miʼ tojʼesʌntel pejtelel chuqui miʼ yujtel yicʼot chaʼan miʼ tojʼesʌntel i ñaʼtʌbal lac piʼʌlob cheʼ bajcheʼ an chuqui wem bʌ tiʼ wut Dios, 17 chaʼan jiñi i wiñic Dios wen chajpʌbil i miʼ mejlel i mel ti tsʼʌcʌl pejtelel chuqui wem bʌ.